Istxah konhobꞌ Sión lanhan yaqꞌlen isyaꞌtajil
5
Mam Jahawil nati hanta tzet hul jibꞌanhanh,okanh tꞌanhno jinhanh, chawilni isyaꞌtajil ayayo jibꞌanhanh.
2 Haꞌ kotxꞌotxꞌanh okkano txꞌotxꞌ yu ebꞌnaj nan konhobꞌal,
haxa jatutanh yetxa komon anma yehi.
3 Haꞌ komiꞌanh lahan maꞌelkaniko hakaꞌ ebꞌix hunix.
4 Haꞌ jaꞌanh chijukꞌanh chikoloqꞌanh haꞌ,
chikoloqꞌnipaxojanh kosiꞌanh.
5 Chonhtzumbꞌelaxikꞌojanh yu ebꞌnaj ayko ishowal jinhanh,
kaw chonhsikihanh komunlahanh, yajaꞌ maxhtikꞌa chonhchalax xewojanh.
6 Kobꞌatxbꞌato koqꞌabꞌanh yay kosatanh koqꞌannihanh tzet chikolohanh tet ebꞌnaj Egipto yebꞌ tet ebꞌnaj asirio.
7 Haꞌ ebꞌnaj jichmamanh yako ebꞌnaj ismul, iskamto ebꞌnaj,
yajaꞌ hanhonhanh lanhan kotohlananh ismul ebꞌnaj jichmam tuꞌanh.
8 Haꞌ ebꞌnaj chejabꞌ yehi, yahawil yeko ebꞌnaj jinhanh tinanh,
machi mak chonhkolnilojanh yul isqꞌabꞌ ebꞌnaj.
9 Hayet chonhbꞌeyanh jiqꞌahanh tzet chikolohanh kaw chiꞌeliko kokamanh yu espada
tet ebꞌnaj elqꞌom ay sat txꞌotxꞌ desierto.
10 Haꞌ istzꞌumal konimanilanh kaw qꞌej elkaniko hakaꞌ isqꞌejal yul hunu horno yu nhubꞌ,
yuto tit qꞌaꞌ jinhanh yu wahil.
11 Haꞌ ebꞌix ix ah Sión etalax ebꞌix,
yetalaxpaxo ebꞌix qꞌopota ix ah Judá.
12 Haxa ebꞌnaj yahaw konhobꞌ Sión alaxiko txꞌanh lasu yinh isqꞌabꞌ ebꞌnaj istꞌunhbꞌalax ebꞌnaj yu ebꞌnaj ayko ishowal yinh.
Matxa yelapno ebꞌnaj ichamta winaj yul sat ebꞌnaj.
13 Haꞌ ebꞌnaj tzehtaj alaxiko ebꞌnaj kokꞌtze trigo,
yalaxpaxiko ebꞌnaj ijo siꞌ, ispaxilo yip ebꞌnaj yalanh yalil teꞌ.
14 Haꞌ ebꞌnaj ichamta winaj, matxa chiꞌil-lax ebꞌnaj yul ispultahil konhobꞌ,
haxa ebꞌnaj tzehtaj matxa chibꞌitni ebꞌnaj.
15 Matxa tzalahilal yinh janmahanh,
haꞌ bꞌiskꞌulal meltzoko selelo yet chonhkanhalwihanh yu tzalahilal.
16 Maꞌaykꞌaykano kocoronahanh ayahto yinh kowiꞌanh.
¡Wal tinanh kaw kꞌanchꞌan honhanh yuto jako komulanh!
17 Yu tuꞌ, yuxin kaw bꞌiskꞌulal ye janmahanh,
yu tuꞌ yuxin qꞌejholilo komujlubꞌalanh.
18 Haꞌ wonhan Sión, maꞌuchkꞌalaxkantoj,
haxanhe noꞌ wech chiꞌekꞌ bꞌey tuꞌ.
19 Wal hach tiꞌ Mam Jahawil, ayachnhetikꞌa yinh sunilbꞌal ej tiempo,
Yahawil hach yinh tohbꞌalqꞌinal.
20 ¿Tzet yinh xin chonhhanahulnhekantojanh yinh hunelnhe?
¿Tzet yinh xin chonhhabꞌejkanojanh yinh kaw niman tiempo?
21 Mam Jahawil, aqꞌonhmeltzohojanh yul haqꞌabꞌ hunelxa,
kat komeltzokojanh yul haqꞌabꞌ, aqꞌ iskꞌulal jilaꞌanh hakaꞌ yet yalanhtokanoj.
22 Yuto haꞌ tinanh makonhhawintanhekaniltojanh, yinh kaw yeli kaw titkano hahowal jinhanh Mamin.