Haꞌ Israel chiwatxꞌelaxkanh yet bꞌaqꞌinh
36
Tzotel Komam Jahawil wetan, yalni hakaꞌ tiꞌ: «Hach iskꞌahol naj winaj, hal intzotiꞌan tet anma ay bꞌey txꞌotxꞌ chewal txꞌotxꞌ ay yul ismajul Israel, chawalni: “¡Hex ay bꞌey txꞌotxꞌ chewal txꞌotxꞌ ay yul ismajul Israel, abꞌewe istzotiꞌ Komam!” kachi. 2 Yalnipaxo Komam Jahawil hakaꞌ tiꞌ: “Haꞌ ebꞌnaj ayko ishowal teyinh chiyal hakaꞌ tiꞌ: ‘Haꞌ txꞌotxꞌ chewal txꞌotxꞌ ay bꞌey hunteqꞌan nime witz nahat yekanh ay yul ismajul Israel, chiꞌokpaxkano txꞌotxꞌ komajuloj,’ xhi ebꞌnaj. 3 Yuxin hal intzotiꞌan, chawalni: Hak tiꞌ yalni Komam Jahawil: Hex tiꞌ kaw sunil nimeta konhobꞌ aqꞌni howal teyinh, kexistanhtzenkaniloj, kexaykꞌaykano yul isqꞌabꞌ sunil nananta konhobꞌal, hebꞌahlaxi, hebꞌuchlax yu anma ay yulajla konhobꞌ. 4 Yuxin hex ay hex bꞌey txꞌotxꞌ chewal txꞌotxꞌ ay yul ismajul Israel, abꞌewe istzotiꞌ Komam Jahawil: Hak tiꞌ yalni Komam Jahawil tet ej hunteqꞌan witz, hunteqꞌan wonhan yebꞌ ej haꞌ nixhte haꞌ, hunteqꞌan konhobꞌ xaꞌuchkꞌalaxtoj, hunteqꞌan konhobꞌ xaꞌay isyaꞌtajil yibꞌanh, yebꞌ tet hunteqꞌan konhobꞌ bꞌay machi anma, hunteqꞌan konhobꞌ elqꞌalaxto tzetaj aya, isbꞌuchlaxpaxo yu hunteqꞌan konhobꞌ ayko yinhla ishoyanil. 5 Hanin Yahawintiꞌan, yinh kaw yeli chintzotelan yu sunil inhowalan yinh hunteqꞌanxa nimeta konhobꞌ yebꞌ yinh konhobꞌ Edom, yuto ismajilo ebꞌnaj intxꞌotxꞌan, kaw xin tzala ebꞌnaj, yalni ebꞌnaj intxꞌotxꞌan oko yu. Ischiwako iskꞌul yinh inkonhobꞌan, istzumbꞌenilo anma ayayo sat txꞌotxꞌ, ok anma tuꞌ ischejabꞌoj. 6 Yuxin hach Ezequiel, hal intzotiꞌan tet anma ay sat txꞌotxꞌ Israel yebꞌ tet anma ay yinhla istzalanil witz, yebꞌ bꞌey ej wonhan yebꞌ tet anma ay istiꞌla haꞌ nixhte haꞌ, yebꞌ tet anma ayayo satla akꞌal, chawalni hakaꞌ tiꞌ: Hak tiꞌ yalni Komam Jahawil: ‘Hanintiꞌan yinh sunil inhowalan chintzotelan, yuto hex tiꞌ kexbꞌuchlax yu anma ay yulaj nimeta konhobꞌ. 7 Yuxin hanin Yahawilintiꞌan chiwalan ta xawakanh inqꞌabꞌan waqꞌni bꞌinaho inbꞌihan walnihan ta haꞌ hunteqꞌan konhobꞌ ayko yinhla hehoyanil chꞌokkano yinh txꞌixwilal,’ kachi. 8 »”Wal bꞌey iswitzlajil Israel xin, kaw chipohchakanokanh teꞌ qꞌebꞌtaj, kat isto leno isqꞌabꞌ teꞌ, chiyaqꞌni teꞌ sat yunhe islohni inkonhobꞌan, yuto kaw toxa chimeltzo inkonhobꞌtuꞌan sat txꞌotxꞌ Israel. 9 Yuto haninan chinokan heyetbꞌihoj, chinmeltzohan tekꞌatanh; hex tiꞌ hakaꞌ inmunilan yebꞌ intzꞌunubꞌan cheyukoj. 10 Chiwaqꞌ chibꞌojan hebꞌisil hex Israel hex tiꞌ, kat ispohchakanh ebꞌnaj winaj texol, kat hepohchakan yulajla hekonhobꞌ, kat iswatxꞌenkanh konhobꞌ uchkꞌabꞌiltoj. 11 Chiwaqꞌpohchahojan hebꞌisil, chiwaqꞌnipohchahojan henoqꞌ, kaw chichꞌibꞌkanokanh hebꞌisil, kat hepohchakanokanh, kat heye bꞌey tuꞌ hakaꞌ yet payat. Chiwaqꞌnihan ekꞌbꞌal iskꞌulal teyet sata yet yalanhtokanoj, hak tuꞌ chu heyohtanheniloj ta hanintiꞌan Yahawil hinan. 12 Hex chewal txꞌotxꞌ yul ismajul Israel chꞌekꞌo xanhxon ebꞌnaj Israel inkonhobꞌan teyibꞌanh, kat yehkanayo ebꞌnaj bꞌey tuꞌ kat heyokkano ismajuloj, matxa bꞌaqꞌinhal xin chetanhtzelo yuninal inkonhobꞌtiꞌan.
