28
Yul istzotiꞌ Komam Jahawil wetan, yalni hakaꞌ tiꞌ: 2 «Hach iskꞌahol naj winaj, hal tet naj isreyal Tiro hakaꞌ tiꞌ: Hak tiꞌ yalni Komam Jahawil:“Hach tiꞌ kaw nohna hawanma yu loloꞌal, chawalni:
‘Hanintiꞌan, lahan hinan hakaꞌ huneꞌ dios,
tzꞌonhan hinan yul istzꞌonhobꞌal huneꞌ dios xolbꞌal haꞌ mar,’ kachi.
Yajaꞌ xin anma hach, mach Diosojach.
Chawalni ta lahan hahelanil hakaꞌ ishelanil huneꞌ dios.
3 ¿Tom ekꞌbꞌalto yitzꞌatil hawiꞌ yibꞌanh yitzꞌatil iswiꞌ yaꞌ Daniel?
¿Tom sunil tzet ye tuꞌ ewanyehi hawohtaj?
4 Haꞌ yu hahelanil yebꞌ yu hanabꞌal hatenbꞌa qꞌalomal,
hatenbꞌanpaxo chꞌen oro yebꞌ chꞌen plata bꞌay kꞌuwan haqꞌalomal.
5 Haꞌ yu hawip yebꞌ yu hahelanil yinh txonh, yuxin kaw chꞌibꞌkanokanh haqꞌalomal,
yajaꞌ haqꞌalomal tuꞌ aniko loloꞌal yinh hawanma.
6 »”Yuxin hanin Yahawilintiꞌan chiwalan:
Yu hawuteko hawanma hakaꞌ yanma huneꞌ dios,
7 yuxin chiwaqꞌtijan ebꞌnaj nan konhobꞌal tawinh, ebꞌnaj kaw howkanoj,
chiyinahti ebꞌnaj yespada tawinh, kat istanhkanilo
hakꞌulchꞌanil yebꞌ hahelanil, kat yelkano ispixan isqꞌaqꞌal hamay.
8 Chach alaxkanto yul kambꞌal, yuto chachpotxꞌlaxkamo
hakaꞌ chu ispotxꞌlaxkamo ebꞌnaj winaj xol yiktabꞌal haꞌ mar.
9 ¿Chimkaxhtzotel tet naj chachpotxꞌnikamoj, chawalni ta Dios hach?
Hach tiꞌ anma hach, mach Diosojach,
lahan hach hakaꞌ komon anma yul isqꞌabꞌ naj chachpotxꞌnikamoj.
10 Hanin Yahawilintiꞌan, haninan chiwalan ta hakaꞌ chu ispotxꞌlaxkamo ebꞌnaj winaj mach yechel circuncisión yinh,
hak tuꞌ chu hapotxꞌlaxkamo yu ebꞌnaj nan konhobꞌal,”»
xhi Komam Jahawil tet naj rey ah Tiro.
11 Yul istzotiꞌ Komam Jahawil, yalni hakaꞌ tiꞌ: 12 «Hach iskꞌahol naj winaj bꞌitnhe bꞌit yet bꞌiskꞌulal yinh naj rey ah Tiro chawalni: Hak tiꞌ yalni Komam Jahawil hakaꞌ tiꞌ:
“Hach tiꞌ kaw tohol hachtikꞌa sikꞌlebꞌil, yebꞌ xin kaw aytikꞌakano hanabꞌal,
yebꞌ xin kaw kꞌulchꞌan hachtikꞌa.
13 Haꞌ bꞌey Edén, yul ispeyabꞌ Komam Dios ayachtikꞌa,
haꞌ sunil chꞌen chꞌen kꞌulejchꞌan jilni ayko hawelawiloj,
haꞌ ton chꞌen cornerina, chꞌen topacio, chꞌen jaspe,
chꞌen crisólito, chꞌen berilo, chꞌen ónice, chꞌen zafiro,
chꞌen carbunclo, chꞌen esmeralda, yebꞌ chꞌen oro.
Alaxiko teꞌ tinabꞌ yebꞌ teꞌ suꞌ yu ebꞌnaj winaj kaw helan yet hawatxꞌikanoj.
14 Hach tiꞌ querubín hach, kaw niman hawelapnoj, aqꞌbꞌil hawip yinh tanhehomal,
kach yako Komam Dios bꞌey witz yet Komam yehi,
haꞌ tuꞌ kaxhehi, kach ekꞌ xolaj chꞌen chꞌen ayko qꞌaꞌ yinh.a
15 Kaw toholtikꞌa sunil habꞌeybꞌal yettaxtikꞌa istzꞌayikal hawatxꞌi,
yajaꞌ masanto ilchalo istxꞌojal tawinh,
16 yu kaw chꞌibꞌkanokanh hatxonh,
yuxin kaw ahkanokanh hatxꞌojal yebꞌ hamul.
