Jerusalén lahan hakaꞌ teꞌ uva, matzet chiꞌoknikoj
15
Yul istzotiꞌ Komam Jahawil wetan, yalni hakaꞌ tiꞌ:2 «Hach iskꞌahol naj winaj, ¿tom ekꞌbꞌalto yelapno isteꞌal teꞌ uva sata isteꞌal hunuxa te teꞌ?
¿Tom ekꞌbꞌalto yelapno isqꞌabꞌ teꞌ uva sata hunu teꞌ qꞌebꞌtaj ay xolaj qꞌebꞌtaj?
3 ¿Aymi hunu mak tiꞌ chiꞌiniti istxꞌanhal teꞌ uva yu iswatxꞌen hunu munil yinh isteꞌal teꞌ? Machoj.
¿Aymi hunu mak chꞌiniti istxꞌanhal teꞌ uva yu iswatxꞌe hun estaca yu islokbꞌalax tzetaj ye tuꞌ yinh?
4 Wal xin siꞌalnhe chiꞌokniko teꞌ, kat yalaxikto teꞌ yul qꞌaꞌ,
kat istzꞌakanto isyutz teꞌ yebꞌ iswiꞌ teꞌ, kat istzꞌapaxkanto yiktabꞌanil teꞌ.
¿Aymi munil chiwatxꞌi yinh teꞌ yet chilahwi istzꞌakanto teꞌ?
5 Hayet maxhto chinhuslaxto teꞌ, machi hunu munil tiꞌ chisje iswatxꞌelax yinh teꞌ,
¿haꞌ tom xin yet xanhuslaxto teꞌ aytom tzet chisje iswatxꞌelax yinh teꞌ?
6 »Yuxin hanin Yahawilintiꞌan chiwalan:
Hakaꞌ chu istzꞌato teꞌ yoj uva yinta hunteqꞌanxa te teꞌ xol qꞌa qꞌaꞌ,
hak tuꞌ chu innhusnitojan anma ay bꞌey Jerusalén.
7 Chiwako inhowalan yinh anma tuꞌ, waxanhka chꞌelkanh tet qꞌa qꞌaꞌ tuꞌ yalni, yajaꞌ masan chitzꞌakanto yu qꞌaꞌ,
hayet chiwanayojan inhowalan yinh anma tuꞌ cheyohtanheniloj ta hanintiꞌan Yahawil hinan.
8 Hanin Yahawilintiꞌan, chiwalan ta chinmeltzokanikojan konhobꞌ Jerusalén tuꞌ hakaꞌ txꞌotxꞌ matxa yahaw,
kat istzꞌinhtzꞌonkanoj yuto haꞌ hunteqꞌan anma tuꞌ,
kaw manhkꞌomkano yute isbꞌa wetan,» xhi Komam.