13 »”Hanin Yahawilintiꞌan chiwalan: Hex chewal txꞌotxꞌ, haꞌ anma ay yul hunteqꞌanxa konhobꞌ chala ta hex tiꞌ chekꞌuxayto anma, chemaqꞌnikamo anma ay yul konhobꞌ. 14 Yajaꞌ hanin Yahawilintiꞌan, chiwalan ta matxa bꞌaqꞌinhal chebꞌiqꞌayto anma, yebꞌ xin matxa bꞌaqꞌinhal chemaqꞌkamo anma ay yul konhobꞌ. 15 Matxa bꞌaqꞌinhal cheyabꞌe isbꞌuchwa anma ay yulaj nimeta konhobꞌ teyinh yebꞌ xin matxa chiꞌilaxilo hepixan yu ej konhobꞌ. Hanin Yahawilintiꞌan chiwalan ta matxa bꞌaqꞌinh chemaqꞌkamo anma ay yul konhobꞌ,”» xhi Komam.
16 Lahwi tuꞌ istzotelpaxo Komam Jahawil wetan, yalni hakaꞌ tiꞌ: 17 «Hach iskꞌahol naj winaj hayet ay anma Israel, sat istxꞌotxꞌ yet yalanhtokanoj yetanto anma txꞌotxꞌ yu isbꞌeybꞌal yebꞌ yu istxꞌojal iswatxꞌe, yuto haꞌ isbꞌeybꞌal tuꞌ kaw yahbꞌeta yul insatan hakaꞌ istzꞌilal yet chilni ix ix istxꞌawobꞌal. 18 Wayojan inhowalan yibꞌanh yuto ismaqꞌkamo yet anmahil, yaqꞌni maloto ischikꞌil sat txꞌotxꞌ yul iskonhobꞌ, yetanto txꞌo txꞌotxꞌ yu istxꞌojal iswatxꞌe yet yok yinoyo isbꞌa sata tioxh. 19 Yuxin waqꞌ sajlemotojan yulajla nimeta konhobꞌ, ispujnakanto sunil yul sat yibꞌanhqꞌinal tiꞌ, wilnihan tzet elkaniko hatatikꞌa tzet isbꞌeybꞌalnhe yebꞌ tzet iswatxꞌe. 20 Haxa yet yapni yulajla nimeta konhobꞌ bꞌay apnikanoj yinilo ispixan inbꞌihan kaw aykano yelapnoj, yuto haꞌ anma ay yulajla nimeta konhobꞌ bꞌay apni, halni hakaꞌ tiꞌ: “Haꞌ hunteqꞌan anma tiꞌ iskonhobꞌ Komam Dios Jahawil, yajaꞌ xin maꞌilaxilo yul iskonhobꞌ,” xhi. 21 Yajaꞌ xin kaw yaꞌ wabꞌehan wilnihan yilaxilo ispixan inbꞌihan yu anma Israel yulajla konhobꞌ bꞌay apnikanoj.
