Samaria yebꞌ Jerusalén lahan hakaꞌ kawanh ebꞌix ix isnoh isbꞌa
23
Hul istzotiꞌ Komam Jahawil wetan, yalni hakaꞌ tiꞌ: 2 «Hach iskꞌahol naj winaj, ay kawanh ebꞌix ix isnoh isbꞌa, 3 yettaxtikꞌa kaw nixhte qꞌopoto ebꞌix yichiko iswatxꞌen ebꞌix mule yebꞌ ebꞌnaj winaj bꞌey Egipto, haꞌ bꞌey tuꞌ tzabꞌobꞌtanhelax yim ebꞌix, hak tuꞌ xin matxa qꞌopo yukano ebꞌix. 4 Haꞌ ix bꞌabꞌel, Ahola isbꞌi ix, haꞌ ix tiꞌ yechel konhobꞌ Samaria; haxa ix isnoh ix Aholiba isbꞌi ix, haꞌ ix yechel konhobꞌ Jerusalén. Haꞌ ebꞌix tiꞌ hakaꞌta ok ebꞌix wixalojan, ispitzkꞌa inkꞌaholan yebꞌ inkutzꞌinan yebꞌ ebꞌix.5 »Hayet iqꞌbꞌil ix Ahola wuhan, issayni ix iswinaj, yochento ix ebꞌnaj asirio ayayo iskawilal. 6 Haꞌ ebꞌnaj asirio tuꞌ, qꞌap qꞌap kajmutzꞌmunhe ayko xilo isqꞌap ebꞌnaj, yahawil konhobꞌ ebꞌnaj, yebꞌ xin yahawil soldadopaxo ebꞌnaj. Sunil ebꞌnaj tuꞌ kaw tzehtanhe ebꞌnaj yebꞌ xin kaw kawla winaj ebꞌnaj, kaw helan ebꞌnaj yekꞌ yibꞌanh cheh. 7 Haꞌ ebꞌnaj kawla winaj xol ebꞌnaj asirio yocheto ix Ahola tuꞌ, iswatxꞌen ix mule yebꞌ sunil ebꞌnaj, yok ix yinoyo isbꞌa sata istioxh ebꞌnaj. 8 Hataxtikꞌa yet qꞌopo xin yet ay ix bꞌey Egipto issomchakanto yul iswiꞌ ix, maxhtikꞌa xin chisbꞌej ix iswinajli, haꞌ ebꞌnaj Egipto tuꞌ tzabꞌobꞌtanhen yim ix, iswatxꞌen ebꞌnaj mule yebꞌ ix. 9 Yuxin inbꞌejtzokojan ix yul isqꞌabꞌ ebꞌnaj asirio, ebꞌnaj iswinaj ix, yuto haꞌ ebꞌnaj yocheto ix. 10 Yilaxilo ispixan ix yu ebꞌnaj, yinikanilo ebꞌnaj yunin ix tet, istejnikamo ebꞌnaj ix yu espada. Haꞌ tzet utelax ix tuꞌ kaw bꞌinakano xol ebꞌix ix, yu isyaꞌtajil ay yibꞌanh ix.
11 »Haxa ix Aholiba, isnoh ix xin, yil ix hunteqꞌan tuꞌ, yajaꞌ xin kaw palkꞌon ix iswatxꞌen tzet chal iskꞌul sata ix Ahola, yok ix winajloj. 12 Yochento ix ebꞌnaj asirio, ayayo iskawilal, haꞌ ebꞌnaj tuꞌ yahaw konhobꞌ ebꞌnaj, yebꞌ xin yahaw soldado ebꞌnaj, kaw nanxa islow ischꞌen ebꞌnaj yet howal, kaw helan ebꞌnaj yekꞌ yibꞌanh cheh. Sunil ebꞌnaj tuꞌ kaw tzehtanhe ebꞌnaj, yebꞌ xin kaw kawla winaj ebꞌnaj. 13 Wilan yetanto isbꞌa ix Aholiba hakaꞌ isnoh, kaw lahannhe isbꞌeybꞌal ebꞌix iskawanhil. 