2 Yul istzotiꞌ Komam Jahawil wetan, yalni hakaꞌ tiꞌ: 3 «Hach iskꞌahol naj winaj, tzotelanh tet ebꞌnaj ichamta winaj Israel tiꞌ, chawalni tet ebꞌnaj: “Hak tiꞌ yalni Komam Jahawil: ¿Tom ay tzet cheyoche heqꞌambꞌeꞌ wetan? Hanin Yahawilintiꞌan itzitz hinan. Chiwalan ta mach chiwaqꞌan ispaj tzet cheyoche heqꞌambꞌeꞌ wetan,” xhi Komam. 4 Hach iskꞌahol naj winaj, hach tiꞌ hal tzet chꞌeliko hunteqꞌan ebꞌnaj tiꞌ, chawaqꞌni yohtanhelo ebꞌnaj yinh isyahbꞌetajil iswatxꞌe yichmam ebꞌnaj. 5 Chawalni tet ebꞌnaj: “Hak tiꞌ yalni Komam Jahawil hakaꞌ tiꞌ: Haꞌ istzꞌayikal yet insikꞌnilojan konhobꞌ Israel, wikanh inqꞌabꞌan, waqꞌni bꞌinaho inbꞌihan tet yuninal yaꞌ Jacob heyichmam, waqꞌni hinbꞌahan yohtanhelo ebꞌnaj bꞌey Egipto. Hayet winikanh inqꞌabꞌ tuꞌan, waqꞌni bꞌinaho inbꞌihan, walnihan: ‘Hanintiꞌan Yahawil hinan, haninan heDiosal,’ kinchihan. 6 Hayet huneꞌ tzꞌayik tuꞌ wikanh inqꞌabꞌan, waqꞌni bꞌinaho inbꞌihan, walnihan ta chiwilojan heyichmam sat txꞌotxꞌ Egipto, chiwinitojan bꞌey huneꞌ txꞌo txꞌotxꞌ saybꞌilxa wuhan, kaw yax sat bꞌay kaw ay noꞌ lech yebꞌ noꞌ kabꞌ. Haꞌ huneꞌ txꞌo txꞌotxꞌ tuꞌ kaw ekꞌna kꞌulchꞌankano txꞌotxꞌ sata sunil txꞌo txꞌotxꞌ. 7 Walnihan tet ebꞌnaj ta chisbꞌejkano ebꞌnaj iswatxꞌen isyahbꞌetajil yinh insatan yebꞌ xin ta mach chetato isbꞌa yu hunteqꞌan istioxh anma Egipto, yuto hanin Yahawil, haninan isDiosal.

