5 Lahwi tuꞌ ismalen naj isbꞌitzꞌabꞌil Yatut Komam Dios, oxebꞌ metro ispimal, haxa yinhla iskꞌul ishoyanil Yatut Komam ay hunteqꞌan cuarto kabꞌ metro yeko sat. 6 Haꞌ hunteqꞌan cuarto tuꞌ aykanh yibꞌanh hunteqꞌanxa, oxebꞌ piso yehi, haxa yinh hunun piso ay 30 (lahonhebꞌ iskawinaj) cuarto. Haxa isbꞌitzꞌabꞌil Yatut Komam Dios ayilti istiꞌ, chischale isbꞌa yebꞌ hunun piso. Haxa yibꞌanh hunteqꞌan tuꞌ, chiꞌokto ispatzabꞌil hunun cuarto, hak tuꞌ xin machi chiꞌekꞌto yibꞌanh bꞌitzꞌabꞌ. 7 Haꞌ hunteqꞌan cuarto ayko yinhla ishoyanil tuꞌ, hunteqꞌan iskabꞌ piso, nimajal yul sata hunteqꞌan yinh isbꞌabꞌel piso. Haxa hunteqꞌan cuarto yinh yox piso niman yul, sata hunteqꞌanxa yinh iskabꞌ piso. Ay huneꞌ qꞌoch, kotxkon yekꞌi, chiꞌahto bꞌey bꞌabꞌel piso, kat yekꞌpaxo bꞌey iskabꞌ piso masanto chiꞌahapno yinh yox piso. 8 Wilnihan hanta yekanh istel iskabꞌ piso Yatut Komam Dios yinhla ishoyanil, iswatxꞌenilto ebꞌnaj yet tzꞌuh yinh istiꞌla kabꞌ piso, oxebꞌ metro yekanh istel. Iswatxꞌepaxo ebꞌnaj hunteqꞌan cuarto yibꞌanh iscimientohal tuꞌ. 9 Haꞌ bꞌitzꞌabꞌ ayilto yintalto hunteqꞌan cuarto, yikta yox metro ispimal, haktikꞌapax tuꞌ ismalil xolbꞌal hunteqꞌan cuarto yebꞌ isbꞌitzꞌabꞌil Yatut Komam Dios yuliktoj. 10 Ay xin huneꞌ amaqꞌ yinhla ishoyanil Yatut Komam, lahonhebꞌ metro sat, haꞌ huneꞌ amaqꞌ tuꞌ, ayko xolbꞌal Yatut Komam yebꞌ hunteqꞌan cuarto. 11 Haꞌ hunteqꞌan cuarto ayko yinhla ishoyanil Yatut Komam, ay ispultahil chitaelapno yamaqꞌil, ay huneꞌ pulta ayko yinh yetkꞌulal norte yebꞌ huneꞌ ayko yinh yetkꞌulal sur. Ay xin yikta yox metro xolbꞌal Yatut Komam yebꞌ hunteqꞌan cuarto tuꞌ sunil yinhla ishoyanil.

12 Ay xin huneꞌ nha sata yamaqꞌil ayko yetkꞌulal bꞌay chiꞌahilo tzꞌayik, haꞌ huneꞌ nha tuꞌ, 30 (lahonhebꞌ iskawinaj) metro sat, 45 (howebꞌ yoxkꞌal) ispakꞌul, yikta yox metro ispimal isbꞌitzꞌabꞌil yinhla ishoyanil.

13 Lahwi tuꞌ ismalen naj Yatut Komam Dios, 50 (lahonhebꞌ yoxkꞌal) metro ispakꞌul, ismalenpaxo naj yamaqꞌil yebꞌ cuarto tuꞌ yebꞌ isbꞌitzꞌabꞌil, 50 (lahonhebꞌ yoxkꞌal) metropaxo ismalil. 14 Haꞌ sata Yatut Komam yebꞌ yamaqꞌil ayko yinh yetkꞌulal bꞌay chiꞌahilo tzꞌayik, 50 (lahonhebꞌ yoxkꞌal) metro ismalil.

