39
»Hach, iskꞌahol naj winaj, hal isyaꞌtajil chiwayojan yibꞌanh naj Gog; chawalni ta hak tiꞌ walnihan, hanin Yahawilintiꞌan: “Hanintiꞌan chiwakojan inhowalan tawinh, hach Gog, yahawil konhobꞌ Mesec yebꞌ konhobꞌ Tubal. 2 Chiwayojan isyaꞌtajil tawibꞌanh, chachwijbꞌantojan bꞌey bꞌay kaw nahat bꞌey yetkꞌulal norte, chachwinitojan bꞌey iswiꞌla witz bꞌey txꞌotxꞌ Israel. 3 Chiwinilojan halitꞌ ayko yul hamekqꞌabꞌ, chinmaqꞌnipaxilojan isbꞌaqꞌ halitꞌ ayko yul hawatxꞌqꞌabꞌ. 4 Haxa hach tiꞌ yebꞌ hasoldado yebꞌ sunil konhobꞌla ayko hawetbꞌihoj chexaykꞌay xol howal, kat hekamkano iswiꞌla witz bꞌey txꞌotxꞌ Israel, chiwaqꞌnihan henimanil istꞌojoto sunil ej noꞌ chꞌik, kat kexiskꞌuxnito noꞌ xoltelajil noqꞌ. 5 Chexkankano pakꞌno sat txꞌotxꞌ xolaj munil, yuto hanin Yahawilintiꞌan, hankawinan chiwalan hunteqꞌan tiꞌ. 6 Chiwayojan qꞌa qꞌaꞌ yibꞌanh Magog yebꞌ yibꞌanh ej konhobꞌ kaw aqꞌankꞌulal ye istiꞌla haꞌ mar, hak tuꞌ chu yohtanheniloj ta hanintiꞌan Yahawil hinan.7 »”Chinyelojan xol anma Israel inkonhobꞌan ta kaw nimankano yelapno inbꞌihan, matxa bꞌaqꞌinhal xin chinchahan elo ispixan inbꞌihan kaw aykano yelapnoj, chiyohtanhenilo nimeta konhobꞌ ta hanintiꞌan Yahawil hinan, kaw aykano welapnojan, hanin isDiosal Israel. 8 Haꞌ tzet chiwalan tiꞌ, yilal yijni isbꞌa, hanin Yahawilintiꞌan chiwalan ta haꞌ yinh huneꞌ tzꞌayik tuꞌ haꞌ yinh kintzotelkanojan.
9 »”Haꞌ anma ay yulajla konhobꞌ Israel chiꞌelto iskutxbꞌako sunil chꞌen yet howal; chꞌen escudo chipahni qꞌojbꞌal, yebꞌ chꞌen nimeta escudo, yebꞌ teꞌ litꞌ, yebꞌ isbꞌaqꞌ litꞌ yebꞌ hunteqꞌan litꞌ chiqꞌojlaxto yu qꞌabꞌe yebꞌ chꞌen lanza. Chiskutxbꞌako anma hunteqꞌan tuꞌ, kat yalaxiko qꞌaꞌ yinh, yulbꞌal xin hujebꞌ habꞌil chitzꞌatoj. 10 Matxa chiyij anma issiꞌ, matxa chistzokꞌ issiꞌ xolaj qꞌebꞌtaj, wal xin haꞌ chꞌen chꞌen yet howal chisnhus anma selelo teꞌ siꞌ. Hanin Yahawilintiꞌan chiwalan ta haꞌ anma Israel chimeltzo yul isqꞌabꞌ hunelxa tzet ilaxilo tet, chinilo tzet elqꞌalaxilo tet.
11 »”Haꞌ yinh huneꞌ tiempohal tuꞌ haninan chiwaqꞌan bꞌay chimujlax naj Gog yebꞌ sunil issoldado kaw nimankano isbꞌisil yul ismajul Israel, haꞌ ton huneꞌ hokan bꞌay chꞌekꞌ anma ay satakꞌti haꞌ mar. Haꞌ bꞌey tuꞌ matxa mak chꞌekꞌi, yuto haꞌ bꞌey tuꞌ chimujlax naj Gog yebꞌ sunil issoldado, kat yokkano Hamón-gog isbꞌiho huneꞌ hokan tuꞌ. 12 Hujebꞌ ixahaw chiyito ismujlax kamom tuꞌ yu anma Israel, hak tuꞌ chu iswatxꞌilo txꞌotxꞌ hunelxa. 13 Sunil anma Israel chikolwa ismujni kamom. Hanin Yahawilintiꞌan chiwalan ta kaw aykano yelapno huneꞌ tzꞌayik yet chiꞌalaxiko inmayan xol anma Israel. 14 Hayet chilahwi yekꞌto hujebꞌ ixahaw tuꞌ, chitolalax ebꞌnaj winaj chito mujno isnimanil ebꞌnaj soldado chikankano pakꞌno sat txꞌotxꞌ yul ismajul Israel, yunhe istzꞌisni ebꞌnaj konhobꞌ. 15 Hayet chiꞌilcha isbꞌajil kamom yu anma chiꞌekꞌ sat txꞌotxꞌ Israel, kat yanikanayo ebꞌnaj yechel bꞌay ayejayo isbꞌajil kamom tuꞌ, haxa ebꞌnaj mujum kamom chiꞌinitoj, kat ismujni ebꞌnaj bꞌey hokan chiyij Hamón-gog. 16 Yebꞌpaxo xin, haꞌ huneꞌ konhobꞌ bꞌay ay tuꞌ chiyij Hamona, hak tuꞌ chu istzꞌislaxkanh sat txꞌotxꞌ Israel yu ebꞌnaj.