8 »”Yajaꞌ xin mach isyije ebꞌnaj tzet walan, yok ebꞌnaj manhkꞌomal wetan. Mach isbꞌej ebꞌnaj iswatxꞌen isyahbꞌetajil, yebꞌ xin mach isbꞌej ebꞌnaj yinayo isbꞌa sata istioxh anma Egipto, walnihan ta chiwayojan inhowalan yibꞌanh ebꞌnaj, chiwanayojan isyaꞌtajil yibꞌanh ebꞌnaj bꞌey Egipto tuꞌ. 9 Yajaꞌ xin matxa wayojan isyaꞌtajil yibꞌanh ebꞌnaj hakaꞌ yu walni tuꞌan, yunhe machi el ispixan inbꞌihan yul sat anma ay bꞌay ay ebꞌnaj, yuto yinh sat anma tuꞌ waqꞌ bꞌinaho inbꞌihan, walnihan ta chiwilojan ebꞌnaj sat txꞌotxꞌ Egipto. 10 Hak tuꞌ yu winilojan ebꞌnaj sat txꞌotxꞌ Egipto, winitojan ebꞌnaj sat txꞌotxꞌ desierto. 11 Waqꞌnihan chejbꞌanile tet ebꞌnaj, waqꞌnihan kuybꞌanile yohtanhelo ebꞌnaj, haꞌ mak xin chibꞌeybꞌalnheni, ay iskawil. 12 Waqꞌnipaxojan tzꞌayik xewilal tet ebꞌnaj, yu yok yechelo inxolbꞌalan yebꞌ ebꞌnaj, yebꞌ yu yohtanhenilo ebꞌnaj ta hanin Yahawilintiꞌan, inpohilojan ebꞌnaj yok ebꞌnaj wuhan. 13 Yajaꞌ xin ok ebꞌnaj Israel manhkꞌomal wetan bꞌey txꞌotxꞌ desierto, mach isbꞌeybꞌalnhe ebꞌnaj chejbꞌanile walan, yintanhenilto ebꞌnaj tzet walan. Ta chisyije ebꞌnaj chejbꞌanile walan ay iskawil ebꞌnaj. Haꞌ ebꞌnaj tuꞌ, mach isyije ebꞌnaj tzꞌayik xewilal, yinilo ebꞌnaj ispixan tzꞌayik tuꞌ, yuxin walan ta chiwayojan inhowalan yibꞌanh ebꞌnaj bꞌey txꞌotxꞌ desierto yu intanhtzenkanilojan ebꞌnaj yinh hunelnhe. 14 Yajaꞌ yunhe mach chiꞌel ispixan inbꞌihan yinh sat anma bꞌay wilojan ebꞌnaj, yuxin matxa intanhtzelojan ebꞌnaj.

15 »”Yebꞌpaxo xin wikanh inqꞌabꞌan yinh ebꞌnaj, sat txꞌotxꞌ desierto waqꞌni bꞌinaho inbꞌihan, walnihan ta mach chꞌokto ebꞌnaj sat txꞌo txꞌotxꞌ walan ta chiwaqꞌan tet, bꞌay kaw ay noꞌ lech yebꞌ noꞌ kabꞌ, txꞌotxꞌ kaw ekꞌna kꞌulchꞌan sata sunil txꞌo txꞌotxꞌ. 16 Yuto yintanhelto ebꞌnaj chejbꞌanile walan tet, yebꞌ xin mach isbꞌeybꞌalnhe ebꞌnaj intzotiꞌan, mach isyijepaxo ebꞌnaj tzꞌayik xewilal, yinilo ebꞌnaj ispixan tzꞌayik tuꞌ, yuto haꞌ yinh tioxh yako yanma ebꞌnaj. 17 Yajaꞌ xin waqꞌ nimankꞌulalan yinh ebꞌnaj, mach inpotxꞌkamojan ebꞌnaj, mach intanhtzekanilojan ebꞌnaj yinh hunelnhe sat txꞌotxꞌ desierto. 18 Walnihan tet yuninal ebꞌnaj bꞌey txꞌotxꞌ desierto: Mach chebꞌeybꞌalnhe isbꞌeybꞌal hemam, mach chekꞌubꞌapaxo ischejbꞌanil ebꞌnaj, yebꞌ xin mach cheyetato hebꞌa yu istioxh ebꞌnaj. 19 Hanintiꞌan heYahawil, heDiosal wehan, ekꞌanhwe yinh chejbꞌanile, kat hekꞌubꞌan kuybꞌanile kat heyaniko yinh ismunil. 20 Nimanojabꞌ yelapno tzꞌayik xewilal yul hesat, tzꞌayik wetan yehi, huneꞌ wakojan yechelo texol yebꞌ hinan, yunhe heyohtanheniloj ta hanin Yahawilintiꞌan, heDiosal.

