Ismul ebꞌnaj ah Jerusalén
22
Hul istzotiꞌ Komam Jahawil wetan, yalni hakaꞌ tiꞌ: 2 «Hach iskꞌahol naj winaj, hach chaxhok hawalaꞌ isyaꞌtajil chiꞌay yibꞌanh konhobꞌ maqꞌomkamo anma, chayenilo sunil isyahbꞌetajil chiswatxꞌe. 3 Chawalni tet: “Hak tiꞌ yalni Komam Jahawil hakaꞌ tiꞌ: ¡Hex ah Jerusalén, hex chepotxꞌkamo heyet anmahil yul konhobꞌ, hewatxꞌen hetioxh kexetantoj, lanhanxa yul yorahil bꞌay chiꞌay isyaꞌtajil teyibꞌanh! 4 Yu ischikꞌil anma hemaltoj, yuxin xaꞌok hemul, heyetanto hebꞌa yu hunteqꞌan hetioxh hewatxꞌe, yuxin lanhan ishitzti istzꞌayikal bꞌay chiꞌay isyaꞌtajil teyibꞌanh, yebꞌ islahobꞌal hetiempohal, yuxin chexbꞌalaxo yu anma ay yulajla nimeta konhobꞌ, kat hebꞌuchlax yu ej konhobꞌ ay sat txꞌo txꞌotxꞌ. 5 Haꞌ anma ayko hekawilal yebꞌ anma ay nahat chitzebꞌo teyinh. Kaw xaꞌelkano ispixan isbꞌi hekonhobꞌ, kaw xasomchakanto henabꞌal.6 »”Haꞌ ebꞌnaj yahaw konhobꞌ Israel ay yul konhobꞌ tuꞌ, hatatikꞌa yip hunun ebꞌnaj chispotxꞌkamo ebꞌnaj makta chal iskꞌul. 7 Matxa yelapno mame miꞌe yul hesat yul konhobꞌ, cheyetan anma nan konhobꞌal ay texol, cheyinilo tzet ay nixhte mebꞌaꞌ unin ay texol, yebꞌ ebꞌix hunix ay yul hekonhobꞌ. 8 Matxa yelapno watutan yul hesat, cheyinilo ispixan tzꞌayik xewilal. 9 Haꞌ yu bꞌaltzotiꞌ, ay mak tiꞌ machi ismul chepotxꞌkamoj, chexwaꞌpaxo iswiꞌla wonhan yet cheyekꞌtzen qꞌinh tet hetioxh, chewatxꞌen ismachiswalilal yul konhobꞌ. 10 Ay hex tiꞌ heyilo ispixan hemam, heway yebꞌ yixal hemam tuꞌ, ay hex tiꞌ kexway yebꞌ heyixal yet lanhan yilni istxꞌawobꞌal. 11 Ay hex tiꞌ hewatxꞌe mule yebꞌ yixal heyet anmahil, ay hexpaxo hewatxꞌe mule yebꞌ heyalibꞌ, ay hex tiꞌ kexipiko yinh iskutzꞌin hemam. 12 Ay hex tiꞌ kextolalaxi yu hepotxꞌnikamo heyet anmahil, ay hex tiꞌ niman yal chꞌen melyu heqꞌana yet heyaqꞌni chꞌen kꞌamil. Ay hex tiꞌ kexok eleqꞌ yinh heyet anmahil heyinilo yinh sunil hehowal tzet aya. Hanin Yahawilintiꞌan chiwalan ta kinhenahulnhetojan.
13 »”Hanintiꞌan intzaqꞌ inqꞌabꞌan yuto kaw chíwa inkꞌulan wilnihan heyaniko heyanma yinh qꞌalomal, hepotxꞌnikamo anma, ismalikꞌo ischikꞌil heyu yul konhobꞌ. 14 Hex tiꞌ chimhenah ta ay yip heyanma yebꞌ yip heqꞌabꞌ yinh istzꞌayikal yet chexok linhno yinh insatan yet chiwanayojan isyaꞌtajil teyibꞌanh. Hanin Yahawilintiꞌan, haꞌ tzet xawalan chinwatxꞌehan. 15 Chexsajlemito wuhan yulajla nimeta konhobꞌ, chexpujnakanto yulajla konhobꞌ ay sat txꞌo txꞌotxꞌ tiꞌ, chexinsajnhenan yinh sunil hetzꞌilal. 16 Hex kaw hex cheyilo hepixan sata anma ay yulajla nimeta konhobꞌ,”» xhi Komam.
