5. YATUT KOMAM DIOS BꞌEY JERUSALÉN YINH ISTZUJANILXA
(40:1–48:35)
Yelax yechel Yatut Komam Dios yilaꞌ yaꞌ Ezequiel
40
Hayet 25 (howebꞌ iskawinaj) habꞌilxa jilaxtojanh preso, yinh 10 (islahonhebꞌ) tzꞌayik, yulbꞌal ixahaw yet yichebꞌanil habꞌil tuꞌ, yanayo Komam Jahawil isqꞌabꞌ wibꞌanhan, kinyinitojan bꞌey txꞌotxꞌ Israel. Hayet yanayo Komam isqꞌabꞌ wibꞌanh tuꞌan 14 (kanhlahonhebꞌxa) habꞌil istanhtzelaxilo konhobꞌ Jerusalén. 2 Wilan kinyinitojan Komam Dios bꞌey txꞌotxꞌ Israel, kinyinahtojan iswiꞌ huneꞌ witz kaw nahat yekanh, wilnihan yibꞌanh witz tuꞌ yinh yetkꞌulal sur, huneꞌ niman nha, hakaꞌ jilni hunu niman konhobꞌ. 3 Kinyinitojan Komam bꞌey huneꞌ konhobꞌ tuꞌ, wilnihan huneꞌ naj winaj kaw chitzejtzon jilni hakaꞌ istzejtzon chꞌen bronce, linhankanh yinh sat pulta, iqꞌbꞌil huneꞌ txꞌanh txꞌanh lino yul isqꞌabꞌ, yebꞌ huneꞌ teꞌ ah ayko malbꞌalil. 4 Istzotel huneꞌ naj winaj tuꞌ wetan, yalni naj: «Hach iskꞌahol naj winaj kaw kam chawabꞌe yebꞌ kaw kam chawil tzet chinyehan tawet chawaniko hawanma yinh, yuto yu inyenihan hunteqꞌan tiꞌ tawet, yuxin kach ilaxti bꞌey tiꞌ. Lahwi tuꞌ chawalni sunil tzet chawil tiꞌ tet anma Israel,» xhi naj wetan.5 Lahwi tuꞌ wilnihan huneꞌ kꞌubꞌ hoyaniko yinhla Yatut Komam Dios. Haꞌ huneꞌ teꞌ ah ayko malbꞌalil iqꞌbꞌil yu huneꞌ naj winaj tuꞌ oxebꞌ metro istel teꞌ. Ismalen naj huneꞌ kꞌubꞌ tuꞌ, oxebꞌ metro ispimal, oxebꞌpaxo metro yekanh istel. 6 Lahwi tuꞌ, isto naj bꞌey pulta ayko yinh yetkꞌulal bꞌay chiꞌahilo tzꞌayik, yahto naj yul qꞌoch, yok naj ismaleno iswiꞌ pulta; haꞌ huneꞌ pulta tuꞌ, oxebꞌ metro sat, oxebꞌ metropaxo ispimal huneꞌ yoyal, yebꞌ oxebꞌ metro hunxa yoyal. 7 Ay oxebꞌ cuarto yinh qꞌaxqꞌep iskꞌul yul pulta tuꞌ, oxebꞌ metro sat yebꞌ oxebꞌ metro ispakꞌul hunun cuarto tuꞌ, haxa xolbꞌal hunun cuarto ay yikta yox metro. Haxa ismalil iswiꞌta huneꞌ pulta bꞌay chonhokto yulikto tuꞌ, oxebꞌ metro sat. 8 Ismalenpaxo naj pulta bꞌay chonhokapno yul Yatut Komam Dios, oxebꞌ metro yul. 9 Lahwi tuꞌ ismalen naj yulikto yamaqꞌil, kanhebꞌ metro yekoj, haxa yoyal, huneꞌ metro ispimal, haxa ispultahil yamaqꞌil tuꞌ, yulikto aykoj. 10 Haxa bꞌey pulta ayko yinh yetkꞌulal bꞌay chiꞌahilo tzꞌayik ay oxebꞌ cuarto yinh qꞌaxqꞌep iskꞌul, lahannhe xin ismalil hunun cuarto tuꞌ, yebꞌpaxo xin yamaqꞌil ayko yinh isqꞌaxqꞌep iskꞌul, lahan ismalil. 11 Ismalen naj pulta, howebꞌ metro sat, haxa yamaqꞌil bꞌay chonhokapnoj, yikta ishuj metro sat. 12 Haꞌ istiꞌ hunun cuarto yikta metro yekoj yinh qꞌaxepal, haxa yinh qꞌaxepxa yiktapaxo metro yekoj. Haꞌ sata hunun cuarto aykanh nixhte kꞌubꞌ yikta metro yekanh, yikta metropaxo ispimal. 