31
Haꞌ yinh isbꞌabꞌel tzꞌayik, yinh isyox ixahaw, yet 11 (hunlahonhebꞌxa) habꞌil jokanh preso, hul istzotiꞌ Komam Jahawil wetan, yalni hakaꞌ tiꞌ: 2 «Hach iskꞌahol naj winaj, tzotelanh tet naj faraón, isreyal Egipto yebꞌ tet anma ay yul ismajul Egipto, chawalni:“Hach faraón, ¿mak yebꞌ halahbꞌa hawip yet ayachkanh?
3 Lahan hach hakaꞌ txꞌotxꞌ Asiria, txꞌotxꞌ yet payxa hakaꞌ teꞌ cedro ay bꞌey txꞌotxꞌ Líbano kaw kꞌulchꞌankano jilni isqꞌabꞌ,
yebꞌ xin kaw niman sat, yebꞌ kaw nimajal istel; iswiꞌ teꞌ chitaahapno satkanh.
4 Kaw kꞌul yu ischꞌibꞌkanh teꞌ yu haꞌ nhabꞌ yebꞌ yu ha haꞌ ay sat txꞌo txꞌotxꞌ,
yuto kaw chꞌekꞌ yojomal ha haꞌ yich teꞌ,
hak tuꞌ xin chu yekꞌpaxo yojomal haꞌ yich sunil hunteqꞌanxa teꞌ qꞌebꞌtaj ay bꞌey tuꞌ.
5 Kaw nimajal chꞌibꞌkanokanh istel teꞌ yibꞌanh sunil ej teꞌ qꞌebꞌtaj,
yuto kaw niman ha haꞌ chiꞌekꞌ yojomal yich teꞌ,
kaw niman isqꞌabꞌ teꞌ eliloj yebꞌ xin kaw nimej eliko istel isqꞌabꞌ teꞌ.
6 Sunil hunun majan noꞌ chꞌik hul iswatxꞌeꞌ yatut yinh isqꞌabꞌ teꞌ,
sunil noꞌ xoltelajil noqꞌ pitzkꞌa yunin yich teꞌ,
txꞌiꞌal nimeta konhobꞌ ehayo yalanh yenhel isqꞌabꞌ teꞌ.
7 Haꞌ teꞌ cedro tuꞌ, kaw niman yelapno elkaniko teꞌ yebꞌ xin kaw kꞌulchꞌankano jilni teꞌ,
kaw nimejal chꞌibꞌ istel isqꞌabꞌ teꞌ, yuto kaw txꞌiꞌal ha haꞌ chꞌekꞌ yich teꞌ.
8 Machi hunu teꞌ cedro ay yul ispeyabꞌ Komam Dios lahan hakaꞌ teꞌ niman cedro tuꞌ,
haꞌ teꞌ tzꞌisis mach apni isqꞌabꞌ teꞌ hakaꞌ teꞌ,
hakpax tuꞌ teꞌ castaño, mach apni xaj teꞌ hakaꞌ teꞌ niman cedro tuꞌ.
Machi hunu teꞌ qꞌebꞌtaj ay yul ispeyabꞌ Komam Dios apni hakaꞌ iskꞌulchꞌanil teꞌ niman cedro tuꞌ.
9 Kaw kꞌulchꞌan yu inwatxꞌenan teꞌ, yuxin kaw nimankano xaj teꞌ.
Haꞌ sunil teꞌ qꞌebꞌtaj ay yul Edén,
ispeyabꞌ Komam Dios, kaw chichiwako iskꞌul teꞌ yinh iskꞌulchꞌanil jilni teꞌ, kachi tet naj Faraón,” xhi Komam.
