3 »Hanin Yahawilintiꞌan, itzitz hinan, haninan chiwalan ta matxahojabꞌ bꞌaqꞌinhal chihal-lax hunteqꞌan tzotiꞌ tiꞌ bꞌey Israel. 4 Sunil anma wetan yehi: Wetan ye naj mame, wetan ye naj kꞌahole. Haꞌ mak chiyako ismul, haꞌ chikami. 5 Haꞌ naj winaj tohol isbꞌeybꞌal, haꞌ ton naj chiwatxꞌen iskꞌulal yebꞌ istoholal, 6 mach chꞌok naj waꞌo xol anma chꞌekꞌtzen qꞌinh tet tioxh iswiꞌla witz, mach chito tꞌanhno yinh istioxh anma Israel, mach chiswatxꞌe naj mule yebꞌ yixal hunuxa yet anmahil, mach chiway naj yebꞌ yixal yet chilni ix istxꞌawobꞌal, 7 mach hunu mak tiꞌ chiyeta naj, wal xin chiyaqꞌ meltzoho naj tzet chischah yet chaqꞌni melyu kꞌamil, mach chiꞌelqꞌawi naj; chaqꞌ naj tzet chislo makta chinhochahi, chaqꞌnipaxo naj xil isqꞌap makta mach xil isqꞌap. 8 Mach chisqꞌan naj yal chꞌen melyu chaqꞌ kꞌamil, ta xin chisqꞌan naj yal chꞌen, mach nimano chisqꞌan naj, yebꞌ xin mach chato naj isqꞌabꞌ yinh istxꞌojal. Kaw lahan chu iswatxꞌen naj istoholal yinh yet anmahil. 9 Chisbꞌeybꞌalnhen inchejbꞌanilan, chiskꞌubꞌan naj inleyan yinh kaw istoholal, haꞌ huneꞌ naj winaj tuꞌ kaw tohol isbꞌeybꞌal. Hanin Yahawilintiꞌan chiwalan ta ay iskawil huneꞌ naj winaj tuꞌ.

10 »Yajaꞌ ta xin ay hunu iskꞌahol naj elqꞌom yebꞌ xin potxꞌom anma chiꞌelikoj, haꞌ tuꞌ isbꞌeybꞌal, 11 mach isbꞌeybꞌalnhe ismam hakaꞌ tuꞌ. Wal xin chꞌok waꞌo xol anma, chekꞌtzen qꞌinh tet tioxh iswiꞌla witz, chiswatxꞌen mule yebꞌ yixal yet anmahil, 12 chiyetan anma mebꞌaꞌ yebꞌ anma chꞌoqꞌ yanma yu manhtzetal, elqꞌom, mach chaqꞌ meltzo tzet chischah yet chaqꞌni melyu kꞌamil, kat isto tꞌanhno yinh tioxh, chiswatxꞌen isyahbꞌetajil, 13 chisqꞌanni yal chꞌen melyu chaqꞌ kꞌamil yebꞌ xin kaw niman yal chꞌen chisqꞌana. ¿Aymi iskawil huneꞌ naj kꞌahole tuꞌ? ¡Mach iskawil naj sat yibꞌanhqꞌinal tiꞌ! Yinh kaw yeli chikam naj yu sunil isyahbꞌetajil iswatxꞌe tuꞌ, haꞌ yibꞌanh naj chitokano ischikꞌil.

14 »Yajaꞌ ta ay hunu iskꞌahol naj txꞌoj isbꞌeybꞌal tiꞌ chiꞌilni sunil istxꞌojal chiswatxꞌe ismam, yajaꞌ mach chiꞌoktzujno yinta istxꞌojal tuꞌ, 15 mach chiꞌok waꞌo xol anma chꞌekꞌtzen qꞌinh tet tioxh iswiꞌla witz, mach chitꞌanhxiko yinh istioxh anma Israel, mach chiswatxꞌe mule yebꞌ yixal yet anmahil, 16 mach hunu mak chiyeta, chaqꞌ meltzo naj tzet chischah yet chaqꞌni melyu kꞌamil, mach chiꞌelqꞌawi, chaqꞌ tzet chislo makta chaqꞌle nhochahilal, chaqꞌni xilqꞌape tet mak mach xil isqꞌap. 17 Mach cheta anma mebꞌaꞌ, mach chisqꞌan yal melyu chaqꞌ kꞌamil, ta xin chisqꞌana, mach nimano chisqꞌana, chiskꞌubꞌa inleyan, chisbꞌeybꞌalnhen chejbꞌanile chiwalan, haꞌ huneꞌ naj tiꞌ mach chikam naj yu ismul ismam yinh kaw yeli ay iskawil naj. 18 Wal ismam naj tuꞌ chikam yu istxꞌojal iswatxꞌe, yuto chelqꞌalo tzetaj ay yet anmahil, yebꞌ yu maxhtaj iskꞌulal iswatxꞌe xol yet konhobꞌ, yuxin chikam naj yu istxꞌojal.

