Tzotiꞌ hal-laxkano yibꞌanhilo konhobꞌ Tiro
26
Yet 11 (ishunlahonhebꞌxa) habꞌil yinh isbꞌabꞌel tzꞌayik yinh isbꞌabꞌel ixahaw, hul istzotiꞌ Komam Jahawil wetan, yalni hakaꞌ tiꞌ: 2 «Hach iskꞌahol naj winaj, hak tiꞌ yalni ebꞌnaj ah Tiro yinh Jerusalén:“¡Haꞌ huneꞌ konhobꞌ bꞌay chiskutxbꞌako isbꞌa ebꞌnaj txonhom chitit yulajla nimeta konhobꞌ,
kaw lanhan yaqꞌlen isyaꞌtajil tinanh!
¡Wal hanhonh tiꞌ xin kaw lanhan komeltzokaniko qꞌalomal,
haxa huneꞌ konhobꞌ tiꞌ xin, lanhan istanhkanayoj!” xhi ebꞌnaj.
3 »Yuxin hanin Yahawilintiꞌan chiwalan:
“Hanintiꞌan kaw ayko inhowalan yinh konhobꞌ Tiro,
chiwaqꞌtijan txꞌiꞌal nimeta konhobꞌ yaqꞌaꞌko howal yinh hakaꞌ chiyu ismaqꞌnikanh isbꞌa haꞌ mar yu ishowal.
4 Chiꞌuchkꞌalaxto iskꞌubꞌal konhobꞌ Tiro kaw kokꞌ chiꞌaykanikoj, kat yuchkꞌalaxayo istorrehal.
Kaw chintzꞌiskanhan ispojojal, hakaꞌ chꞌen nime chꞌen kaw txꞌutxꞌuꞌ sat,
hak tuꞌ chꞌelkaniko konhobꞌ Tiro.
5 Haꞌ konhobꞌ Tiro chikankano xolbꞌal haꞌ mar,
kat yokkano bꞌay chitajtzelaxto txꞌanh hakꞌ chꞌinahti noꞌ kay.
Chꞌelqꞌalaxto tzetaj ay konhobꞌ Tiro yu ej nimeta konhobꞌ.
Haꞌ hunteqꞌan tiꞌ chiyij isbꞌa yuto hanin Yahawilintiꞌan, chiwalan.
6 Haxa anma ay yulaj yaldeahil konhobꞌ ay istiꞌla haꞌ mar tuꞌ,
chitejlaxkamo yu chꞌen espada, hak tuꞌ chu yohtanheniloj tato hanintiꞌan Yahawil hinan,” xhi Komam.
7 »Yuto hak tiꞌ yu yalnipaxo Komam Jahawil hakaꞌ tiꞌ: “Haninan chiwaqꞌtijan naj Nabucodonosor ay bꞌey yetkꞌulal txꞌotxꞌ norte yaqꞌaꞌko howal yinh konhobꞌ Tiro. Haꞌ naj tuꞌ isreyal Babilonia, naj kaw aykano yip xol ebꞌnaj isreyal ej konhobꞌ. Chul naj yaqꞌaꞌko howal yebꞌ issoldado ayahto yibꞌanh noꞌ cheh, chinipaxti naj noꞌ cheh yebꞌ chꞌen carruaje yet howal, kaw nimankano ebꞌnaj winaj yet howal chiyiti naj,” xhi Komam.
8 Yalnipaxo Komam: “Haꞌ anma ay yulajla yaldeahil Tiro chistejkamo yu espada.
Chiswatxꞌenkanh ebꞌnaj ah Babilonia tuꞌ torre yinhla ishoyanil konhobꞌ Tiro, chiswatxꞌenkanh ebꞌnaj bꞌay chiskol isbꞌa yet chaqꞌni howal,
iqꞌbꞌilpaxo chꞌen escudo yu ebꞌnaj.
9 Chismaqꞌnilo ebꞌnaj iskꞌubꞌal konhobꞌ yu chꞌen ariete, kat yay wuynahi,
chisqꞌajnayo ebꞌnaj istorrehal yu chꞌen eche.
10 Matxa chu yil-lax konhobꞌ Tiro yu pojoj chiꞌah yu noꞌ cheh yet chꞌekꞌ noꞌ, yuto kaw tzetkꞌa noꞌ.
Hayet chꞌokapno ebꞌnaj soldado yul ispultahil konhobꞌ, xanhe chibꞌiliko chꞌen kꞌubꞌ yu isbꞌili yay yoj noꞌ cheh,
yebꞌ yu isbꞌili yay isyantahil chꞌen carruaje hakaꞌ chu yokto ebꞌnaj soldado yul isholanil iskꞌul iskꞌubꞌal konhobꞌ uchkꞌabꞌilxatoj.
11 Chisxanhobꞌtanhe noꞌ yu yisqꞌaj sunil iscallehal konhobꞌ, haxa anma ay yul konhobꞌ chitejlaxkamo yu espada xol howal.
Haꞌ hunteqꞌan nime oy kaw ay yip ay yul konhobꞌ chiꞌay wuyna sat txꞌotxꞌ.
