—Hach iskꞌahol naj winaj, ¿chimyu yulkanh iskꞌul hunteqꞌan isbꞌajil kamom tiꞌ? xhi Komam.

Intaqꞌwihan:

—Mam Wahawil, hach hawohtaj, kinchihan.

4 Yalni Komam wetan:

—Hal intzotiꞌan tet hunteqꞌan isbꞌajil kamom tiꞌ, chawalni: “¡Hex isbꞌajil kamom kaw tajin tiꞌ, abꞌewe istzotiꞌ Komam Jahawil! 5 Hak tiꞌ yalni Komam Jahawil hakaꞌ tiꞌ: Haninan chiwaqꞌan jaqꞌeqꞌ hehiqꞌaꞌ, kat yul hekꞌul hunelxa. 6 Chishunbꞌan isbꞌa hebꞌajil, chiwaqꞌnihan ischibꞌehal henimanil, chiwanikojan istzꞌumal henimanil, chiwaqꞌnihan jaqꞌeqꞌ hehiqꞌaꞌ, kat yulkanh hekꞌul, cheyohtanheniloj ta hanintiꞌan Yahawil hinan,” xhi Komam, kachi, xhi Komam wetan.

7 Walnihan istzotiꞌ Komam tet hunteqꞌan isbꞌajil kamom hakaꞌ yu yalni Komam wetan. Hayet lanhan intzotel tuꞌan wabꞌenan isbꞌili yekꞌ huneꞌ hakaꞌ txixkabꞌ, ishunbꞌan isbꞌa isbꞌajil hunun kamom anma tuꞌ. 8 Wilnihan ta xaꞌishunbꞌa isbꞌa bꞌaj tuꞌ yebꞌ xin ayxa ischibꞌehal yebꞌ istzꞌumal isnimanil; yajaꞌ maxhto chishiqꞌ jaqꞌeqꞌ.

9 Yalni Komam wetan: «Hach iskꞌahol naj winaj, hal intzotiꞌan tet jaqꞌeqꞌ, chawalni: Hak tiꞌ yalni Komam Jahawil wetan hakaꞌ tiꞌ: “¡Hach jaqꞌeqꞌ, titanh bꞌay sunil yul sat yibꞌanhqꞌinal tiꞌ, kat hawayto yul hunteqꞌan nimanile kamnajilo tiꞌ!” kachi,» xhi Komam wetan. 10 Walnihan istzotiꞌ Komam tet jaqꞌeqꞌ hakaꞌ yu yalni Komam wetan. Ishiqꞌni hunteqꞌan kamom anma tuꞌ jaqꞌeqꞌ, yulkanh iskꞌul, yah linhnoj, kaw nimankano isbꞌisil hakaꞌ jilnito hunu niman majan soldado.

11 Tzujan tuꞌ yalni Komam Yahawil wetan: «Hach iskꞌahol naj winaj, haꞌ sunil hunteqꞌan isbꞌajil kamom anma tiꞌ yechel konhobꞌ Israel yehi. Haꞌ anma Israel tiꞌ chala: “¡Hanhonh tiꞌ tajinxa kobꞌajil, kamnaxa tzet ayko yipo kokꞌul, lanhan kotanhkanilo yinh hunelnhe!” xhi.^b 12 Yuxin hal intzotiꞌan tet anma Israel tiꞌ, chawalni: Hak tiꞌ yalni Komam Jahawil: Hex Israel inkonhobꞌan, chexinhajiltijan bꞌay mujan hex, chexwiniltijan bꞌey tuꞌ, chexwaqꞌni meltzohojan sat txꞌotxꞌ Israel. 13 Hayet chinhajnihan bꞌay mujan hex chexwiniltijan bꞌey tuꞌ, cheyohtanheniloj hex Israel inkonhobꞌtiꞌan ta hanintiꞌan Yahawil hinan. 14 Chiwalan teyet ta chiwaqꞌan Wespírituhan teyinh, hak tuꞌ xin ay hekawil, chexwaqꞌni xewojan sat hetxꞌotxꞌ, cheyohtanheloj ta hanin Yahawilintiꞌan walan hunteqꞌan tiꞌ, kat yijni isbꞌa tzet chiwalan,» xhi Komam Yahawil.