13 Ismalen naj pulta yibꞌanh iswiꞌ huneꞌ cuarto masanta bꞌey huneꞌxa cuarto yetkꞌulal istel yichinh ichiko ismalen naj masanta apni yetkꞌulal istel yichinh hunxa cuarto, ay yikta yoxlahonhebꞌ metro xolbꞌal kabꞌebꞌ cuarto tuꞌ. 14 Ismalen naj yoyal pulta, 10 (lahonhebꞌ) metro istel, lahan ismalil hunun oy hoyaniko yinhla yamaqꞌil pulta tuꞌ. 15 Haxa ismalil sata pulta bꞌay chonhokapnoj masanta sata huneꞌxa pulta, yuliktoj bꞌay chonhokto ay 25 (howebꞌ iskawinaj) metro. 16 Ay xin isventanahil hunun cuarto, haꞌ ventanah tuꞌ kaw txannhe sat, hakpax tuꞌ bꞌitzꞌabꞌ ayko yinhla ishoyanil yulikto pulta, ay isventanahil, aypaxo isventanahil cuarto tuꞌ sataj yinh istiꞌlaj, yebꞌ xin ayleko isventanahil yinhla ishoyanil yuliktoj bꞌay chonhoktoj. Haꞌ yinh hunun oy, ayko yechel teꞌ palmera yelawiloj.
17 Lahwi tuꞌ kinyinitojan bꞌey yamaqꞌil ay yintaltoj, wilnihan 30 (lahonhebꞌ iskawinaj) cuarto yinhla ishoyanil yamaqꞌil tuꞌ, latzꞌbꞌilayo xin chꞌen chꞌen yinhla ishoyanil yamaqꞌil tuꞌ. 18 Haꞌ bꞌay latzꞌbꞌilayo chꞌen chꞌen tuꞌ haꞌ yamaqꞌil nahat yehayoj, chitaxin apni bꞌey isbꞌitzꞌabꞌil hunteqꞌanxa cuarto bꞌay chonhokapnoj; haꞌ yamaqꞌil tuꞌ hakaꞌtikꞌa ismalil ispakꞌul, hak tuꞌ ismalil yepaxiko sat. 19 Lahwi tuꞌ ismalen naj xolbꞌal sata pulta ay bꞌey yalanhaytoj masanta bꞌey hunxa pulta ay yul, ay 50 (lahonhebꞌ yoxkꞌal) metro ismalil yinh yetkꞌulal bꞌay chiꞌahilo tzꞌayik yebꞌ yetkꞌulal norte.
20 Ismalenpaxo naj sat yebꞌ istel ispultahil iskꞌubꞌal yetkꞌulal norte. 21 Ay xin oxebꞌ iscuartohal yinh qꞌaxqꞌep iskꞌul; haꞌ yoyal yebꞌ ispetanil yibꞌanh iswiꞌ pulta, lahan ismalil hakaꞌ yamaqꞌil bꞌabꞌel pulta yetkꞌulal bꞌay chiꞌahilo tzꞌayik. Haꞌ huneꞌ yamaqꞌil yulikto bꞌay chonhokto yul pulta tuꞌ 25 (howebꞌ iskawinaj) metro yehikto istel, yikta yoxlahonhebꞌ xin metro yeko sat. 22 Haxa isventanahil yebꞌ ispetanil yebꞌ yechel teꞌ palmera, lahan ismalil hakaꞌ pulta ayko yinh yetkꞌulal bꞌay chiꞌahilo tzꞌayik, ay xin hujebꞌ sat isqꞌochal bꞌay chonhahtoj, haxa sata isqꞌochal tuꞌ aypaxo hunteqꞌan oy yebꞌ ispetanil yibꞌanh iswiꞌ. 23 Haꞌ pulta bꞌey yamaqꞌil Yatut Komam Dios, yuliktoj yamaqꞌil ayko satakꞌto pulta ayko yinh yetkꞌulal norte, lahan ismalil pulta ayko yinh yetkꞌulal bꞌay chiꞌahilo tzꞌayik; ismalen naj xolbꞌal kabꞌebꞌ pulta tuꞌ, ay 50 (lahonhebꞌ yoxkꞌal) metro xolbꞌal.
