32
Haꞌ yinh isbꞌabꞌel tzꞌayik, yinh 12 (iskabꞌlahonhebꞌ) ixahaw yet 12 (kabꞌlahonhebꞌxa) habꞌil jokanh preso, yul istzotel Komam Jahawil wetan, yalni hakaꞌ tiꞌ: 2 «Hach iskꞌahol naj winaj, bꞌitnhe huneꞌ bꞌit yet kamikal yinh naj faraón, isreyal Egipto, chawalni:“Hach tiꞌ lahan hach hakaꞌ hunu noꞌ bꞌalam ay xolaj nimeta konhobꞌ,
yebꞌ hakaꞌ hunu noꞌ dragón ay xol haꞌ mar.
Chamaqꞌobꞌtanhe haꞌ yu hawoj, kat istatbꞌikanh haꞌ,
kat haxanhobꞌtanhen haꞌ nixhte haꞌ.
3 »”Yalnipaxo Komam Jahawil hakaꞌ tiꞌ yinh naj faraón:
Haninan chiwaytojan txꞌanh hakꞌ tawibꞌanh,
yet chinkutxbꞌanikojan txꞌiꞌal konhobꞌ,
kat hakankano yul inhakꞌan, haxa konhobꞌ tuꞌ chaxhinahti istiꞌ haꞌ.
4 Chach inhatxnitijan kat hakankano pakꞌno sat txꞌotxꞌ,
kat yul sunil noꞌ chꞌik kach isxanhobꞌtanheni,
kat kach iskꞌuxnito noꞌ xoltelajil noqꞌ.
5 Chiwakojan hachibꞌehal iswiꞌla witz, chinnohtzelojan ej akꞌal yu habꞌajil.
6 Chiwaqꞌ chakꞌanbꞌojan txꞌo txꞌotxꞌ yu hachikꞌil masanta yichla witz,
kat isnohilo isbꞌeh ha haꞌ yu hachikꞌil.
7 Hayet chachtanhkaniloj chiqꞌejholilo satkanh,
kat isqꞌejholilo txꞌumel, kat yok moyan yinh sat tzꞌayik,
yebꞌ xin matxa chimujli yoj ixahaw.
8 Chiwalan ta chitanhilo ismujlubꞌal sunil tzet chitzejtzon satkanh,
chiwanayojan qꞌejholo yibꞌanh hatxꞌotxꞌ yet chachtanhiloj,” xhi Komam Jahawil.
9 »Yalnipaxo Komam: Chiwanikojan bꞌiskꞌulal yinh yanma txꞌiꞌal konhobꞌ, yet chiꞌilaxto hawet konhobꞌ preso yulajla nimeta konhobꞌ mach ohtabꞌil hawu. 10 Chiwakojan niman xiwkilal yinh txꞌiꞌal konhobꞌ yet chachyilni, chiwanipaxikojan niman xiwkilal yinh ebꞌnaj isreyal hunteqꞌan konhobꞌ tuꞌ yet chꞌekꞌ jepla wespadahan yinh sat ebꞌnaj. Haꞌ istzꞌayikal yet chachtanhiloj toxanhe chiluylunkanh sunil anma yu xiwkilal, 11 yuto hanin Jahawil intiꞌan, chiwalan hakaꞌ tiꞌ:
Haꞌ yespada naj isreyal Babilonia chilow tawinh,
12 chintanhtzelojan hakonhobꞌ yu yespada ebꞌnaj winaj kaw aykano yip,
haꞌ sunil hunteqꞌan ebꞌnaj tuꞌ, haꞌ ebꞌnaj kaw aykano yip xolaj nimeta konhobꞌ.
Haꞌ ebꞌnaj chitanhtzenkanilo isloloꞌal konhobꞌ Egipto,
kat istanhkanilo anma kaw nimankano isbꞌisil ay sat txꞌotxꞌ Egipto.
13 Chintanhtzekanilojan sunil isnoqꞌ naj Faraón chiꞌukꞌni ha haꞌ ay sat txꞌotxꞌ Egipto,
matxa hunu anma chitzꞌilnhento haꞌ yu yoj,
matxa hunu no noqꞌ chitzꞌilnhento haꞌ yu yisqꞌaj.
14 Chiwalan ta hak tuꞌ chu waqꞌni sajbꞌojan ha haꞌ,
kat yel yojomal haꞌ hakaꞌ aceite,» xhi Komam Jahawil.
