Yechel yinh huneꞌ xi chihuji
24
Yinh isbꞌalonhebꞌ habꞌil, yinh 10 (islahonhebꞌ) ixahaw, yet 10 (islahonhebꞌ) tzꞌayik yinh ixahaw tuꞌ, yul istzotiꞌ Komam Jahawil wetan, yalni hakaꞌ tiꞌ: 2 «Hach iskꞌahol naj winaj tzꞌibꞌnhekanayo huneꞌ tzꞌayik tiꞌ, yebꞌ yinh tzet ixahawil yebꞌ yinh tzet tiempohal, yuto yinh huneꞌ tzꞌayik tiꞌ chiyako naj rey Nabucodonosor howal yinh Jerusalén, 3 kat hatzotel tet konhobꞌ Israel kaw manhkꞌomkano tiꞌ, chawaniko yechel tet yet chachtzoteli, chawalni: “Hak tiꞌ yalni Komam Jahawil hakaꞌ tiꞌ:Ahto hunu chꞌen xi yibꞌanh qꞌaꞌ, chawanayto haꞌ yul.a
4 Chawanayto noꞌ chibꞌe yul xi tuꞌ, noꞌ chibꞌe kaw kꞌul,
yebꞌ noꞌ isbꞌul yebꞌ noꞌ ischibꞌehal istel yichinh,
yebꞌ noꞌ bꞌaj, sunil noꞌ kaw kꞌul.
5 Chawiniti hunu noꞌ meꞌ kaw kꞌul, kaw bꞌaqꞌich,
chawanikto teꞌ siꞌ yalanh chꞌen xi tuꞌ,
haxinwal kaw chihuji masanto chitah noꞌ bꞌaj yinh kaw kꞌul yul chꞌen xi tuꞌ,” xhi Komam.
6 »Yalnipaxo Komam Jahawil hakaꞌ tiꞌ:
“¡Ay, kaw kꞌanchꞌan konhobꞌ Jerusalén, konhobꞌ potxꞌomkamo anma!
Haꞌ konhobꞌ tiꞌ, lahan hakaꞌ hunu xi ay sam isqꞌuxewal, yuto maxhto chiꞌilaxilo istzꞌilal.
Chawinahti noꞌ chibꞌe yul xi tuꞌ yinh hununtajil, yajaꞌ mach chasikꞌle hawinati noꞌ.
7 Haꞌ konhobꞌ tiꞌ kaw nohna yu ischikꞌil anma xapotxꞌlaxkamoj,
haꞌ chikꞌ tuꞌ maxhtaj yibꞌanh txꞌo txꞌotxꞌ tixhmoyoj yu ismujnikanto pojoj,
wal xin yibꞌanh chꞌen chꞌen ayi.
8 Haꞌ ischikꞌil anma ay tixhna yibꞌanh chꞌen chꞌen tuꞌ mach chinhokanhan yebꞌ xin mach chiwakojan yenhel.
Yu istit lemna inhowalan chiwaqꞌnihan ispaj tet anma potxꞌnikamo anma malto ischikꞌil tuꞌ,” xhi Komam.
9 Yuxin yalpaxo Komam Jahawil hakaꞌ tiꞌ:
“¡Ay, kaw kꞌanchꞌan konhobꞌ potxꞌomkamo anma!
Hankawhinan chinwatxꞌehan bꞌay chihojlaxkamo hunteqꞌan potxꞌom anma tuꞌ.
10 Kaw niman teꞌ siꞌ chinkutxbꞌayojan chiwanikojan qꞌaꞌ yinh teꞌ,
yu istanhkanilo yal noꞌ chibꞌe, kat istzꞌakanto noꞌ, kat istzꞌapaxkanto noꞌ bꞌaj.
11 Lahwi tuꞌ, kat hawanipaxahto chꞌen xi yibꞌanh qꞌa qꞌaꞌ tuꞌ yinh matxa tzet ayayto yul,
kat istzꞌato yich chꞌen, kaw kaj txaltxonhe chꞌeliko chꞌen yu qꞌaꞌ,
yu isnhusnito qꞌaꞌ istzꞌilal yebꞌ isqꞌuxewal chꞌen.