17 »”Yalnipaxo Komam Jahawil: Hach, iskꞌahol naj winaj, hal tet sunil hunun majan noꞌ chꞌik, yebꞌ tet sunil noꞌ xoltelajil noqꞌ: Kutxbꞌaweti hebꞌa sunil bꞌayejtuꞌwalil, kat hetit bꞌey witz ay bꞌey Israel bꞌay chinpotxꞌkamojan ebꞌnaj winaj hakaꞌto chinwatxꞌehan hunu niman xahanbꞌal yu helowi. Titanhwej kꞌuxwe chibꞌe, cheyukꞌni chikꞌ. 18 Chekꞌux ischibꞌehal isnimanil ebꞌnaj winaj kaw ay yip, cheyukꞌni ischikꞌil ebꞌnaj yahawil konhobꞌ ay sat txꞌo txꞌotxꞌ tiꞌ, hakaꞌto chekꞌux ischibꞌehal noꞌ icham meꞌ yebꞌ noꞌ yunin meꞌ, noꞌ winaj chiw, noꞌ wakax yebꞌ xin noꞌ winaj wakax kaw bꞌaqꞌich ay bꞌey txꞌotxꞌ Basán. 19 Cheloh ismantecahil ebꞌnaj winaj chinpotxꞌkamojan masanta chinoh hekꞌul, cheyukꞌnipaxo chikꞌ masanto chinoh hekꞌul hakaꞌto chexukꞌikanh yu, haꞌ huneꞌ tiꞌ, lahan hakaꞌ hunu niman xahanbꞌal chinwatxꞌehan teyet. 20 Hanin Yahawilintiꞌan chiwalan ta chexwaꞌ sat inmexhahan. Kaw chinoh hekꞌul yu hekꞌuxni ischibꞌehal noꞌ cheh, chekꞌuxni ischibꞌehal ebꞌnaj soldado kaw ay yip chiyaqꞌ howal yibꞌanh cheh, yebꞌ ischibꞌehal isnimanil sunil ebꞌnaj winaj yet howal.
21 »”Chiwakojan isqꞌaqꞌal inmayan xolaj nimeta konhobꞌ, sunil nimeta konhobꞌ chiꞌilni ta haninan chiwilan tzet chiꞌelikoj, chiyilni yip inqꞌabꞌan yebꞌ chiwanayojan isyaꞌtajil yibꞌanh. 22 Hayet huneꞌ tzꞌayik tuꞌ chiꞌichiko anma Israel yohtanheniloj ta hanin Yahawilintiꞌan, haninan isDiosal. 23 Chiyohtanhenpaxilo nimeta konhobꞌ ta ilaxto anma Israel preso yu ismul, yuto meltzoko manhkꞌomal wetan, yuxin webꞌato insatan tet ebꞌnaj, wanikojan ebꞌnaj yul isqꞌabꞌ ebꞌnaj ayko ishowal yinh, istanhilo ebꞌnaj xol howal yu espada. 24 Inwatxꞌehan yinh ebꞌnaj hakaꞌtikꞌa isyahbꞌetajil iswatxꞌe yebꞌ ismanhkꞌomal wetan, webꞌantojan insatan tet ebꞌnaj.
25 »”Yajaꞌ hanin Yahawilintiꞌan, chiwaqꞌ meltzohojan anma titna yinh yaꞌ Jacob, chiwinilojan ebꞌnaj preso yehi, kat istzꞌay inkꞌulan yinh sunil anma Israel tiꞌ. Hak tuꞌ xin chu inyenilojan ta kaw xahan ay ebꞌnaj wuhan, yuto kaw aykano yelapno inbꞌihan. 26 Chitxꞌixwikanh ebꞌnaj yu ismul yebꞌ yu ismanhkꞌomal wetan yet chiꞌehayo ebꞌnaj sat istxꞌotxꞌ yinh aqꞌankꞌulal, yebꞌ yet matxa mak chixibꞌten ebꞌnaj. 27 Yet chiwinilojan anma Israel yulajla konhobꞌ, chiwilojan sat istxꞌotxꞌ ebꞌnaj ayko ishowal yinh, chinkutxbꞌanikojan sat istxꞌotxꞌ hunelxa. Hayet chinkutxbꞌanikojan ebꞌnaj tuꞌ kaw niman yelapno chiꞌelkaniko inbꞌihan sata hunteqꞌan nimeta konhobꞌ. 28 Haꞌ anma Israel chiyohtanheloj ta hanin Yahawilintiꞌan, yebꞌ xin haninpaxojan isDiosal yet chinkutxbꞌanikojan ebꞌnaj sat istxꞌotxꞌ hunelxa, machi hunu tiꞌ chikankano yulajla nan konhobꞌal yet lahwi wanitojan preso yulaj nimeta konhobꞌ. 29 Hanin Yahawilintiꞌan chiwalan ta matxa chiwebꞌato insatan tet anma Israel, yuto chiwakojan Wespírituhan yinh anma Israel,”» xhi Komam Jahawil.