7 »”Watxꞌe habꞌa kat hawiqꞌni hachꞌen yet howal yebꞌ sunil ebꞌnaj soldado ayko hawetbꞌihoj, kat hawok yahawilo yinh ebꞌnaj. 8 Hayet chiꞌekꞌto txꞌiꞌal habꞌil, chachani chejbꞌanil hawaqꞌni howal yinh huneꞌ konhobꞌ kolbꞌilxalo tet chꞌen espada bꞌay ay anma kutxbꞌabꞌilti yulajla konhobꞌ bꞌay sajlemitoj, yajaꞌ xaꞌiskutxbꞌako isbꞌa bꞌey txꞌotxꞌ Israel tinanh. Huneꞌ konhobꞌ tuꞌ kaw txꞌiꞌal tiempo kaw tzꞌinlokanoj, haxa tinanh xameltzo anma sat istxꞌotxꞌ, kaw aqꞌankꞌulalxa yehi. 9 Hakaꞌ hunu niman jaqꞌeqꞌ nhabꞌ, hak tuꞌ chu hawapni yinh huneꞌ konhobꞌ tuꞌ, yebꞌ xin hakaꞌ hunu niman moyan chimajnayo txꞌo txꞌotxꞌ yu yenhel, hak tuꞌ chu hawapni yinh, yebꞌ sunil ebꞌnaj hasoldado kaw nimankano isbꞌisil, yebꞌ ej konhobꞌ, kaw txꞌiꞌalkano isbꞌisil ayko hawetbꞌihoj.

10 »”Hanin Yahawilintiꞌan chiwalan: Haꞌ yinh huneꞌ tzꞌayik tuꞌ chiꞌoko istxꞌojal yinh hawanma yebꞌ yinh hanabꞌal. 11 Chawalni: ‘Chinahtojan waqꞌaꞌkojan howal yinh huneꞌ konhobꞌ mach chu iskolni isbꞌa, konhobꞌ bꞌay ay anma kaw tzalahilal yebꞌ kaw aqꞌankꞌulal yehi. Konhobꞌ machi iskꞌubꞌal, machi ispultahil, machipaxo isqꞌanh ispultahil,’ kachi. 12 Chinapnihan yinh huneꞌ konhobꞌ tuꞌ, chiwelqꞌantojan tzetaj aya, chiwitojan chꞌen munlabꞌal yet howal, chiwanikojan howal yinh konhobꞌ kaw tzꞌinan yukanoj yajaꞌ wal tinanh ayxa anma, aypaxo noꞌ wakax; haꞌ ton anma kutxiti yulajla nimeta konhobꞌ bꞌay pujanejtoj, yehayo yiktabꞌal ej konhobꞌ tuꞌ. 13 Haꞌ anma ay bꞌey konhobꞌ Sabá yebꞌ bꞌey Dedán yebꞌ ebꞌnaj txonhom ay bꞌey Tarsis yebꞌ sunil ebꞌnaj yahawil, chisqꞌambꞌen ebꞌnaj tawet: ‘¿Tom makach hul eleqꞌ? ¿tom hakutxbꞌako sunil ebꞌnaj hasoldado, makach hul yebꞌ ebꞌnaj hawelqꞌato chꞌen chꞌen yet howal ay yul konhobꞌ tiꞌ, yebꞌ yu hawelqꞌanto chꞌen plata yebꞌ chꞌen oro yebꞌ no noqꞌ yebꞌ tzetaj ay yul konhobꞌ tiꞌ, kat hawinito sunil isqꞌalomal?’ xhi ebꞌnaj tawet,” xhi Komam.

14 »Yuxin, hach iskꞌahol naj winaj, hal intzotiꞌan tet naj Gog, chawalni: “Hak tiꞌ yalni Komam Jahawil: Haꞌ yinh hunteqꞌan tiempo tuꞌ yet chiꞌeh Israel inkonhobꞌan yinh aqꞌankꞌulal, ¿tom mach chawohtajoj xin? 15 Chachtit bꞌey txꞌotxꞌ norte bꞌay ayach yebꞌ txꞌiꞌal konhobꞌ ayko hawetbꞌihoj. Haꞌ sunil ebꞌnaj hasoldado tuꞌ ayahto ebꞌnaj yibꞌanh cheh, kaw nimankano isbꞌisil ebꞌnaj hasoldado tuꞌ, yebꞌ xin kaw ay yip ebꞌnaj yinh howal. 16 Chach ahapno yinh Israel, inkonhobꞌan, hakaꞌ hunu niman moyan chimajnayo txꞌo txꞌotxꞌ, kat yok yenheloj. Hayet islahobꞌal hunteqꞌan tzꞌayik tuꞌ, chachwitijan hach Gog, kat hawul sat intxꞌotxꞌan, kat inyenilojan wipan tawinh sata nimeta konhobꞌ, yu kinyohtanhenilojan nimeta konhobꞌ tiꞌ.

17 »”Yalnipaxo Komam Jahawil: ¿Tom maxhtaj hach tiꞌ hach Gog, waqꞌ bꞌinahojan yettax payat, yet inchejnihan ebꞌnaj inchejabꞌan yalno intzotiꞌan xol anma Israel, yalni ebꞌnaj ta chaxhwaqꞌtijan hawanoko howal yinh konhobꞌ Israel xin? 18 Hanin Yahawilintiꞌan chiwalan ta haꞌ yinh huneꞌ tzꞌayik yet chihul naj Gog yaqꞌaꞌko howal yinh konhobꞌ Israel, kaw chititkano lemna inhowalan sikꞌlebꞌil. 19 Yuto xawalan yinh sunil inhowalan kaw ayxakano ismay, ta haꞌ yinh huneꞌ tzꞌayik tuꞌ chiꞌekꞌ huneꞌ niman txixkabꞌ sat txꞌotxꞌ Israel. 20 Haꞌ sunil noꞌ kay ay xol haꞌ mar, yebꞌ noꞌ chꞌik chiꞌekꞌ satkanh yebꞌ sunil no noqꞌ ay xolaj telaj, yebꞌ sunil noꞌ labꞌa chishatxikꞌo iskꞌul sat txꞌotxꞌ, yebꞌ sunil ebꞌnaj winaj ay sat txꞌo txꞌotxꞌ, chiluylunkanh yu xiwkilal insatajan, kat yay wuyna witz yebꞌ chꞌen nimeta chꞌen, kat yay wuyna iskꞌubꞌal konhobꞌ tuꞌ sat txꞌotxꞌ. 21 Hanin Yahawilintiꞌan, chiwalan: Haꞌ bꞌey sunil iswiꞌla witz ay yul ismajul inkonhobꞌan chiwatojan espada yinh naj Gog, haxa hunun ebꞌnaj issoldado naj chimeltzoko howal yinh yet soldadohal yebꞌ yespada. 22 Haninan chiwayojan isyaꞌtajil yibꞌanh naj Gog yebꞌ yibꞌanh sunil issoldado naj, yebꞌ yibꞌanh sunil ej konhobꞌ ayko yetbꞌiho naj, chiwanitojan howla yabꞌil yinh, yebꞌ kamikal. Chiwanipaxayojan nimeta yaxnhabꞌ yebꞌ chꞌen nimeta sajbꞌat hakaꞌ chꞌen chꞌen, chiwanipaxtojan qꞌa qꞌaꞌ yebꞌ azufre yibꞌanh. 23 Hak tuꞌ chu inyenilojan sata txꞌiꞌal nimeta konhobꞌ wipan yebꞌ ta kaw niman welapnojan, chinyohtanhenilojan ta hanintiꞌan Yahawil hinan,” xhi Komam.