27
Istzotelpaxo Komam Jahawil wetan, yalni hakaꞌ tiꞌ: 2 «Hach iskꞌahol naj winaj bꞌitnhe huneꞌ bꞌit yet bꞌiskꞌulal yinh konhobꞌ Tiro, 3 huneꞌ konhobꞌ ayayo istiꞌ haꞌ mar, bꞌay chiskutxbꞌako isbꞌa anma loqꞌwoj, anma ay yulaj ej konhobꞌ ayayo istiꞌ haꞌ mar, chawalni: “Hak tiꞌ yalni Komam Jahawil hakaꞌ tiꞌ:Haꞌ konhobꞌ Tiro kaw chiyako ismay,
chalni ta matxa hunuxa konhobꞌ chꞌapni hakaꞌ iskꞌulchꞌanil.
4 Haꞌ konhobꞌ tuꞌ, hata istiꞌla haꞌ mar chꞌekꞌ ismohonal,
haꞌ ebꞌnaj watxꞌenkanh kaw kꞌulchꞌan yu iswatxꞌenkanokanh ebꞌnaj.
5 Haꞌ yaqꞌinteꞌal, tah teꞌ, teꞌ chitit bꞌey witz Senir,
haxa yoyal, cedro teꞌ, teꞌ chitit bꞌey txꞌotxꞌ Líbano.
6 Haꞌ te teꞌ chimaqꞌni ha haꞌ yu isbꞌelwito teꞌ barco, hih teꞌ, teꞌ chitit bꞌey txꞌotxꞌ Basán,
haxa piso yinh teꞌ tah watxꞌebꞌil, ayko chꞌen marfil yelawiloj,
haꞌ teꞌ tah tuꞌ hata bꞌey istiꞌla haꞌ bꞌey Quitim chitit teꞌ.
7 Haꞌ isvelahil teꞌ barco nabꞌa lino qꞌap ayko yelawil, haꞌ bꞌey Egipto chitit qꞌap,
haxa isbanderahil yaxtzꞌantzꞌonhe yebꞌ saj qꞌap,
qꞌap chitit bꞌey Elisa ayayo istiꞌla haꞌ mar.
8 Ebꞌnaj winaj ah Sidón yebꞌ ah Arvad,
haꞌ ebꞌnaj chimaqꞌnikꞌo isbarco konhobꞌ Tiro.
Haꞌ ebꞌnaj winaj kaw helan, ah konhobꞌ Tiro ebꞌnaj,
haꞌ ebꞌnaj chibꞌaqꞌon isbarco iskonhobꞌ.
9 Haꞌ ebꞌnaj ichamta winaj ah Gebal kaw helan,
ebꞌnaj chiwatxꞌen isbarco konhobꞌ Tiro chiꞌetaxtoj.
Sunil ebꞌnaj chꞌekꞌ yul barco chꞌapni ebꞌnaj isloqꞌoꞌ tzet chitxonhlax yul konhobꞌ.
10 Haꞌ ebꞌnaj ah Persia, yebꞌ ebꞌnaj ah Lud yebꞌ ebꞌnaj ah Fut,
haꞌ ebꞌnaj ayko issoldadohalo konhobꞌ Tiro.
Haꞌ chꞌen escudo chipahni litꞌ yebꞌ chꞌen casco chiyahto
ebꞌnaj yinh iswiꞌ, lokan chꞌen yinhla iskꞌul kꞌubꞌ, yelawil konhobꞌ yeko chꞌen.
Haꞌ ebꞌnaj soldado tuꞌ kaw ismay konhobꞌ Tiro yeko ebꞌnaj.
11 »”Haꞌ ebꞌnaj ah Arvad yebꞌ issoldadohal konhobꞌ Tiro hoyaniko ebꞌnaj yinhla ismurohal konhobꞌ, haxa yul istorrehal, haꞌ ebꞌnaj ah Gamad ayahtoj, haꞌ yescudo ebꞌnaj chipahni litꞌ lokankanh chꞌen yinhla iskꞌul kꞌubꞌ, kaw ay ismay jilni konhobꞌ tuꞌ yu chꞌen.
