30
Hul istzotiꞌ Komam Jahawil wetan, yalni hakaꞌ tiꞌ: 2 «Hach iskꞌahol naj winaj, hal intzotiꞌan, chawalni: “Hak tiꞌ yalni Komam Jahawil:Oqꞌanhwej, cheyalni: ‘¡Ay, lanhanxa yul istzꞌayikal bꞌay chihul isyaꞌtajil!’ kexchi.
3 Yuto lanhan ishitzti tzꞌayik bꞌay chihul isyaꞌtajil,
haꞌ ton huneꞌ tzꞌayik yet Komam Jahawil.
Haꞌ huneꞌ tzꞌayik tuꞌ, kaw bꞌiskꞌulal,
lahan hakaꞌ yet kaw moyantanhe.
Haꞌ yinh huneꞌ tzꞌayik tuꞌ, chiꞌay isyaꞌtajil yibꞌanh ej nimeta konhobꞌ.
4 Chiꞌalaxoko howal yinh Egipto, kat yelqꞌalaxto isqꞌalomal,
chiꞌuchkꞌalaxkanto konhobꞌ Egipto tuꞌ, yebꞌ sunil iscimientohal;
wal anma ah Etiopía xin chiluylunkanh yu xiwkilal yu yilni ispotxꞌlaxkamo anma ah Egipto.
5 Hakpax tuꞌ anma ay yul konhobꞌ Etiopía, yebꞌ Fut, yebꞌ Lud yebꞌ sunil Arabia, yebꞌ Libia,
yebꞌ anma ay yul hunteqꞌan konhobꞌ ay istrato yebꞌ Egipto chitejlaxkamo yu espada yinta anma ah Egipto.
6 Hak tiꞌ yalnipaxo Komam Jahawil: Hakpax tuꞌ hunteqꞌanxa konhobꞌ kolwa yinh Egipto chitanhpaxiloj.
Haꞌ yip Egipto bꞌay kaw chisloloꞌnhe isbꞌa, chitanhpaxiloj.
Haꞌ anma ay yul konhobꞌ Migdol masanta konhobꞌ Sevene chitejlaxkamo yu espada xol howal,” xhi Komam Jahawil.
7 »Haꞌ txꞌotxꞌ Egipto kaw tzꞌinan chiꞌelkaniko sata hunteqꞌanxa txꞌotxꞌ kaw tzꞌinan, haxa ej konhobꞌ ay yul ismajul Egipto chiꞌuchkꞌalaxkanto yinta konhobꞌ xaꞌuchkꞌalaxkantoj. 8 Chiyohtanhelo anma ta hanintiꞌan Yahawil hinan yet chiwanokojan qꞌaꞌ yinh Egipto yu istzꞌakantoj, yebꞌ yet chꞌay isyaꞌtajil yibꞌanh konhobꞌ chikolwa yinh.
9 »Hayet chiꞌay isyaꞌtajil yibꞌanh Egipto, chinchejtojan ebꞌnaj chejabꞌ yibꞌanh haꞌ mar yalno tet anma ah Etiopía, anma kaw matzet chal iskꞌul, yajaꞌ hayet chiyabꞌeni, kat yok niman xiwkilal yinh. Haꞌ huneꞌ tzꞌayik tuꞌ kawilxa yetij.
10 »Hanin Yahawilintiꞌan chiwalan: “Haninan chiwakojan isqꞌalomal Egipto yul isqꞌabꞌ naj Nabucodonosor, isreyal Babilonia kat istanhkanilo naj. 11 Haꞌ naj Nabucodonosor chꞌapni yebꞌ issoldado yebꞌ ebꞌnaj winaj kaw ay yip ay yul nimeta konhobꞌ yuchkꞌakanto konhobꞌ Egipto, chispotxꞌnikamo ebꞌnaj anma yu yespada, chinohkanilo konhobꞌ yu anma kamom. 12 Chiwaqꞌ tajolojan ha haꞌ, chiwanikojan txꞌotxꞌ Egipto yul isqꞌabꞌ ebꞌnaj winaj kaw txꞌoj, haxa ebꞌnaj nan konhobꞌal chitanhtzenkanilo konhobꞌ Egipto yebꞌ sunil tzet ay yul konhobꞌ tuꞌ. Haꞌ hunteqꞌan isyaꞌtajil tiꞌ hanin Yahawilintiꞌan chiwalkanojan,” xhi Komam.
