Hal-laxkano isyaꞌtajil chiꞌay yibꞌanh txꞌotxꞌ Seir
35
Hul istzotiꞌ Komam Jahawil wetan, yalni hakaꞌ tiꞌ: 2 «Hach iskꞌahol naj winaj, tꞌanhxanhto yinh yetkꞌulal txꞌotxꞌ Seir kat hatzotel yibꞌanhilo isyaꞌtajil chul yinh txꞌotxꞌ, 3 chawalni hakaꞌ tiꞌ: “Hak tiꞌ yalni Komam Jahawil:Hanintiꞌan chiwakojan inhowalan teyinh, hex ay hex bꞌey txꞌotxꞌ chewal txꞌotxꞌ Seir.
Chiwayojan isyaꞌtajil teyibꞌanh yinh sunil wipan,
chinmeltzokanikojan hekonhobꞌ tiꞌ hakaꞌ txꞌotxꞌ desierto, kat yuchkꞌalaxkantoj.
4 Haꞌ hunteqꞌan konhobꞌ ay yulaj ismajul txꞌotxꞌ Seir chintanhtzekanilojan,
matxa mak chikankano sat txꞌotxꞌ, hak tuꞌ chu heyohtanheniloj ta hanintiꞌan Yahawil hinan.
5 »”Hex kaw naunhe heyako howal yinh ebꞌnaj Israel, heyaniko yul isqꞌabꞌ kamikal yet kaw ayayo istatilal isyaꞌtajil yibꞌanh ebꞌnaj. 6 Yuxin hanin Yahawilintiꞌan chiwaqꞌ bꞌinaho inbꞌihan, chiwalnihan ta chexwakojan yul isqꞌabꞌ kamikal, chexistzumbꞌenikꞌo kamikal, yuto machi tzꞌay hekꞌul heyaqꞌni maloto ischikꞌil anma Israel. 7 Chinmeltzokanikojan txꞌotxꞌ chewal txꞌotxꞌ Seir hakaꞌ txꞌotxꞌ machi yahaw, chintanhtzenkanilojan hunteqꞌan konhobꞌ ay yul ismajul txꞌotxꞌ. Chintanhtzenilojan makta chiꞌapni sat txꞌotxꞌ yebꞌpaxo makta chiꞌel sat txꞌotxꞌ. 8 Xanhe chinohilo iswiꞌla witz yu kamom anma chitejlaxkamo yu espada, kat iskankano pakꞌno bꞌey iswiꞌla wonhan yebꞌ satla akꞌal, yebꞌ bꞌey sunil istiꞌla ha nixhte haꞌ. 9 Haninan chiwayojan isyaꞌtajil teyibꞌanh yinh sunilbꞌal tiempo, matxa bꞌaqꞌinhal chiwatxꞌelaxkanh hekonhobꞌ hunelxa, hak tuꞌ chu heyohtanheniloj ta hanintiꞌan Yahawil hinan.
10 »”Hex tiꞌ cheyala: ‘Haꞌ txꞌotxꞌ Israel yebꞌ txꞌotxꞌ Judá, jet yeh txꞌotxꞌ iskabꞌ majanil, chiꞌokkano txꞌotxꞌ ju waxanhka aykꞌo Komam Jahawil bꞌey tuꞌ,’ kexchi. 11 Yajaꞌ hanin Yahawilintiꞌan chiwaqꞌ bꞌinaho inbꞌihan, chiwalnihan ta hakaꞌ yu ischiwako hekꞌul heyaniko howal yinh Israel, hak tuꞌ chexwutepaxojan. Hayet chiwilnihan tzet chexelikoj, chinyohtanhenilojan anma Israel. 12 Cheyohtanheniloj hex tiꞌ ta hanin Yahawilintiꞌan, chiwabꞌehan yet chexbꞌuchwa yinh Israel yet cheyalni: ‘Haꞌ konhobꞌ ay bꞌey txꞌotxꞌ chewal txꞌotxꞌ yul ismajul Israel kaw maꞌuchkꞌalaxkantoj, haxa anma tuꞌ maꞌalaxiko yul koqꞌabꞌ yunhe kotanhtzenkaniloj,’ kexchi. 13 Kaw nime anma cheyute hebꞌa yinh insatan, kexok tzotelo winhan. Wabꞌehan tzet heyalah,”» xhi Komam. 14 Hak tiꞌ yalnipaxo Komam Jahawil: «Haninan chiwayojan isyaꞌtajil teyibꞌanh yunhe istzala anma ay yulajla konhobꞌ ay sat txꞌo txꞌotxꞌ. 15 Kaw sunil anma chitzalahi hakaꞌ yu hetzala yet yay isyaꞌtajil yibꞌanh anma Israel. Hak tuꞌ chexwutehan yet chiwanayojan isyaꞌtajil teyibꞌanh, hex ay hex bꞌey txꞌotxꞌ chewal txꞌotxꞌ Seir. Chiwanipaxayojan isyaꞌtajil yibꞌanh sunil txꞌotxꞌ Edom, hak tuꞌ chu heyohtanheniloj ta hanintiꞌan Yahawil hinan,» xhi Komam Jahawil.