Kachbꞌanile yinh ebꞌnaj yahaw konhobꞌ Israel kaw txꞌojkano
11
Kinyinikanhan Espíritu, kinyinitojan bꞌey ispultahil Yatut Komam Jahawil, huneꞌ pulta ayko yinh yetkꞌulal bꞌay chiꞌahilo tzꞌayik, wilnihan 25 (howebꞌ iskawinaj) ebꞌnaj winaj yul pulta tuꞌ. Haꞌ xol ebꞌnaj tuꞌ wilan naj Jaazanías, iskꞌahol naj Azur yebꞌ naj Pelatías, iskꞌahol naj Benaía, haꞌ ebꞌnaj tiꞌ, kaw aykano yelapno ebꞌnaj xol konhobꞌ. 2 Yalni Komam wetan: «Hach iskꞌahol naj winaj, haꞌ hunteqꞌan ebꞌnaj tiꞌ, chꞌekꞌ istxꞌojal yinh isnabꞌal, chilaiswatxꞌeni, chiskuyni ebꞌnaj anma ay yul konhobꞌ yinh istxꞌojal. 3 Chiyalni ebꞌnaj: “Maxhto chihul istzꞌayikal bꞌay chonhtanhtzelaxiloj, yuxin Kowatxꞌeꞌwekanh jatut. Haꞌ konhobꞌ tiꞌ, lahan hakaꞌ hunu xi, haxa hanhonh tiꞌ, lahanonh hakaꞌ noꞌ chibꞌe,” xhi ebꞌnaj. 4 Yuxin hach iskꞌahol naj winaj, tzotelanh yibꞌanhilo isyaꞌtajil chiꞌay yibꞌanh ebꞌnaj,» xhi Komam wetan.5 Yul Yespíritu Komam Jahawil wibꞌanhan, yalni wetan: «Hala: Hak tiꞌ yalni Komam Jahawil: “Xawabꞌehan tzet cheyala hex ah Israel, yebꞌ xin wohtajan tzet chꞌekꞌ yinh henabꞌal. 6 Kaw xaꞌahkanokanh isbꞌisil anma xahepotxꞌkamo yul huneꞌ konhobꞌ tiꞌ, nohna iscallehal konhobꞌ yu isnimanil kamom anma.
7 »”Yuxin hanin Dios, Yahawilintiꞌan, haninan chiwalan: Haꞌ anma xahepotxꞌkamo yul konhobꞌ Jerusalén tiꞌ, lahan hakaꞌ noꞌ chibꞌe, haxa Jerusalén tiꞌ, lahan hakaꞌ txꞌotxꞌ xi; wal hex tiꞌ xin chexwilojan yul konhobꞌ tiꞌ. 8 Hanin Dios, Yahawilintiꞌan chiwalan: Hex tiꞌ kaw chexxiw tet chꞌen espada, yuxin chiwatijan espada teyinh. 9 Chexwilojan yul konhobꞌ Jerusalén tiꞌ, chexwanikojan yul isqꞌabꞌ ebꞌnaj nan konhobꞌal, chiwanayojan isyaꞌtajil texol. 10 Chexpotxꞌlaxkamo yu espada, chiwilnihan tzet chexeliko bꞌey ismohonal txꞌotxꞌ Israel, cheyohtanheniloj ta hanintiꞌan Yahawil hinan. 11 Haꞌ Jerusalén tiꞌ, mach lahano hakaꞌ hunu xi teyinh, yebꞌ xin mach lahanoj hex hakaꞌ noꞌ chibꞌe. Haꞌ bꞌey ismohonal txꞌotxꞌ Israel, chiwilan yinh tzet chexelikoj. 12 Cheyohtanheloj ta hanintiꞌan Yahawil hinan, yuto hex tiꞌ mach hebꞌeybꞌalnhe chejbꞌanile waqꞌan teyet, mach heyijepaxo inleyan, wal xin haꞌ isbꞌeybꞌal nimeta konhobꞌ ayko yinhla hehoyanil, haꞌ hewatxꞌe,” kachi,» xhi Yespíritu Komam.