21 »”Yajaꞌ xin ok ebꞌnaj kꞌahole tuꞌ manhkꞌomal wetan, mach isbꞌeybꞌalnhe ebꞌnaj chejbꞌanile walan, mach iskꞌubꞌa ebꞌnaj intzotiꞌan, mach isyije ebꞌnaj, yajaꞌ xin haꞌ chꞌaqꞌni iskawil makta chiyijeni. Mach isyijepaxo ebꞌnaj tzꞌayik xewilal, yinilo ebꞌnaj ispixan tzꞌayik tuꞌ. Walnihan xin ta chiwayojan isyaꞌtajil yibꞌanh ebꞌnaj, yu yijni isbꞌa inhowalan yinh ebꞌnaj sat txꞌotxꞌ desierto. 22 Yajaꞌ matxa wayojan isyaꞌtajil yibꞌanh ebꞌnaj yu inbꞌihan, yunhe machi el ispixan inbꞌihan tuꞌ yinh sat anma ay yulajla nimeta konhobꞌ ilni winilojan ebꞌnaj sat txꞌotxꞌ Egipto. 23 Yebꞌpaxo xin wikanh inqꞌabꞌan yinh ebꞌnaj bꞌey txꞌotxꞌ desierto, waqꞌni bꞌinaho inbꞌihan, walnihan ta chisajlemito ebꞌnaj wuhan yulajla nimeta konhobꞌ, yu ispujnakanto ebꞌnaj sunil sat yibꞌanhqꞌinal tiꞌ. 24 Yuto machi isbꞌeybꞌalnhe ebꞌnaj chejbꞌanile walan, yintanhenilto ebꞌnaj tzet walan, ismanhkꞌo ebꞌnaj tzꞌayik xewilal, istꞌanhxito ebꞌnaj yinh istioxh ismam, yok tzujno ebꞌnaj yintaj. 25 Yuxin hakinpax tuꞌan, waqꞌan hunteqꞌan chejbꞌanile mach kꞌulo tet ebꞌnaj yebꞌ hunteqꞌan intzotiꞌan mach yaqꞌ iskawil ebꞌnaj.^a 26 Inbꞌejtzonikojan ebꞌnaj yinh yetanto isbꞌa yu isxahanbꞌal yet isnhusni ebꞌnaj isbꞌabꞌel kꞌahol xahanbꞌalil tet istioxh. Haꞌ hunteqꞌan tuꞌ waqꞌan yubꞌ ebꞌnaj, yu yok ebꞌnaj yinh xiwkilal kat yohtanhenilo ebꞌnaj ta haninan Yahawil hinan,” kachi tet ebꞌnaj ichamta winaj Israel, xhi Komam.

27 »Hach iskꞌahol naj winaj tzotelanh tet anma Israel tiꞌ, chawalni tet: “Hak tiꞌ yalni Komam Jahawil hakaꞌ tiꞌ: Haꞌ ebꞌnaj heyichmam, yaqꞌtij ebꞌnaj inhowalan yet yok ebꞌnaj manhkꞌomal wetan yinh hunteqꞌanxa tiꞌ. 28 Hayet winitojan ebꞌnaj sat txꞌo txꞌotxꞌ, yinh txꞌotxꞌ bꞌay waqꞌ bꞌinaho inbꞌihan winikanh inqꞌabꞌan, walnihan ta chiwaqꞌan tet ebꞌnaj; yajaꞌ xin yilto ebꞌnaj sunil hunteqꞌan wonhanlaj yebꞌ sunil teꞌ qꞌebꞌtaj kaw how yeko xaj, isnhusni ebꞌnaj xahanbꞌal tet istioxh bꞌey tuꞌ, yaqꞌnitij ebꞌnaj inhowalan. Isnhusnipaxo ebꞌnaj teꞌ pom kaw xuqꞌ sam, isjobꞌnayo ebꞌnaj vino isyebꞌalqꞌabꞌoj. 29 Inqꞌambꞌenan tet ebꞌnaj: ‘¿Tzet chal yelapno hunteqꞌan bꞌay nahat yekanh^b bꞌay chexto tiꞌ? kinchihan. Yuxin Bama, chihal-lax yinh hunteqꞌan wonhan tuꞌ masanta tinanh,’ xhi Komam,” kachi.

