3 »Yuxin wal tinanh, hach iskꞌahol naj winaj, watxꞌeyo haqꞌuybꞌe, kat hawel hawatut yinh sat anma Israel tiꞌ, kat hato hunuxa nan bꞌayah, hakaꞌto chachto preso, kꞌuxantaxka istxumchalo yu hunteqꞌan anma tiꞌ; yuto haꞌ hunteqꞌan anma tiꞌ kaw manhkꞌomkano yinh hunelnhe. 4 Chawito haqꞌuybꞌe yet tzꞌayikal yinh sat anma, hakaꞌ isqꞌuybꞌe anma chiꞌilaxto preso, kat hawel yinh qꞌejbꞌiyal yinh sat anma hakaꞌ mak chiꞌilaxto preso. 5 Chaholni iskꞌul chꞌen kꞌubꞌ yinh sat anma, kat haweltoj. 6 Chawilto haqꞌuybꞌe tuꞌ yet aqꞌbꞌalil yibꞌanh hawixikꞌ yinh sat anma, chawaniko yenhel hasat yu mach chawil konhobꞌ yet chaxheli, yuto hach chaxhwakojan yechelo tet anma Israel,» xhi Komam wetan.

7 Inyijenan hakaꞌ yu yalni Komam wetan, winiltijan inqꞌuybꞌehan yet tzꞌayikal hakaꞌ isqꞌuybꞌe anma chiꞌilaxto preso, haxa yet qꞌejbꞌiyalil, inholan iskꞌul chꞌen kꞌubꞌ, weltojan yet aqꞌbꞌalil yebꞌ inqꞌuybꞌehan yibꞌanh inwixikꞌanh yinh sat anma. 8 Haxa yet sakꞌayalil yet hunxa tzꞌayik, yul istzotiꞌ Komam Jahawil wetan, yalni hakaꞌ tiꞌ: 9 «Hach iskꞌahol naj winaj, ¿mam isqꞌambꞌe anma Israel, anma kaw manhkꞌomkanoj yinh tzet maxawu? 10 Ta chisqꞌambꞌe, hak tiꞌ chawute hawalni tet: Hak tiꞌ yalni Komam Jahawil: “Haꞌ huneꞌ tiꞌ chitzotel yinh tzet chiꞌutelax naj rey ah Jerusalén yebꞌ tzet chiꞌutelax sunil anma Israel ay yul konhobꞌ Jerusalén,” kachi. 11 “Hanintiꞌan yechel wehan yinh huneꞌ tiꞌ, hakaꞌ mayu welan yul konhobꞌ tiꞌ, hak tuꞌ chexutelaxoj, chexilaxto preso nan konhobꞌal,” kachi,» xhi Komam. 12 «Haꞌ naj isreyal Jerusalén tiꞌ, chiswixikꞌnheto naj isqꞌuybꞌe yet aqꞌbꞌalil, kat ishol-lax iskꞌul chꞌen kꞌubꞌ bꞌay chiꞌilaxilto naj, kat isto naj. Chaniko naj yenhel sat, yunhe mach chil naj konhobꞌ yet chito naj. 13 Yajaꞌ haninan chiwayojan latzꞌabꞌ yinh sat naj, kat yaykꞌay naj yul latzꞌabꞌ, chiwanitojan naj bꞌey Babilonia sat istxꞌotxꞌ ebꞌnaj caldeo, yajaꞌ mach chil naj yinh txꞌotxꞌ Babilonia tuꞌ, haꞌ bꞌey tuꞌ xin chikam naj. 14 Chiwaqꞌ sajlemotojan sunil bꞌayejtuꞌwal sunil ebꞌnaj soldado chikolwa yinh naj, yebꞌ sunil issoldado naj yet howal, kat istzumbꞌelaxikꞌo ebꞌnaj yu espada. 15 Chiyohtanhelo ebꞌnaj ta hanintiꞌan Yahawil hinan yet chisajlemito ebꞌnaj wuhan yulaj sunil nimeta konhobꞌ, yebꞌ yet chipujnakanh ebꞌnaj sat txꞌo txꞌotxꞌ tiꞌ. 16 Yajaꞌ xin ay haywanh ebꞌnaj chꞌelkanh chikolchalo tet chꞌen espada, tet wahil, yebꞌ tet howla yabꞌil, yu yalnilo ebꞌnaj isyahbꞌetajil iswatxꞌe yet konhobꞌ tet anma ay yul konhobꞌ bꞌay chiꞌapni, chiyohtanhenilo ebꞌnaj ta hanintiꞌan Yahawil hinan,» xhi Komam.