10 »Yuxin hak tiꞌ yu yalnipaxo Komam Jahawil: “Haꞌ teꞌ niman cedro tuꞌ, kaw nimajalkano istel teꞌ, yebꞌ xin kaw palkꞌonkanokanh istel teꞌ yibꞌanh teꞌ qꞌebꞌtaj, yuxin kaw loloꞌ elkaniko teꞌ. 11 Haninan chiwakojan teꞌ yul isqꞌabꞌ huneꞌ naj winaj kaw aykano yip xol ebꞌnaj winaj ay yulaj ej nimeta konhobꞌ; chaqꞌni naj isyaꞌtajil tet hakaꞌtikꞌa istxꞌojal iswatxꞌe. Hanintiꞌan yahbꞌilxa teꞌ niman cedro tuꞌ wuhan. 12 Chitzokꞌlaxayo teꞌ yu ebꞌnaj winaj kaw ay yip, ay yulajla nimeta konhobꞌ, kat istanhtzelaxkanilo yu ebꞌnaj nan konhobꞌal. Chiqꞌahto isqꞌabꞌ teꞌ yet chiꞌaykꞌay yibꞌanh witz, yebꞌ yibꞌanh ej akꞌal, yebꞌ yibꞌanh haꞌ nixhte haꞌ ay sat txꞌo txꞌotxꞌ. Haxa ej konhobꞌ ayayo yalanh yenhel teꞌ, chiꞌelkanh, kat isbꞌejlaxkano teꞌ ischukil. 13 Hayet isqꞌajlaxayoj teꞌ yul sunil ismajanil noꞌ chꞌik chꞌekꞌ satkanh eho yibꞌanh xeꞌ teꞌ, yekꞌ noꞌ xoltelajil noqꞌ xolaj isqꞌabꞌ teꞌ. 14 Yunhe matxa hunu te teꞌ kaw nimajal istel ayayo istiꞌla ha haꞌ chisloloꞌnhe isbꞌa, yebꞌ xin matxa teꞌ chipalkꞌon istel yibꞌanh te qꞌebꞌtaj. Yebꞌ yunhe matxa chikawxi iskꞌul yinh yu kaw ay ha haꞌ yich, yuto sunil te teꞌ chiqꞌajlaxayoj. Haꞌ chal yelapno tuꞌ, to haꞌ sunil ebꞌnaj nime winaj, yahaw nime konhobꞌ, chitanhkanilo yinh ebꞌnaj winaj chitokano yul kambꞌal.
15 »”Hanin Yahawilintiꞌan chiwalan: Hayet chiꞌapni teꞌ niman cedro tiꞌ yul yich kambꞌal, chiwaqꞌ tajoyojan haꞌ mar yu bꞌiskꞌulal, kat islinhi yekꞌ yojomal haꞌ, kat yay niman qꞌejholo yibꞌanh txꞌotxꞌ Líbano, kat ispaxilo yip sunil teꞌ qꞌebꞌtaj yu bꞌiskꞌulal. 16 Wakantojan teꞌ yul kambꞌal, yapnikano iskꞌatanh hunteqꞌan kamom ay bꞌey tuꞌ. Hayet isbꞌili yet yaykꞌay tuꞌ, waqꞌni bꞌilojan nimeta konhobꞌ yintaj, hak tuꞌ xin kaw tzala sunil te teꞌ, kaw ay ha haꞌ ekꞌ yich yet yalanhtokanoj, yajaꞌ wal tinanh ayxa bꞌey yul kambꞌal, bꞌay nahat yich txꞌo txꞌotxꞌ, haꞌ ton sunil teꞌ qꞌebꞌtaj kaw ochebꞌil yul peyabꞌ Edén yebꞌ teꞌ kaw ochebꞌil bꞌey txꞌotxꞌ Líbano. 17 Aypaxkanto hunteqꞌan tuꞌ yinta naj faraón yul kambꞌal, yebꞌ makta potxꞌlaxkamo yu espada yaypaxkanto yul kambꞌal yinta naj, makta kolwa yinh, yebꞌ ej nimeta konhobꞌ yenhelnhe isbꞌa yalanh yenhel teꞌ niman cedro, yechel naj faraón tuꞌ.
18 »”¿Mak yebꞌ halahbꞌa habꞌa yebꞌi yinh teꞌ qꞌebꞌtaj ay bꞌey Edén, yinh iskꞌulchꞌanil jilni yebꞌ yinh isnimanil yelapnoj? Hach tiꞌ tzokꞌbꞌil hachayoj yebꞌ teꞌ qꞌebꞌtaj ay bꞌey Edén, ay bꞌey txꞌotxꞌ kaw nahat yehayto yich, yul txꞌotxꞌ bꞌay ay kamom anma mach circuncisión yinh, hunteqꞌan potxꞌlaxkamo yu espada. Hunteqꞌan tiꞌ, haꞌ ton naj faraón yebꞌ sunil yet konhobꞌ. Hak tuꞌ yalni Komam Jahawil,” kachi,» xhi Komam.