6 »”Wekꞌtojan hakawilal, kaxhwilnihan, aytoko istzꞌilal hachikꞌil yet hapitzkꞌahi; walnihan ta chiwaqꞌan hakawil. Hoꞌ, walan tawet tato chiwaqꞌan hakawil yet aytoko istzꞌilal hachikꞌil tawinh. 7 Kaxhwaqꞌ chꞌibꞌojan hakaꞌ teꞌ telaj, hachꞌibꞌkan, hawok nime anmahil, kaw xin kꞌulchꞌan kaxhelkanikoj hakaꞌ hunu ix qꞌopo xachꞌibꞌ yim yebꞌ xil iswiꞌ. ¡Yajaꞌ xin tꞌilan hach, machi xil haqꞌap aykoj!

8 »”Kinekꞌpaxtojan hunelxa hakawilal, kaxhwilnihan, lahan hachxa hakaꞌ hunu ix qꞌopo istzꞌayikalxa yiqꞌni yichamil; inlebꞌanikojan qꞌap qꞌap tawinh, yokkano xilo haqꞌap. Hanin Yahawilintiꞌan, waqꞌ bꞌinaho inbꞌihan, intꞌinhbꞌankanojan intzotiꞌan tawet, hawokkano wuhan. 9 Kaxhwaxhnhenan, intxꞌahnilojan istzꞌilal hachikꞌil, inmasnikojan aceite tawinh. 10 Wanikojan qꞌap qꞌap chembꞌil xilo haqꞌap, wanikojan noꞌ tzꞌum xanhabꞌ yinh hawoj, wanikojan qꞌap txꞌambꞌale lino yinh hawiktaj, waqꞌnipaxojan qꞌap seda xilo haqꞌap. 11 Wanikojan hawelawil, wakojan chꞌen pulsera yinh isnuqꞌ haqꞌabꞌ yebꞌ chꞌen uwe yinh hanuqꞌ. 12 Wanikojan chꞌen ome yinh hatxam yebꞌ yinh hatxikin, wanahtojan huneꞌ diadema kaw kꞌulchꞌankano jilni yinh hawiꞌ. 13 Hak tuꞌ yu wanikojan chꞌen oro yebꞌ chꞌen plata hawelawiloj, haxa xil haqꞌap hawakoj, haꞌ ton qꞌap lino, qꞌap kaw kꞌul yebꞌ qꞌap seda, yebꞌ qꞌap kaw kꞌul yeko yelawil. Hawani ixim harina, ixim kaw kꞌul yebꞌ noꞌ kabꞌ, yebꞌ aceite. Kaw saqꞌal iskꞌulchꞌanil kaxhelkanikoj, hak tuꞌ yu hawiqꞌnikanh hawip masanto kaxhok yahawil. 14 Kaw bꞌinakano habꞌi xolaj nimeta konhobꞌ yu hakꞌulchꞌanil, hanin Yahawilintiꞌan chiwalan, haꞌ hakꞌulchꞌanil tuꞌ kaw matxa hunuxa hakaꞌ, yuto haninan wakojan hakꞌulchꞌanil,” xhi Komam Jahawil.