12 »”Haꞌ ebꞌnaj ah Tarsis chiyaqꞌ ebꞌnaj chꞌen plata, chꞌen hierro, chꞌen estaño yebꞌ chꞌen plomo selelo tzetaj chisloqꞌ tet konhobꞌ Tiro, yuto kaw qꞌalomkano konhobꞌ tuꞌ. 13 Hakpax tuꞌ konhobꞌ Javán, konhobꞌ Tubal yebꞌ konhobꞌ Mesec, chiloqꞌwi tet konhobꞌ Tiro. Haꞌ tzet chiyaqꞌ istoholo tzet chisloqꞌ tuꞌ, haꞌ ton ebꞌnaj chejabꞌ yebꞌ tzetaj ye tuꞌ watxꞌebꞌil yinh chꞌen bronce. 14 Hakpax tuꞌ konhobꞌ Togarma chiyaqꞌ noꞌ cheh ijtzom yebꞌ noꞌ cheh yet howal yebꞌ noꞌ mula selelo tzet chisloqꞌ tet konhobꞌ Tiro. 15 Hakpax tuꞌ konhobꞌ Dedán yebꞌ txꞌiꞌal konhobꞌ ayayo istiꞌla haꞌ mar, chisloqꞌ tzetaj chistxonh konhobꞌ Tiro chiyaqꞌni chꞌen marfil yebꞌ teꞌ ébano istoholo tzet chisloqꞌ tuꞌ. 16 Hakpax tuꞌ anma ah konhobꞌ Edom apni loqꞌwo bꞌey Tiro yuto kaw txꞌiꞌal tzet chistxonh konhobꞌ tuꞌ, yaqꞌni Edom tuꞌ chꞌen perla, qꞌap qꞌap kaj jilni, qꞌap xilqꞌape ayko yelawil, qꞌap lino kaw ay istohol, chꞌen coral yebꞌ chꞌen rubí selelo tzet chisloqꞌ bꞌey konhobꞌ Tiro. 17 Hakpax tuꞌ txꞌotxꞌ Judá yebꞌ txꞌotxꞌ Israel, loqꞌwipaxo tet konhobꞌ Tiro, yaqꞌni ixim trigo chꞌel bꞌey Minit, yebꞌ ixim pastel yebꞌ noꞌ kabꞌ, yebꞌ teꞌ aceite, yebꞌ bálsamo istoholo tzet chisloqꞌ tuꞌ. 18 Hakpax tuꞌ konhobꞌ Damasco apni loqꞌwo bꞌey Tiro, yuto kaw txꞌiꞌalkano tzet chistxonh konhobꞌ Tiro yebꞌ xin kaw qꞌalomkanoj. Yaqꞌni konhobꞌ Damasco tuꞌ vino chiwatxꞌi bꞌey konhobꞌ Helbón yebꞌ noꞌ saj lana istoholo tzet chisloqꞌ tuꞌ. 19 Hakpax tuꞌ konhobꞌ Dan yebꞌ konhobꞌ Javán, apnipaxo loqꞌwo bꞌey konhobꞌ Tiro, yaqꞌni chꞌen hierro watxꞌebꞌilxa yebꞌ mirra yebꞌ teꞌ canela istoholo tzet isloqꞌo. 20 Hakpax tuꞌ konhobꞌ Dedán yaqꞌ qꞌap qꞌap kaw kꞌulejchꞌan jilni chiꞌok yinh isxhilahil carruaje istoholo tzet chisloqꞌ tet konhobꞌ Tiro. 21 Hakpax tuꞌ konhobꞌ Arabia yebꞌ sunil ebꞌnaj yahawil konhobꞌ Cedar, apnipaxo ebꞌnaj loqꞌwo tet konhobꞌ Tiro yaqꞌni ebꞌnaj noꞌ nixhte meꞌ, yebꞌ noꞌ icham meꞌ, yebꞌ noꞌ chiw istoholo tzet chisloqꞌo. Haꞌ hunteqꞌan tuꞌ, yaqꞌ ebꞌnaj loqꞌom istoholo tzet isloqꞌ tet konhobꞌ Tiro. 22 Hakpax tuꞌ ebꞌnaj txonhom ah Sabá yebꞌ ebꞌnaj ah Raama, apnipaxo ebꞌnaj loqꞌwo tet konhobꞌ Tiro, yaqꞌni ebꞌnaj sunil hunteqꞌan anh kaw xuqꞌ sam kaw ay istohol, yebꞌ chꞌen chꞌen kꞌulejchꞌan jilni, yebꞌ chꞌen oro istoholo tzet isloqꞌ tet konhobꞌ Tiro. 23 Hakpax tuꞌ konhobꞌ Harán, konhobꞌ Cane, konhobꞌ Edén, konhobꞌ Sabá, konhobꞌ Asiria yebꞌ konhobꞌ Quilmad, loqꞌwipaxo tet konhobꞌ Tiro. 24 Haꞌ ebꞌnaj txonhom ay yul hunteqꞌan konhobꞌ tuꞌ, txꞌiꞌal tzet chiyaqꞌ ebꞌnaj selelo tzet chisloqꞌ tet konhobꞌ Tiro, yaqꞌ ebꞌnaj qꞌap qꞌap yaxtzꞌantzꞌonhe ayko yelawil, yebꞌ xilqꞌape kaw kꞌulchꞌan jilni, yebꞌ txꞌanh lasu kaw kꞌul ye isbꞌaybꞌanil, chistxonhnipaxo ebꞌnaj teꞌ cedro tet konhobꞌ Tiro tuꞌ.
