6 Ay xin huneꞌ naj winaj linhankanh inkꞌatanhan, wabꞌenan istzotelilti Komam Jahawil wetan yul yatut. 7 Yalni wetan: «Hach iskꞌahol naj winaj, haꞌ ton bꞌey tiꞌ ay intronohan, haꞌ bꞌey tiꞌ chiwayojan ispaqꞌanil wojan. Haꞌ bꞌey tiꞌ chinehikꞌojan xol ebꞌnaj Israel yinh sunilbꞌal ej tiempo, matxa bꞌaqꞌinhal xin chiꞌilaxilo ispixan inbꞌihan yu konhobꞌ Israel, haꞌ ton inbꞌihan kaw aykano yelapnoj. Haꞌ ebꞌnaj Israel tiꞌ yebꞌ ebꞌnaj isreyal ebꞌnaj, matxa chinyintanhekaniltojan ebꞌnaj yu yinayo isbꞌa sata tioxh bꞌay nahat yekanh yebꞌ xin matxa chismuj ebꞌnaj isreyal iskawilal watutan hakaꞌ yute ebꞌnaj yet yalanhtokanoj. 8 Yuto hayet ischalen isbꞌa istxikin iswiꞌ ispultahil watutan yebꞌ iswiꞌ ispultahil ispalacio ebꞌnaj, iswatxꞌen ebꞌnaj ispalacio tuꞌ yinh iskꞌul watutan; huneꞌchꞌannhe bꞌitzꞌabꞌ chipohni xol watutan yebꞌ ispalacio ebꞌnaj, yinilo ebꞌnaj ispixan inbꞌihan kaw aykano yelapnoj yet iswatxꞌen ebꞌnaj isyahbꞌetajil, yuxin intanhtzelojan ebꞌnaj yu inhowalan. 9 Yajaꞌ wal tinanh matxa chꞌok ebꞌnaj yiqꞌayo isbꞌa sata tioxh, nahat chisqꞌojkanto ebꞌnaj istxꞌojal tuꞌ yinh insatan, yebꞌ xin matxa chismuj ebꞌnaj isreyal iskawilal watutan, yuto chinehayojan xol ebꞌnaj yinh sunilbꞌal ej tiempo. 10 Hach iskꞌahol naj winaj, yeh yechel watutan maxawil tiꞌ tet konhobꞌ Israel, chayeni ismalil yebꞌ yelawil yinh sat ebꞌnaj, hak tuꞌ xin chu istxꞌixwikanh ebꞌnaj yu ismul. 11 Ta xin chitxꞌixwilo ebꞌnaj yinh sunil ismul yakoj, wal tuꞌ chawaqꞌ yohtanhelo ebꞌnaj yechel iswatxꞌebꞌanil watutan, chawalni tzet ay yul, yebꞌ bꞌay chonhoktoj yebꞌ bꞌay chonheltoj; chawalni tzet jilni watuttuꞌan tet ebꞌnaj, yebꞌ sunil chejbꞌanile yilal isyijelaxi. Chatzꞌibꞌnheyo yechel watuttuꞌan yebꞌ chejbꞌanile tuꞌ yinh sat ebꞌnaj yunhe istxumnilo ebꞌnaj, chisyijen ebꞌnaj hakaꞌ hawalni. 12 Haꞌ hunteqꞌan chejbꞌanile tiꞌ yilal isyijelax yinh watutan: Sunil txꞌotxꞌ tzalan yinhla ishoyanil watutan kaw ekꞌna txahulkanoj,» xhi Komam.

13 Hak tiꞌ ismalil ismexhahil yet xahanbꞌal ay yul Yatut Komam Dios, haꞌ malbꞌal maleni, haꞌ ton malbꞌal wilan Yatut Komam Dios. Haꞌ iscimientohal yich ismexhahil yet xahanbꞌal tuꞌ, yikta metro yehayto yul txꞌotxꞌ, yiktapaxo metro sat, haxa istiꞌla ismexhahil yet xahanbꞌal tuꞌ 25 (howebꞌ iskawinaj) centímetro yehilti istiꞌ. Haꞌ yich ismexhahil yet xahanbꞌal tuꞌ hak tiꞌ ye hakaꞌ tiꞌ: 14 Haꞌ ismalil chiꞌichikanh yich xeꞌ, masanto chiꞌahapno yalanh iskabꞌ majan yich, huneꞌ metro yekanh istel, haxa yinhla ishoyanil istiꞌlaj, yikta metro yehiltij. Haxa hunxa yet yox majan yich, kabꞌ metro yekanh istel, haxa ishoyanil istiꞌlaj yikta metro yehiltij. 15 Haꞌ ismexhahil yet xahanbꞌal tuꞌ, kabꞌ metro yekanh istel, aypaxo kanhebꞌ yukꞌaꞌ, huneꞌ yinh hunun istxikin. 16 Haꞌ mexha yet xahanbꞌal tuꞌ, wajebꞌ metro ispakꞌul, wajebꞌpaxo metro yeko sat, lahannhe ismalil yinh iskanhebꞌal istxikin. 17 Haxa huneꞌ yox yich hujebꞌ metro yeko ispakꞌul, hujebꞌpaxo metro yeko sat, yinh iskanhebꞌal istxikin, lahannhe ismalil, haxa istiꞌ ayilti yinhla ishoyanil 25 (howebꞌ iskawinaj) centímetro yehiltij, haxa yich yinhla ishoyanil, yikta metro. Haxa isqꞌochal yinh yetkꞌulal bꞌay chiꞌahilo tzꞌayik aykoj.