15 Yalnipaxo Komam: «Hayet kaw chitzꞌinhlokano txꞌotxꞌ Egipto kat yilaxilo sunil tzet ay sat txꞌotxꞌ,
yebꞌ yet chinpotxꞌkamojan sunil mak ay sat txꞌotxꞌ,
chiyohtanheniloj ta hanintiꞌan Yahawil hinan.
16 »Haꞌ huneꞌ tiꞌ bꞌit yet kamikal chibꞌitnhelaxi, haꞌ chisbꞌitnhe ebꞌix ix ay yulajla nimeta konhobꞌ, yet chiꞌoqꞌ ebꞌix yinh konhobꞌ Egipto, yebꞌ yinh sunil anma ah Egipto,» xhi Komam Jahawil.
17 Haꞌ yinh 15 (isholanhebꞌ) tzꞌayik, yinh 12 (iskabꞌlahonhebꞌ) ixahaw, yet 12 (iskabꞌlahonhebꞌxa) habꞌil jokanh preso, hul istzotiꞌ Komam Jahawil wetan yalni hakaꞌ tiꞌ: 18 «Hach iskꞌahol naj winaj, bꞌitnhe huneꞌ bꞌit yet bꞌiskꞌulal yinh anma ah Egipto kaw nimankano isbꞌisil, yebꞌ yinh ebꞌix iskutzꞌin nimeta konhobꞌ. Chaqꞌojnayto yul kambꞌal yalanh txꞌo txꞌotxꞌ yetbꞌiho anma chilaalaxayto bꞌey tuꞌ.
19 Chawalni tet: “¿Tajka chenah ta ekꞌbꞌal hekꞌulchꞌanil sata hunteqꞌanxa maka?
Wal xin chexalaxayto yul kambꞌal,
bꞌay ay kamom anma mach circuncisión yinh,” kachi tet.
20 »Haꞌ hunteqꞌan anma tuꞌ,
chiꞌaykꞌay yu espada yinta anma chitejlaxkamo xol howal, chiꞌalaxoko yul isqꞌabꞌ espada,
haꞌ naj faraón tuꞌ iweto naj yebꞌ sunil yet konhobꞌ yul kambꞌal.
21 Haꞌ yul kambꞌal tuꞌ, chitzotel ebꞌnaj yahaw kaw aykano yip ayxa bꞌey tuꞌ tet naj faraón yebꞌ ebꞌnaj kolwa yinh naj,
haꞌ ton ebꞌnaj ayayto yul kambꞌal bꞌay ay kamom anma tejlaxkamo yu espada machi circuncisión yinh.
22 Haꞌ bꞌey tuꞌ, ayayto Asiria yebꞌ sunil issoldado kaw niman isbꞌisil,
tejlaxkamo yu chꞌen espada xol howal; haꞌ bꞌay mujbꞌil naj rey Asiria tuꞌ,
hoybꞌilayo yu bꞌay muji ebꞌnaj issoldado naj.
23 Haꞌ ebꞌnaj tuꞌ, mujbꞌil ebꞌnaj yul holan kaw nahat yich,
hoyaniko yinh bꞌay mujbꞌil naj rey Asiria,
haꞌ sunil ebꞌnaj tuꞌ tejlaxkamo ebꞌnaj yu chꞌen espada xol howal,
haꞌ ton ebꞌnaj aqꞌni niman xiwkilal xol anma itzitz ay sat txꞌo txꞌotxꞌ tiꞌ.
24 Haꞌ bꞌey yul kambꞌal tuꞌ, ayxapaxayto konhobꞌ Elam,
yebꞌ sunil issoldado kaw nimankano isbꞌisil,
hoyaniko bꞌay mujbꞌil ebꞌnaj yinhla bꞌay mujbꞌil naj isreyal konhobꞌ Elam.
Sunil ebꞌnaj, tejlaxkamo yu chꞌen espada xol howal,
istokano ebꞌnaj yul kambꞌal yul txꞌo txꞌotxꞌ kaw nahat yich;
haꞌ hunteqꞌan ebꞌnaj tuꞌ, machi circuncisión yinh.
Haꞌ ton ebꞌnaj aqꞌni niman xiwkilal yilaꞌ anma itzitz ay sat txꞌo txꞌotxꞌ.
25 Haꞌ bꞌay mujan naj isreyal Elam,
hoybꞌilayo yu bꞌay mujan sunil issoldado naj kaw nimankano isbꞌisil;
haꞌ sunil ebꞌnaj tuꞌ, mach circuncisión yinh, potxꞌlaxkamo ebꞌnaj yu espada xol howal.
