Isyaꞌtajil chiꞌay yibꞌanh ebꞌnaj chisbꞌaliko isbꞌa ischejabꞌo Komam Dios
13
Yul istzotiꞌ Komam Jahawil wetan, yalni hakaꞌ tiꞌ: 2 «Hach iskꞌahol naj winaj, hal intzotiꞌan tet ebꞌnaj Israel chisbꞌaliko isbꞌa inchejabꞌojan, ebꞌnaj haꞌ tzet chal yanma haꞌ chalikꞌoj. Chawalni tet ebꞌnaj: “Abꞌewe istzotiꞌ Komam Jahawil, 3 yuto hak tiꞌ yalni Komam Jahawil hakaꞌ tiꞌ: ¡Ay, kaw kꞌanchꞌan ebꞌnaj chisbꞌaliko isbꞌa inchejabꞌojan, hunteqꞌan ebꞌnaj machi isnabꞌal, ebꞌnaj tzujan yinta tzet chal yanma, yebꞌ xin matzet chil yinh sajsatil! 4 Hex ah Israel, haꞌ ebꞌnaj hechejabꞌ leqꞌtiꞌ tuꞌ, lahan ebꞌnaj hakaꞌ noꞌ wech chꞌekꞌ bꞌey txꞌotxꞌ desierto. 5 Haꞌ ebꞌnaj tuꞌ mach lanhano iswatxꞌenkanh ebꞌnaj chꞌen kꞌubꞌ yinhla ishoyanil Israel, yu ay yip iskolni isbꞌa tet howal, yinh istzꞌayikal bꞌay chiwayojan inhowalan yibꞌanh. 6 Haꞌ tzet chiꞌaqꞌlax yilaꞌ ebꞌnaj, mach yeloj, haꞌ tzotiꞌ chal ebꞌnaj yet chiꞌahbꞌeli, leqꞌtiꞌal. Chalni ebꞌnaj: ‘Haꞌ Komam Jahawil chalni hunteqꞌan tzotiꞌ tiꞌ,’ xhi ebꞌnaj. Yajaꞌ xin maxhtaj hinan chinchejan ebꞌnaj yalaꞌ, kaw xin chikawxi iskꞌul anma ta chiyij isbꞌa tzet chal ebꞌnaj tuꞌ. 7 Yuxin hanintiꞌan chiwalan tet ebꞌnaj chejabꞌ leqꞌtiꞌ tuꞌ: Haꞌ tzet cheyil heyalni, mach yeloj, haxa tzotiꞌ cheyal yet chextxumli, leqꞌtiꞌal. Cheyalni: ‘Haꞌ hunteqꞌan tzotiꞌ tiꞌ, haꞌ Komam Jahawil chihalni jetanh,’ kexchi, yajaꞌ xin matzet chiwalan teyet,” xhi.8 »Yuxin hanin Yahawilintiꞌan chiwalan: “Chiwayojan inhowalan teyibꞌanh, yuto haꞌ tzotiꞌ cheyala mach yeloj, yebꞌ xin leqꞌtiꞌal tzet cheyila. 9 Chiwikanh inqꞌabꞌan, chiwanayojan isyaꞌtajil yibꞌanh ebꞌnaj chisbꞌaliko isbꞌa inchejabꞌojan, chalni ta ay tzet chila, yajaꞌ mach yeloj, yebꞌ xin leqꞌtiꞌal tzotiꞌ chala yet chitxumli. Haꞌ ebꞌnaj tuꞌ, mach chiꞌok ebꞌnaj xol inkonhobꞌan yet chiskutxbꞌan isbꞌa, yebꞌ xin mach chitzꞌibꞌnhelax isbꞌi ebꞌnaj yul hum bꞌay chimeltzopaxo ebꞌnaj sat txꞌotxꞌ Israel, hak tuꞌ chu yohtanhenilo ebꞌnaj ta hanintiꞌan Yahawil hinan. 10 Haꞌ kaw yeli haꞌ ebꞌnaj tuꞌ, yaqꞌ subꞌchaho ebꞌnaj inkonhobꞌan, yalni ebꞌnaj ta ay aqꞌankꞌulal, yajaꞌ machi aqꞌankꞌulal. Lahan hakaꞌ yet chiwatxꞌelaxkanh hunu bꞌitzꞌabꞌ, haxa ebꞌnaj xin chiꞌaniko tzꞌotzꞌew isrepellohaloj. 11 Yajaꞌ hal tet ebꞌnaj chiꞌaniko tzꞌotzꞌew repellohal tuꞌ ta chiꞌay tixhna tzꞌotzꞌew tuꞌ, yuto chiwatijan huneꞌ niman yaxnhabꞌ, chiwanipaxtijan nimeta sajbꞌat yebꞌ howla jaqꞌeqꞌ, kat yaykꞌay huneꞌ bꞌitzꞌabꞌ tuꞌ. 12 Hayet xaꞌaykꞌay huneꞌ bꞌitzꞌabꞌ tuꞌ, kat isqꞌambꞌelax tet ebꞌnaj, ¿tzet iswatxꞌe tzꞌotzꞌew heyako repellohal yinh huneꞌ bꞌitzꞌabꞌ tiꞌ?” xhi. 13 Yuxin hanin Yahawilintiꞌan chiwalan, chiwatijan huneꞌ niman howla jaqꞌeqꞌ yu inhowalan, kat ishatkanh huneꞌ bꞌitzꞌabꞌ tuꞌ, chiwanipaxtijan huneꞌ niman jaqꞌeqꞌ yaxnhabꞌ yebꞌ nimeta sajbꞌat, hakaꞌ chꞌen chꞌen yu inhowalan, kat yuchkꞌakanto huneꞌ bꞌitzꞌabꞌ tuꞌ. 14 Hak tuꞌ chu wuchkꞌantojan huneꞌ bꞌitzꞌabꞌ heyako tzꞌotzꞌew isrepellohalo tuꞌ, kat yaykano wuyna sat txꞌotxꞌ, kat yixtanhwipaxahti xeꞌ. Chiꞌay wuyna huneꞌ bꞌitzꞌabꞌ tuꞌ teyibꞌanh, kat hetanhkanilo yalanh, hak tuꞌ chu heyohtanheniloj ta hanintiꞌan Yahawil hinan. 