4. CHIKUTXIKO ISRAEL HUNELXA SAT ISTXꞌOTXꞌ
(33:1–39:29)
Bꞌaytet yilal iswatxꞌen naj majwawom
33
Hul istzotiꞌ Komam Jahawil wetan, yalni hakaꞌ tiꞌ: 2 «Hach iskꞌahol naj winaj, tzotelanh tet hawet konhobꞌ Israel, chawalni ta haninan chiwalan hakaꞌ tiꞌ: “Hayet chiwanitojan howal bꞌey hunu konhobꞌ, haꞌ anma bꞌey tuꞌ chissikꞌilo hunu mak chiꞌok majwal. 3 Hayet chiyilni naj majwawom tuꞌ, ta lanhan yapni ebꞌnaj soldado yanoko howal yinh konhobꞌ, kat yoqꞌtzen naj chꞌen trompeta, yu iskolni isbꞌa anma. 4 Yajaꞌ ta ay hunu mak mach chiskol isbꞌa yet chiyabꞌen yoqꞌ chꞌen trompeta, kat istejlaxkamo yu espada, haꞌ huneꞌ mak tuꞌ haꞌ chꞌiniti kamikal tuꞌ yibꞌanh. 5 Yuto yabꞌe yoqꞌ chꞌen trompeta, yajaꞌ mach iskol isbꞌa, yuxin haꞌ initi kamikal tuꞌ yibꞌanh. Yajaꞌ wal mak chiyabꞌe yoqꞌ chꞌen trompeta, kat iskolni isbꞌa, mach chikami. 6 Yajaꞌ ta chiyil naj majwawom tuꞌ istit ebꞌnaj soldado yaqꞌaꞌko howal yinh konhobꞌ, machi xin chiyoqꞌtze naj chꞌen trompeta yu iskolni isbꞌa anma, yuxin hayet chiꞌapni ebꞌnaj soldado tuꞌ chistejnikamo ebꞌnaj anma yu espada, haꞌ mak chikam tuꞌ, chikam yu ismul, yajaꞌ haꞌ iskamikal tuꞌ chitokano yibꞌanh naj majwawom tuꞌ.7 »”Hach iskꞌahol naj winaj, hach kach wakojan majwawomal yinh hawet konhobꞌ Israel, haꞌ tzotiꞌ chꞌelti yul intiꞌan haꞌ chawal tet yu hakachwa yinh wuhan.a 8 Hayet chiwalnihan tet makta txꞌoj isbꞌeybꞌal hakaꞌ tiꞌ: ‘Hach txꞌoj, yilal chachkami,’ kinchihan tet. Yajaꞌ xin ta matzet chawal tet yunhe ispohnilo isbꞌa yinh istxꞌojal, haꞌ huneꞌ mak tuꞌ chikam yu ismul, yajaꞌ wal iskamikal tuꞌ tawibꞌanh chitokanoj. 9 Ta xin chawal tet anma txꞌoj isbꞌeybꞌal ta chispohilo isbꞌa yinh istxꞌojal, yajaꞌ xin mach chabꞌeto tzet chawala, haꞌ huneꞌ mak tuꞌ chikam yu ismul, yajaꞌ wal hach, matxa hawok yinh,”» xhi Komam.
Haꞌ isbꞌeybꞌal Komam Dios kaw tzꞌajan
10 Yalnipaxo Komam Jahawil wetan: «Hach iskꞌahol naj winaj, hal tet konhobꞌ Israel hakaꞌ tiꞌ: “Hex tiꞌ cheyala: ‘Haꞌ yu komanhkꞌomal yebꞌ yu kotxꞌojal, yuxin lanhan kotanhkaniloj, ¿tzetto xin chu yulkanh kokꞌul kexchi?’ kachi tet. 11 Chawalnipaxo tet hakaꞌ tiꞌ: Komam Jahawil chalni hakaꞌ tiꞌ: Hanin Yahawilintiꞌan, itzitz hinan mach chiwochehan iskamikal anma txꞌoj, wal xin haꞌ huneꞌ chiwochehan to chishel isbꞌeybꞌal, haxinwal ay iskawil. Hex Israel meltzanhweko yul inqꞌabꞌan chebꞌejnikano istxꞌojal. ¿Hex Israel tzet yinh xin chexkami?