15 »Yalnipaxo Komam: “Yajaꞌ xin kaw kawxi hakꞌul yinh hakꞌulchꞌanil, yebꞌ xin yu chaxhbꞌinahi, yuxin hawetato habꞌa, hakaꞌ hunu ix ix ay iswinaj, makxanhetikꞌa yebꞌ kach ekꞌi; hawatxꞌe mule yebꞌi. ¡Hawokkano yetoj! 16 Hawatxꞌenayo qꞌap mantiado yinh xil haqꞌap bꞌay hawiyo habꞌa tet hatioxh, hawatxꞌen txꞌiꞌal ismexhahil yet xahanbꞌal iswiꞌla witz, hawatxꞌen mule bꞌey tuꞌ. ¡Haꞌ hunteqꞌan tuꞌ maxhto bꞌay xayuhi, matxa bꞌaqꞌinhal chupaxoj! 17 Hawatxꞌen yechel winaj hatioxhoj yinh chꞌen oro yebꞌ chꞌen plata kaw kꞌulejchꞌan waqꞌan tawet, hawok hawinoyo habꞌa tet, hawaniko hamul hakaꞌ ismul hunu ix ix ay iswinaj. 18 Hawaniko xil haqꞌap kaw txꞌiꞌal yelawil xilo isqꞌap hatioxh tuꞌ, haꞌ xin teꞌ aceite yebꞌ incienso wetan yehi, hawaqꞌ xahanbꞌalil tet hunteqꞌan hatioxh tuꞌ. 19 Hakpax tuꞌ ixim pan waqꞌan hawabꞌ, yebꞌ ixim harina kaw kꞌul, yebꞌ aceite yebꞌ noꞌ kabꞌ waqꞌan halobꞌ, haꞌ hawalte xahanbꞌalil tet hatioxh tuꞌ, yunhe kaw xuqꞌ yekꞌ sam. Hanin Yahawilintiꞌan chiwalan tato hak tuꞌ hawatxꞌe. 20 Yebꞌpaxo xin hawiti hakꞌahol yebꞌ hakutzꞌin, hunteqꞌan wetan yehi, hanhusni xahanbꞌalil tet hatioxh. ¿Tom xin hanikꞌnhe hamul yinh hakaꞌ tuꞌ, 21 yet hahojnikamo nixhte wuninalan hanhusni yinh xahanbꞌalil tet hunteqꞌan hatioxh tuꞌ? 22 Haꞌ yu sunil hayahbꞌetajil yebꞌ yu hamul hakaꞌ ismul ebꞌix ix ay iswinaj, yuxin matxa chanatij yet nichꞌanaxhto, yet tꞌilan hach, machi xil haqꞌap aykoj, yet aytoko istzꞌilal hachikꞌil tawinh.

23 »”Hanin Yahawilintiꞌan chiwalan: ¡Ay, ay kaw kꞌanchꞌan hach! Yuto hayet xalahwi hawatxꞌen sunil istxꞌojal tuꞌ, yay isyaꞌtajil tawibꞌanh. 24 Hawatxꞌenkanh bꞌay chawiyo habꞌa tet hatioxh, bꞌay nahat yekanh, hawatxꞌenpaxokanh ismexhahil yet xahanbꞌal sunil yulajla txonhbꞌal. 25 Sunil bꞌay chikachnakan apno bꞌeh hawatxꞌenkanh bꞌay chawiyo habꞌa tet hatioxh, kaw yahbꞌeta elkaniko hakꞌulchꞌanil yu, makxanhetikꞌa chꞌekꞌto bꞌey tuꞌ hawatxꞌe mule yebꞌi, yahkanokanh hamul yinh winajloj. 26 Hawatxꞌe mule yebꞌ ebꞌnaj ayayo hakawilal, haꞌ ton ebꞌnaj ah Egipto, ebꞌnaj kaw ay yip, ischꞌibꞌkanh hamul yinh winajloj, hawaqꞌnitij inhowalan. 27 Yuxin wikanh inqꞌabꞌan tawinh, wanayojan isyaꞌtajil tawibꞌanh, wanitojan wahil texol, kaxhwanikojan yul isqꞌabꞌ ebꞌix iskutzꞌin ebꞌnaj filisteo, kaxhisyahni ebꞌix, istxꞌixwilo ebꞌix yilni habꞌeybꞌal kaw txꞌixobꞌal. 28 Hawatxꞌenpaxo mule yebꞌ ebꞌnaj asirio, yuto maxhtikꞌa yiqꞌ hakꞌul hawatxꞌen mule, yajaꞌ xin maxhtikꞌa yiqꞌpaxo hakꞌul hawatxꞌen mule yebꞌ ebꞌnaj asirio tuꞌ. 29 Yuxin kaw kaxhahpaxokanh hawatxꞌen mule sat txꞌotxꞌ Canaán, hawatxꞌenpaxo mule tuꞌ yebꞌ ebꞌnaj filisteo, yajaꞌ xin maxhtikꞌa yiqꞌpaxo hakꞌul.