30 »Chawalnipaxo tet anma Israel: “Hak tiꞌ yalni Komam Jahawil hakaꞌ tiꞌ: ¿Tom mach heyetato hebꞌa hakaꞌ yu yetanto isbꞌa heyichmam? ¿tom mach lahano isyahbꞌetajil chewatxꞌe cheyinayo hebꞌa sata ej tioxh hakaꞌ heyichmam tuꞌ? 31 Yuto hayet heyalten hexahanbꞌal, henhusni heyuninal xahanbꞌalil tet hetioxh, heyetanto hebꞌa, yexnheto xin heyetanto hebꞌa yu sunil hunteqꞌan hetioxh tuꞌ tinanh. ¿Tom xin chiwaqꞌan ispaj tzet cheyoche heqꞌambꞌeꞌ wetan hex Israel hex tiꞌ yinh hakaꞌ tuꞌ? Hanin Yahawilintiꞌan itzitz hinan, yaj xawalan ta mach chiwaqꞌan ispaj tzet cheqꞌambꞌe.

32 »”Hex tiꞌ cheyala: ‘Lahanojabꞌ chijute kobꞌa hakaꞌ hunteqꞌanxa konhobꞌ, hakaꞌ anma ay sat yibꞌanhqꞌinal tiꞌ, chiyiyo isbꞌa sata te teꞌ yebꞌ chꞌen chꞌen,’ kexchi. Yajaꞌ mach chu heyu hakaꞌ chꞌekꞌ yinh henabꞌal tuꞌ.

33 »”Hanin Yahawilintiꞌan, itzitz hinan. Haninan chiwalan ta haꞌ yinh sunil inhowalan yebꞌ yinh sunil wipan yebꞌ inqꞌabꞌan leyantoj, chinokan yahawilo teyinh. 34 Chexwilojan yulajla konhobꞌ ay sat txꞌotxꞌ bꞌay kexpujnakantoj, chexinkutxbꞌanikojan yinh sunil wipan yebꞌ inhowalan yebꞌ inqꞌabꞌan leyantoj. 35 Chexwinitojan sat ej txꞌotxꞌ desierto, haꞌ bꞌey tuꞌ xin chijil-le kosat, chiwilnihan tzet chexelikoj. 36 Hakaꞌ yu wilnihan tzet eliko heyichmam sat txꞌotxꞌ desierto bꞌey Egipto. Hanin Yahawilintiꞌan chiwalan ta hak tuꞌ chu wilnihan tzet chexelikoj. 37 Chexekꞌto yalanh inqꞌojochan hakaꞌ chu yekꞌto noꞌ meꞌ yalanh isqꞌojoch naj tanhem meꞌ, hak tuꞌ chexwutehan yu heyijen istꞌinhanil intratohan. 38 Haꞌ mak manhkꞌom texol yebꞌ makta ok manhkꞌomal wetan, chiwilojan texol, chiwitijan yulajla nan konhobꞌal bꞌay ayah, yajaꞌ mach chiꞌapni sat txꞌotxꞌ Israel, hak tuꞌ chu heyohtanheniloj ta hanintiꞌan Yahawil hinan.

39 »”Hex konhobꞌ Israel, hanin Yahawilintiꞌan chiwalan hakaꞌ tiꞌ: Ta mach cheyoche heyijeꞌ tzet chiwalan, okanhwe tzujno yinta hetioxh, kat heyinayo hebꞌa tet, yuto mach cheyije tzet chiwalan. Yajaꞌ tzujanxa xin cheyabꞌen tzet chiwalan, matxa cheyilo ispixan inbꞌihan, matxa xin cheyaqꞌ heyebꞌalqꞌabꞌ yebꞌ heyinayo hebꞌa sata hetioxh.

