Yechel yibꞌanhilo noꞌ tꞌiw yebꞌ teꞌ uva
17
Yul istzotiꞌ Komam Jahawil wetan yalni hakaꞌ tiꞌ: 2 «Hach iskꞌahol naj winaj, tzotelanh tet anma Israel, chawalni kuybꞌanile tet ebꞌnaj. 3 Chawalni: Hak tiꞌ yalni Komam Jahawil:“Ay huneꞌ noꞌ tꞌiw kaw nimajalkanoj,
kaw nahatta chiꞌapni istel xikꞌ yebꞌ xin kaw txꞌiꞌal yelawil noꞌ aykoj.
Haꞌ huneꞌ noꞌ tꞌiw tuꞌ apni purna noꞌ yinh isqꞌabꞌ huneꞌ teꞌ cedro bꞌey Líbano,
isnhotxꞌnilto noꞌ ischon teꞌ cedro tuꞌ.a
4 Haꞌ ischon teꞌ isnhotxꞌilto noꞌ kaw aykano yelapnoj,
yinito noꞌ teꞌ sat istxꞌotxꞌ hunteqꞌan ebꞌnaj txonhom yul huneꞌ konhobꞌ bꞌay kaw ay txonh.
5 Lahwi tuꞌ yinikanh noꞌ huneꞌ teꞌ hinhat uva sat txꞌotxꞌ,
istzꞌunnayo noꞌ huneꞌ hinhat tuꞌ sat txꞌo txꞌotxꞌ kaw kꞌul,
bꞌay ay tzꞌunubꞌ istiꞌ ha haꞌ hakaꞌ chu istzꞌunlax teꞌ sauce.
6 Yahilo teꞌ uva tuꞌ, ischꞌibꞌkanh teꞌ, kaw xin txꞌiꞌal isqꞌabꞌ teꞌ eliloj, txannhe xin yukanh istel teꞌ.
Haꞌ isqꞌabꞌ teꞌ uva tuꞌ tꞌanhanto yinh noꞌ tꞌiw,
ischꞌibꞌayto isxeꞌ teꞌ yul txꞌotxꞌ, ischꞌibꞌkanokanh teꞌ, yelilo iswol yebꞌ isqꞌabꞌ teꞌ.
7 Aypaxo xin huneꞌxa noꞌ niman tꞌiw kaw nimajal istel xikꞌ yebꞌ xin kaw niman isxil,
haꞌ xin iskawilal noꞌ yato teꞌ uva tuꞌ isxeꞌ yebꞌ isqꞌabꞌ,
yunhe ishayen noꞌ teꞌ bꞌay tzꞌunbꞌilayo yinh istxolal.
8 Haꞌ teꞌ uva tuꞌ tzꞌunbꞌilayo teꞌ sat txꞌo txꞌotxꞌ kaw kꞌul istiꞌ ha haꞌ,
yunhe yaqꞌni teꞌ isqꞌabꞌ yebꞌ sat, yebꞌ yunhe kaw ay yip chiꞌelkaniko teꞌ,” kachi,» xhi Komam.
9 Chawalnipaxoj: «Hak tiꞌ yalni Komam Jahawil:
“Haꞌ teꞌ uva tuꞌ, mach chichꞌibꞌ teꞌ. Haꞌ noꞌ bꞌabꞌel tꞌiw chishokꞌkanh noꞌ teꞌ yebꞌ sunil xeꞌ, kat yaykꞌay sat teꞌ, kat istajkanilo teꞌ.
Haꞌ sunil xaj teꞌ kaw yax chitajkaniloj;
mach xin yilalo txꞌiꞌal anma yebꞌ xin mach yilalo kaw ay yip anma chihokꞌnikanh teꞌ yebꞌ sunil xeꞌ.
10 Waxanhka chitzꞌunlaxayo teꞌ, yajaꞌ matxa chiwolni teꞌ,
wal xin maqꞌbꞌil istajkanilo teꞌ yet chilow jaqꞌeqꞌ
chitit yinh yetkꞌulal bꞌay chiꞌahilo tzꞌayik yinh teꞌ,
matxa chiꞌelilo iswol teꞌ, to maqꞌbꞌil istajkanilo teꞌ,”» xhi Komam Jahawil.