14 Yajaꞌ xin kaw palkꞌon ix Aholiba tuꞌ iswatxꞌen mule yebꞌ ebꞌnaj winaj, yilniko ix yechel ebꞌnaj caldeo kaj jilni, tzꞌibꞌnhebꞌiliko yinh bꞌitzꞌabꞌ. 15 Haꞌ yechel ebꞌnaj tuꞌ ayko iscincho yinh yiktaj bꞌay ayko yespada, yebꞌ xin ayahto isqꞌuxil iswiꞌ, lahan jilni hakaꞌ ebꞌnaj yahawil soldado ah Babilonia pitzkꞌana sat txꞌotxꞌ Caldea. 16 Hayet yilniko ix yechel ebꞌnaj ah Babilonia tuꞌ, yocheniko ix ebꞌnaj, ischejnito ix ischejabꞌ tet ebꞌnaj bꞌey txꞌotxꞌ Caldea. 17 Yapni ebꞌnaj ah Babilonia iskꞌatanh ix, isway ebꞌnaj yebꞌ ix, iswatxꞌen ebꞌnaj mule yebꞌ ix, yetaxkanto ix yu ebꞌnaj. Tzujan tuꞌ xin isyahnikanh ix ebꞌnaj yuto kaw txꞌoj elkaniko ix yu ebꞌnaj. 18 Hak tuꞌ yu isbꞌejtzonkaniko isbꞌa ix yul isqꞌabꞌ istxꞌojal, iswatxꞌen mule yebꞌ ebꞌnaj winaj yinh sat konhobꞌ, chisyeni ix isnimanil tet ebꞌnaj winaj, yuxin inyahkanhan ix yinh sunil wanmahan hakaꞌ yu inyahnikanhan isnoh ix. 19 Kaw xin palkꞌonkanokanh ix iswatxꞌen mule yebꞌ ebꞌnaj winaj, chisnaniti ix mule iswatxꞌe yinh isqꞌopohal yebꞌ ebꞌnaj ah Egipto. 20 Kaw ok yanma ix yinh ebꞌnaj winaj kaw maxhtikꞌa chitxꞌixwininoj, yochelen isbꞌa hakaꞌ noꞌ burro yebꞌ hakaꞌ noꞌ cheh yet chisajchi. 21 Hak tuꞌ yu isnahniti ix Aholiba tuꞌ tzetaj yoche isnimanil yet nichꞌan qꞌopoto yet istzabꞌobꞌtanhen ebꞌnaj ah Egipto yim ix.
22 »Yuxin hanin Yahawilintiꞌan, chiwalan: “Hach Aholiba, haninan chiwitijan ebꞌnaj hawinaj yaqꞌaꞌko howal tawinh, ebꞌnaj chayah tinanh; chul ebꞌnaj kat kach ishoynayo ebꞌnaj. 23 Haꞌ ebꞌnaj tuꞌ, haꞌ ton ebꞌnaj ah Babilonia, yebꞌ sunil ebꞌnaj caldeo, ebꞌnaj ah Pecod, ebꞌnaj ah Soa, yebꞌ ebꞌnaj ah Coa, kat yulpaxo sunil ebꞌnaj ah Asiria yinta ebꞌnaj. Haꞌ ebꞌnaj tuꞌ nabꞌa tzehtaj ebꞌnaj yebꞌ xin kaw kawla winaj ebꞌnaj, yahaw konhobꞌ ebꞌnaj, yebꞌ xin yahaw soldado ye ebꞌnaj. Kaw nime winaj ebꞌnaj yebꞌ xin kaw aykano yelapno ebꞌnaj, sunil ebꞌnaj chꞌekꞌ yibꞌanh cheh. 24 Chul ebꞌnaj tuꞌ tawinh yebꞌ txꞌiꞌal iscarruaje, kaw hunbꞌulan ebꞌnaj soldado ay yulajla konhobꞌ chul tawinh, chachishoynayo ebꞌnaj, iqꞌbꞌil ischꞌen ebꞌnaj yet howal yebꞌ chꞌen escudo, chꞌen paves yebꞌ chꞌen yelmo chiꞌahto yinh iswiꞌ ebꞌnaj. Haninan chiwaqꞌan yip ebꞌnaj yilni tzet chachelikoj, hakaꞌ chal iskuybꞌanil iskonhobꞌ ebꞌnaj. 