19 »Yajaꞌ ta cheqꞌambꞌe hakaꞌ tiꞌ: “¿Tzet yinh xin mach chistohla naj kꞌahole tuꞌ ismul ismam?” kexchi. Wal xin mach chistohla naj ismul ismam, yuto haꞌ iskꞌulal yebꞌ istoholal iswatxꞌe naj, iskꞌubꞌa naj sunil chejbꞌanile chiwalan, isyijen naj, yuxin yinh kaw yeli ay iskawil naj. 20 Haꞌ anma chiyako ismul, haꞌ huneꞌ tuꞌ chikami, naj kꞌahole mach chistohla naj ismul ismam, naj mame, mach chistohla naj ismul iskꞌahol. Haꞌ mak tohol isbꞌeybꞌal chischah ispaj istoholal chiswatxꞌe, haxa mak txꞌoj isbꞌeybꞌal chischah ispaj istxꞌojal chiswatxꞌe.

21 »Ta ay hunu mak kaw txꞌoj isbꞌeybꞌal, yajaꞌ ta chispohilo isbꞌa yinh sunil istxꞌojal chilaiswatxꞌe, chiskꞌubꞌan inchejbꞌanilan, chiswatxꞌen iskꞌulal yebꞌ istoholal, haꞌ huneꞌ mak tuꞌ ay iskawil, mach chitit kamikal yibꞌanh. 22 Haꞌ sunil ismul yakoj, matxa chinahlaxtij. Haꞌ yu iskꞌulal iswatxꞌe yuxin ay iskawil. 23 Hanin Yahawilintiꞌan chiwalan ta mach chiwochehan chitit kamikal yibꞌanh anma txꞌoj isbꞌeybꞌal; wal xin chiwochehan ta chispohilo isbꞌa yinh istxꞌojal, haxinwal ay iskawil. 24 Yajaꞌ ta ay hunu mak tohol isbꞌeybꞌal chispohilo isbꞌa yinh istoholal, kat yok iswatxꞌeno istxꞌojal, chiswatxꞌen sunil isyahbꞌetajil chilaiswatxꞌe anma txꞌoj, haꞌ huneꞌ mak tuꞌ mach isqꞌinal. Haꞌ istoholal iswatxꞌe yet yalanhtokanoj, mach chinnatijan, wal xin chitit kamikal yibꞌanh yu ismanhkꞌomal yebꞌ yu ismul yakoj.

25 »¿Tajka chetxumu ta mach toholo inbꞌeybꞌalan? Abꞌewe tzet chiwalan tinanh, hex Israel hex tiꞌ. Mach wetojan huneꞌ bꞌeh kotxkiltanhe tuꞌ, wal xin kaw tohol inbꞌehan. 26 Ta ay hunu mak tohol isbꞌeybꞌal chispohilo isbꞌa yinh istoholal, chiswatxꞌen istxꞌojal, haꞌ huneꞌ mak tuꞌ chitit kamikal yibꞌanh yu istxꞌojal iswatxꞌe. 27 Ta xin ay hunu mak txꞌoj isbꞌeybꞌal chispohilo isbꞌa yinh istxꞌojal, kat iswatxꞌen iskꞌulal yebꞌ istoholal, haꞌ huneꞌ mak tuꞌ ay iskawil, itzitz yanma. 28 Yuto istxum isbꞌa iskꞌul ispohnilo isbꞌa yinh sunil istxꞌojal chilaiswatxꞌe, haꞌ huneꞌ mak tuꞌ yinh kaw yeli ay iskawil, mach chitit kamikal yibꞌanh. 29 Yajaꞌ chiyal ebꞌnaj Israel hakaꞌ tiꞌ: “Yinh kaw yeli mach toholo isbꞌeybꞌal Komam Dios,” xhi ebꞌnaj. ¿Tom mach toholo inbꞌehan, heyalni? ¡Yinh kaw isyelal hex tiꞌ machiswalil bꞌeh bꞌay tzujan hex!

30 »Yuxin hex Israel, hanin Yahawilintiꞌan, chiwilan tzet chexelikoj, hunun hex, hatatikꞌa bꞌeh bꞌay ayexikoj. Wal xin nahwe hebꞌa, pohwelo hebꞌa yinh sunil istxꞌojal, haxinwal mach chextanhiloj. 31 Bꞌejwekano sunil istxꞌojal bꞌay heyako hemul, kat yakꞌbꞌilo heyanma yebꞌ henabꞌal. Hex konhobꞌ Israel, ¿tzet yinh xin cheyiti kamikal teyibꞌanh? 32 Yuto hanin Yahawilintiꞌan mach chiwochehan kamikal yibꞌanh anma chikami, yuxin meltzanhweko yul inqꞌabꞌan, haxinwal ay hekawil,» xhi Komam.