11 Yul istzotiꞌ Komam Jahawil wetan, yalni hakaꞌ tiꞌ: 12 «Qꞌambꞌe tet anma kaw manhkꞌomkano hakaꞌ tiꞌ: “¿Mamtxumchalo heyu tzet chal yelapno hunteqꞌan kuybꞌanile tiꞌ?” kachi. Chawalni tet: “Haꞌ naj isreyal Babilonia apni naj Jerusalén, yinito naj yaꞌ hereyal yebꞌ ebꞌnaj yahawil hekonhobꞌ preso bꞌey Babilonia. 13 Lahwi tuꞌ yaniko naj huneꞌxa yaꞌ yuninal ebꞌyaꞌ okle reyal bꞌey Israel, istꞌinhbꞌankano naj istzotiꞌ tet yaꞌ istaqꞌweniko yaꞌ yinh ta yijem chiyute isbꞌa yaꞌ tet naj rey Babilonia tuꞌ. Yinipaxto naj rey Babilonia ebꞌnaj winaj kaw ay yelapno ay yul konhobꞌ Jerusalén preso bꞌey Babilonia, 14 yunhe ispaxkano yip txꞌotxꞌ Judá, hak tuꞌ xin matxa chu yahwanoj, chisyijen huneꞌ tzet tꞌinhbꞌabꞌilkano yunhe yijem chute isbꞌa. 15 Yajaꞌ ok yaꞌ isreyal Jerusalén tuꞌ manhkꞌomal tet naj rey ah Babilonia, ischejnito yaꞌ ischejabꞌ bꞌey Egipto isqꞌanaꞌ noꞌ cheh yebꞌ txꞌiꞌal ebꞌnaj soldado. ¿Kꞌulmi xin chenah tzet iswatxꞌe yaꞌ tuꞌ, aymi iskolbꞌanil yaꞌ yinh hakaꞌ tuꞌ? ¿aymi iskolbꞌanil mak mach chisyije hunu tzet ye tuꞌ tꞌinhbꞌabꞌilkanoj? 16 Hanin Yahawilintiꞌan, itzitz hinan, haninan chiwalan: Haꞌ yaꞌ mach chiyijen tzet ye tuꞌ tꞌinhbꞌabꞌilkanoj tuꞌ, yebꞌ mach isyije tzet taqꞌwebꞌilkano yu, chipotxꞌlaxkamo xolbꞌal konhobꞌ Babilonia bꞌay ay naj rey aniko yaꞌ reyal. 17 Hayet chiyaniko naj rey Babilonia howal yinh konhobꞌ Jerusalén, chiswatxꞌenkanh naj torre yebꞌ chꞌen kꞌubꞌ yinhla ishoyanil, chispotxꞌnikamo naj txꞌiꞌal anma, mach chu iskolwa naj rey faraón yebꞌ txꞌiꞌal issoldado yebꞌ hunbꞌulan anma yinh konhobꞌ Jerusalén. 18 Yuto mach isyije yaꞌ isreyal Jerusalén tuꞌ tzet taqꞌwebꞌilkano yu, yebꞌ yu ismanhkꞌo tzet istꞌinhbꞌakanoj, yuxin machi iskolbꞌanil yaꞌ yu tzet iswatxꞌe. 19 Yuxin hanin Yahawilintiꞌan chiwalan: Haꞌ yaꞌ isreyal Jerusalén tuꞌ, mach isyije tzet istaqꞌweko yibꞌanh yinh insatan, ismanhkꞌon yaꞌ tzet tꞌinhbꞌabꞌilkanoj, yuxin chiwayojan isyaꞌtajil yibꞌanh. 20 Chiwayojan txꞌanh hakꞌ yibꞌanh yaꞌ, kat iskankano yaꞌ yul txꞌanh, chiwanitojan yaꞌ bꞌey Babilonia, haꞌ tuꞌ xin chiwilan tzet chꞌelkaniko yaꞌ, yuto ok yaꞌ manhkꞌomal wetan, yaniko ismul. 21 Haxa sunil ebꞌnaj winaj chiyaqꞌle yelkanh yebꞌ sunil ebꞌnaj issoldado yaꞌ chipotxꞌlaxkamo ebꞌnaj yu espada, haxa mak chitokani, chisajlemitoj sunil bꞌayejtuꞌwal. Cheyotanheloj ta hanin Yahawilintiꞌan walan hunteqꞌan tiꞌ, xhi Komam.
22 »”Yalnipaxo Komam Jahawil hakaꞌ tiꞌ:
Haninan chinwoqꞌilojan ischon teꞌ cedro kaw nimajal yekanh istel, chintzꞌunnayojan teꞌ;
chintzokꞌilojan ischon isqꞌabꞌ teꞌ kaw ay yelapnoj chintzꞌunnayojan teꞌ iswiꞌ huneꞌ wonhan kaw nahat yekanh.
23 Haꞌ bꞌey iswiꞌ wonhan kaw nahat yekanh bꞌey Israel,
haꞌ tuꞌ chintzꞌunnayojan teꞌ, kat ischꞌibꞌ isqꞌabꞌ teꞌ, chaqꞌni teꞌ sat.
Hak tuꞌ xin kaw niman cedro chiꞌelkaniko teꞌ,
kat yul sunil ismajanil noꞌ chꞌik chiswatxꞌen noꞌ yatut xol isqꞌabꞌ teꞌ, kat yul noꞌ yenhelnhen isbꞌa yalanh teꞌ.
24 Hak tuꞌ chu yohtanhenilo sunil teꞌ qꞌebꞌtaj ta hanintiꞌan Yahawil hinan.
Haninan inqꞌajayojan teꞌ qꞌebꞌtaj kaw nimankano yelapnoj, waqꞌni chꞌibꞌojan istel teꞌ qꞌebꞌtaj txannhe istel.
Haninan waqꞌ tajolojan teꞌ qꞌebꞌtaj kaw yax, waqꞌni yaxbꞌolojan teꞌ qꞌebꞌtaj tajin.
Haninan xin chiwalan hunteqꞌan tiꞌ, kat yaqꞌni yijaꞌ isbꞌa, xhi Komam Jahawil,” kachi,» xhi Komam.