3. TZOTIꞌ YIBꞌANHILO HUNTEQꞌAN NIME KONHOBꞌ AY ISTIOXH
(25:1–32:32)
Tzotiꞌ hal-laxkano yibꞌanhilo anma Amón
25
Hul istzotiꞌ Komam Jahawil wetan, yalni hakaꞌ tiꞌ: 2 «Hach iskꞌahol naj winaj, tꞌanhxanhto yinh yetkꞌulal istxꞌotxꞌ ebꞌnaj iskꞌahol naj Amón, chawalni isyaꞌtajil chꞌay yibꞌanh ebꞌnaj. 3 Chawalni tet ebꞌnaj: “Hex ah Amón, abꞌewe istzotiꞌ Komam Jahawil, yuto hak tiꞌ yalni Komam hakaꞌ tiꞌ: ¡Hex tiꞌ kexah wejna hehuhlahi yu tzalahilal! yet yetalaxto watutan, yebꞌ yet yalaxayo isyaꞌtajil yibꞌanh Israel, yilaxto anma ah Judá preso. 4 Yuxin chexwakojan yul isqꞌabꞌ ebꞌnaj winaj ay yulajla konhobꞌ ay bꞌey yetkꞌulal bꞌay chiꞌahilo tzꞌayik, kat yokkano hetxꞌotxꞌ yu ebꞌnaj. Chiswatxꞌenkanh ebꞌnaj bꞌay chiꞌeyayoj yebꞌ ispeyabꞌil ismeꞌ sat hetxꞌotxꞌ, chisloni ebꞌnaj sat hetzꞌunubꞌ, chiyukꞌnito ebꞌnaj helech. 5 Haꞌ konhobꞌ Rabá chiwakanikojan bꞌay chilow noꞌ camello, kat xin inmeltzonpaxkanikojan konhobꞌ Amón bꞌay chitanhelax noꞌ meꞌ, hak tuꞌ chu heyohtanheniloj ta hanintiꞌan Yahawil hinan. 6 Hanin Yahawilintiꞌan chiwalan: Hex tiꞌ kaw hepoqꞌ heqꞌabꞌ, hetinhnayo heyoj sat txꞌotxꞌ yu tzalahilal, hebꞌuchni konhobꞌ Israel. 7 Yuxin chiwikanh inqꞌabꞌan teyinh chiwanayojan isyaꞌtajil teyibꞌanh, chexwanikojan yul isqꞌabꞌ ej konhobꞌ, kat yelqꞌanto tzetaj ay hex, chexwilojan xolaj konhobꞌ, chexintanhtzenkanilojan yinh hunelnhe sat txꞌo txꞌotxꞌ tiꞌ, cheyohtanheniloj ta hanintiꞌan Yahawil hinan,” xhi Komam,» kachi.Tzotiꞌ hal-laxkano yibꞌanh konhobꞌ Moab
8 Yalnipaxo Komam Jahawil hakaꞌ tiꞌ: «Hex ah Moab, yebꞌ hex ah Seir heyala ta haꞌ Judá lahan hakaꞌ sunil hunteqꞌanxa konhobꞌ, 9 yuxin chintanhtzelojan konhobꞌ ayko majwal yinhla ismohonal Moab; hunteqꞌan konhobꞌ kaw ochebꞌil, haꞌ ton konhobꞌ Bet-jesimot, konhobꞌ Baal-meón, yebꞌ konhobꞌ Quiriataim. 10 Chiwaqꞌtijan ej konhobꞌ ay bꞌey yetkꞌulal bꞌay chiꞌahilo tzꞌayik yinh ebꞌnaj moabita kat wanikanikojan istxꞌotxꞌ ebꞌnaj yul isqꞌabꞌ hunteqꞌan konhobꞌ tuꞌ, hakaꞌ wutehan yinh ebꞌnaj amonita, hak tuꞌ xin matxa chibꞌina konhobꞌ Amón xolaj nimeta konhobꞌ. 11 Hak tuꞌ chu wanayojan isyaꞌtajil yibꞌanh Moab, yunhe yohtanheniloj ta hanintiꞌan Yahawil hinan,» xhi Komam.a
Tzotiꞌ hal-laxkano yibꞌanhilo Edom
12 Hak tiꞌ yalni Komam Jahawil hakaꞌ tiꞌ: «Haꞌ ebꞌnaj ah Edom yaqꞌ ebꞌnaj howal yinh Judá, yaqꞌni ebꞌnaj ispaj selel tet, yuxin kaw ahkanokanh ismul ebꞌnaj yul insatan. 13 Yajaꞌ hakinpax tuꞌan hanin Yahawilintiꞌan, chiwakanh inqꞌabꞌan yinh ebꞌnaj, chiwanayojan isyaꞌtajil yibꞌanh Edom tiꞌ. Chintanhtzelojan anma yebꞌ no noqꞌ sat txꞌotxꞌ Edom. Chitanhkanilo anma ah Edom tiꞌ, chitejlaxkamo yu espada chitaichiti bꞌey Temán masanta bꞌey Dedán. 14 Chinpajtzehan tet Edom, chiyaniko konhobꞌ Israel, inkonhobꞌan howal yinh, chiwayojan isyaꞌtajil yibꞌanh yu sunil inhowalan, yuto kaw ayko inhowalan yinh Edom. Hanin Yahawilintiꞌan, chiwalan tato hak tuꞌ chu yohtanheniloj ta haninan chinpajtzehan tet yu tzetaj iswatxꞌe yinh Israel,» xhi Komam.
Tzotiꞌ hal-laxkano yibꞌanhilo ebꞌnaj filisteo
15 Hak tiꞌ yalni Komam Jahawil: «Yu tzet iswatxꞌe ebꞌnaj filisteo, yako ebꞌnaj howal yinh Israel, yaqꞌni ebꞌnaj ispaj selel tet, isyahni ebꞌnaj konhobꞌ Israel yinh sunil yanma, kaw payxatax ichi yaqꞌni ebꞌnaj howal yinh Israel, yochele ebꞌnaj istanhtzenkaniloj, 16 yuxin hanin Yahawilintiꞌan chiwikanh inqꞌabꞌan yinh ebꞌnaj filisteo. Chiwanayojan isyaꞌtajil yinh ebꞌnaj. Chintanhtzenkanilojan ebꞌnaj Cereteo yebꞌ hunteqꞌanxa anma kantokano istiꞌla haꞌ mar. 17 Chiwaqꞌnihan ispaj selel tet ebꞌnaj, chiwanayojan isyaꞌtajil yibꞌanh ebꞌnaj yu sunil inhowalan. Hayet chinpajtzenan tet ebꞌnaj filisteo, chiyohtanhenilo ebꞌnaj ta hanintiꞌan Yahawil hinan,» xhi Komam.