Isyaꞌtajil chꞌay yibꞌanh ebꞌnaj chiyiyo isbꞌa tet tioxh
14
Hul haywanh ebꞌnaj ichamta winaj Israel inkꞌatanhan, yay tzꞌonhno ebꞌnaj insatajan. 2 Yul istzotiꞌ Komam Jahawil wetan, yalni hakaꞌ tiꞌ: 3 «Hach iskꞌahol naj winaj, haꞌ hunteqꞌan ebꞌnaj tiꞌ, kaw ayko yanma ebꞌnaj yinh istioxh, chiyaniko isnabꞌal ebꞌnaj yinh istxꞌojal chꞌaqꞌni aykꞌayoj. ¿Tom xin chinokan wabꞌehan tzet chal ebꞌnaj yet chaqꞌni ebꞌnaj isqꞌambꞌebꞌal wetan? 4 Yuxin tzotelanh tet ebꞌnaj, kat hawalni: “Hak tiꞌ yalni Komam Jahawil: Makxanhetikꞌa Israel chiyako yanma yinh istioxh, chiyaniko isnabꞌal yinh istxꞌojal chꞌaqꞌni aykꞌayoj, lahwi tuꞌ kat yul iskꞌatanh hunu inchejabꞌan yu isqꞌambꞌen hunu tzet ye tuꞌ, hanin Yahawilintiꞌan chinpajtzehan tet hakaꞌtikꞌa ismul, yuto kaw txꞌiꞌal istioxh. 5 Haninan chintzotelan yul yanma sunil anma Israel yuto xaꞌispohilo isbꞌa winhan yu yok tzujno yinta istioxh,” xhi Komam.6 »Yalnipaxo Komam: Yuxin hal tet anma Israel, “Hak tiꞌ yalni Komam Jahawil: Meltzanhweko yul inqꞌabꞌan, kat hebꞌejnikano hetioxh, chebꞌejni heyaniko henabꞌal yinh sunil isyahbꞌetajil tuꞌ. 7 Ta ay hunu naj Israel maka hunu mak nan konhobꞌal ay yul konhobꞌ Israel chispohilo isbꞌa winhan, chaniko yanma yinh istioxh, chaniko isnabꞌal yinh istxꞌojal chꞌaqꞌni subꞌchahoj, lahwi tuꞌ, kat yul iskꞌatanh hunu inchejabꞌan yu yaqꞌni isqꞌambꞌebꞌal wetan, hankawin Yahawilintiꞌan chiwaqꞌan ispaj tet. 8 Chiwiti inhowalan yinh huneꞌ mak tuꞌ, chiwanayojan isyaꞌtajil yibꞌanh, yu yilni sunil anma, kat yaqꞌni yul iswiꞌ. Chintanhtzelojan xol inkonhobꞌan, hak tuꞌ chu heyohtanheniloj ta hanintiꞌan Yahawil hinan.
9 »”Ta ay hunu mak chisbꞌaliko isbꞌa inchejabꞌojan, kat istzotel yul yet, hanin Yahawilintiꞌan chiwaqꞌ subꞌchahojan huneꞌ mak tuꞌ, chiwinikanh inqꞌabꞌan yinh, chintanhtzenkanilojan xol anma Israel inkonhobꞌan. 10 Haꞌ kawanh mak tuꞌ, chiꞌay isyaꞌtajil yibꞌanh yu istxꞌojal, yuto hakaꞌ istxꞌojal naj chꞌaqꞌni isqꞌambꞌebꞌal, hakpax tuꞌ istxꞌojal naj chejabꞌ chispajtzen yul yet. 11 Yunhe matxa chislahiko anma Israel ishekꞌnilo isbꞌa winhan, yebꞌ yunhe matxa chislahiko yetanto isbꞌa yinh sunil ismanhkꞌomal, kat yokkano inkonhobꞌojan, kat wokpaxkanojan isDiosaloj,”» xhi Komam Jahawil.