Hach querubín, aqꞌbꞌil ismunil yinh tanhehomal,
haninan kach wilojan bꞌey witz wetan yehi,
kach inqꞌojnilojan xol chꞌen chꞌen ayko qꞌaꞌ yinh.
17 Kaw loloꞌbꞌikanilo hawanma yu hakꞌulchꞌanil,
hawetato hahelanil yu isqꞌaqꞌal hamay, yuto hawako hamay,
yuxin haninan kach inqꞌojayojan sat txꞌotxꞌ yu ismatzꞌli ebꞌnaj isreyal konhobꞌ tawinh.
18 Yu tzetkꞌa hamul hawatxꞌe yebꞌ haweta makta loqꞌwi yebꞌ txꞌonhwi tawet yuxin etaxto hatemplo,
yuxin waqꞌ elotijan qꞌa qꞌaꞌ tawinh, kach isnhusnito qꞌaꞌ.
Tanhxanhe kaxheliko sat txꞌotxꞌ wuhan sata sunil mak kach ilni.
19 Sunil makta kach ohtanhen sat txꞌo txꞌotxꞌ tiꞌ kaw chitakilo iskꞌul kach yilni,
kaw chixiw anma kach yilni, kach tanhkanilo yinh hunelnhe,”» xhi Komam.
Tzotiꞌ hal-laxkano yibꞌanh konhobꞌ Sidón
20 Hul istzotiꞌ Komam Jahawil wetan yalni hakaꞌ tiꞌ: 21 «Hach iskꞌahol naj winaj tꞌanhxanhto yinh yetkꞌulal konhobꞌ Sidón, chawalni isyaꞌtajil chul yibꞌanh. 22 Chawal, hak tiꞌ yalni Komam Jahawil:
“Hex ah konhobꞌ Sidón, hanintiꞌan chiwayojan howal teyibꞌanh.
Chꞌalaxiko inmayan, yul ej konhobꞌ yu tzet chinwatxꞌehan teyinh,
chiyohtanhenilo anma ta hanintiꞌan Yahawil hinan yet chiwanayojan isyaꞌtajil teyibꞌanh,
kat yalaxiko inmayan.
23 Chiwatojan howla yabꞌil teyibꞌanh, chexpotxꞌlaxkamo yul konhobꞌ,
chikꞌxanhe chiꞌekꞌ yulaj bꞌeh, cheyohtanheniloj ta hanintiꞌan Yahawil hinan.
24 Hex ah Sidón, lahan hex hakaꞌ hunu teꞌ txꞌix kaw xixiꞌ iswiꞌ kaw yaꞌ chilow yinh konhobꞌ Israel,
yajaꞌ wal tinanh matxa bꞌaqꞌinal chu hakaꞌ tuꞌ.
Hakpax tuꞌ hunteqꞌanxa konhobꞌ chiyahni Israel, ayko yinhla ishoyanil, matxa chisyahaꞌ,
hak tuꞌ chu yohtanhenilo anma ta hanintiꞌan Yahawil hinan,”» xhi Komam tet ebꞌnaj ah Sidón.
25 Yalnipaxo Komam Jahawil: «Hayet chinkutxbꞌanikojan anma Israel yulajla konhobꞌ bꞌay pujantoj chinyenilojan ta hanhe hinan kaw ay welapnojan xol inkonhobꞌan sata anma ay yulajla nimeta konhobꞌ. Hayet chinkutxbꞌako tuꞌan chiꞌeh sat istxꞌotxꞌ, txꞌotxꞌ waqꞌkanojan tet yaꞌ Jacob inchejabꞌan. 26 Chiꞌehayo ebꞌnaj sat istxꞌotxꞌ yinh aqꞌankꞌulal, chiswatxꞌenkanh ebꞌnaj yatut, chistzꞌunni ebꞌnaj teꞌ uva. Chiꞌehayo ebꞌnaj sat txꞌotxꞌ yinh sunil iskꞌul. Haninan chiwayojan isyaꞌtajil yibꞌanh hunteqꞌan nimeta konhobꞌ etliko yinh ebꞌnaj Israel, hak tuꞌ xin chiyu yohtanhenilo ebꞌnaj tato haninan Yahawil hinan, yebꞌ xin isDiosal ebꞌnaj,» xhi Komam.