13 Hayet lanhan walnihan istzotiꞌ Komam Jahawil tuꞌ, yaykꞌay naj Pelatías, iskꞌahol naj Benaía, iskamilo naj. Hayet wilnihan huneꞌ tuꞌ, way jahnojan, way xulnojan sat txꞌotxꞌ, wahwihan yinh kaw ip: «¡Ay, Mam Wahawil! ¿Tom chatanhtzekanilo yinh hunelnhe haywanhxa anma Israel kantokano tiꞌ?» kinchihan.a
Haltelaxi ta chꞌakꞌbꞌilo Israel hunelxa
14 Yul istzotiꞌ Komam Jahawil wetan, yalni hakaꞌ tiꞌ: 15 «Hach iskꞌahol naj winaj, haꞌ yinh ebꞌnaj hawuxhtaj, yebꞌ yinh makta ayto hawu habꞌa yebꞌi, yebꞌ yinh sunil Israel, chitzotel anma kankano bꞌey Jerusalén, chalni: “Wal ebꞌnaj tuꞌ nahat yehilo ebꞌnaj yinh Komam Jahawil, yuxin haꞌ txꞌo txꞌotxꞌ tiꞌ maꞌaqꞌlaxkano txꞌotxꞌ komajuloj,” xhi ebꞌnaj.
16 »Yuxin hal tet anma ay bꞌey Jerusalén tuꞌ: Hak tiꞌ yalni Komam Jahawil: “Waxanhka nahatta inqꞌojtojan anma Israel yulaj nimeta konhobꞌ, waqꞌni sajlemotojan sat ej sunil txꞌo txꞌotxꞌ tiꞌ, yajaꞌ xin hakaꞌto nichꞌan yatut ebꞌnaj wehikojan xol,” kachi,» xhi Komam.
17 Chawalnipaxo tet ebꞌnaj ayto preso hakaꞌ tiꞌ: «Hak tiꞌ yalni Komam Jahawil: “Haninan chexwilojan xolaj konhobꞌlaj, chexwinitijan bꞌay pujanexto sat txꞌo txꞌotxꞌ tiꞌ, chexinkutxbꞌanikojan, chiwaqꞌnihan txꞌotxꞌ Israel tiꞌ hunelxa teyet. 18 Chexmeltzoti bꞌey tuꞌ, kat heyinilo sunil hunteqꞌan tioxh kaw yahbꞌeta sat txꞌotxꞌ Israel tuꞌ. 19 Chiwaqꞌni akꞌbꞌolojan heyanma yebꞌ henabꞌal, chinhelniltijan heyanma kaw kaw hakaꞌ chꞌen chꞌen, kat waniktojan selel kaw labꞌan hakaꞌ chibꞌe. 20 Yu hebꞌeybꞌalnhen chejbꞌanile chiwalan, chekꞌubꞌan kuybꞌanile aqꞌbꞌil wuhan, kat heyok inkonhobꞌojan, kat wokan heDiosaloj. 21 Yajaꞌ wal hunteqꞌan anma ayko yanma yinh yochento tioxh, kaw yahbꞌeta yul insatan, hanin Yahawilintiꞌan, chiwalan ta chiwayojan isyaꞌtajil yibꞌanh yu tzetaj isbꞌeybꞌalnhe tuꞌ,” kachi,» xhi Komam.
22 Lahwi tuꞌ, wilnihan yinikanh ebꞌnaj querubín isxikꞌ, yah ebꞌnaj, yahpaxo hunteqꞌan rueda iskꞌatanh ebꞌnaj, wal isqꞌaqꞌal ismay Komam Dios, isDiosal Israel aykanh yibꞌanh ebꞌnaj querubín tuꞌ. 23 Yah isqꞌaqꞌal yip Komam Jahawil, yilo xol konhobꞌ Jerusalén, yapni linhno yibꞌanh iswiꞌ witz ayko yinh yetkꞌulal bꞌay chiꞌahilo tzꞌayik yinh konhobꞌ tuꞌ. 24 Lahwi tuꞌ, kinyinikanhan Espíritu, isyeni Yespíritu Komam Dios hunteqꞌanxa saj wayik wilaꞌan, kinyaqꞌni meltzohojan sat istxꞌotxꞌ ebꞌnaj caldeo bꞌay ayko anma Israel preso. Lahwi tuꞌ yel huneꞌ saj wayik tuꞌ yinh insatan, matxa isye isbꞌa. 25 Wokan walnojan sunil tzet isye Komam Jahawil wetan tet anma Israel ayko preso tuꞌ.