25 Hanintiꞌan chiwitijan inhowalan tawinh, chachyaqꞌnipaxo ekꞌoyaꞌ ebꞌnaj chiꞌaniko howal tawinh tuꞌ yinh sunil ishowal. Chiskꞌupilto ebꞌnaj hatxam, yebꞌ hatxikin, haxa hawet konhobꞌ itzitzto chitokani, chipotxꞌlaxkamo yu espada. Chiyilo ebꞌnaj, ebꞌnaj hawunin yebꞌ ebꞌix hawunin, kat kach isnhusnikanto ebꞌnaj. 26 Chiyilo ebꞌnaj xil haqꞌap, kat yinilo ebꞌnaj sunil chꞌen chꞌen ayko hawelawiloj. 27 Chitanhkanilo tzet yoche hanimanil, yet hawatxꞌen mule yebꞌ ebꞌnaj winaj sat txꞌotxꞌ Egipto, matxa chaxhtꞌanhxito yinh ebꞌnaj Egipto tuꞌ yebꞌ xin matxa bꞌaqꞌinh chanati txꞌotxꞌ. 28 Yuto hak tiꞌ yu yalnipaxo Komam Jahawil hakaꞌ tiꞌ: Haninan chachwakojan yul isqꞌabꞌ ebꞌnaj winaj hayaha, ebꞌnaj bꞌay chíwa hakꞌul. 29 Haꞌ ebꞌnaj tuꞌ chul yaqꞌaꞌko howal tawinh yinh sunil ishowal, chiyelqꞌanto ebꞌnaj sat hatzꞌunubꞌ, kat kach istꞌilbꞌankano ebꞌnaj, kat yixtanhwikanilo hatxꞌojal yebꞌ hamul hawako yebꞌ ebꞌnaj winaj. 30 Chiwatxꞌelax hunteqꞌan isyaꞌtajil tuꞌ tawinh, yuto hawatxꞌe mule yebꞌ hunteqꞌan nimeta konhobꞌ tuꞌ, hawetanto habꞌa hawok hawinayo habꞌa sata hunteqꞌan istioxh nimeta konhobꞌ tuꞌ. 31 Haꞌ tzet iswatxꞌe hanoh, haꞌ xin habꞌeybꞌalnhe, yuxin ha isyaꞌtajil wayojan yibꞌanh ix, haꞌ chiwapaxayojan tawibꞌanh,”» xhi Komam.
32 Yalnipaxo Komam Jahawil hakaꞌ tiꞌ:
«Haꞌ huneꞌ niman vaso kaw nimajal yebꞌ kaw nahat yehayto yich waqꞌan yukꞌuꞌ ix hanoh,
haꞌ chiwaqꞌpaxojan hawukꞌuꞌ, huneꞌ vaso tuꞌ kaw nimajal yul.
Haꞌ anma ay yul nimeta konhobꞌ chitzebꞌi tawinh, kat kach isbꞌuchni.
33 Hakaꞌta chachukꞌikanokanh kat hawabꞌen isyaꞌil yu tzet ayayto yul vaso tuꞌ,
chihul isyaꞌtajil tawibꞌanh kat hatanhkaniloj hakaꞌ yu hanoh Samaria.
34 Chawukꞌ tzet ayayto yul vaso tuꞌ masanto chalahkanilo sunil, lahwi tuꞌ,
kat hapohnito huneꞌ vaso tuꞌ, haxa ispohlenal chawikanh kat hawaniko islahwilal hawim yu,
yuto hanin Yahawilintiꞌan chiwalan hunteqꞌan tiꞌ,» xhi Komam.
35 Yuxin yalpaxo Komam Jahawil hakaꞌ tiꞌ: «Yu kinhanahulnhetojan, hawaniti hawichinh wetan, yu huneꞌ tuꞌ xin chawaqꞌle isyaꞌtajil yu tzet hawaqꞌ yoche hanimanil yet hawatxꞌen mule yebꞌ ebꞌnaj winaj,» xhi Komam.