15 Yul istzotiꞌ Komam Jahawil wetan yalni hakaꞌ tiꞌ: 16 «Hach iskꞌahol naj winaj sayti hunu te teꞌ bꞌay chatzꞌibꞌnheko hakaꞌ tiꞌ: “Yet konhobꞌ Judá yebꞌ anma Israel ayiko yetbꞌiho Judá tuꞌ,” chawutekoj. Lahwi tuꞌ kat hawiniti hunxa teꞌ, kat hatzꞌibꞌnheniko yinh teꞌ hakaꞌ tiꞌ: “Yet yaꞌ Efraín, yaꞌ ayko selelo yaꞌ José yebꞌ hunteqꞌanxa anma Israel ayko yetbꞌihoj,” chawutekoj. 17 Lahwi tuꞌ, chahunbꞌan teꞌ iskabꞌil, hak tuꞌ xin huneꞌxanhe chiꞌeliko teꞌ yul haqꞌabꞌ. 18 Haxa yet chisqꞌambꞌen hawet konhobꞌ Israel, chalni: “¿Halilo jetanh tzet chalilo huneꞌ tiꞌ?” xhi. 19 Chawalni tet, hak tiꞌ yalni Komam Jahawil: “Chiwilojan te teꞌ yet yaꞌ José, teꞌ ayko yul isqꞌabꞌ yaꞌ Efraín, yebꞌ hunmajan anma Israel ayko yetbꞌihoj, chinhunbꞌanan yebꞌ teꞌ yet Judá, hak tuꞌ xin hunxanhe chiꞌeliko yul inqꞌabꞌan,” xhi Komam. 20 Haꞌ te teꞌ bꞌay kach tzꞌibꞌli tuꞌ ayko teꞌ yul haqꞌabꞌ sata anma Israel, 21 chawalni tet: Hak tiꞌ yalni Komam Jahawil: “Hanintiꞌan chiwilojan anma Israel, yulajla nimeta konhobꞌ bꞌay apnikanoj, chinkutxbꞌanikojan sunil bꞌayejtuꞌwalil bꞌay pujnakantoj, chiwinitijan sat istxꞌotxꞌ. 22 Hunxanhe konhobꞌal chiꞌelkaniko bꞌey txꞌotxꞌ chewal txꞌotxꞌ sat txꞌotxꞌ Israel yebꞌ xin hunxanhe mak chiꞌok yahawiloj, matxa bꞌaqꞌinhal tiꞌ kabꞌ konhobꞌal chiꞌelikoj, matxa chispohle isbꞌa. 23 Matxa chiyetato isbꞌa yu hunteqꞌan tioxh bꞌay yiyo isbꞌa, yebꞌ xin matxa chiyetato isbꞌa yu isyahbꞌetajil yebꞌ yu sunil istxꞌojal iswatxꞌe yet yalanhtokanoj. Wal xin chinkolilojan tet sunil istxꞌojal, hunteqꞌan istxꞌojal iswatxꞌe, yaniko ismul yul insatan. Haninan chinsajnhekanojan yinh istxꞌojal, kat yokkano inkonhobꞌojan, haninan xin chinokan isDiosaloj.

24 »”Haꞌ yaꞌ David inchejabꞌan, haꞌ yaꞌ chiꞌok yahawo yinh ebꞌnaj, yebꞌ xin huneꞌnhe mak chiꞌok istanhemalo sunil, chisbꞌeybꞌalnhen ebꞌnaj chejbꞌanil chiwaqꞌan tet, chiskꞌubꞌan tzet chiwalan, chisyijeni. 25 Chiꞌeh sat txꞌo txꞌotxꞌ waqꞌkanojan tet yaꞌ Jacob inchejabꞌan, txꞌotxꞌ bꞌay eh yichmam ebꞌnaj, txꞌotxꞌ bꞌay ehpaxo yuninal ebꞌnaj yebꞌ yuninal yuninal ebꞌnaj, haꞌ xin yaꞌ David inchejabꞌan, haꞌ chiꞌok tanheno sunilbꞌal ej tiempo. 26 Chintꞌinhbꞌakanojan intratohan yet aqꞌankꞌulal yebꞌ ebꞌnaj, haꞌ huneꞌ trato tuꞌ aynhetikꞌa yinh sunilbꞌal ej tzꞌayik. Chiꞌehayo ebꞌnaj sat istxꞌotxꞌ yinh hunelnhe, chiwaqꞌnipohchahojan isbꞌisil, chiwanayojan watutan xol ebꞌnaj yinh sunilbꞌal tzꞌayik. 27 Haꞌ xol ebꞌnaj chiꞌehayo watutan, haninan chinokan isDiosaloj, kat yokkano ebꞌnaj inkonhobꞌojan. 28 Haꞌ ej nimeta konhobꞌ chiyohtanheloj ta hanin Yahawilintiꞌan chinsajnhekanojan anma Israel, kat yehayo watutan xol ebꞌnaj yinh sunilbꞌal ej tiempo,”» xhi Komam.