25 »”Haꞌ isbarco ebꞌnaj ah Tarsis txolanto teꞌ yijnikꞌo tzet chistxonh Tiro yebꞌ tzetaj chisloqꞌo, hak tuꞌ yu isqꞌalombꞌikanokanh.
Haꞌ konhobꞌ Tiro lahan hakaꞌ hunu barco kaw nohna yu qꞌalomal ayko yibꞌanh haꞌ mar.
26 Ilaxto teꞌ barco tuꞌ xolbꞌal haꞌ mar yu ebꞌnaj chimaqꞌnikꞌo teꞌ,
yajaꞌ hul huneꞌ niman jaqꞌeqꞌ tit yinh yetkꞌulal bꞌay chiꞌahilo tzꞌayik,
ismaqꞌnipoho jaqꞌeqꞌ teꞌ yibꞌanh haꞌ.
27 Hayet yetaxto teꞌ, istokano qꞌalomal ayikto yul teꞌ yich haꞌ,
yebꞌ txonh, yebꞌ sunil tzet ay yul teꞌ.
Istopaxkano ebꞌnaj chimaqꞌnikꞌo teꞌ yibꞌanh haꞌ yebꞌ ebꞌnaj chiwatxꞌen teꞌ, ebꞌnaj txonhom,
yebꞌ sunil ebꞌnaj soldado yebꞌ sunil anma ayikto yul teꞌ,
tokano yich haꞌ yinh istzꞌayikal yet istanhkanilo teꞌ.
28 Haꞌ ej konhobꞌ ay istiꞌ haꞌ mar chiluylunkanh yu xiwkilal yabꞌen yel yaw ebꞌnaj chimunla yul teꞌ barco tuꞌ yet istokano ebꞌnaj yich haꞌ.
29 Haꞌ sunil ebꞌnaj chimaqꞌnikꞌo teꞌ barco,
yebꞌ ebꞌnaj chꞌinikꞌo teꞌ, ayti ebꞌnaj yul isbarco tuꞌ,
iskankano ebꞌnaj sat txꞌotxꞌ istiꞌ haꞌ mar,
30 yabꞌelax yul isnuqꞌ ebꞌnaj yoqꞌ sikꞌlebꞌil yinh konhobꞌ Tiro,
chistixhnahto ebꞌnaj pojoj yinh iswiꞌ, kat isbꞌalnikꞌo isbꞌa ebꞌnaj xol tanh yu bꞌiskꞌulal.
31 Chiskꞌupnilo ebꞌnaj xil iswiꞌ yu bꞌiskꞌulal yinh konhobꞌ Tiro,
chiyaniko ebꞌnaj xilqꞌape yet bꞌiskꞌulal yinh,
chiyabꞌen ebꞌnaj bꞌiskꞌulal yinh yanma, kat yok ebꞌnaj oqꞌo, kꞌah yehilo yanma ebꞌnaj.
32 Chisbꞌitnhen ebꞌnaj bꞌit yet bꞌiskꞌulal yinh konhobꞌ Tiro, chalni ebꞌnaj:
‘Haꞌ niman konhobꞌ Tiro matanhkanilo xol haꞌ mar,
kaw machi hunuxa konhobꞌ hakaꞌ huneꞌ konhobꞌ tiꞌ,’ xhi ebꞌnaj.
33 Hayet yilaxto tzetaj chistxonh konhobꞌ Tiro yul teꞌ barco yapni yulaj konhobꞌ,
kaw txꞌiꞌal konhobꞌ qꞌalombꞌikanokanh, hakpax tuꞌ ebꞌnaj rey qꞌalombꞌikanokanh ebꞌnaj.
34 Yajaꞌ wal tinanh maꞌay isyaꞌtajil yibꞌanh,
matanhkanilo xol haꞌ mar, matokano yich haꞌ.
Haꞌ sunil tzet chistxonho, yebꞌ sunil ebꞌnaj chimunla yul konhobꞌ tuꞌ matokano ebꞌnaj yich haꞌ.
35 Haꞌ sunil ej konhobꞌ ay istiꞌla haꞌ mar kaw kꞌaykanilo iskꞌul yilni konhobꞌ Tiro,
hakaꞌ ebꞌnaj yahawil ej konhobꞌ tuꞌ luylunkanh ebꞌnaj yu xiwkilal,
sajpaqꞌpoxanhe eliko sat ebꞌnaj yu xiwkilal.
36 Haꞌ ebꞌnaj txonhom ay yulajla konhobꞌ xanhe chixuqꞌabꞌli ebꞌnaj yinh konhobꞌ Tiro.
Haꞌ konhobꞌ Tiro kaw xiwkilta chiꞌelkanikoj,
yinh hunelnhe chitanhkaniloj,” kachi,» xhi Komam Jahawil.