22 »Yuxin hal tet hawet konhobꞌ Israel, hak tiꞌ yute yalni Komam Jahawil: “Haꞌ tzet chinwatxꞌehan maxhtaj heyu Israel hex tiꞌ yuxin inwatxꞌehan, wal xin yu inbꞌihan kaw aykano yelapnoj, yuxin inwatxꞌehan; haꞌ ton inbꞌihan heyilo ispixan xolaj nimeta konhobꞌ bꞌay kexapnikanoj.a 23 Chinsajnhehan inbꞌihan kaw aykano yelapnoj, haꞌ ton inbꞌihan heyilo ispixan xolaj nimeta konhobꞌ. Hanin Yahawilintiꞌan chiwalan ta chiyohtanhelo anma ay yulajla nimeta konhobꞌ ta hanintiꞌan Yahawil hinan yet chinsajnhen inbꞌihan teyinh yinh sat anma tuꞌ. 24 Haninan chexwilojan yulajla nimeta konhobꞌ, chexinkutxbꞌantijan sunil yul sat yibꞌanhqꞌinal, chexwinitojan yul hekonhobꞌ. 25 Chexinsajnhehan yu haꞌ sajla haꞌ, chexinsajnhenkanojan yinh sunil heyahbꞌetajil, chexinsajnhenpaxkanojan yinh sunil hemul yet heyinayo hebꞌa sata hetioxh. 26 Chiwaqꞌ akꞌbꞌolojan heyanma, chiwaqꞌni akꞌbꞌolojan henabꞌal. Haꞌ heyanma kaw kaw hakaꞌ chꞌen chꞌen, chiwaqꞌan huneꞌ selel kaw labꞌan, isyijen tzet chiwalan. 27 Chiwanikojan Wespírituhan teyinh, chiwakojan yinh henabꞌal chebꞌeybꞌalnhen chejbꞌanile chiwaqꞌan, chekꞌubꞌanpaxo kuybꞌanile chiwalan, kat heyijen tzet chala. 28 Chexehayo sat txꞌo txꞌotxꞌ waqꞌan tet heyichmam, kat heyok inkonhobꞌojan, kat wokkanojan heDiosaloj. 29 Chexinkolilojan tet sunil isyahbꞌetajil kexetantoj, chiwalnihan ta chisatni ixim trigo, matxa xin chiwayojan wahil teyibꞌanh. 30 Chiwalnihan ta yilal chisatni teꞌ lobꞌehal, chiwalnipaxojan ta chisatni tzꞌunubꞌ chꞌel sat txꞌo txꞌotxꞌ, yunhe matxa bꞌaqꞌinh chꞌel hepixan yu wahil sata ej nimeta konhobꞌ. 31 Chenanoti istxꞌojal hebꞌeybꞌal yebꞌ tzetaj mach kꞌulo hewatxꞌe yet yalanhtokanoj, kat hetxꞌixwilo tet, yu istxꞌojal yebꞌ isyahbꞌetajil hewatxꞌe. 32 Hanin Yahawilintiꞌan chiwalan: Hex Israel hex tiꞌ ohtanheweloj ta maxhtaj yu kꞌul hex yuxin chinwatxꞌehan hunteqꞌan tiꞌ, wal xin txꞌixwanhwej, kat istak hekꞌul teyinh yu istxꞌojal hewatxꞌe.
33 »”Haꞌ istzꞌayikal yet chexinsajnhekanojan yinh sunil hetxꞌojal, chexwinitojan yul hekonhobꞌ, kat hekankano bꞌey tuꞌ, chewatxꞌenkanh hekonhobꞌ uchkꞌalaxtoj. 34 Haꞌ hetxꞌotxꞌ tzꞌinan yukanoj chexmunlaho sat txꞌotxꞌ, chiyaqꞌni hetzꞌunubꞌ sat, hak tuꞌ xin chu yilni anma chꞌekꞌ bꞌey tuꞌ ta ayxa tzꞌunubꞌ sat txꞌotxꞌ. 35 Chalni anma tuꞌ hakaꞌ tiꞌ: ‘Haꞌ huneꞌ txꞌo txꞌotxꞌ tiꞌ kaw tzꞌinan yukano txꞌotxꞌ, yajaꞌ wal tinanh ayxa tzꞌunubꞌ sat txꞌotxꞌ kaw lahan jilni txꞌotxꞌ hakaꞌ peyabꞌ Edén, ispeyabꞌ Komam Dios. Haxa hunteqꞌan konhobꞌ tiꞌ ay isyaꞌtajil yibꞌanh, yuchkꞌalaxkantoj yebꞌ xin kaw tzꞌinan yukanoj, ayxa anma sat, pebꞌilpaxayoj,’ xhi anma. 36 Haꞌ anma chitokan yulajla konhobꞌ ayko yinhla hehoyanil chiyohtanheloj ta haninan Yahawilintiꞌan, chinwatxꞌekanhan tzet uchkꞌabꞌiltoj, chintzꞌunnayojan tzet hokꞌbꞌilkanh. Haꞌ hunteqꞌan tiꞌ hanin Yahawilintiꞌan, chiwalan, chiyij isbꞌa wuhan.
37 »”Yalnipaxo Komam Jahawil hakaꞌ tiꞌ: Hex Israel hex tiꞌ chiwaqꞌpaxojan tzet cheqꞌan hunelxa wetan. Chiwaqꞌ chꞌibꞌojan hebꞌisil hakaꞌ ispohcha isbꞌisil noꞌ meꞌ. 38 Hex tiꞌ lahan hex hakaꞌ noꞌ meꞌ chiꞌaqꞌlax wetan xahanbꞌalil yinh qꞌinh kaw aykano yelapnoj chꞌekꞌtzelax bꞌey konhobꞌ Jerusalén. Haꞌ konhobꞌ kaw tzꞌinan yukanoj chinohilo heyu, hak tuꞌ chu heyohtanheniloj ta hanintiꞌan Yahawil hinan,”» xhi Komam Jahawil.