Yijkano isbꞌa yay isyaꞌtajil yibꞌanh konhobꞌ Sión
4
¡Kaw qꞌej maꞌelkaniko chꞌen oro kaw chitikꞌa tzejlahi!¡Haꞌ chꞌen oro kaw kꞌul matxa chitzejla chꞌen tinanh!
Haꞌ chꞌen ischꞌenal Yatut Komam Dios toxanhe chiꞌekꞌ pakꞌla chꞌen bꞌay chiskulusnhe isbꞌa bꞌeh.
2 Haꞌ ebꞌnaj tzehtaj ah Sión kaw ochebꞌiltikꞌa ebꞌnaj,
kaw ekꞌbꞌaltikꞌa yelapno ebꞌnaj sata chꞌen oro, chꞌen kaw kꞌul.
¡Wal tinanh kaw lahan maꞌelkaniko ebꞌnaj hakaꞌ txꞌotxꞌ xi chistzꞌaj naj watxꞌem xi!
3 Haꞌ noꞌ miꞌe oj chaqꞌ noꞌ yim nixhte yunin kat istxutxwi nixhte yunin noꞌ,
wal ebꞌix ix wet konhobꞌan kaw machiswalilkano ebꞌix,
lahan ebꞌix hakaꞌ noꞌ avestruz ay bꞌey txꞌotxꞌ desierto.
4 Haꞌ yaqꞌ nixhte neneꞌ chitotxutxwi chikankano lakꞌno yinh ishomal istiꞌ yu tajintiꞌal.
Isqꞌan nixhte unin ispan iswabꞌ, yajaꞌ machi mak chiꞌaqꞌni tet.
5 Haꞌ anma kaw ischiꞌalnhetikꞌa chislo payxa,
lanhan iskam yu wahil yulaj calla tinanh.
Haꞌ anma chꞌibꞌkanh xolaj qꞌalomal chaniko qꞌap qꞌap kajmutzꞌmunhe kaw ay istohol xilo isqꞌap,
haꞌ tinanh chislaqꞌ isbꞌa yebꞌ ebꞌnaj chitzꞌisnikanh istzaꞌ no noqꞌ.
6 Hak tuꞌ chaqꞌle wet konhobꞌtiꞌan,
yuto kaw palkꞌonkanh ismul sata konhobꞌ Sodoma.
Haꞌ huneꞌ konhobꞌ tuꞌ yinh kaw hunepchꞌan tanhkaniloj,
mach yilalo apni hunbꞌulan ebꞌnaj aqꞌom howal yinh.
7 Haꞌ ebꞌnaj yahaw konhobꞌ Sión, ekꞌbꞌal sajhoponhe yil-lax ebꞌnaj sata chꞌen chew,
ekꞌbꞌal sajhoponhe yil-lax ebꞌnaj sata noꞌ lech.
Ekꞌbꞌal kaw kaj chimchonhe isnimanil ebꞌnaj sata chꞌen coral,
kaw kawla winaj ebꞌnaj hakaꞌ iskꞌulchꞌanil chꞌen Zafiro.
8 Wal tinanh ekꞌbꞌal isqꞌejal jilni ebꞌnaj hakaꞌ isqꞌejholohal aqꞌbꞌal,
matxa chitxumlaxilo ebꞌnaj yulaj calla,
kankano lakꞌno istzꞌumal isnimanil ebꞌnaj yinh isbꞌajil,
kaw tajinxa ebꞌnaj yu bꞌajil hakaꞌ teꞌ tajin teꞌ.
9 Ekꞌbꞌalto kꞌul yet mak chitejlaxkamo yu espada sata mak chikam yu wahil.
Haꞌ hunteqꞌan anma tiꞌ kaw nixhtejal yu yel iskꞌul yu wahil,
yuto matxa sat tzꞌunubꞌ chiꞌel sat txꞌo txꞌotxꞌ.
10 Haꞌ ebꞌix miꞌe kaw kꞌul iskꞌul yinh nixhte yunin,
ismaqꞌkamo ebꞌix yunin, istxikni ebꞌix ischibꞌehal yunin tuꞌ iskꞌuxni ebꞌix.