40 »”Yajaꞌ hanin Yahawilintiꞌan, chiwalan ta haꞌ bꞌey wonhan wetan yehi, huneꞌ wonhan nahat yekanh bꞌey Israel inkonhobꞌan, haꞌ tuꞌ cheyaqꞌ chejaꞌ hebꞌa sunil hex Israel hex tiꞌ wetan. Haꞌ bꞌey tuꞌ chexinchahan, chinqꞌannihan teyet ta cheyaqꞌ heyebꞌalqꞌabꞌ wetan, cheyaqꞌni bꞌabꞌel sat hetzꞌunubꞌ wetan yebꞌ sunil tzet ye tuꞌ wetan yehi. 41 Chexinchahan hakaꞌ chu inchahnihan teꞌ pom kaw xuqꞌ sam chiꞌaqꞌlax yebꞌalqꞌabꞌehal wetan, yet chexwinilojan yulajla konhobꞌ bꞌay pujanexto sat yibꞌanhqꞌinal tiꞌ, kaw niman welapnojan texol yinh sat anma ay yulaj nimeta konhobꞌ. 42 Cheyohtanheniloj ta haninan Yahawil hinan, yet chexwinitijan sat txꞌotxꞌ Israel, txꞌotxꞌ bꞌay wikanh inqꞌabꞌan waqꞌni bꞌinaho inbꞌihan, walnihan ta chiwaqꞌan tet heyichmam. 43 Haꞌ bꞌey tuꞌ chenati istxꞌojal hebꞌeybꞌalnhe yebꞌ sunil tzet hewatxꞌe kexyetantoj, ischiwakanh hekꞌul teyinh hunun hex. 44 Hex konhobꞌ Israel, hanin Yahawilintiꞌan chiwalan ta cheyohtanheloj ta hanintiꞌan Yahawil hinan yet chinyenilojan iskꞌulal inkꞌulan teyinh mach hakaꞌo hebꞌeybꞌal kaw txꞌoj yebꞌ sunil ismachiswalilal hewatxꞌe yet yalanhtokanoj, mach hako tuꞌ chiwaqꞌan teyet,”» xhi Komam.

45 Hul istzotiꞌ Komam Jahawil wetan, yalni hakaꞌ tiꞌ: 46 «Hach iskꞌahol naj winaj, tꞌanhxanhto yinh yetkꞌulal sur chachtzotelto yinh, chawalni isyaꞌtajil chiꞌay yibꞌanh teꞌ qꞌebꞌtala ay bꞌey txꞌotxꞌ Neguev ayko yinh yetkꞌulal sur. 47 Chawalni tet teꞌ qꞌebꞌtaj ay bꞌey Neguev: “Abꞌewe istzotiꞌ Komam Jahawil, hak tiꞌ yalni hakaꞌ tiꞌ: Haninan chintzujbꞌakojan qꞌaꞌ teyinh kat hetzꞌaloj. Chisnhusnikanto qꞌaꞌ sunil teꞌ qꞌebꞌtaj yax yebꞌ sunil teꞌ qꞌebꞌtaj tajin. Haꞌ huneꞌ qꞌaꞌ tuꞌ mach chitanh yah xaj. Haꞌ sunil anma ay bꞌey tuꞌ chitzꞌato yu qꞌaꞌ, chitaichiti qꞌaꞌ bꞌey sur masanta chꞌapni qꞌaꞌ bꞌey norte. 48 Sunil anma chiꞌilni ta hanin Yahawilintiꞌan intzujbꞌakojan qꞌaꞌ yinh, matxa xin chitanhayo qꞌaꞌ,» xhi Komam.

49 Walnihan tet Komam: «¡Ay, Mamin Wahawil! Haꞌ anma tiꞌ chitzoteli, chalni winhan hakaꞌ tiꞌ: “¿Hanhkꞌanhe yechel chiyaqꞌbꞌalnhe yaꞌ yet chitzoteli?” xhi anma,» kinchihan tet Komam.