Hal-lax isyaꞌtajil chiꞌay yibꞌanhilo Egipto
29
Haꞌ yinh 12 (iskabꞌlahonhebꞌ) tzꞌayik, yinh 10 (islahonhebꞌ) ixahaw, yet (lahonhebꞌxa) habꞌil, jokanh preso, yul istzotiꞌ Komam Jahawil wetan, yalni hakaꞌ tiꞌ: 2 «Hach iskꞌahol naj winaj, tꞌanhxanhto yinh yetkꞌulal Egipto bꞌay ay naj rey faraón, chawalni isyaꞌtajil chiꞌay yibꞌanh naj yebꞌ yibꞌanh sunil konhobꞌ Egipto tuꞌ. 3 Chawalni hakaꞌ tiꞌ: Hak tiꞌ yalni Komam Jahawil:“Hanintiꞌan ayko inhowalan tawinh hach Faraón, isreyal Egipto;
hach lahan hakaꞌ hunu noꞌ dragón, ayayto xol ha haꞌ, chawalni:
‘Haꞌ niman Nilo tiꞌ wetan, yuto haninan watxꞌenhe haꞌ,’ kachi.
4 Yajaꞌ haninan chiwakojan chꞌen gancho yul hatiꞌ, chachwinahtijan xol haꞌ.
Hayet chachwinahtijan tuꞌ chiꞌahpaxti sunil noꞌ kay ay xol haꞌ tawintaj,
yuto chiꞌok nhakꞌno noꞌ yinh hatzꞌumal yet chachwinahtijan xol haꞌ.
5 Chachwanitojan sat txꞌotxꞌ desierto yebꞌ sunil noꞌ kay ahti tawinta xol haꞌ Nilo.
Chachkankano bꞌalno sat txꞌotxꞌ, machi mak chachsikꞌnikanh, nitam mak chachmujni;
wal xin chachwaqꞌan iskꞌuxuꞌ noꞌ howla noqꞌ ay sat txꞌo txꞌotxꞌ,
kat yulpaxo noꞌ chꞌik chiꞌekꞌ satkanh kach istꞌojotoj.
6 Chiyohtanhe sunil anma ay sat txꞌotxꞌ Egipto ta hanintiꞌan Yahawil hinan,
yuto haꞌ konhobꞌ Israel, halni tawet ta chachkolwal yinh,
yajaꞌ lahan hach hakaꞌ hunu teꞌ ah chꞌok qꞌojochoj.
7 Hayet yok tzabꞌno ebꞌnaj yinh teꞌ isqꞌahto teꞌ, istzilmoto yul isqꞌabꞌ ebꞌnaj yu teꞌ,
yebꞌ xin hayet yanayo ebꞌnaj yip yibꞌanh teꞌ,
isqꞌahkanto sunil ebꞌnaj yinh hunelnhe yu teꞌ,” xhi Komam.
8 »Yuxin hak tiꞌ yu yalnipaxo Komam Jahawil: “Haninan chiwaqꞌtijan ebꞌnaj yet howal yebꞌ yespada tawinh, haxa anma ay yul konhobꞌ Egipto chipotxꞌlaxkamoj kat ispotxꞌlaxpaxokamo no noqꞌ. 9 Chiwayojan isyaꞌtajil yibꞌanh txꞌotxꞌ Egipto, kaw tzꞌinan chukano txꞌotxꞌ, hak tuꞌ chu yohtanhenilo anma ah Egipto ta hanintiꞌan Yahawil hinan. Yuto hach tiꞌ hawala: ‘Haꞌ haꞌ niman Nilo wetan haꞌ, haninan watxꞌenhe haꞌ,’ kachi. 10 Yuxin chiwakojan howal tawinh, yebꞌ yinh ha haꞌ ay sat txꞌotxꞌ Egipto chawal hawetoj. Chiwanayojan isyaꞌtajil yibꞌanh txꞌotxꞌ Egipto, kaw tzꞌinan chukano txꞌotxꞌ, hakaꞌ txꞌotxꞌ desierto. Haꞌ isyaꞌtajil chiwayo tuꞌan, chitaichiti bꞌey Migdol masanta chꞌapni bꞌey Sevene yebꞌ bꞌey ismohon txꞌotxꞌ Etiopía. 11 Machi hunu mak tiꞌ chiꞌanayo yoj yibꞌanh txꞌotxꞌ, matxapaxo hunu no noqꞌ chiꞌekꞌ sat txꞌotxꞌ, yulbꞌal 40 (kawinaj) habꞌil. 12 Chiwutekojan txꞌotxꞌ Egipto tiꞌ, kaw tzꞌinan sata hunteqꞌanxa txꞌotxꞌ kaw tzꞌinankanoj, kat yuchkꞌalaxkanto ej konhobꞌ ay yul ismajul Egipto yinta ej konhobꞌ xaꞌuchkꞌalaxtoj; yulbꞌal 40 (kawinaj) habꞌil chꞌay isyaꞌtajil yibꞌanh txꞌotxꞌ Egipto. Haꞌ anma ah Egipto, chisajlemito wuhan xolaj nimeta nan konhobꞌal, chipujnato anma sunil sat yibꞌanhqꞌinal,” xhi Komam.