30 »”Hanin Yahawilintiꞌan chiwalan, ¡Kaw machi hawanma hawatxꞌen sunil hunteqꞌan tiꞌ, kaw lahan hach hakaꞌ hunu ix ix txꞌoj ye iswiꞌ, kaw mach chitxꞌixwi! 31 Sunil bꞌayejtuꞌwal bꞌay chikachnakan apno bꞌeh, hawatxꞌekanh bꞌay chawiyo habꞌa sata hatioxh bꞌay kaw nahat yekanh, hawatxꞌenpaxokanh ismexhahil yet xahanbꞌal sunil yulajla txonhbꞌal. Yajaꞌ xin mach lahan hawute habꞌa hakaꞌ hunu ix ix txꞌotxꞌ ye iswiꞌ, yuto mach chaqꞌan hatohol. 32 Hakaꞌ hunu ix ix txꞌoj ye iswiꞌ ay yichamil chischah ix hunuxa komon yichamil, hak tuꞌ hawute habꞌa hach Jerusalén. 33 Haꞌ sunil ebꞌix ix txꞌoj ye iswiꞌ, chischah ebꞌix istohol, yajaꞌ wal hach tiꞌ chatohla sunil makta chaxhocheni, chawaqꞌni sabꞌehal tet ebꞌnaj winaj, yunhe yapni ebꞌnaj sunil bꞌayejtuꞌwal iswatxꞌe mule yebꞌ hach. 34 Haꞌ yinh huneꞌ mule tiꞌ, mach lahano hach hakaꞌ ebꞌix ix txꞌoj ye iswiꞌ, yuto machi mak chaxhsaynikꞌoj yebꞌ xin hach chatohla makta chiwatxꞌen mule yebꞌ hach. Haꞌ yinh tuꞌ mach lahano hach hakaꞌ ebꞌix txꞌoj ye iswiꞌ tuꞌ.

35 »”Yuxin hach txꞌoj ye hawiꞌ, abꞌe tzet chiwalan. 36 Hanin Yahawilintiꞌan chiwalan: Hach tiꞌ makaxhilchalo yinh hamul, maꞌel yenhel istxꞌixwilal chawatxꞌe, hakaꞌ ebꞌix ix txꞌoj ye iswiꞌ. Yelpaxkano hatxꞌixobꞌal sata ebꞌnaj hawinaj, hawinilo hapixan sata hatioxh, hunteqꞌan kaw yahbꞌetaj, hawaqꞌni maloto ischikꞌil hawuninal hawalten xahanbꞌalil tet hatioxh tuꞌ. 37 Yuxin chinkutxbꞌakojan sunil ebꞌnaj chaxhocheni, ebꞌnaj yaqꞌ tzalaho iskꞌul yebꞌ hach, yebꞌ sunil ebꞌnaj kaw xahan ay hawu, yebꞌ ebꞌnaj yahbꞌil hawu. Chinkutxbꞌakojan sunil ebꞌnaj tawinh, chaxhintꞌilbꞌanan sata ebꞌnaj, chiyilni ebꞌnaj hanimanil yet tꞌilan hach tuꞌ. 38 Chiwayojan isyaꞌtajil tawibꞌanh hakaꞌ isyaꞌtajil chiꞌay yibꞌanh ix ixale ay iswinaj yebꞌ ebꞌix maqꞌom anma, yuxin chiwatojan kamikal tawibꞌanh yu inhowalan, yuto hawaqꞌ chíwaho inkꞌulan. 39 Chaxhwanikojan yul isqꞌabꞌ hunteqꞌan ebꞌnaj tuꞌ, chiyuchkꞌanto ebꞌnaj bꞌay hawiyo habꞌa tet hatioxh kaw nahat yekanh, chiyuchkꞌanpaxayo ebꞌnaj ismexhahil yet xahanbꞌal, chiyelqꞌanto ebꞌnaj xil haqꞌap, chiyinipaxto ebꞌnaj chꞌen chꞌen kaw kꞌulchꞌan chawako hawelawiloj, chaxhistꞌilbꞌankano ebꞌnaj. 40 Chiyiti ebꞌnaj hunbꞌulan anma tawinh, kat haqꞌojlaxkamoj, kat hatejlaxkamo yu chꞌen espada. 