36 Lahwi tuꞌ yalni Komam Jahawil wetan: «Hach iskꞌahol naj winaj, ¿tom mach chachok hawilaꞌ tzet chiꞌeliko ix Ahola yebꞌ ix Aholiba, chawalnilo isyahbꞌetajil iswatxꞌe ebꞌix? 37 Yuto haꞌ ebꞌix tuꞌ issay ebꞌix iswinaj, yebꞌ xin bꞌakbꞌiliko chikꞌ yinh isqꞌabꞌ ebꞌix, kinisbꞌejkanojan ebꞌix, yok ebꞌix yinoyo isbꞌa sata tioxh, isnhusnito ebꞌix wuninalan xahanbꞌalil tet istioxh. 38 Iswatxꞌenpaxo ebꞌix hunteqꞌan istxꞌojal tiꞌ: Yetato ebꞌix watutan yinh huneꞌ tzꞌayik tuꞌ, yinilo ebꞌix ispixan tzꞌayik xewilal, tzꞌayik wetan yehi. 39 Haꞌ yinh istzꞌayikal yet isnhusni ebꞌix yunin xahanbꞌalil tet istioxh, yokto ebꞌix yul watutan, yinilo ebꞌix ispixan watuttuꞌan. Haꞌ hunteqꞌan tuꞌ iswatxꞌe ebꞌix yul watutan. 40 Yebꞌpaxo xin ischejto ebꞌix ischejabꞌ yalno tet ebꞌnaj winaj ay kaw nahat, ta chitit ebꞌnaj iskꞌatanh ebꞌix. Hayet yapni ebꞌnaj iskꞌatanh ebꞌix yok ebꞌix axhnoj, yaniko ebꞌix yanhal isbꞌaqꞌ sat, yaniko ebꞌix chꞌen ome yebꞌ chꞌen uwe yelawiloj, yunhe ischani ebꞌix ebꞌnaj, yuto kaw chitzala ebꞌix yinh ebꞌnaj. 41 Yay tzꞌonhno yul huneꞌ tzꞌonhobꞌal kaw kꞌul ay ismay, iswatxꞌelaxayo mexha sata tzꞌonhobꞌal tuꞌ, yanayo ebꞌix inpoman yebꞌ waceitehan sat mexha tuꞌ. 42 Xanhe chiwejcha hunbꞌulan ebꞌnaj winaj iskꞌatanh ebꞌix yekꞌtzen qꞌinh, yapnipaxo ebꞌnaj komon winaj iskꞌatanh ebꞌix, haꞌ ton ebꞌnaj sabeo ay sat txꞌotxꞌ desierto, yaniko ebꞌnaj chꞌen pulsera yinh isnuqꞌ isqꞌabꞌ ebꞌix, yanahto ebꞌnaj corona kaw kꞌulchꞌankano jilni yinh iswiꞌ ebꞌix.
43 »Walnihan yinh ix kaw ixnamxa iswinajli tuꞌ: “¿Tom xin chito yixnhe ebꞌnaj ix? hakpax tuꞌ ix, ¿tom xin chito iswinajnhe ix ebꞌnaj?” kinchihan. 44 Yuto apni ebꞌnaj winaj iskꞌatanh ebꞌix hakaꞌ chu yapni ebꞌnaj winaj iskꞌatanh ix ix txꞌoj ye iswiꞌ, hak tuꞌ yu yapni ebꞌnaj iskꞌatanh ix Ahola yebꞌ ix Aholiba, ebꞌix kaw mulumkanoj. 45 Yuxin haꞌ ebꞌnaj winaj tohol isnabꞌal chiꞌilni tzet chiꞌeliko ebꞌix, hakaꞌ isyaꞌtajil chiꞌalaxayo yibꞌanh ebꞌix ix txꞌoj ye iswiꞌ yebꞌ xin hakaꞌ isyaꞌtajil chiꞌay yibꞌanh ebꞌix potxꞌomkamo anma, hak tuꞌ chꞌutelax ebꞌix, yuto haꞌ ebꞌix tiꞌ txꞌoj ye iswiꞌ ebꞌix, yebꞌ xin bꞌakbꞌiliko chikꞌ yinh isqꞌabꞌ ebꞌix.
46 »Yuxin hak tiꞌ yu yalnipaxo Komam Jahawil hakaꞌ tiꞌ: “Haninan chiwaqꞌtijan hunbꞌulan ebꞌnaj soldado yaqꞌaꞌko howal yinh ebꞌix chiwanikojan niman xiwkilal yinh, kat yelqꞌalaxto tzetaj aya.a 47 Chiqꞌojlaxkanh ebꞌix yu chꞌen chꞌen yu anma, kat ispotxꞌlaxkamo ebꞌnaj yunin ebꞌix, yebꞌ ebꞌix yunin ebꞌix, kat isnhuslaxkanto yatut ebꞌix. 48 Hak tuꞌ chu waqꞌni tanholojan istxꞌojal tzetaj choche ix Ahola yebꞌ ix Aholiba ay yul ismajul txꞌotxꞌ Israel, chiyilni sunil ebꞌix ix huneꞌ tiꞌ, hak tuꞌ xin mach chisbꞌeybꞌalnhe ebꞌix istxꞌojal iswatxꞌe ebꞌix. 49 Haꞌ istxꞌojal iswatxꞌe ebꞌix tuꞌ yibꞌanh ebꞌix chitokanoj, chistohlan ismul yakoj yet yok yinoyo isbꞌa sata tioxh; hak tuꞌ chu yohtanheniloj ta hanintiꞌan Yahawil hinan,”» xhi Komam.