15 Tzujan tuꞌ ismalen naj huneꞌ nha ay yintalto Yatut Komam Dios yebꞌ hunteqꞌan cuarto ayko yinh qꞌaxqꞌep, 50 (lahonh yoxkꞌal) metro ismalil. Ismalen naj Yatut Komam ayikto yul yebꞌ yoyal yamaqꞌil. 16 Haꞌ iswiꞌ pulta, yebꞌ ventanah txannhe sat yebꞌ ej cuarto hoyaniko yinh Yatut Komam yinh oxebꞌ piso, aqꞌinteꞌ teꞌ ayko yinh, chiꞌichiti teꞌ yich masanta chiꞌahapno yibꞌanh iswiꞌ ventanah. Hakpax tuꞌ ventanah aqꞌinteꞌ teꞌ ayko ventanahil. 17 Ismalen naj yibꞌanh pulta masanta bꞌey yul Yatut Komam Dios, ismalenpaxo naj yintalto Yatut Komam, yebꞌ sunil isbꞌitzꞌabꞌil yinhla ishoyanil yul yebꞌ yintaj. 18 Nohnako yinh sat sunil aqꞌinteꞌ tuꞌ yechel ebꞌnaj querubín yebꞌ yechel teꞌ chꞌibꞌ, haꞌ xolbꞌal hunun querubín, ayko yechel hunun teꞌ chꞌibꞌ, haxa hunun querubín tuꞌ, kabꞌebꞌ sat. 19 Haꞌ bꞌabꞌel sat, lahan jilni hakaꞌ sat anma, tꞌanhanto yinh yechel teꞌ chꞌibꞌ yinh qꞌaxep iskꞌul, haxa hunxa sat lahan jilni hakaꞌ sat noꞌ bꞌalam, tꞌanhanto yinh yechel teꞌ chꞌibꞌ yinh qꞌaxepxa iskꞌul. Hak tuꞌ yeko yechel ebꞌnaj querubín yebꞌ yechel teꞌ chꞌibꞌ yinh sunil ishoyanil Yatut Komam Dios. 20 Haꞌ yechel ebꞌnaj querubín yebꞌ yechel teꞌ chꞌibꞌ, chitaichiti sat txꞌotxꞌ masanta chiꞌahapno yetkꞌulal iswiꞌ pulta, haꞌ yelawil tuꞌ ayko yinh sunil iskꞌul isbꞌitzꞌabꞌil Yatut Komam Dios.

21 Haꞌ hunun yoyal Yatut Komam Dios tuꞌ, kanhebꞌ istxikin, haxa istiꞌ bꞌabꞌel cuarto yet Yatut Komam Jahawil, lahan jilni hakaꞌ istiꞌ huneꞌxa cuarto, Ehobꞌal kaw Txahul. 22 Aypaxo huneꞌ teꞌ mexha yet xahanbꞌal yikta iskabꞌ metro yekanh istel teꞌ, lahan ismalil ispakꞌul yebꞌ issat, huneꞌ metro yehi. Haꞌ huneꞌ mexha tuꞌ aqꞌinteꞌ teꞌ ayko yinh istxikin, yebꞌ yibꞌanh issat yebꞌ yinh iskꞌul. Yalni huneꞌ naj winaj tuꞌ wetan: «Haꞌ ton huneꞌ mexha tiꞌ ayko sata Komam Jahawil,» xhi naj. 23 Haꞌ ispultahil bꞌabꞌel cuarto Yatut Komam Dios yebꞌ ispultahil cuarto kaw txahulkanoj, kabꞌkabꞌ ye ispultahil hunun. 24 Haꞌ hunun pulta tuꞌ kabꞌebꞌ yiqꞌni isbꞌa haꞌ hunun xaj pulta tuꞌ ayko isvisagrahil, kabꞌebꞌ xaj yinh huneꞌ pulta, kabꞌebꞌpaxo yinh huneꞌxa pulta. 25 Haꞌ yinh ispultahil Yatut Komam Dios, ayko yechel ebꞌnaj querubín yebꞌ yechel teꞌ chꞌibꞌ, lahan jilni hakaꞌ yeko yinh bꞌitzꞌabꞌ. Haꞌ bꞌey yamaqꞌil yintalto patzabꞌ teꞌ aykanh iswiꞌoj. 26 Haꞌ yinh qꞌaxqꞌep iskꞌul yamaqꞌil ayko ventanah txannhe sat, haꞌ yinh sat bꞌitzꞌabꞌ ayko yechel teꞌ chꞌibꞌ.