18 Lahwi tuꞌ yalni Komam Jahawil wetan: Hach iskꞌahol naj winaj, hanin Yahawilintiꞌan, chiwalan: «Hayet istzꞌayikal bꞌay chiwatxꞌi mexha yet xahanbꞌal tuꞌ yilal isyijelax hunteqꞌan chejbꞌanile tiꞌ: Haꞌ yibꞌanh ismexha yet xahanbꞌal tuꞌ, chinhuslax no noqꞌ xahanbꞌalil, kat istxihlaxayo ischikꞌil noꞌ yibꞌanh. 19 Cheyaqꞌni hunu noꞌ tzehla wakax tet ebꞌyaꞌ sacerdote levita titna yinh yuninal yaꞌ Sadoc, haꞌ ton ebꞌyaꞌ chihitziko inkꞌatanhan, chimunla yinh inmunilan yu yaqꞌni noꞌ xahanbꞌalil wetan, yu yaqꞌni tanho mule, haꞌ hunteqꞌan tiꞌ hanin Yahawilintiꞌan chiwalan. 20 Lahwi tuꞌ chiyinikanh ebꞌyaꞌ sacerdote tuꞌ hanikꞌ ischikꞌil noꞌ, chismasniko ebꞌyaꞌ yinh iskanhebꞌal yukꞌaꞌ mexha yet xahanbꞌal tuꞌ, yebꞌ yinh iskanhebꞌal istxikin, yebꞌ yinhla ishoyanil istiꞌ mexha yet xahanbꞌal tuꞌ, yunhe saj chiꞌelkaniko huneꞌ mexha tuꞌ. 21 Lahwi tuꞌ, cheyinilo noꞌ wakax aqꞌlax istoholo mule, chenhusni noꞌ yintalto watutan bꞌey huneꞌ txꞌotxꞌ ixtanhxa tikꞌa yehi, hakaꞌ yalni chejbꞌanile aqꞌbꞌilkano wuhan. 22 Haxa yet iskabꞌ tzꞌayik, cheyalte hunu noꞌ chiw winaj machi istzakaꞌil yinh xahanbꞌalil, yu yaqꞌni tanho mule, chissajnhen ebꞌyaꞌ mexha yet xahanbꞌal yu ischikꞌil noꞌ, hakaꞌ yu issajnhen ebꞌyaꞌ yu ischikꞌil noꞌ tzehla wakax. 23 Hayet chilahwi heyalten noꞌ chiw yinh xahanbꞌalil tuꞌ, cheyaltenpaxo hunuxa noꞌ wakax tzeh, mach istzakaꞌil aykoj, yebꞌ hunuxa noꞌ meꞌ winaj machi istzakaꞌil. 24 Cheyalte noꞌ yinh xahanbꞌalil wetan, hanin Yahawilintiꞌan. Chayo ebꞌyaꞌ sacerdote atzꞌam yibꞌanh noꞌ, chisnhusni ebꞌyaꞌ noꞌ xahanbꞌalil wetan. 25 Hunun tzꞌayik yulbꞌal hujebꞌ tzꞌayik, cheyalte hunu noꞌ chiw winaj yinh xahanbꞌalil chꞌaqꞌni tanho mule, cheyaltenpaxo hunu noꞌ wakax tzeh yebꞌ xin hunu noꞌ meꞌ winaj machi istzakaꞌil aykoj, yinh xahanbꞌalil tuꞌ. 26 Hujebꞌ tzꞌayik cheyalte xahanbꞌal wetan yunhe issajbꞌikano huneꞌ mexha yet xahanbꞌal tuꞌ kat yokkano yinh inmunilan. 27 Hak tuꞌ cheyute yulbꞌal hujebꞌ tzꞌayik, haxa yinh iswaxajebꞌ tzꞌayik chiyalten ebꞌyaꞌ sacerdote xahanbꞌal yibꞌanh mexha yinh ismul konhobꞌ, chiyaltenpaxo ebꞌyaꞌ yebꞌalqꞌabꞌe yet aqꞌankꞌulal yinh tzalahilal. Haꞌ hunteqꞌan chejbꞌanile tiꞌ, hanin Yahawilintiꞌan chiwalan,» xhi Komam.