Haꞌ ton ebꞌnaj tuꞌ aqꞌni niman xiwkilal yilaꞌ anma itzitz ay sat txꞌo txꞌotxꞌ tiꞌ,
yajaꞌ wal tinanh matxa chinawi yu ebꞌnaj tzet chute isbꞌa yul kambꞌal xol kamom anma.
26 Haꞌ bꞌey yul kambꞌal tuꞌ, ayxapaxayto naj Mesec yebꞌ naj Tubal yebꞌ sunil issoldado kaw nimankano isbꞌisil,
haꞌ bꞌay mujan ebꞌnaj tuꞌ, hoybꞌilayo bꞌay mujan issoldado ebꞌnaj.
Haꞌ sunil ebꞌnaj tuꞌ mach circuncisión yinh,
potxꞌlaxkamo ebꞌnaj yu chꞌen espada xol howal,
yuto yaqꞌ ebꞌnaj niman xiwkilal yilaꞌ anma itzitz ay sat txꞌo txꞌotxꞌ tiꞌ.
27 Haꞌ ebꞌnaj tuꞌ, huneꞌnhe mujan ebꞌnaj yebꞌ ebꞌnaj soldado kaw helan,
mach circuncisión yinh, aykanto ebꞌnaj yebꞌ ischꞌen yet howal yul kambꞌal,
ayikto yespada ebꞌnaj yalanh iswiꞌ; istokano ismul ebꞌnaj yibꞌanh isbꞌajil,
yuto yaqꞌ ebꞌnaj niman xiwkilal yilaꞌ anma itzitz ay sat txꞌo txꞌotxꞌ tiꞌ yebꞌ kaw ay yip ebꞌnaj.
28 »Hakachpax tuꞌ isreyal Egipto,
chachaqꞌlax ekꞌoyaꞌ xol ebꞌnaj mach circuncisión yinh,
kat hamujlax yebꞌ ebꞌnaj mujlax potxꞌlaxkamo yu chꞌen espada.
29 Haꞌ yul kambꞌal tuꞌ ay anma ah Edom yebꞌ isreyal,
yebꞌ ebꞌnaj yahaw ej konhobꞌ ay yul ismajul txꞌotxꞌ Edom;
waxanhka kaw aytikꞌakano yip ebꞌnaj,
yajaꞌ wal tinanh ay ebꞌnaj yul kambꞌal xol kamom anma tejlaxkamo yu chꞌen espada.
Haꞌ bꞌey tuꞌ mujan ebꞌnaj xol anma mach circuncisión yinh bꞌay chitokano kamom.
30 Haꞌ bꞌey tuꞌ aypaxo ebꞌnaj oklena yahawil txꞌo txꞌotxꞌ ay yinh yetkꞌulal norte, yebꞌ sunil ebꞌnaj ah Sidón.
Ebꞌnaj tuꞌ, kaw aytikꞌakano yip ebꞌnaj, yaqꞌ ebꞌnaj niman xiwkilal yilaꞌ anma,
yajaꞌ yinhxa txꞌixwilal yu iskam ebꞌnaj.
Haꞌ ebꞌnaj mach circuncisión yinh tuꞌ xaꞌaykanto ebꞌnaj xol kamom anma,
potxꞌlaxkamo yu espada xol howal.
Haꞌ bꞌey tuꞌ, matxa chinawi yu tzet chute isbꞌa
yebꞌ yet kamomal yul kambꞌal.
31 »Hanin Yahawilintiꞌan chiwalan ta haꞌ sunil ebꞌnaj tuꞌ, chiꞌil-lax ebꞌnaj yu naj rey faraón yul kambꞌal, chiyiqꞌni yaqꞌlobꞌal iskꞌul naj yinh sunil issoldado kamom yul kambꞌal. Naj faraón yebꞌ sunil issoldado potxꞌlaxkamo yu chꞌen espada xol howal. 32 Hanin Yahawilintiꞌan waqꞌan yaqꞌaꞌko naj rey faraón niman xiwkilal xol anma itzitz ay sat txꞌo txꞌotxꞌ tiꞌ; yajaꞌ xin ayxayto naj faraón yul kambꞌal yebꞌ sunil issoldado kaw nimankano isbꞌisil xol kamom anma, mach circuncisión yinh, tejlaxkamo yu espada xol howal,» xhi Komam Jahawil.