17 Istzotelpaxo Komam Jahawil wetan, yalni hakaꞌ tiꞌ: 18 «Hach iskꞌahol naj winaj, haꞌ anma Israel tiꞌ, lahan xaꞌelkaniko hakaꞌ istzꞌilal chꞌen plata, chꞌen bronce, chꞌen estaño, chꞌen hierro yebꞌ chꞌen plomo yet chinhuslax chꞌen yul horno. 19 Yuxin hanin Yahawilintiꞌan, chiwalan: “Hex ah Israel yu kexmeltzokaniko hakaꞌ istzꞌilal chꞌen plata, yuxin chexinkutxbꞌakojan yul konhobꞌ Jerusalén, 20 hakaꞌ chu iskutxbꞌalaxiko chꞌen plata, chꞌen bronce, chꞌen hierro yebꞌ chꞌen estaño yul horno yunhe isnhuslaxi, kat yulitoj, hak tuꞌ chu kexinnhusnihan yu sunil inhowalan. Chexinkutxbꞌakojan, chexinnhusnihan. 21 Chexinkutxbꞌakojan, chinxunitojan qꞌaꞌ teyibꞌanh yu sunil inhowalan, kat heyulito xol qꞌaꞌ, 22 hakaꞌ chu yulito chꞌen plata xol qꞌa qꞌaꞌ, hak tuꞌ chu heyulitoj; hak tuꞌ chu heyohtanheniloj ta hanin Yahawilintiꞌan wayojan inhowalan teyibꞌanh,” kachi,» xhi Komam.
23 Yulpaxo istzotiꞌ Komam Jahawil wetan hakaꞌ tiꞌ: 24 «Hach iskꞌahol naj winaj, hal tet anma Israel hakaꞌ tiꞌ: “Haꞌ hetxꞌotxꞌ mach sajo txꞌotxꞌ, mach chiyaqꞌaꞌ haꞌ nhabꞌ yibꞌanh txꞌotxꞌ yinh istzꞌayikal yet chiwanayojan inhowalan teyibꞌanh. 25 Haꞌ ebꞌnaj chisbꞌaliko isbꞌa inchejabꞌojan texol, pakꞌiko ebꞌnaj howal yinh yet anmahil, lahan ebꞌnaj hakaꞌ noꞌ bꞌalam chixitnito no noqꞌ, chispotxꞌkamo ebꞌnaj anma, chiyelqꞌanilo ebꞌnaj isqꞌalomal yebꞌ tzetaj ayah. Kaw ahkanokanh isbꞌisil ebꞌix ix kankano hunixal yul konhobꞌ yu ebꞌnaj. 26 Ebꞌyaꞌ sacerdote ay yul konhobꞌ, mach isyije chejbꞌanile walan, yinilo ispixan watutan. Mach istxum ebꞌyaꞌ bꞌaytet kꞌul wetan yehi yebꞌ bꞌaytet txꞌoj; mach istxum bꞌaytet saj hakaꞌ yalni intzotiꞌan yebꞌ bꞌaytet mach sajoj. Machi yelapno tzꞌayik xewilal yul sat ebꞌyaꞌ, kaw chꞌel inpixanan xol yuto machi welapnojan yul sat ebꞌyaꞌ. 27 Haxa ebꞌnaj yahaw konhobꞌ Israel tiꞌ, lahan ebꞌnaj hakaꞌ noꞌ oj chixitnikamo no noqꞌ, yuto chispotxꞌkamo ebꞌnaj anma, chaqꞌni maloto ebꞌnaj ischikꞌil, yu yok ebꞌnaj qꞌalomal yu iswatxꞌen istxꞌojal tuꞌ. 28 Haꞌ ebꞌnaj chisbꞌaliko isbꞌa inchejabꞌojan, lahan ebꞌnaj hakaꞌ mak chimasniko tzꞌotzꞌew repellohal, yuto haꞌ tzet chil ebꞌnaj yul iswayik leqꞌtiꞌal, haꞌ tzet chistxum ebꞌnaj mach yeloj. Chalni ebꞌnaj hakaꞌ tiꞌ: ‘Hak tiꞌ yalni Komam Jahawil,’ xhi ebꞌnaj, yajaꞌ matzet chiwalan. 29 Haxa konhobꞌ Israel tiꞌ xin, hanhkꞌanhe yetan yet anmahil yebꞌ xin eleqꞌ chu, potxꞌwalnhetikꞌa chu yinh anma mebꞌaꞌ matzet aya. Chetanpaxo ebꞌnaj anma nan konhobꞌal yu mach istohol chaqꞌ ebꞌnaj. 30 Insayan xol anma Israel tiꞌ ta ay hunu naj winaj chikolnilo konhobꞌ tiꞌ, kat istxahli wetan yunhe mach chintanhtzelojan yinh hunelnhe, yajaꞌ xin machi hunu mak ilcha wuhan. 31 Yuxin chiwayojan inhowalan yibꞌanh ebꞌnaj, chintanhtzenilojan ebꞌnaj. Hanin Yahawilintiꞌan chiwalan, ta hakaꞌtikꞌa tzet isbꞌeybꞌalnhe ebꞌnaj, hak tuꞌ isyaꞌtajil chiwayojan yibꞌanh iswiꞌ ebꞌnaj,”» xhi Komam Jahawil.