13 »Yalnipaxo Komam Jahawil hakaꞌ tiꞌ:
Chiwuchkꞌapaxtojan hunteqꞌan tioxh yebꞌ hunteqꞌan yechel komon dios ay bꞌey konhobꞌ Menfis,
matxa mak chiꞌok yahawilo ej konhobꞌ ay yul ismajul txꞌotxꞌ Egipto,
chiwanikojan xiwkilal yinh anma ah Egipto.
14 Haꞌ konhobꞌ Patros, chintanhtzelojan,
haxa konhobꞌ Zoán chiwakojan qꞌaꞌ yinh,
chiwanayojan isyaꞌtajil yibꞌanh konhobꞌ Tebas.
15 »Chiwayojan inhowalan yibꞌanh konhobꞌ Sin, konhobꞌ kaw ayko yipo Egipto, chintanhtzekanilojan anma ah Tebas. 16 Chintzujbꞌakojan qꞌaꞌ yinh Egipto, haxa anma ah konhobꞌ Sin kaw chiyabꞌe isyaꞌil, chintanhtzenkanilojan konhobꞌ Tebas, haxa konhobꞌ Menfis naunhe chiyabꞌen isyaꞌtajil. 17 Haꞌ ebꞌnaj tzehtaj ah konhobꞌ Avén yebꞌ ebꞌnaj ah konhobꞌ Pibeset chitejlaxkamo ebꞌnaj yu espada, haxa ebꞌix ix chiꞌilaxto ebꞌix preso. 18 Hayet chintanhtzenilojan yip Egipto, yip kaw chiꞌaniko ismay, chipáxilo yip yoj tzꞌayik bꞌey konhobꞌ Tafnes kat isqꞌejholiloj, haxa anma ay yulajla yaldeahil, chiꞌilaxto preso. 19 Hayet chiwanayojan isyaꞌtajil yibꞌanh Egipto chiyohtanhenilo anma ta hanintiꞌan Yahawil hinan,» xhi Komam.
20 Hayet 11 (hunlahonhebꞌxa) habꞌil, yinh isbꞌabꞌel ixahaw, yinh ishuj tzꞌayik istzotel Komam Jahawil wetan, yalni hakaꞌ tiꞌ: 21 «Hach iskꞌahol naj winaj, xahinqꞌahiltojan isqꞌabꞌ naj faraón, isreyal Egipto. Machi xin mak chiꞌanhten isqꞌabꞌ naj, machi mak chikꞌalni tet naj yu iswatxꞌikoj, kat yiqꞌni yip isqꞌabꞌ naj istzabꞌni chꞌen espada. 22 Yuxin hanin Yahawilintiꞌan chiwalan ta chiwakojan howal yinh naj faraón, isreyal Egipto, chinmaqꞌ qꞌahojan isqꞌabꞌ naj iskabꞌil, huneꞌ kꞌul yebꞌ xin huneꞌ xatikꞌa inmaqꞌ qꞌahojan, yu yaykꞌay yespada naj yul isqꞌabꞌ. 23 Chisajlemito ebꞌnaj Egipto wuhan xolaj nimeta konhobꞌ, chipujnakanh ebꞌnaj wuhan sat yibꞌanhqꞌinal tiꞌ. 24 Haninan chiwaqꞌan yip isqꞌabꞌ naj rey Nabucodonosor, chiwanikojan wespadahan yul isqꞌabꞌ naj; wal naj faraón xin chinmaqꞌ qꞌahojan isqꞌabꞌ naj, kat isqꞌajwi naj sata naj rey Nabucodonosor hakaꞌ isqꞌajwi hunu mak lanhan iskami. 25 Haninan chiwaqꞌan yip isqꞌabꞌ naj rey Nabucodonosor; wal isqꞌabꞌ naj faraón chipax lohnahi. Chiwakojan wespadahan yul isqꞌabꞌ naj rey Nabucodonosor, chiyaqꞌni naj howal yinh Egipto, hak tuꞌ chu yohtanheni ta hanintiꞌan Yahawil hinan. 26 Chisajlemito ebꞌnaj Egipto wuhan xolaj ej nimeta konhobꞌ, kat ispujnakanto ebꞌnaj sunil sat yibꞌanhqꞌinal tiꞌ, hak tuꞌ chu yohtanheniloj ta hanintiꞌan Yahawil hinan,» xhi Komam.