Hal-lax isyaꞌtajil yinh ebꞌnaj tanhem anma Israel
34
Hul istzotiꞌ Komam Jahawil wetan, yalni hakaꞌ tiꞌ: 2 «Hach iskꞌahol naj winaj, hal isyaꞌtajil chiꞌay yibꞌanh ebꞌnaj tanhem anma Israel, chawalni: “Hak tiꞌ yalni Komam Jahawil: ¡Ay, kaw kꞌanchꞌan hex chebꞌaliko hebꞌa hetanhen anma Israel, yuto hanhe hex chetanhe hebꞌa! Hakaꞌ ebꞌnaj tanhem meꞌ, ¿tom mach chistanhe ebꞌnaj noꞌ meꞌ xin? 3 Hex tiꞌ cheyukꞌ yal yim noꞌ meꞌ, chewatxꞌenpaxo isxil noꞌ xilo heqꞌap, chepotxꞌnipaxo noꞌ kaw bꞌaqꞌich hekꞌuxuꞌ, yajaꞌ maxhtikꞌa chetanhepaxo noꞌ. 4 Mach cheyaqꞌ ilnhe noꞌ machi yip, mach cheyanhtepaxo noꞌ qꞌahnato yoj. Haꞌ noꞌ sajlemitoj, mach heyaqꞌ meltzo noꞌ yul ispeyabꞌ, mach hesaypaxo noꞌ kꞌaynatoj, wal xin kaw yahaw cheyute hebꞌa yinh noꞌ, yebꞌ xin kaw how hex yinh noꞌ, chemaqꞌni noꞌ. 5 Yuxin toxanhe chꞌekꞌ kolo noꞌ, yuto machi mak chitanhen noꞌ, chiskꞌuxnito noꞌ xoltelajil noqꞌ noꞌ, yuto chisajlemikanikꞌo noꞌ. 6 Haꞌ inkonhobꞌtiꞌan lahan hakaꞌ noꞌ meꞌ kꞌaynato iswiꞌla witz yebꞌ iswiꞌla wonhan, issajlemito noꞌ sunil sat yibꞌanhqꞌinal tiꞌ, machi hunu mak xin chisayni noꞌ, maka chiqꞌambꞌen noꞌ.7 »”Yuxin hex tanhem anma Israel, abꞌewe intzotiꞌan, 8 hanin Yahawil hinan, itzitz hinan, haninan chiwalan teyet: Haꞌ inkonhobꞌtiꞌan lahan hakaꞌ noꞌ meꞌ chiꞌelqꞌalaxtoj, chikꞌuxlaxto yu noꞌ xoltelajil noqꞌ, yuto machi mak chitanheni, mach xin saylax noꞌ yu ebꞌnaj chitanhen noꞌ. Wal xin hanhe ebꞌnaj chistanhe isbꞌa, mach xin chistanhe ebꞌnaj inmeꞌ tuꞌan. 9 Yuxin hex tanhem anma Israel, abꞌewe istzotiꞌ Komam Jahawil. 10 Hak tiꞌ yalni Komam Jahawil hakaꞌ tiꞌ: Hanintiꞌan chiwiti inhowalan teyinh, hex istanhemal inkonhobꞌan. Chiwilojan inkonhobꞌan yul heqꞌabꞌ, yuto hexnhe chiyaꞌ ilnhe hebꞌa, mach chetanhe inkonhobꞌtiꞌan.
11 »”Yuto hak tiꞌ yu yalnipaxo Komam Jahawil: Hankawinan chinsayikꞌojan inmeꞌ tuꞌan, kat wilnikojan yinh. 12 Hakaꞌ chu yohtanhenilo naj tanhem meꞌ ismeꞌ, chissayni naj noꞌ yet chissajlemito noꞌ, hak tuꞌ chu wohtanhenilojan inmeꞌ tuꞌan. Chinkutxbꞌanikojan, chiwinilojan yulaj konhobꞌ bꞌay sajlemito yinh istzꞌayikal yet yul isyaꞌtajil yebꞌ xiwkilal yibꞌanh. 13 Haninan chiwilojan yulajla konhobꞌ, chinkutxbꞌanikojan chiwinitojan sat istxꞌotxꞌ, chintanhenan yinhla istzalanil txꞌotxꞌ Israel, yebꞌ bꞌey istiꞌla ha haꞌ yebꞌ bꞌey ej konhobꞌ bꞌay ay anma yul ismajul Israel. 14 Chiwitojan lowo bꞌay kaw yax telaj, chinwatxꞌenan ispeyabꞌ yinhla istzalanil witz, haꞌ bꞌey tuꞌ chiway yul ispeyabꞌ tuꞌ, chintanhenan bꞌay kaw ay cheqꞌanh yinhla istzalanil iswitzal txꞌotxꞌ Israel. 15 Hanin Yahawilintiꞌan chiwalan ta haninan chintanhehan inmeꞌan, chinwatxꞌenan ispeyabꞌ. 16 Haninan chinsayan noꞌ kꞌaynatoj, chiwaqꞌni meltzohojan noꞌ sajleminato tuꞌ yul ispeyabꞌ, chiwanhtenan noꞌ qꞌahnato yoj yebꞌ noꞌ machi yip, chintanhenan noꞌ yinh kaw istoholal. Wal noꞌ kaw bꞌaqꞌich yebꞌ noꞌ kaw ay yip chintanhtzelojan noꞌ.