12 »”Hach, iskꞌahol naj winaj, hal tet hawet konhobꞌ hakaꞌ tiꞌ: Ta ay hunu naj winaj kaw kꞌul isbꞌeybꞌal; yajaꞌ lahwi tuꞌ kat iswatxꞌen istxꞌojal, huneꞌ iskꞌulal iswatxꞌe yet yalanhtokano mach chikolwa yinh naj. Hakpax tuꞌ, ta ay hunu naj winaj txꞌoj isbꞌeybꞌal, lahwi tuꞌ kat isnahni isbꞌa, chiswatxꞌen iskꞌulal; mach chikam naj yu istxꞌojal iswatxꞌe yet yalanhtokano tuꞌ. Wal xin huneꞌ naj mulum, mach chischah naj isqꞌinal yu isbꞌeybꞌal kꞌul yet yalanhtokano tuꞌ. 13 Hayet chiwalnihan tet mak tohol isbꞌeybꞌal ta ay isqꞌinal, kaw xin chikawxi iskꞌul yinh istoholal iswatxꞌe tuꞌ chiyaniko ismul, haꞌ sunil istoholal iswatxꞌe yet yalanhtokano tuꞌ, matxa chinnatijan, wal xin chitit kamikal yibꞌanh yu ismul yakoj. 14 Yebꞌ xin ta chiwalan tet mak kaw txꞌoj isbꞌeybꞌal ta chikam yu istxꞌojal tuꞌ, yajaꞌ ta chisnah isbꞌa kat isbꞌejnikano istxꞌojal chiswatxꞌen iskꞌulal yebꞌ istoholal, 15 chiyaqꞌni meltzo tzet ischah iskꞌambꞌanil melyu, chiyaqꞌni meltzo tzet yelqꞌa, chisyijen iskꞌulal chiswatxꞌe anma itzitz sat yibꞌanhqꞌinal tiꞌ, chisbꞌejnikano istxꞌojal, haꞌ huneꞌ mak tuꞌ yinh kaw yeli ay isqꞌinal, machi tit kamikal yibꞌanh. 16 Haꞌ huneꞌ mak tuꞌ matxa hunu ismul yako yet yalanhtokanoj chinnatijan, yuto iswatxꞌe iskꞌulal yebꞌ istoholal, yuxin yinh kaw yeli ay isqꞌinal.
17 »”Haꞌ hawet konhobꞌ tiꞌ chala ta mach toholo tzet chinwatxꞌehan, hanin Yahawilintiꞌan, yajaꞌ haꞌ ebꞌnaj mach toholo tzet chiswatxꞌe. 18 Hayet chispohnilo isbꞌa naj winaj tohol isbꞌeybꞌal yinh iskꞌulal, chiswatxꞌen naj istxꞌojal, chitit kamikal yibꞌanh naj. 19 Yebꞌ xin ta chispohilo isbꞌa naj winaj kaw txꞌoj isbꞌeybꞌal yinh istxꞌojal, chiswatxꞌen naj iskꞌulal yebꞌ istoholal, matxa chitit kamikal yibꞌanh naj, wal xin ay isqꞌinal naj yu istoholal iswatxꞌe. 20 ‘Haꞌ tzet chiswatxꞌe Komam Dios Jahawil, mach toholoj,’ kexchi. Hex Israel haninan chiwilan tzet chexeliko hunun hex, hatatikꞌa tzet hebꞌeybꞌalnhe,” xhi Komam,» kachi.
Apni isqꞌumal tet yaꞌ Ezequiel ta aykꞌay konhobꞌ Jerusalén
21 Hayet howebꞌ tzꞌayik yinh 10 (islahonhebꞌ) ixahaw yet 12 (kabꞌlahonhebꞌxa) habꞌil jilaxtojanh preso, yapni huneꞌ naj ispeto bꞌey Jerusalén yalno wetan ta xaꞌaykꞌay konhobꞌ Jerusalén yu ebꞌnaj aniko howal yinh. 22 Yajaꞌ yinh qꞌejbꞌiyal yet yewihal yet yalanhto maxhto chiꞌapni naj inkꞌatanhan yanayo Komam Jahawil isqꞌabꞌ wibꞌanhan. Haxa yet sahabꞌ yet apni naj inkꞌatanhan ishajni Komam intiꞌan, intzotelkanhan hunelxa, matxa tonhe tukan hinan.