12 »”Yajaꞌ xin nabꞌanhe nhuslax chꞌen yu qꞌa qꞌaꞌ, yuto maxhtikꞌa el istzꞌilal yebꞌ isqꞌuxewal chꞌen. 13 Hex ah Jerusalén chꞌay isyaꞌtajil teyibꞌanh yu isyahbꞌetajil istxꞌojal heyaqꞌ yoche heyanma, yuto wochehan kexwaqꞌ sajbꞌojan, yajaꞌ mach heyaqꞌ sajbꞌo hebꞌa, yajaꞌ hato yet chiwayojan inhowalan teyibꞌanh katto hesajbꞌikanoj. 14 Haꞌ hunteqꞌan tiꞌ hanin Yahawilintiꞌan chiwalan, yuxin chiyij isbꞌa tzet chiwalan tiꞌ, kat yul isyaꞌtajil teyibꞌanh. Haꞌ tzet xawalan masan chiyij isbꞌa mach chinmanhkꞌotojan, yebꞌ xin mach chitzꞌay inkꞌulan teyinh. Hanin Yahawilintiꞌan chiwalan ta hakaꞌtikꞌa tzet hebꞌeybꞌalnhe yebꞌ tzet hewatxꞌe, hak tuꞌ isyaꞌtajil chiwayojan teyibꞌanh,”» xhi Komam Jahawil.
Iskamikal yixal yaꞌ Ezequiel
15 Istzotelpaxo Komam Jahawil wetan, yalni hakaꞌ tiꞌ: 16 «Hach iskꞌahol naj winaj, wal tinanh chiwilojan hawixal kaw ochebꞌil hawu, kaw hunepnhechꞌan, kat iskamkanh ix, yajaꞌ xin mach chawiqꞌ bꞌiskꞌulal yebꞌ xin mach chachoqꞌ yinh ix. 17 Machojabꞌ chayelo habꞌiskꞌulal yinh ix, mach chakꞌubꞌa istzꞌayikal bꞌiskꞌulal hakaꞌ chute anma yet ay kamom, wal xin kꞌalahto isqꞌuxil hawiꞌ, ayko haxanhabꞌ yet chachekꞌi, mach chawako yenhel hasat chiyenilo bꞌiskꞌulal, yebꞌ xin mach chaloh tzet chislo anma bꞌiskꞌulal ye yet ay kamom,» xhi Komam wetan.
18 Hayet sahabꞌ yet yalanh chuman kintzotelan tet konhobꞌ, haxa yet qꞌejbꞌiyalil iskamkanh wixalan, haxa yet hunxa tzꞌayik yinh sahabꞌ sakꞌayal inyijenan hakaꞌ yu yalni Komam Jahawil wetan. 19 Yuxin isqꞌambꞌe anma ay yul konhobꞌ wetan:
—Halilo jetanh tzet chal yelapno hunteqꞌan tzet chawatxꞌe tiꞌ, xhi.
20 Intaqꞌwihan tet anma tuꞌ:
—Tzotel Komam Jahawil wetan, yalni hakaꞌ tiꞌ: 21 “Hal tet anma Israel ta hanin Yahawilintiꞌan chiwalan: Chiwaqꞌ etaxotojan watutan ay texol bꞌay kaw chextzalahi, yebꞌ kaw cheyoche, watutan kaw hemay yebꞌ heyip yekoj. Haꞌ ebꞌnaj hekꞌahol yebꞌ ebꞌix hekutzꞌin hebꞌejkano bꞌey Jerusalén chitejlaxkamo yu chꞌen espada,” xhi Komam. 22 Walnihan hakaꞌ tiꞌ: “Yajaꞌ cheyute hakaꞌ wutehan. Mach cheyako yenhel hesat cheyenilo hebꞌiskꞌulal, mach cheloh tzet chilolax yet ay bꞌiskꞌulal yet ay kamom. 23 Cheyahto isqꞌuxil hewiꞌ, ayko hexanhabꞌ yet chexekꞌi, mach cheyiqꞌ bꞌiskꞌulal, mach chexoqꞌ yinh heyuninal tuꞌ. Wal xin nixhtejal hetanhkanilo yu hetxꞌojal, cheyal-len isyaꞌtajil teyet hunun hex. 24 Haninan chinokan yechelo texol, sunil tzet inwatxꞌehan cheyute; hayet chiyuni tzet chiwalan teyet tiꞌ, cheyohtanheniloj tato ta Komam Jahawil yahawil yeko jinh,” kinchihan.
25 Yalnipaxo Komam Jahawil wetan: «Hach iskꞌahol naj winaj, chiwilojan watutan xol anma Israel, watutan kaw ayko ismayoj yebꞌ yipoj, yebꞌ xin bꞌay kaw chitzalakoj yebꞌ chiyoche yilaꞌ. Chintanhtzenilojan yuninal. 26 Hayet huneꞌ tzꞌayik tuꞌ chihul hunu mak kolchakaniloj, chul yalno tawet tzet yuhi. 27 Hayet huneꞌ tzꞌayikal tuꞌ chihajlo hatiꞌ, kat hatzotel tet mak elkanh tuꞌ. Hach chaxhok yechelo tet anma tiꞌ, chohtanheniloj ta hanintiꞌan Yahawil hinan,» xhi Komam.