Chꞌen espada ayahti yeh yet Komam Jahawil
21
Hul istzotiꞌ Komam Jahawil wetan, yalni hakaꞌ tiꞌ: 2 «Hach iskꞌahol naj winaj, tꞌanhxanhto yinh yetkꞌulal Jerusalén, kat hatzotelto yinh watutan, chawalni isyaꞌtajil chiꞌay yibꞌanh txꞌotxꞌ Israel. 3 Chawalni tet Israel: “Hak tiꞌ yalni Komam Jahawil hakaꞌ tiꞌ: Hanintiꞌan chiwakojan howal teyinh, chiwihtijan wespadahan yul yatut, chinpotxꞌnikamojan anma kꞌul yebꞌ anma txꞌoj. 4 Chiwihtijan wespadahan yul yatut, chinpotxꞌnikamojan sunil anma, anma kꞌul, anma txꞌoj, chitaichiti bꞌey sur, kat yapni bꞌey norte. 5 Chiyohtanhenilo sunil anma ta hanin Yahawilintiꞌan wihtijan wespadahan yul yatut, matxa chiwaytojan chꞌen yul yatut,”» xhi Komam. 6 Yalnipaxo Komam: «Hach iskꞌahol naj winaj, okanh oqꞌo yu bꞌiskꞌulal, yu isyaꞌil hawanma, yebꞌ yu isyaꞌil hamotx, oqꞌanh sata anma Israel. 7 Yet chiqꞌambꞌelax tawet: ¿tzet yinh xin chachoqꞌi? kat hataqꞌwi hakaꞌ tiꞌ: “Chinoqꞌan yuto ay huneꞌ isyaꞌtajil chihuli, hayet chiyabꞌen anma isqꞌumal, kat ispaxilo yip yanma, kat ispaxilo yip isqꞌabꞌ, kat issomchakanh isnabꞌal; chipáxilo yip yoj anma hakaꞌ istanhayo ha haꞌ,” kachi. Hanin Yahawilintiꞌan, chiwalan ta chihul huneꞌ isyaꞌtajil tuꞌ, chiyijni isbꞌa,» xhi Komam.8 Yulpaxo istzotiꞌ Komam Jahawil wetan, yalni hakaꞌ tiꞌ: 9 «Hach iskꞌahol naj winaj tzotelanh tet anma Israel chawalni: “Hak tiꞌ yalni Komam Jahawil hakaꞌ tiꞌ:
¡Haꞌ chꞌen espada, haꞌ chꞌen espada, kaw ayxahti yeh,
kaw elnaxa istzꞌilal chꞌen, kaw chijepla chꞌen!
10 Kaw ayxati yeh chꞌen yu ishosnikamo chꞌen anma,
yebꞌ xin kaw sajhoponhe yil-laxti chꞌen nahat hakaꞌ kꞌuh.
Matxa tzalahilal yuto yintanhekanilto konhobꞌ isqꞌojoch inkꞌaholan hakaꞌ hunu komon teꞌ ye yul sat.
11 Haꞌ chꞌen espada tuꞌ kaw sajhoponhe elkaniko chꞌen,
yebꞌ xin kaw ayahti ye chꞌen yu yalaxiko chꞌen yul isqꞌabꞌ naj potxꞌom anma.
12 Hach iskꞌahol naj winaj, elojabꞌ hawaw, kat hawok oqꞌoj,
yuto chiwatojan chꞌen espada tuꞌ xol inkonhobꞌan yebꞌ xol sunil ebꞌnaj yahaw konhobꞌ Israel.
Hun chu istejlaxkamo ebꞌnaj yahaw tuꞌ yinta inkonhobꞌan yu chꞌen espada.
¡Yuxin chakꞌiko istxam hakꞌul yu bꞌiskꞌulal!
13 Yuto ilwebꞌal huneꞌ tiꞌ, yajaꞌ ta chiyintanhelto chꞌen espada tiꞌ teꞌ qꞌojoch, matxa kꞌulo chꞌeliko chꞌen.
Haꞌ huneꞌ tiꞌ hanin Yahawilintiꞌan chiwalan.
14 Hach iskꞌahol naj winaj, hal isyaꞌtajil chihuli, chapoqꞌni haqꞌabꞌ.
Haꞌ chꞌen espada tiꞌ ayxakano ismay ishowal chꞌen,
kaw nimankano anma chistejkamo chꞌen, chiqꞌaxponilto chꞌen yulaj iskꞌul anma.
15 Chipáxilo yip yanma anma, kat yahkanh isyaꞌtajil;
sunil yulaj ispulta anma ay nimeta xiwkilal tet chꞌen espada tiꞌ.
Haꞌ chꞌen espada, hinan chꞌen isjeplahi yebꞌ kꞌulxa ye chꞌen istejnikamo anma.
16 ¡Haꞌ chꞌen espada tiꞌ, chispotxꞌkamo chꞌen anma yinh iswatxꞌ,
kat istejnikamo chꞌen anma yinh ismek,
chispotxꞌnikamo chꞌen anma yet chismeltzon isbꞌa chꞌen!