15 Hak tuꞌ chu yijni isbꞌa wanayojan inhowalan yibꞌanh huneꞌ bꞌitzꞌabꞌ tuꞌ yebꞌ yibꞌanh ebꞌnaj aniko tzꞌotzꞌew isrepellohaloj. Hanin Yahawilintiꞌan chiwalan: “Matxatikꞌa yekꞌlenal huneꞌ bꞌitzꞌabꞌ tuꞌ chikani, kat istanhpaxkanilo ebꞌnaj aniko tzꞌotzꞌew isrepellohaloj. 16 Haꞌ ebꞌnaj tuꞌ, haꞌ ton ebꞌnaj Israel chisbꞌaliko isbꞌa inchejabꞌojan, chalni tet anma ta ay tzet chil yinh sajsatil; chalni tet anma Jerusalén ta ay aqꞌankꞌulal, yajaꞌ xin machi aqꞌankꞌulal. Haꞌ hunteqꞌan tiꞌ hanin Yahawilintiꞌan, chiwalan,” xhi Komam.
17 »Hach iskꞌahol naj winaj, wal tinanh, tzotelanh tet ebꞌix ix hawet konhobꞌ chisbꞌaliko isbꞌa inchejabꞌojan, ebꞌix chitzotel tet anma hakaꞌ chal yanma; chawalni isyaꞌtajil chiꞌay yibꞌanh ebꞌix. 18 Chawalni: “Hak tiꞌ yalni Komam Jahawil: ¡Ay, kaw kꞌanchꞌan hex ix hex tiꞌ, yuto chewatxꞌe qꞌap qꞌap yet eslom tet anma, kat iskꞌalniko anma yinh isqꞌabꞌ; chewatxꞌenpaxo qꞌap payuꞌe yet eslom chiyahto ichamta anma yebꞌ nixhte unin yinh iswiꞌ, yunhe issubꞌcha heyu! ¿Chetxumu tato yu heleqꞌtiꞌal chꞌok anma wet konhobꞌan yul heqꞌabꞌ, cheyalni tzet chiꞌelikoj, ta chikami, maka ta ay iskawil? 19 Hex tiꞌ cheyilo inpixanan sata inkonhobꞌan yu nixhte yachan cebada yebꞌ yu nixhte qꞌaxep istiꞌ pan. Cheyaqꞌkamo anma mach yeto ay iskami, cheyanikano sat yibꞌanhqꞌinal anma yet ay iskami, cheyaniko leqꞌtiꞌal tet inkonhobꞌan, chiyabꞌen leqꞌtiꞌal cheyala,” xhi Komam.
20 »Yuxin hanin Yahawilintiꞌan, chiwalan: “Hanintiꞌan chiwayo inhowalan teyibꞌanh yu hunteqꞌan qꞌap qꞌap yet eslom chꞌaqꞌni subꞌchaho yanma anma; yajaꞌ xin chinkolilojan anma, chinbꞌejtzonilojan anma tuꞌ yul heqꞌabꞌ hakaꞌ chu isbꞌejtzolaxto hunu noꞌ chꞌik. 21 Chintzilnitojan qꞌap payuꞌe yet eslom chewatxꞌe, chinkolnilojan inkonhobꞌan yul heqꞌabꞌ, matxa xin preso chuko yul heqꞌabꞌ, hak tuꞌ xin chu heyohtanheniloj ta hanintiꞌan Yahawil hinan. 22 Heyako bꞌiskꞌulal yinh makta tohol isbꞌeybꞌal yu heleqꞌtiꞌal, yajaꞌ wal hinan mach waqꞌan bꞌiskꞌulal tet, walpaxo anma txꞌoj isbꞌeybꞌal heyiptze yunhe mach chisbꞌej iswatxꞌen istxꞌojal, hekawxenkaniko yinh istxꞌojal. 23 Yuxin matxa cheyalaꞌ leqꞌtiꞌal, yet cheyalni ta ay tzet chiyelax teyet yinh sajsatil, yebꞌ xin matxa chextxumli; chinkolilojan inkonhobꞌan yul heqꞌabꞌ, kat heyohtanheniloj ta hanintiꞌan Yahawil hinan,” kachi,» xhi Komam wetan.