23 Istzotel Komam Jahawil wetan, yalni hakaꞌ tiꞌ: 24 «Hach iskꞌahol naj winaj, haꞌ anma ay yulajla konhobꞌ xaꞌuchkꞌalaxto yul ismajul txꞌotxꞌ Israel, chala: “Haꞌ yaꞌ Abraham kaw hanhechꞌan yaꞌ ischukil, yajaꞌ okkano txꞌo txꞌotxꞌ yeto yaꞌ, hajxamonh kaw niman kobꞌisil, yuxin jet chukaniko txꞌotxꞌ,” xhi. 25 Yuxin hal tet anma tuꞌ: “Hak tiꞌ yalni Komam Jahawil: ‘Hex tiꞌ chekꞌux noꞌ chibꞌe yebꞌ ischikꞌil, cheyinayo hebꞌa sata hetioxh, chemaqꞌnikamo heyet anmahil, ¿tom xin chito henah yok txꞌo txꞌotxꞌ tiꞌ heyetoj? 26 Hemaqꞌkamo anma yu heyespada, hewatxꞌen isyahbꞌetajil, heyetanto hebꞌa hunun hex yet heyixnhen yixal heyet anmahil, ¿tom xin chito henah yok txꞌo txꞌotxꞌ heyetoj?’ xhi Komam,” kachi.
27 »Chawalnipaxo tet: “Hak tiꞌ yalni Komam Jahawil Yahawil: Hanintiꞌan itzitz hinan, haninan chiwalan ta haꞌ hunteqꞌan anma ay yulajla konhobꞌ xaꞌuchkꞌalaxto tuꞌ, chimaqꞌlaxkamo yu espada, haxa mak ay xolajla ismunil chiwakojan tet noꞌ howla noqꞌ, chisxitnikamo noꞌ, haxa mak chikankano yul cuartel maka yulaj chꞌen nhachꞌen chikam yu howla yabꞌil. 28 Haxa iskonhobꞌ chinmeltzokanikojan desiertohal, chiwuchkꞌankantojan, chintanhtzenkanilojan yip bꞌay kaw chisloloꞌnhe isbꞌa. Haꞌ iswitzal txꞌotxꞌ Israel tuꞌ, kaw tzꞌinan chukanoj, matxa hunu mak chiꞌekꞌi. 29 Haꞌ anma tuꞌ chohtanheloj ta hanintiꞌan Yahawil hinan yet chinmeltzokanikojan iskonhobꞌ desiertohal, chiwuchkꞌankantojan yu sunil isyahbꞌetajil iswatxꞌe,” kachi», xhi Komam.
30 Yalnipaxo Komam: «Hach iskꞌahol naj winaj, haꞌ ebꞌnaj hawet konhobꞌ tiꞌ chibꞌuchwa ebꞌnaj tawinh yet chischalen isbꞌa ebꞌnaj bꞌey ismurohal konhobꞌ yebꞌ bꞌey ispultahil yatut, chilatzotel ebꞌnaj tet hunun, chilayalni ebꞌnaj: “Wal tinanh titanhwej chijabꞌen istzotiꞌ Komam Jahawil,” xhi ebꞌnaj. 31 Chiskutxbꞌako isbꞌa ebꞌnaj takꞌatanh hakaꞌ chu iskutxbꞌaniko isbꞌa konhobꞌ, kat yay tzꞌonhno ebꞌnaj tasataj yabꞌen tzet chawala hakaꞌ chu yay tzꞌonhno inkonhobꞌan, yajaꞌ mach chisyije ebꞌnaj tzet chawala, waxanhka xin kaw kꞌulchꞌan istzotel ebꞌnaj yu istiꞌ, yajaꞌ wal yanma ebꞌnaj tzujaniko yinta istxꞌojal chiyoche. 32 Hach tiꞌ, lahan hach yul sat ebꞌnaj hakaꞌ hunu mak chibꞌitni tet ebꞌix qꞌopotaj, kaw kꞌulchꞌan isbꞌitni yebꞌ kaw kꞌul yul isnuqꞌ. Haꞌ anma tiꞌ kaw chiyabꞌe tzet chawala, yajaꞌ mach chisyije.
33 »Yajaꞌ hayet chiyij isbꞌa sunil tzet hawala, hunteqꞌan kaw toxa chiyij isbꞌa, chisnanoti ebꞌnaj ta watojan inchejabꞌan xol ebꞌnaj,» xhi Komam.