24 Lahwi tuꞌ, kinyinitojan huneꞌ naj winaj tuꞌ bꞌey yetkꞌulal sur, wilnihan huneꞌ pulta bꞌey tuꞌ, ismalen naj yamaqꞌil yebꞌ ispetanil iswiꞌ yelawil oy, lahan xin ismalil yebꞌ hunteqꞌanxa. 25 Aypaxo isventanahil iscuartohal pulta tuꞌ, yebꞌ ispetanil yinhla ishoyanil hakaꞌ hunteqꞌanxa ventanah. Ismalen naj hunteqꞌan cuarto tuꞌ, 25 (howebꞌ iskawinaj) metro ispakꞌul, 11 (hunlanhebꞌ) metro yok 25 centímetro sat.a 26 Hujebꞌ sat isqꞌochal bꞌay chonhahapnoj bꞌey huneꞌ pulta tuꞌ, sata qꞌoch tuꞌ aypaxo ispetanil iswiꞌ yoyal yamaqꞌil tuꞌ, yebꞌ xin ayko yechel teꞌ palmera yinh ej qꞌaxqꞌep iskꞌul. 27 Aypaxo xin pulta yinh yetkꞌulal sur bꞌey iskabꞌ yamaqꞌil. Ismalen naj xolbꞌal kabꞌebꞌ pulta ayko yinh yetkꞌulal sur tuꞌ, ay 50 (lahonhebꞌ yoxkꞌal) metro xolbꞌal.
28 Lahwi tuꞌ kinyinitojan bꞌey pulta bꞌay ay yamaqꞌil yul, bꞌey yetkꞌulal sur. Ismalen naj pulta tuꞌ, lahan xin ismalil hakaꞌ hunteqꞌanxa pulta. 29 Haꞌ iscuartohal bꞌay chonhokapnoj, yebꞌ yoyal yebꞌ ispetanil iswiꞌ yoyal, lahan ismalil yebꞌ hunteqꞌanxa. Ay xin isventanahil yebꞌ ispetanil iswiꞌ ventanah tuꞌ yinhla ishoyanil. 24 (Kanhebꞌ iskawinaj) metro yeko ispakꞌul huneꞌ yokapno tuꞌ, haxa sat yikta yoxlahonhebꞌ metro yekoj. 30 Haꞌ ispetanil yoyal yinhla ishoyanil, 25 (howebꞌ iskawinaj) metro istel, yikta yoxlahonhebꞌ metro sat. 31 Haꞌ ispetanil, chitaelapno bꞌey hunxa yamaqꞌil bꞌey yintaltoj, aypaxiko teꞌ palmera yelawilo yoyal, haxa huneꞌ isqꞌochal ayko waxajebꞌ bꞌay chijayo joj jahapnoj.
32 Kinyinitojan bꞌey yamaqꞌil ay yintaktoj, bꞌey yetkꞌulal bꞌay chiꞌahilo tzꞌayik, ismalen naj pulta ay bꞌey tuꞌ, lahan xin ismalil hakaꞌ hunteqꞌanxa. 33 Haꞌ iscuartohal, yebꞌ yoyal, yebꞌ ispetanil iswiꞌ yoyal, lahan ismalil yebꞌ hunteqꞌanxa, ay xin isventanahil yebꞌ ispetanil yinhla ishoyanil, 25 (howebꞌ iskawinaj) metro ispakꞌul, yikta yoxlahonhebꞌ metro sat. 34 Haꞌ ispetanil chitaelapno bꞌey yintalto yamaqꞌil, aypaxiko teꞌ palmera yelawilo yoyal yinh qꞌaxqꞌep iskꞌul, haxa isqꞌochal waxajebꞌ bꞌay chijayo joj jahapnoj.
35 Lahwi tuꞌ kinyinitojan bꞌey pulta ayko yinh yetkꞌulal norte, ismalen naj yamaqꞌil tuꞌ, lahan xin ismalil yebꞌ hunteqꞌanxa. 36 Aypaxo iscuartohal, yebꞌ yoyal yebꞌ ispetanil yoyal, yebꞌ isventanahil yinhla ishoyanil yamaqꞌil tuꞌ; 25 (howebꞌ iskawinaj) metro ispakꞌul, yikta yoxlahonhebꞌ metro sat. 37 Haꞌ yoyal chiꞌelapno bꞌey hunxa yamaqꞌil, aypaxiko teꞌ palmera yelawilo yoyal yinh qꞌaxqꞌep iskꞌul. Haxa isqꞌochal waxajebꞌ bꞌay chijayo joj jahapnoj.