41 Chinhuslaxto hawatut, chikawxelaxiko kamikal tawibꞌanh yinh sat txꞌiꞌal ebꞌix ix, hak tuꞌ chu habꞌejni hawinajli, chabꞌejni hatohlan ebꞌnaj. 42 Hak tuꞌ chu inbꞌejnihan wanayojan inhowalan tawibꞌanh, kat yekꞌayo ischiwa inkꞌulan tawinh, kat yok wanmahan yinh xewilal, matxa bꞌaqꞌinh xin chitit inhowalan. 43 Hach tiꞌ xahanahulnheto tzet hawaqꞌle yet nichꞌan hachto, hawaqꞌnitij inhowalan yu sunil isyahbꞌetajil hawatxꞌe, yuxin hanin Yahawilintiꞌan chiwayojan isyaꞌtajil tawibꞌanh yu habꞌeybꞌal, maxhtikꞌa istxumpaxo isbꞌa hakꞌul yinh sunil haloloꞌal.

44 »”Sunil anma chalno tawinh hakaꞌ tiꞌ: ‘Hakaꞌtikꞌa ix miꞌe, haktikꞌapax tuꞌ ix uninale,’ xhi. 45 Hach tiꞌ unine haweh yu hamiꞌ. Haꞌ hamiꞌ tuꞌ isyahkanh yichamil yebꞌ yunin, hach tiꞌ aypaxo hunteqꞌanxa hanoh isyahpaxokanh yichamil yebꞌ yunin. Hamiꞌ tuꞌ, hetea ix, haxa hamam amorreo naj. 46 Haꞌ ix hanoh bꞌabꞌel, Samaria ix, haꞌ xin yinh yetkꞌulal norte ay ix yebꞌ ebꞌix yunin. Haxa ix hanoh islahobꞌal unin Sodoma ix, haꞌ xin yinh yetkꞌulal sur ay ix yebꞌ ebꞌix yunin.^a 47 Hex tiꞌ heyilto tzetaj iswatxꞌe henoh tuꞌ, heyok hewatxꞌen isyahbꞌetajil iswatxꞌe, mach xin hanikꞌnhe tzet hewatxꞌe tuꞌ, wal xin to kaw ekꞌbꞌalto kexpalkꞌon hewatxꞌen sunil istxꞌojal yibꞌanh Samaria yebꞌ Sodoma tuꞌ. 48 Hanintiꞌan, itzitz hinan, Yahawil hinan. Haninan chiwalan: Hanoh Sodoma yebꞌ ebꞌix yunin, mach apni iswatxꞌen istxꞌojal hakaꞌ istxꞌojal hawatxꞌe hach tiꞌ yebꞌ ebꞌix hawunin. 49 Hanoh Sodoma yebꞌ ebꞌix yunin, haꞌ hunteqꞌan tiꞌ ismul: Loloꞌal, isahil, yebꞌ kaw ay tzet chislo yul isqꞌabꞌ, yajaꞌ maxhtikꞌa kolwa nino yinh anma mebꞌaꞌ ayko yinh manhtzetal. 50 Hak tuꞌ yu isloloꞌnhen isbꞌa, iswatxꞌen isyahbꞌetajil yinh insatan, yuxin hayet wilnihan ismul tuꞌ, intanhtzenilojan, winilojan sat yibꞌanhqꞌinal tiꞌ. 51 Walpaxo Samaria mach apni ismul hakaꞌ hamul hach tiꞌ, yuto hach tiꞌ kaw ahkanokanh isyahbꞌetajil hawatxꞌe sata Samaria tuꞌ, yuxin hanikꞌnhe ismul tasataj, wal hach tiꞌ xin hawatxꞌe sunil isyahbꞌetajil. 52 Hach tiꞌ kaxhok hawilaꞌ ismul hanoh haꞌ ton Sodoma yebꞌ Samaria, yuxin chaxhokkano yinh txꞌixobꞌal yu hamul, yuto kaw ekꞌna isyahbꞌetajil hawatxꞌe sata hanoh tuꞌ, ekꞌna kꞌulto tasataj. Chaxhokkano yinh txꞌixwilal yebꞌ takkꞌulal, yuto ekꞌna kꞌulto ebꞌix hanoh tuꞌ tasataj.

