Bꞌit yet bꞌiskꞌulal yinh ebꞌyaꞌ isreyal Israel
19
Yalni Komam: «Hach Ezequiel, okanh habꞌitnhe huneꞌ bꞌit yet bꞌiskꞌulal yinh ebꞌyaꞌ isreyal Israel. 2 Chawalni:“¡Haꞌ hemiꞌ lahan hakaꞌ hunu noꞌ miꞌe bꞌalam ayko xol ej noꞌ icham bꞌalam!
Haꞌ xol noꞌ bꞌalam tuꞌ yaqꞌ chꞌibꞌo noꞌ miꞌe nixhte yunin.
3 Ay xin huneꞌ yunin noꞌ yaqꞌ chꞌibꞌoj masanto ok noꞌ nime bꞌalamil,
isqꞌaytzen isbꞌa noꞌ istzabꞌni ischibꞌe, chiskꞌuxaytoj,
haꞌ hunpaxo anma chiskꞌuxpaxayto noꞌ.
4 Yabꞌelaxilo isqꞌumal huneꞌ tuꞌ yu nimeta konhobꞌ,
yaykꞌay yul latzꞌabꞌ yu hunteqꞌan nimeta konhobꞌ,
iskꞌal-laxayo yu cadena, yilaxto bꞌey txꞌotxꞌ Egipto.a
5 Hayet yilni noꞌ miꞌe bꞌalam tuꞌ ta kaw txꞌiꞌalxa tzꞌayik chechma noꞌ,
yebꞌ xin ta mach chiyij isbꞌa tzet ayko yipo iskꞌul,
yiniti noꞌ hunxa yunin yaqꞌni chꞌibꞌoj.
6 Haxa yet xachꞌibꞌkanh noꞌ yok noꞌ nime bꞌalamil chilabꞌeykꞌo noꞌ xol hunteqꞌanxa noꞌ bꞌalam.
Iskuyni noꞌ istzabꞌni no noqꞌ iskꞌuxuꞌ, chiskꞌuxnipaxayto noꞌ anma.
7 Yuchkꞌanto cuartel, istanhtzenilo konhobꞌ,
kaw tzꞌinhlokano txꞌotxꞌ, manh anmahil,
yebꞌ xin sunil tzet ay sat txꞌotxꞌ chixiwkanh yet chꞌel yaw noꞌ.
8 Yajaꞌ ej konhobꞌla hoyaniko yinh bꞌay ay tuꞌ,
isqꞌojto txꞌanh hak yibꞌanh noꞌ, yok noꞌ yul latzꞌabꞌ.
9 Yalaxiko cadena yinh, yalaxikto yul yatut bꞌalam, yilaxto tet naj rey Babilonia,
ismajchelaxikto yul cuartel, yunhe matxa chiꞌabꞌelax yul isnuqꞌ iswiꞌla witz bꞌey Israel yet chꞌel yaw.
10 Haꞌ hemiꞌ, lahanpaxo hakaꞌ hunu yoj teꞌ uva xol teꞌ uva, tzꞌunbꞌilayo istiꞌ ha haꞌ,
chaqꞌni teꞌ sat, chiwolnipaxo teꞌ, yuto tzꞌunbꞌilayo teꞌ istiꞌ ha haꞌ.
11 Ay xin isqꞌabꞌ teꞌ kaw kaw elikoj, okniko isvaraho ebꞌnaj rey,
kaw sunil mak ilni teꞌ yuto kaw nimajal yukanh istel teꞌ,
yebꞌ xin kaw tzetkꞌa iswol teꞌ eliloj.
12 Yajaꞌ hokꞌlaxkanh teꞌ uva tuꞌ yu sunil ishowal mak hokꞌnikanh teꞌ,
yaykꞌaykano teꞌ sat txꞌotxꞌ, isqꞌahkanto isqꞌabꞌ teꞌ kaw kaw, istajkaniloj.
Tzujan tuꞌ xin isnhuslaxto isqꞌabꞌ teꞌ.
13 Haꞌ tinanh xin tzꞌunbꞌilayo teꞌ sat txꞌotxꞌ machi yahawo,
bꞌay kaw tajin sat txꞌotxꞌ bꞌay machi ha haꞌ.
14 Haꞌ xol isqꞌabꞌ teꞌ chꞌelilo qꞌa qꞌaꞌ chinhusnito ischon teꞌ yebꞌ sat teꞌ.
Matxa isqꞌabꞌ teꞌ kaw kaw chisje yokniko isqꞌojocho ebꞌnaj rey,” kachi,» xhi Komam.
Haꞌ huneꞌ bꞌit tiꞌ, bꞌit yet bꞌiskꞌulal, haꞌ chibꞌitnhelax yet ay bꞌiskꞌulal.