17 Hanintiꞌan, chiwalan ta chinpoqꞌpaxo inqꞌabꞌan masanta chꞌekꞌayo inhowalan,» xhi Komam Jahawil.
18 Yulpaxo istzotiꞌ Komam Jahawil wetan, yalni hakaꞌ tiꞌ: 19 «Hach iskꞌahol naj winaj, watxꞌe yechel kabꞌebꞌ bꞌeh bꞌay chitit naj rey Nabucodonosor yebꞌ yespada. Haꞌ kabꞌebꞌ bꞌeh tuꞌ huneꞌnhe konhobꞌ bꞌay chiꞌichikanh, haꞌ bꞌay chispoh isbꞌa bꞌeh tuꞌ hako kabꞌebꞌ yechel yu isyenilo tzet konhobꞌal bꞌay chilaapni hunun. 20 Chawatxꞌe yechel huneꞌ bꞌeh bꞌay chitit naj rey Nabucodonosor yebꞌ yespada, chiꞌinapno bꞌey Rabá, istxꞌotxꞌ iskꞌahol naj Amón, haxa hunxa bꞌeh xin chiꞌapni sat txꞌotxꞌ Judá, kat isto bꞌey konhobꞌ Jerusalén, konhobꞌ ayko iskꞌubꞌal. 21 Yuto haꞌ naj rey Nabucodonosor chiꞌok linhno naj bꞌay chispoh isbꞌa bꞌeh, chisqꞌambꞌen naj yabꞌeꞌ tzet bꞌehal chito naj, chistzik naj islitꞌ, chiyaqꞌni naj isqꞌambꞌebꞌal tet istioxh. 22 Haꞌ yinh iswatxꞌ qꞌap naj elilo islitꞌ chiyenito Jerusalén, chalniloj ta haꞌ yinh Jerusalén tuꞌ yilal yaniko naj howal, kat yichiko niman kamikal, kat yah aw yet howal, kat ismaqꞌlaxpoho ispultahil konhobꞌ, kat ishoylaxayo Jerusalén, kat iswatxꞌelaxkanh torre yinhla ishoyanil. 23 Yajaꞌ wal anma ah Jerusalén xin leqꞌtiꞌal hunteqꞌan tiꞌ yalni, yu istrato tꞌinhbꞌabꞌil kaw niman yelapno iswatxꞌe yebꞌ naj, yajaꞌ xin yohta naj Nabucodonosor tuꞌ istxꞌojal anma ah Jerusalén, yuxin chiyito naj ebꞌnaj preso.
24 »Yuxin chalpaxo Komam Jahawil hakaꞌ tiꞌ: “Hex ah Jerusalén, kaw heyelo hetxꞌojal, hepakꞌiko winhan, heyenilo hemul yinh sunil tzetaj hewatxꞌe, yuxin xakexinnatijan, chexwanikojan yul isqꞌabꞌ naj rey Nabucodonosor. 25 Haxa hach isreyal Israel tiꞌ, kaw yahbꞌil hach yebꞌ xin kaw txꞌoj hachkanoj, xaꞌapni istzꞌayikal bꞌay chiꞌay isyaꞌtajil tawibꞌanh yu hatxꞌojal. 26 Hanin Yahawilintiꞌan chiwalan: Chiꞌilaxilo huneꞌ yenhel hawiꞌ, kat yilaxilo hacorona; sunil chihel-laxi. Haꞌ mak chiyiyo isbꞌa chiꞌilaxkanh, haꞌ mak chiyikanh isbꞌa chiꞌilaxayoj. 27 Sunil chiwuchkꞌakantojan, sunil chiwuchkꞌakantojan, yekꞌlenalxanhe chikani, haꞌ huneꞌ isyaꞌtajil tiꞌ chiyij isbꞌa yet chihul naj winaj chinchejtijan iswatxꞌe istoholal, chiwanikojan konhobꞌ tiꞌ yul isqꞌabꞌ naj,” xhi Komam, kachi.
Isyaꞌtajil chihul yibꞌanh ebꞌnaj amonita
28 »Hach iskꞌahol naj winaj, hal hunteqꞌan isyaꞌtajil chihuli, chawalni: “Hak tiꞌ yalni Komam Jahawil yinh ebꞌnaj iskꞌahol naj Amón, ebꞌnaj chibꞌuchwa yinh konhobꞌ Israel. Haꞌ chꞌen espada xaꞌilaxahti chꞌen yul yatut yu ispotxꞌnikamo chꞌen anma, kaw sajhoponhe jilni istzejla chꞌen, chispotxꞌnikamo chꞌen anma. 29 Haꞌ tzet chiyil ebꞌnaj yinh sajsatil yalni, leqꞌtiꞌal, haxa tzet chiyal ebꞌnaj ahbꞌe mach yeloj. Haꞌ chꞌen espada tuꞌ chiꞌalaxiko chꞌen yinh isnuqꞌ hunteqꞌan ebꞌnaj kaw txꞌojkano tuꞌ, ebꞌnaj halbꞌilxa ta yilal ispotxꞌlaxkamoj, yuto xaꞌapni istiempohal bꞌay chitanhtzelaxkanilo yu istxꞌojal. 30 Haꞌ chꞌen espada chiwaqꞌ meltzohojan chꞌen yul yatut. Haꞌ bꞌay kexhchꞌibꞌkanh yebꞌ bꞌay ay hex, haꞌ tuꞌ chiwilan tzet chexelikoj. 31 Chiwayojan inhowalan teyibꞌanh hakaꞌ chu istzujbꞌalaxiko hunu qꞌaꞌ, kat isto bꞌolobꞌ, hak tuꞌ chu wanayojan inhowalan teyibꞌanh. Chexwakojan yul isqꞌabꞌ ebꞌnaj winaj kaw how iswiꞌ yebꞌ kaw helan yuchkꞌanto tzetaj ye tuꞌ. 32 Hex tiꞌ telaj hex yokbꞌal qꞌaꞌ, chichakꞌanbꞌi sat txꞌotxꞌ yu hechikꞌil, matxa mak tiꞌ chexnanitij, yuto hanin Yahawilintiꞌan chiwalan hunteqꞌan tiꞌ,» xhi Komam.