Isyaꞌtajil chꞌay yibꞌanh anma ah Jerusalén yu ismul
12 Yul istzotiꞌ Komam Jahawil wetan, yalni hakaꞌ tiꞌ: 13 «Hach iskꞌahol naj winaj, ta ay hunu konhobꞌ chiyako ismul wetan, kat yok manhkꞌomal, chiwikanh inqꞌabꞌan yinh, chiwilojan tzet chislo, chiwayojan wahil yibꞌanh, chiwaqꞌnikamojan anma yebꞌ no noqꞌ. 14 Qꞌinalo ta haꞌ xol hunteqꞌan anma tuꞌ aytokꞌo yaꞌ Noé, yaꞌ Daniel, yebꞌ yaꞌ Job, hanin Yahawilintiꞌan chiwalan ta hanhem ebꞌyaꞌ tuꞌ chikolchahi, yuto iswatxꞌe ebꞌyaꞌ istoholal.a
15 »Ta xin chiwatojan noꞌ howla noqꞌ xol anma ay yul konhobꞌ tuꞌ, chikam sunil anma yu noꞌ, hak tuꞌ xin kaw chitzꞌinhtzꞌonkanoj. Matxa xin hunu mak chiꞌekꞌ bꞌey tuꞌ yu xiwkilal tet noꞌ. 16 Qꞌinalo ta xin aykꞌo ebꞌyaꞌ oxwanh tuꞌ yul konhobꞌ tuꞌ, hanin Yahawilintiꞌan chiwalan ta hanhem ebꞌyaꞌ chikolchahi, walpaxo iskꞌahol ebꞌyaꞌ yebꞌ iskutzꞌin ebꞌyaꞌ, machom chikolchahi, hak tuꞌ xin kaw chitzꞌinhzꞌonkano konhobꞌ tuꞌ. 17 Maka ta xin chiwatojan howal yinh anma ay yul konhobꞌ tuꞌ, chinchejnihan potxꞌlaxokamo yu espada, kat iskamilo anma yebꞌ no noqꞌ. 18 Qꞌinalo ta xin aykꞌo ebꞌyaꞌ oxwanh yul huneꞌ konhobꞌ tuꞌ, hanin Yahawilintiꞌan chiwalan ta hanhem ebꞌyaꞌ chikolchahi, walpaxo iskꞌahol yebꞌ iskutzꞌin, matxam chikolchahi.
19 »Maka ta chiwayojan howla yabꞌil yinh anma ay yul konhobꞌ tuꞌ, chiwanitojan kamikal yibꞌanh yu inhowalan, kat iskam anma yebꞌ no noqꞌ, 20 qꞌinalo ta xin aykꞌo yaꞌ Noé, yaꞌ Daniel, yebꞌ yaꞌ Job yul huneꞌ konhobꞌ tuꞌ, hanin Yahawilintiꞌan chiwalan ta hanhe ebꞌyaꞌ oxwanh tuꞌ chikolcha yu istoholal iswatxꞌe; walpaxo iskꞌahol yebꞌ iskutzꞌin, matxam chikolchahi.
21 »Yuxin hanin Yahawilintiꞌan chiwalan: “¡Hajxam yet chiwanitojan kanhebꞌ majan isyaꞌtajil kaw aykano ismay yibꞌanh Jerusalén, yuto chiwatojan espada yinh, yebꞌ wahil, chiwanipaxtojan noꞌ howla noqꞌ yinh, yebꞌ howla yabꞌil, yu istanhkanilo anma yebꞌ no noqꞌ ay yul konhobꞌ! 22 Yajaꞌ xin ay haywanh mak tiꞌ chikolchahi, haꞌ ton ebꞌnaj hekꞌahol yebꞌ ebꞌix hekutzꞌin chiꞌilaxilo yul konhobꞌ tuꞌ. Haꞌ xin chihul tekꞌatanh, cheyilni isbꞌeybꞌal yebꞌ tzetaj chiswatxꞌe, hak tuꞌ chu hetxumni tzet yinh xin wayojan sunilal isyaꞌtajil yibꞌanh Jerusalén. 23 Hayet cheyilni isbꞌeybꞌal yebꞌ tzetaj chiswatxꞌe ebꞌnaj hekꞌahol yebꞌ ebꞌix hekutzꞌin tuꞌ, kat yok heyanma yinh aqꞌankꞌulal, cheyohtanheniloj tato mach tonheho wayojan sunil isyaꞌtajil yibꞌanh Jerusalén,”» xhi Komam.