13 »Yuto hak tiꞌ yalni Komam Jahawil: “Hayet chilahwi yekꞌto 40 (kawinaj) habꞌil, chinkutxbꞌanpaxikojan ebꞌnaj Egipto pujnato xolajla ej konhobꞌ, kat ismeltzo sat istxꞌotxꞌ. 14 Haꞌ anma ah Egipto ilaxto preso tuꞌ chimeltzo wuhan, chiwinitojan sat txꞌotxꞌ Patros, istxꞌotxꞌ bꞌay pitzkꞌanahi, chiswatxꞌenkanh iskonhobꞌ, yajaꞌ chiyahlaxo iskonhobꞌ tuꞌ. 15 Haꞌ txꞌotxꞌ Egipto tiꞌ matxa yelapno sata hunteqꞌanxa konhobꞌ, matxa bꞌaqꞌinhal chiyiqꞌkanh yip yibꞌanh ej konhobꞌ, yuto haninan chiwilojan yip yunhe matxa chiqꞌoji yibꞌanh ej konhobꞌ. 16 Matxa bꞌaqꞌinh chiꞌok Egipto tiꞌ yipo iskꞌul konhobꞌ Israel. Hayet chiyilni konhobꞌ Israel yay isyaꞌtajil yibꞌanh Egipto tiꞌ, chisnanitij ta kaw yako ismul yet iskawxi iskꞌul yinh Egipto, kat yohtanheniloj ta hanintiꞌan Yahawil hinan,”» xhikano Komam Jahawil.
17 Haꞌ yinh 27 (hujebꞌ iskawinaj) habꞌil, yinh bꞌabꞌel ixahaw, yinh bꞌabꞌel tzꞌayik, istzotel Komam Jahawil wetan, yalni hakaꞌ tiꞌ: 18 «Hach iskꞌahol naj winaj, haꞌ naj Nabucodonosor isreyal Babilonia kaw niman munil yako naj yibꞌanh issoldado yet yaqꞌni ebꞌnaj howal yinh konhobꞌ Tiro. Sunil ebꞌnaj soldado tuꞌ ay hona xil iswiꞌ, islahwi iswixikꞌ, yajaꞌ xin mach yiqꞌ naj Nabucodonosor istohol yebꞌ issoldado yet yaqꞌni howal yinh konhobꞌ Tiro. 19 Yu tuꞌ, yuxin hanin Yahawilintiꞌan chiwalan: “Chiwaqꞌan txꞌotxꞌ Egipto tet naj Nabucodonosor, chiyinilo naj isqꞌalomal txꞌotxꞌ yebꞌ sunil tzet ay sat txꞌotxꞌ, chistohlan naj Nabucodonosor tuꞌ issoldado yu tzet chiyito bꞌey Egipto. 20 Hanin Yahawilintiꞌan chiwalan ta chiwaqꞌan txꞌotxꞌ Egipto tet naj rey Nabucodonosor istoholo ismunil naj yet yaqꞌni howal yinh Tiro, yuto wetan huneꞌ munil iswatxꞌe ebꞌnaj tuꞌ,” xhi Komam.
21 »Hayet huneꞌ tiempohal tuꞌ chiyiqꞌpaxokanh yip konhobꞌ Israel hunelxa wuhan, kat inhajnihan hatiꞌ, kat hawalni intzotiꞌan xol ebꞌnaj, hak tuꞌ chu yohtanheniloj ta hanintiꞌan, Yahawil hinan,» xhi Komam.