17 »”Hanin Yahawilintiꞌan chiwalan teyet hex inkonhobꞌtiꞌan: Haninan chiwilan tzet chexeliko hunun hex, hex lahan hex hakaꞌ noꞌ meꞌ yebꞌ hex lahan hex hakaꞌ noꞌ chiw. 18 Ay hex tiꞌ hakaꞌ noꞌ meꞌ, hanhkꞌanhe teꞌ telaj kaw kꞌul cheloh, haxa teꞌ matxa chilahwi heyu toxanhe chexekꞌxanhxon yibꞌanh, cheyukꞌni ha haꞌ kaw saj, yajaꞌ haxa yet chilahwi heyukꞌni haꞌ, kat hetzꞌilnhenkanto haꞌ yu heyoj. 19 Haxa hunteqꞌanxa inmeꞌan chilonito teꞌ telaj chexanhobꞌtanhe, chiyukꞌni ha haꞌ chetzꞌilnheto yu heyoj.
20 »”Yuxin hanin Yahawilintiꞌan chiwalan teyet: Haninan chiwilan tzet chiꞌeliko noꞌ meꞌ bꞌaqꞌich yebꞌ noꞌ meꞌ bꞌajtanhe. 21 Hex tiꞌ lahan hex hakaꞌ noꞌ meꞌ chitennikꞌo yet meꞌal machi yip, kat issajlemikanto noꞌ yu noꞌ. 22 Haninan chinkolan inmeꞌ tuꞌan, matxa bꞌaqꞌinh xin chikꞌuxlaxto noꞌ yu noꞌ howla noqꞌ. Haninan chiwilan tzet chiꞌeliko hunun noꞌ meꞌ tuꞌ, ta kꞌul maka ta machoj. 23 Haninan chiwikanhan huneꞌ mak chexilni hex Israel, kat kexistanheni, haꞌ huneꞌ mak tuꞌ, haꞌ ton yaꞌ David inchejabꞌan, haꞌ hetanhemal.a 24 Hanin Yahawilintiꞌan chiwalan ta haninan chinokan heDiosaloj, haxa yaꞌ David inchejabꞌan haꞌ chꞌok yahawo texol. Haꞌ hunteqꞌan tiꞌ hanin Yahawilintiꞌan chiwalan.
25 »”Chintꞌinhbꞌakanojan intratohan yet aqꞌankꞌulal yebꞌ anma Israel, chiwinilojan noꞌ howla noqꞌ sat istxꞌotxꞌ; chiꞌeh sat txꞌotxꞌ kaw kꞌul yinh sunil iskꞌul, kat iskankano wayo xolaj qꞌebꞌtaj. 26 Chiwayojan isyaxil yibꞌanh makta ayayo yinhla ishoyanil wonhan wetan yehi, chiwanipaxayojan haꞌ nhabꞌ yinh istzꞌayikal, haꞌ nhabꞌ chiꞌay tuꞌ, kaw niman isyaxil chiyakanayoj. 27 Haꞌ te teꞌ chiyaqꞌ teꞌ sat, chiyaqꞌni txꞌo txꞌotxꞌ sat tzꞌunubꞌ, chiꞌehayo anma Israel sat istxꞌotxꞌ yinh sunil iskꞌul. Hayet chinkolilojan yul isqꞌabꞌ konhobꞌ bꞌay ayko chejabꞌoj, chiyohtanheloj ta hanintiꞌan Yahawil hinan. 28 Matxa chiꞌelqꞌalaxto tzetaj ay yu nimeta konhobꞌ, yebꞌ xin mach chikꞌuxlaxkamo yu noꞌ howla noqꞌ, wal xin chiꞌehayo sat istxꞌotxꞌ yinh sunil iskꞌul, machi mak chixibꞌteni. 29 Haꞌ istxꞌotxꞌ ebꞌnaj kaw chibꞌinakanoj yuto kaw kꞌul chu sat tzꞌunubꞌ, yuxin matxa chiyaqꞌle wahil yul iskonhobꞌ, matxa xin chꞌel ispixan yu ej nimeta konhobꞌ. 30 Hanin Yahawilintiꞌan chiwalan ta ayinikojan tekꞌatanh hex Israel hex tiꞌ, yuto hanin Yahawilintiꞌan haninan heDiosal, haxa hex Israel hex tiꞌ inkonhobꞌan heyehi. 31 Hanin Yahawilintiꞌan chiwalan ta wetan heyehi, haninan chexintanhehan hakaꞌ istanhelax noꞌ meꞌ bꞌay kaw ay telaj. Hex tiꞌ anma hex, haninan heDiosal,”» xhi Komam Jahawil.b