38 Haꞌ bꞌey tuꞌ ay huneꞌ cuarto bꞌey ispultahil yebꞌ yoyal yamaqꞌil bꞌay chitxꞌahlax no noqꞌ chꞌalaxiko xahanbꞌalil. 39 Haꞌ bꞌey pulta bꞌay chonhokapnoj ay kabꞌebꞌ mexha yinh qꞌaxqꞌep iskꞌul. Haꞌ yibꞌanh mexha tuꞌ chipotxꞌlaxkamo no noqꞌ yinh xahanbꞌalil tet Komam Dios, chinhuslaxpaxo hunteqꞌanxa noꞌ chitohlan mule. 40 Haꞌ bꞌey qꞌaxqꞌep ispakꞌul bꞌay chonhokapno yul pulta, ayko yinh yetkꞌulal norte, yintalto qꞌoch ay kabꞌebꞌ mexha, haxa yinh qꞌaxepxa bꞌay chonhokapnoj, aypaxo kabꞌebꞌxa mexha. 41 Kanhebꞌ mexha qꞌaxqꞌep iskꞌul pulta, yok kanhebꞌxapaxo mexha qꞌaxqꞌepxa iskawilal pulta, yuxin ay waxajebꞌ mexha bꞌay chipotxꞌlaxkamo no noqꞌ. 42 Haꞌ kanhebꞌ mexha bꞌay chipotxꞌlax no noqꞌ chihaltelax yinh xahanbꞌalil tuꞌ chꞌen chꞌen paqꞌbꞌil iskꞌul latzꞌbꞌilkanh, 75 (holahonhebꞌ iskanhwinaj) centímetro sat, 50 (lahonhebꞌ yoxkꞌal) centímetropaxo yekanh istel. Haꞌ yibꞌanh mexha tuꞌ chiꞌalaxayo chꞌen munlabꞌal chiꞌokniko yet chipotxꞌlax no noqꞌ chihaltelax xahanbꞌalil. 43 Haꞌ yinh ay hunteqꞌan chꞌen gancho, wajebꞌ centímetro sat ayko yinhla ishoyanil, haxa yibꞌanh mexha ayayo ischibꞌehal no noqꞌ chipotxꞌlaxkamoj.
44 Lahwi tuꞌ kinyinitojan naj yintakꞌto pulta yul Yatut Komam Dios, bꞌey iskabꞌ yamaqꞌil, iskawilal pulta ayko yinh yetkꞌulal norte, haꞌ tuꞌ ay iscuarto ebꞌnaj bꞌitnom. Haꞌ hunteqꞌan cuarto tuꞌ tꞌanhanto yinh yetkꞌulal sur, haxa huneꞌxa cuarto xin ayko iskawilal pulta ayko yinh yetkꞌulal bꞌay chiꞌahilo tzꞌayik, haꞌ cuarto tuꞌ tꞌanhanpaxto yinh yetkꞌulal norte. 45 Yalni naj wetan: «Haꞌ huneꞌ cuarto tꞌanhanto yinh yetkꞌulal sur, yet ebꞌyaꞌ sacerdote, chitanhen Yatut Komam Dios. 46 Haxa cuarto tꞌanhanto yinh yetkꞌulal norte, yet ebꞌyaꞌ sacerdote chimunla bꞌey ismexhahil yet xahanbꞌal, haꞌ ton ebꞌyaꞌ iskꞌahol yaꞌ Sadoc, titna yinh yuninal yaꞌ Leví, haꞌ ebꞌyaꞌ tuꞌ awtebꞌil yu ismunla yul Yatut Komam Dios, cuarto kaw txahulkanoj bꞌay ayikto querubín,» xhi naj wetan.b 47 Lahwi tuꞌ, ismalen naj yamaqꞌil, 50 (lahonhebꞌ yoxkꞌal) metro ispakꞌul, 50 (lahonhebꞌ yoxkꞌal) metro sat, walpaxo ismexhahil xahanbꞌal xin sata yamaqꞌil Yatut Komam Dios ayayoj.
48 Kinyinitojan naj bꞌey yamaqꞌil Yatut Komam Dios, ismalen naj yoyal yamaqꞌil tuꞌ, yikta yox metro ispimal, haktikꞌapax tuꞌ ismalil huneꞌxa qꞌaxepxa. Ismalenpaxo naj pulta, yikta iskabꞌ metro sat, haktikꞌapax tuꞌ ismalil qꞌaxepxa. 49 Haꞌ yamaqꞌil tuꞌ, lahonhebꞌ metro ispakꞌul, wajebꞌ metro sat. Ayko isqꞌochal. Ay kabꞌebꞌ nime oy bꞌey istiꞌ pulta, huneꞌ qꞌaxep, yok huneꞌxa qꞌaxepxa.