4 Lahwi tuꞌ kinyinitojan huneꞌ naj winaj tuꞌ bꞌey pulta ayko yinh yetkꞌulal norte ayko sata istiꞌ Yatut Komam. Wilnihan isnohilo yul Yatut Komam Jahawil yu isqꞌaqꞌal ismay Komam; way jahnojan, way xulnojan sat txꞌotxꞌ. 5 Yalni Komam Jahawil wetan: «Hach iskꞌahol naj winaj, kaw kam chawila yebꞌ kaw kam chawabꞌe yinh chejbꞌanile chiwalan tawet yinh watutan. Kaw kam chawila mak chꞌoktoj yul watutan yebꞌ mak chiꞌeltoj. 6 Chawalni tet anma Israel, anma kaw manhkꞌomkanoj: “Hak tiꞌ yalni Komam Jahawil: Hex ah Israel, bꞌejwekano hewatxꞌen isyahbꞌetajil. 7 Hex tiꞌ cheyetato watutan yet cheyinikto anma nan konhobꞌal yul watuttuꞌan, haꞌ ton hunteqꞌan machi yechel circuncisión yinh isnimanil yebꞌ yinh yanma. Cheyetato watuttuꞌan yet cheyalten ixim pan xahanbꞌalil wetan yebꞌ ismantecahil no noqꞌ yebꞌ ischikꞌil noꞌ, chemanhkꞌon trato tꞌinhbꞌabꞌilkano wuhan yebꞌ hex, chewatxꞌen sunil isyahbꞌetajil. 8 Hex tiꞌ mach cheyije chejbꞌanile walkanojan yinh tzetaj ye tuꞌ kaw txahulkano wetan yehi, wal xin haꞌ yul isqꞌabꞌ anma nan konhobꞌal heyako munil yilal isyijelax yul watuttuꞌan.

9 »”Hanin Yahawilintiꞌan chiwalan ta machi hunu yuninal anma nan konhobꞌal ay texol hex Israel hex tiꞌ chiꞌokto yul watutan, haꞌ ton hunteqꞌan mach yechel circuncisión yinh isnimanil yebꞌ yinh yanma. 10 Wal ebꞌnaj levita ispohilo isbꞌa winhan yet kinisbꞌejnikanojan anma Israel yok yinoyo isbꞌa sata tioxh, haꞌ ebꞌnaj tuꞌ chíkanto ebꞌnaj ismul yibꞌanh. 11 Haꞌ ebꞌnaj levita tuꞌ, chisje yok ebꞌnaj istanheno ispultahil watutan, yebꞌ yinh hunuxa munil yul watuttuꞌan. Chisje ispotxꞌnikamo ebꞌnaj no noqꞌ chiꞌalaxiko xahanbꞌalil yul watutan, haꞌ ton noꞌ chiyaqꞌ konhobꞌ yinh xahanbꞌalil. Yilal hinan ebꞌnaj ismunla hakaꞌ yalni konhobꞌ. 12 Yuto ebꞌnaj levita tuꞌ ok ebꞌnaj yiqꞌayo isbꞌa sata tioxh, hak tuꞌ yu yaqꞌni aykꞌayo ebꞌnaj konhobꞌ Israel yinh istxꞌojal, yuxin hanin Yahawilintiꞌan wikanh inqꞌabꞌan walnihan ta chiyikanto ebꞌnaj levita tuꞌ ismul yibꞌanh. 13 Mach chisje yok ebꞌnaj yinh inmunilan yinh sacerdotehal insatajan, yebꞌ xin mach chu ishitziko ebꞌnaj iskꞌatanh tzetaj ye tuꞌ kaw txahul yebꞌ hunteqꞌan kaw ekꞌnakano txahulkanoj, wal xin chiyikanilo istxꞌixobꞌal ebꞌnaj yu isyahbꞌetajil iswatxꞌe. 14 Yuxin haꞌ ebꞌnaj levita tuꞌ chiwakojan yahawilo yinh istanhen watutan, yebꞌ xin haꞌ ebꞌnaj chiwatxꞌen komon munil yilal iswatxꞌelax yul watutan.

