42
Lahwi tuꞌ kinyinitojan huneꞌ naj winaj tuꞌ bꞌey yamaqꞌil yintaltoj, ayko yinh yetkꞌulal norte. Kinyinitojan naj yul hunteqꞌan cuarto ayko sata yamaqꞌil huneꞌ nha ayko yinh yetkꞌulal norte. 2 Haꞌ ismalil hunteqꞌan cuarto tuꞌ yinh norte yinh sata pulta, 50 (lahonhebꞌ yoxkꞌal) metro yeko ispakꞌul, yebꞌ xin 25 (howebꞌ iskawinaj) metro sat. 3 Haꞌ sata yamaqꞌil 10 (lahonhebꞌ) metro sat ay yuliktoj, yebꞌ sata yamaqꞌil yintaltoj bꞌay latzꞌbꞌilayo chꞌen chꞌen, bꞌay ay hunteqꞌan cuarto. Haꞌ hunteqꞌan cuarto tuꞌ, chilaischale isbꞌa istiꞌ, oxebꞌ piso yehi. 4 Haꞌ sata cuarto tuꞌ ay huneꞌ yamaqꞌil yuliktoj, howebꞌ metro yekoj, yikta metro sat, haxa ispultahil hakanto yinh yetkꞌulal norte. 5 Haꞌ hunteqꞌan cuarto yinhahto yet yoxebꞌ piso, txannhe, sata hunteqꞌan yet iskabꞌ piso yebꞌ yet isbꞌabꞌel piso, yuto yexakto hunteqꞌan cuarto tuꞌ yibꞌanh hunteqꞌanxa piso tuꞌ. 6 Yuto oxebꞌ piso yehi, mach xin yoyal hakaꞌ yoyal yamaqꞌil, yuxin txannhe hunteqꞌan cuarto yibꞌanh sata cuarto ay xolbꞌal, haxa hunteqꞌan xolbꞌal tuꞌ txannhe sata hunteqꞌan cuarto ay yalanh. 7 Haꞌ sata hunteqꞌan cuarto tuꞌ ay huneꞌ kꞌubꞌ 25 (howebꞌ iskawinaj) metro yeko ispakꞌul, chitaelapno bꞌey yamaqꞌil ay yintaltoj, ayko sata hunteqꞌanxa cuarto. 8 Yuto haꞌ cuarto ay bꞌey yamaqꞌil yintaltoj, 25 (howebꞌ iskawinaj) metro yeko ispakꞌul, haxa cuarto ay yinhla Yatut Komam Dios, 50 (lahonhebꞌ yoxkꞌal) metro yeko ispakꞌul. 9 Haꞌ ispultahil piso ay yalanh ayko yinh yetkꞌulal bꞌay chiꞌahilo tzꞌayik, haꞌ bꞌey yamaqꞌil ay yintaltoj, haꞌ tuꞌ ayko ispultahil tuꞌ.10 Haꞌ sata iskꞌubꞌal yamaqꞌil, yinh yetkꞌulal bꞌay chꞌahilo tzꞌayik, yebꞌ sata hunteqꞌan nha tuꞌ aypaxo hunteqꞌanxa cuarto. 11 Haxa istiꞌ hunteqꞌan cuarto tuꞌ, lahan jilni hakaꞌ istiꞌ hunteqꞌanxa cuarto ayko yinh yetkꞌulal norte, lahanpaxo xin ispakꞌul yebꞌ sat. Lahanpaxo xin ispultahil bꞌay chonhokapnoj yebꞌ bꞌay chonheliloj. 12 Haktikꞌapax tuꞌ jilni ispultahil hunteqꞌan cuarto ayko yinh yetkꞌulal sur, ay xin huneꞌ ispultahil ayko bꞌay chiꞌichiko istiꞌ hunteqꞌan cuarto tuꞌ, haꞌ ton istiꞌ ayko sata kꞌubꞌ ayko yinh yetkꞌulal bꞌay chiꞌahilo tzꞌayik. Haꞌ yul pulta tuꞌ chiꞌokto mak chiꞌapni yul hunteqꞌan cuarto.
13 Yalni huneꞌ naj tuꞌ wetan: «Haꞌ hunteqꞌan cuarto ay yinh yetkꞌulal norte yebꞌ hunteqꞌan ay yinh yetkꞌulal sur ayko sata yamaqꞌil machi iswiꞌ. Haꞌ hunteqꞌan cuarto tuꞌ kaw txahulkanoj, haꞌ bꞌey tuꞌ chislo ebꞌyaꞌ sacerdote yebꞌalqꞌabꞌe chꞌaqꞌlax tet Komam Jahawil, yuto haꞌ ebꞌyaꞌ tuꞌ chimunla yinh ismunil Komam. Haꞌ bꞌey tuꞌ chꞌalaxpaxikto yebꞌalqꞌabꞌe chꞌaqꞌlax tet Komam, yebꞌ xahanbꞌal chiꞌaqꞌlax yinh mule, yuto haꞌ hunteqꞌan cuarto tuꞌ kaw txahulkanoj. 14 Hayet chiꞌokto ebꞌyaꞌ sacerdote yul Ehobꞌal kaw Txahulkanoj, mach chiꞌelto ebꞌyaꞌ bꞌey yamaqꞌil ay yintaltoj ta maxhto chiyilo ebꞌyaꞌ xil isqꞌap chakoj yet chimunla yinh ismunil yul Yatut Komam, yuto haꞌ hunteqꞌan xilqꞌape tuꞌ, kaw txahulkanoj, wal xin nanxa xil isqꞌap ebꞌyaꞌ chako yinh, katto yelto ebꞌyaꞌ xol konhobꞌ,» xhi naj wetan.
15 Lahwi ismalenkano naj yul Yatut Komam Dios tuꞌ, kinyiniltojan naj yul isbꞌehal pulta hakanto yinh yetkꞌulal bꞌay chiꞌahilo tzꞌayik. Yok naj ismaleno sunil yinhla ishoyanil. 16 Ismalen naj yu malbꞌal yinh teꞌ ah sunil ishoyanil yinh yetkꞌulal bꞌay chiꞌahilo tzꞌayik, haꞌ bꞌey tuꞌ ay doscientos cincuenta metro ismalil. 17 Tzujan tuꞌ ismalen naj yinh yetkꞌulal norte, haꞌ bꞌey tuꞌ ay doscientos cincuenta metro ismalil yinhla ishoyanil. 18 Ismalenpaxo naj yinh yetkꞌulal sur, aypaxo doscientos cincuenta metro ismalil yinhla ishoyanil. 19 Ismalenpaxo naj yinh ishoyanil yetkꞌulal bꞌay chito tzꞌayik, haꞌ bꞌey tuꞌ aypaxo doscientos cincuenta metro ismalil. 20 Ismalenpaxo naj iskanhebꞌal iskꞌul. Haꞌ yinh sunil istxꞌotxꞌal Yatut Komam Dios tuꞌ, ay huneꞌ kꞌubꞌ doscientos cincuenta metro yeko ispakꞌul, doscientos cincuenta metro yeko sat. Haꞌ huneꞌ kꞌubꞌ tuꞌ xin chipohni xolbꞌal tzet ye tuꞌ txahul yet Komam Dios, yebꞌ bꞌay ay hunteqꞌan komon tzet ye tuꞌ.