53 »”Haninan chiwaqꞌ meltzohojan hanoh Sodoma bꞌey ebꞌix yunin, yebꞌpaxo Samaria yebꞌ ebꞌix yunin. Chaxhwaqꞌnipaxo meltzohojan hach ah Jerusalén, xol anma tuꞌ. 54 Yajaꞌ xin kaxhokkano yinh takkꞌulal yebꞌ yinh txꞌixwilal yu sunilal istxꞌojal hawatxꞌe, hak tuꞌ yu hawokkano yipo iskꞌul anma, yuto hanikꞌnhe ismul tasataj. 55 Haꞌ Sodoma hanoh yebꞌ ebꞌix yunin, yebꞌ Samaria yebꞌ ebꞌix yunin chimeltzopaxo hakaꞌtikꞌa ye yet bꞌabꞌelal, hakachpax tuꞌ yebꞌ ebꞌix hawunin chexmeltzopaxo hakaꞌtikꞌa heye yet bꞌabꞌelal.^b 56 Hach tiꞌ, kaw kaxhbꞌuchwa yinh Sodoma hanoh yulbꞌal istiempohal ay ayachiko yinh haloloꞌal. 57 Yalanhto maxhto chiꞌixtanhwilo hatxꞌojal; walpaxo tinanh chaxhbꞌuchlax yu ebꞌix iskutzꞌin ebꞌnaj ah Siria yebꞌ yu sunil ebꞌix iskutzꞌin ebꞌnaj filisteo, bꞌajxanhetuꞌwal chaxhyahlax yu ebꞌix. 58 Hanin Yahawilintiꞌan, chiwalan ta chawaqꞌle isyaꞌtajil yu haloloꞌal yebꞌ yu isyahbꞌetajil hawatxꞌe.

59 »”Yajaꞌ hanin Yahawilintiꞌan chiwalpaxojan. Hanintiꞌan mach chinwatxꞌehan hakaꞌ hawu tuꞌ, hach tiꞌ hawintanhekanilto istꞌinhanil tzet walan tawet, hanahulnhetoj huneꞌ trato. 60 Yajaꞌ wal hinan mach chinnahulnhetojan intratohan intꞌinhbꞌakanojan tawet, yet nichꞌan hachto, haꞌ xin huneꞌ tuꞌ chintꞌinhbꞌapaxkanojan tawet tinanh yinh sunilbꞌal ej tiempo. 61 Chanapaxti habꞌeybꞌal tiꞌ, kat hatxꞌixwikanh yet chiwaqꞌni meltzohojan ebꞌix hanoh yul haqꞌabꞌ hakaꞌ hawuninal chuko, haꞌ ton ix bꞌabꞌel unin yebꞌ ix islahobꞌal unin, yajaꞌ maxhtaj yu tzet tꞌinhbꞌabꞌilkano hawu. 62 Wal xin chiyij isbꞌa yu intratohan tꞌinhbꞌabꞌilkano tawet, hak tuꞌ chu hawohtanheniloj ta hanintiꞌan Yahawil hinan, 63 yunhe hananitij, kat hatxꞌixwikanh, kat iskꞌaykanokanh hakꞌul yet chiwaqꞌni nimankꞌulalan yinh sunil tzet hawatxꞌe,”» xhi Komam.