15 »”Yajaꞌ wal ebꞌyaꞌ sacerdote levita, iskꞌahol yaꞌ Sadoc, ebꞌyaꞌ kꞌubꞌan chejbꞌanile yul watutan yet ispohnilo isbꞌa konhobꞌ Israel winhan, haꞌ ebꞌyaꞌ chimunla yinh insatan. Hanin Yahawilintiꞌan chiwalan ta haꞌ ebꞌyaꞌ iskꞌahol yaꞌ Sadoc tuꞌ chihalten ismantecahil no noqꞌ yebꞌ ischikꞌil noꞌ xahanbꞌalil wetan. 16 Haꞌ ebꞌyaꞌ tuꞌ chiꞌokto yul watutan kat ishitziko ebꞌyaꞌ iskꞌatanh inmexhahan, yu ismunla yinh inmunilan, chisyijen ebꞌyaꞌ inchejbꞌanilan. 17 Hayet chiꞌokto ebꞌyaꞌ yul pulta ay bꞌey yamaqꞌil yuliktoj, yilal yaniko xil isqꞌap lino yinh, mach chu yaniko xilqꞌape lana yinh yet chiꞌokto yul pulta ay bꞌey yamaqꞌil yuliktoj yebꞌ yet chiꞌokto ebꞌyaꞌ yul watutan. 18 Chiyahto ebꞌyaꞌ qꞌap qꞌap nabꞌa lino yinh iswiꞌ, chiyaniko qꞌap yul wexe nabꞌa lino yinh. Mach chu yaniko ebꞌyaꞌ qꞌap xilqꞌape kaw pim yinh yunhe mach chiꞌel haꞌ yinh ebꞌyaꞌ. 19 Haxa yet chiꞌelto ebꞌyaꞌ bꞌey yamaqꞌil yintaltoj bꞌay ay konhobꞌ, yilal yinilo ebꞌyaꞌ xil isqꞌap ayko yinh yet chimunla yul watutan; chanikano ebꞌyaꞌ xil isqꞌap chiyilo tuꞌ bꞌey huneꞌ cuarto, nanxa xin xilqꞌape chako ebꞌyaꞌ yinh yet chiꞌelti sata konhobꞌ, yunhe mach chiꞌokkano ismay hunteqꞌan xilqꞌape yinh konhobꞌ tuꞌ. 20 Mach chu yinilo ebꞌyaꞌ xil iswiꞌ, yebꞌ xin mach chu yaqꞌni chꞌibꞌopaxo ebꞌyaꞌ, wal xin haꞌ istxam xil iswiꞌ tuꞌ chu iskꞌupniloj, yunhe mach chichꞌibꞌi. 21 Mach hunu ebꞌyaꞌ sacerdote tiꞌ chisje yukꞌni vino yet chiꞌokto yul yamaqꞌil yuliktoj watutan. 22 Mach chu yiqꞌni ebꞌyaꞌ hunu ix hunix kamnaxa yichamil yixaloj, maka hunu ix ix xabꞌejlaxkano yu yichamil; wal xin hanhkꞌanhe hunu ix qꞌopo ah Israel, maka hunu ix yixal hunu yaꞌ kamom sacerdote, chisje yiqꞌni ebꞌyaꞌ. 23 Haꞌ ebꞌyaꞌ sacerdote tiꞌ chikuyni inkonhobꞌan istxumnilo bꞌaytet wetan yehi yebꞌ bꞌaytet mach wetojan, yebꞌ xin haꞌ ebꞌyaꞌ chikuyni yohtanhelo bꞌaytet saj yebꞌ bꞌaytet mach sajoj. 24 Ta ay howal chiꞌah xol konhobꞌ, haꞌ ebꞌyaꞌ sacerdote tiꞌ chiꞌilni tzet chiꞌelikoj, hakaꞌ yalni inleyan. Chisyijen ebꞌyaꞌ isleyalil sunil qꞌinh kaw aykano yelapnoj, chiskꞌubꞌan tzꞌayik xewilal, tzꞌayik wetan yehi. 25 Mach chu ishitziko ebꞌyaꞌ sacerdote tiꞌ iskꞌatanh isnimanil hunu kamom, yunhe mach chiyetato isbꞌa hakaꞌ yalni ley, kachannhe ta ismam maka ismiꞌ ebꞌyaꞌ chikami, wal tuꞌ, chisje ishitziko ebꞌyaꞌ iskꞌatanh; maka ta hunu iskꞌahol maka iskutzꞌin, maka yuxhtaj maka yanabꞌ maxhto chimohyi; wal tuꞌ chisje ishitziko ebꞌyaꞌ iskꞌatanh. 26 Lahwi tuꞌ chissajnhen isbꞌa ebꞌyaꞌ hakaꞌ yalni ley; yajaꞌ mach chiꞌokto ebꞌyaꞌ yul watutan yulbꞌal hujebꞌ tzꞌayik. 27 Haxa yet istzꞌayikal yet chiꞌokpaxto ebꞌyaꞌ yul watutan hunelxa bꞌey amaqꞌ, yuliktoj yu isyijen ismunil, yilal yalten ebꞌyaꞌ xahanbꞌal chꞌaqꞌni tanho ismul. Haꞌ hunteqꞌan tiꞌ, hanin Yahawilintiꞌan chiwalan.

28 »”Machi ismajul ebꞌyaꞌ sacerdote chischah yinh istxꞌotxꞌ Israel, yuxin machi txꞌotxꞌ cheyaqꞌ tet ebꞌyaꞌ, yuto hanintiꞌan ismajul ebꞌyaꞌ. 29 Haꞌ tzet chiyaqꞌ konhobꞌ wetan isxahanbꞌalil haꞌ chislo ebꞌyaꞌ, yebꞌ xin haꞌ no noqꞌ chiyalte ebꞌyaꞌ xahanbꞌalil yu yaqꞌni tanho mule, haꞌ noꞌ chiskꞌux ebꞌyaꞌ yebꞌ xin sunil tzet chiyaqꞌ konhobꞌ Israel wetan yet ebꞌyaꞌ sacerdote tiꞌ yehi. 30 Haꞌ sunil bꞌabꞌel sat tzꞌunubꞌ yebꞌ sunil yebꞌalqꞌabꞌe yet ebꞌyaꞌ sacerdote tiꞌ yehi, hakpax tuꞌ yet chewatxꞌen ixim pan, haꞌ ixim bꞌabꞌel chewatxꞌe, haꞌ ixim cheyaqꞌ tet ebꞌyaꞌ sacerdote haxinwal aynhetikꞌa isyaxil iskꞌulal Komam yul heyatut. 31 Haꞌ ebꞌyaꞌ sacerdote tiꞌ, mach chu iskꞌuxni ebꞌyaꞌ noꞌ chꞌik maka hunuxa no noqꞌ tonhe chikamkanh, maka potxꞌbꞌil yu hunu noꞌ howla noqꞌ.