12 Chꞌelqꞌalaxto isqꞌalomal konhobꞌ, kat yelqꞌalaxpaxto tzetaj chistxonho. Chiꞌuchkꞌalaxayo iskꞌubꞌal konhobꞌ,
kat yuchkꞌalaxayo teꞌ nha kaw kꞌulejchꞌan jilni ay yul konhobꞌ.
Haꞌ yul haꞌ mar chiqꞌojlaxkanayto chꞌen chꞌen, yebꞌ teꞌ isteꞌal nha yebꞌ ispojojal konhobꞌ tuꞌ.
13 Chintanhtzelojan bꞌit chꞌalaxiko yul konhobꞌ, matxa bꞌaqꞌinhal chꞌabꞌelax yalaxiko teꞌ arpa.
14 Haꞌ konhobꞌ Tiro, chinmeltzokanikojan hakaꞌ hunu niman chꞌen txꞌutxꞌuꞌ sat, kat yokkano bꞌay chilitxꞌbꞌalaxto txꞌanh hakꞌ iqꞌomahti kay.
Bꞌaqꞌinh chiwatxꞌelaxkanh konhobꞌ tuꞌ hunelxa, yuto hanin Yahawilintiꞌan chiwalkanojan hunteqꞌan tiꞌ,” xhi Komam Jahawil.
15 »Hak tiꞌ yalnipaxo Komam Jahawil tet Tiro hakaꞌ tiꞌ: “Hex ah Tiro, ¿chimluylunkanh anma yu xiwkilal ayko istiꞌla haꞌ mar yet chiyabꞌen istanhilo hekonhobꞌ, yebꞌ yet chiyabꞌenpaxo yel yaw anma yu islahwilal chꞌok yu howal, yebꞌ yet chiyabꞌen ispotxꞌlaxkamo anma yul hekonhobꞌ? 16 Hayet chiyuni tuꞌ, sunil ebꞌnaj yahaw ej konhobꞌ ay istiꞌla haꞌ mar chiꞌayti ebꞌnaj yul istzꞌonhobꞌal, chiyinilo ebꞌnaj xil isqꞌap hukaniko yinh, yebꞌ xil isqꞌap ayko yelawil, chiꞌok huneꞌ niman xiwkilal yinh ebꞌnaj, kat yay tzꞌonhno ebꞌnaj sat txꞌotxꞌ, nanhe xin chiluylunkanh ebꞌnaj yu xiwquilal, kat xin iskꞌaykanilo iskꞌul ebꞌnaj yilni isyaꞌtajil chꞌay yibꞌanh konhobꞌ Tiro, kat xin iskꞌaykanilo iskꞌul ebꞌnaj yilni. 17 Chisbꞌitnhen ebꞌnaj bꞌit yet bꞌiskꞌulal yinh, chalni ebꞌnaj:
‘Haꞌ konhobꞌ Tiro bꞌay anma ay istiꞌ haꞌ mar matanhkaniloj, huneꞌ
niman konhobꞌ tuꞌ kaw aykano ismay yebꞌ kaw helan yekꞌ yibꞌanh haꞌ mar.
Sunil anma ay yulaj konhobꞌ ayayo yinhla ishoyanil kaw chixiw tet ebꞌnaj ah Tiro tuꞌ, yajaꞌ wal tinanh matanhkaniloj.
18 Haꞌ tinanh kaw chiluylun anma ay yul konhobꞌ ayayo xol haꞌ mar, yuto matanhkanilo konhobꞌ Tiro.
Haꞌ sunil ej konhobꞌ tuꞌ kaw maꞌokkano niman xiwkilal yinh, yuto matanhkanilo konhobꞌ Tiro,’ xhi huneꞌ bꞌit tuꞌ,” xhi Komam.
19 »Yuto hak tiꞌ yu yalnipaxo Komam Jahawil hakaꞌ tiꞌ: “Haninan chintanhtzekanilojan konhobꞌ Tiro, kaw chitzꞌinhlokanoj hakaꞌ konhobꞌ bꞌay matxa anma chikani. Chiwaqꞌ chꞌibꞌokanhan ha haꞌ yinhla ishoyanil konhobꞌ Tiro tuꞌ, kat ismujikanto yalanh haꞌ mar. 20 Chiwanikantojan anma ah Tiro yul kambꞌal bꞌay ay anma payat kamtoj, chiwakanaytojan nahat yich txꞌo txꞌotxꞌ. Matxa bꞌaqꞌinh chiꞌahti hunelxa yebꞌ xin matxa bꞌaqꞌinhal chiwatxꞌelaxkanh konhobꞌ Tiro yu anma ay sat txꞌo txꞌotxꞌ tiꞌ. 21 Chiwutekanikojan hakaꞌ hunu xibꞌtebꞌal kat isxiw anma tet, yuto chitanhkaniloj, chisaylaxikꞌoj, yajaꞌ matxa chiꞌilchahi,”» xhi Komam yinh konhobꞌ Tiro.