17 Yulpaxo istzotiꞌ Komam Jahawil wetan, yalni hakaꞌ tiꞌ: 18 «Hach iskꞌahol naj winaj, hayet chachwaꞌi, kach luylunkanh yu xiwkilal, chawiqꞌni bꞌiskꞌulal yu isyaꞌtajil yet chawukꞌni hawaꞌ. 19 Chawalni tet anma ay sat txꞌotxꞌ Israel: “Hak tiꞌ yalni Komam Jahawil yinh anma ah Jerusalén yebꞌ yinh anma ay sat txꞌotxꞌ Israel: Chiswah anma ispan yinh xiwkilal, chiyukꞌni yaꞌ yinh bꞌiskꞌulal, yuto chiꞌelqꞌalaxto sunil tzet ay sat txꞌotxꞌ Israel tiꞌ yu ismul sunil anma ay sat txꞌotxꞌ. 20 Haꞌ ej konhobꞌ bꞌay kaw ay anma, hakaꞌ txꞌotxꞌ desierto chukanoj, haxa txꞌotxꞌ Israel tiꞌ, kaw tzꞌinan chiꞌelkaniko txꞌotxꞌ; hak tiꞌ chu heyohtanheniloj ta hanintiꞌan Yahawil hinan,” kachi,» xhi Komam.

21 Yulpaxo istzotiꞌ Komam Jahawil wetan, yalni hakaꞌ tiꞌ: 22 «Hach iskꞌahol naj winaj, ¿tzet chal yelapno hunteqꞌan tzotiꞌ yal ebꞌnaj Israel hakaꞌ tiꞌ: “Bꞌelbꞌon yelto tzꞌayik, mach xin chiyij isbꞌa tzet chiyal ebꞌyaꞌ ischejabꞌ Komam Dios yinh tzetaj chiyil ebꞌyaꞌ yinh sajsatil?” xhi ebꞌnaj. 23 Yuxin hal tet ebꞌnaj: “Hak tiꞌ yalni Komam Jahawil: Haninan chinlinhbꞌahan yal-lax hunteqꞌan tzotiꞌ tuꞌ, matxa chihal-lax xol anma Israel. Wal tinanh maꞌapni istzꞌayikal bꞌay chiyij isbꞌa sunil tzet chinyehan yinh sajsatil. 24 Yuto matxa ebꞌnaj leqꞌtiꞌwom chihalni ta ay tzet yil yinh sajsatil, yebꞌ xin matxa ebꞌnaj ahbꞌelom kaw loloꞌ istzotel xol anma Israel. 25 Yuto hanin Yahawilintiꞌan, haninan chintzotelan, haꞌ xin tzet chiwalan tuꞌ chiyij isbꞌa, mach chinahatli, ayxayo istzꞌayikal bꞌay chij isbꞌa. Wal xin haꞌ yinh hetzꞌayikal tiꞌ, hex Israel kaw manhkꞌom hex tiꞌ, chintzotelan, chiyijni isbꞌa tzet chiwalan, haꞌ huneꞌ tiꞌ, hanin Yahawilintiꞌan chiwalan,”» xhi Komam.

26 Lahwi tuꞌ, yul istzotiꞌ Komam Jahawil wetan, yalni: 27 «Hach iskꞌahol naj winaj, haꞌ anma Israel tiꞌ chalnipaxo hunteqꞌan tzotiꞌ tiꞌ: “Haꞌ tzet chil huneꞌ naj tiꞌ yinh sajsatil maxhto chiyij isbꞌa, ¿bꞌaqꞌinhtam chiyij isbꞌa tzet chal naj?” xhi ebꞌnaj,» xhi Komam.

28 Yuxin hal tet ebꞌnaj hakaꞌ tiꞌ: «Hak tiꞌ yalni Komam Jahawil: “Haꞌ tzotiꞌ chiwalan, matxa chiꞌekꞌto niman tiempo yijni isbꞌa, wal xin haꞌ tzotiꞌ chiwalan masan chiyij isbꞌa. Haꞌ hunteqꞌan tzotiꞌ tiꞌ, hankaw inYahawil intiꞌan chiwalan,” kachi,» xhi Komam.^a