¡Haꞌ kaw yunin ebꞌix ix okniko itahil yinh istzꞌayikal bꞌay ay isyaꞌtajil yibꞌanh ebꞌix ix wet konhobꞌan!
11 Haꞌ ishowal Komam Jahawil yij isbꞌa, isjobꞌayo Komam ishowal.
Istzujbꞌako Komam qꞌa qꞌaꞌ yinh konhobꞌ Sión, istzꞌakantoj, istzꞌapaxkanto isxeꞌal.
12 Haꞌ ebꞌnaj isreyal konhobꞌ ay sat yibꞌanhqꞌinal tiꞌ yebꞌ sunil anma ay sat txꞌo txꞌotxꞌ tiꞌ,
maxhtikꞌa ekꞌ huneꞌ tiꞌ yinh isnabꞌal ta chisje yokto ebꞌnaj ayko ishowal yinh Jerusalén yul ispultahil Jerusalén tiꞌ.
13 Hul sunil hunteqꞌan isyaꞌtajil tiꞌ yu ismul ebꞌnaj isbꞌaliko isbꞌa ischejabꞌo Komam Dios,
yebꞌ yu istxꞌojal iswatxꞌe ebꞌnaj sacerdote,
malikꞌo ischikꞌil anma machi ismul yul konhobꞌ yu ebꞌnaj.
14 Hayet chiꞌekꞌ ebꞌnaj yulaj iscallehal konhobꞌ,
chiꞌekꞌ matxmon ebꞌnaj hakaꞌ mak mach chu yilni,
haꞌ xil isqꞌap ebꞌnaj bꞌakbꞌiliko chikꞌ yinh,
yuxin machi hunu mak chihitziko istzabꞌaꞌ xil isqꞌap ebꞌnaj.
15 Chalni yet konhobꞌ ebꞌnaj yinh kaw ip hakaꞌ tiꞌ: «¡Pohwelo hebꞌa jinhanh!
¡Hex tiꞌ kaw tzꞌilhexkanoj! ¡Hitzanhwelo kokꞌatanhanh,
mach chonhetzabꞌanh!» xhi. Hak tuꞌ yu yelkanh ebꞌnaj, issajlemito ebꞌnaj,
yajaꞌ yal anma ay yulajla nimeta konhobꞌ yinh ebꞌnaj:
«Haꞌ hunteqꞌan ebꞌnaj tiꞌ, mach bꞌaqꞌinhal chikankano ebꞌnaj koxol tiꞌ,» xhi yinh ebꞌnaj.
16 Sajlemito ebꞌnaj yu ishowal Komam, matxa xin tꞌanhxiko Komam yinh ebꞌnaj.
Matxa tzet yelapno ebꞌyaꞌ sacerdote tuꞌ yul sat anma,
matxa tzꞌaypaxo iskꞌul anma yinh ebꞌnaj ichamtaxa.
17 Nabꞌanhe konhsikihanh jechmananh mak chiyu konhiskolnihanh.
Nabꞌanhe kawxi kokꞌulanh yinh huneꞌ konhobꞌ mach chu konhiskolnihanh.a
18 Iskꞌalbꞌa ebꞌnaj jojanh, yunhe matxa chonhekꞌanh yulaj iscallehal kokonhobꞌanh.
Wal tinanh apni istzꞌayikal bꞌay konhtanhkanilojanh,
haꞌ isyaꞌtajil halbꞌilkano jinhanh mayijkano isbꞌa,
maꞌapni istzꞌayikal kamikal jibꞌanhanh.
19 Haꞌ ebꞌnaj konhtzumbꞌenikꞌojanh ekꞌbꞌal yaqꞌni ebꞌnaj anhe sata noꞌ tꞌiw chiꞌekꞌ satkanh;
kotzumbꞌelaxanh yu ebꞌnaj iswiꞌla witz.
Ok ebꞌnaj majwal jinhanh sat txꞌotxꞌ desierto, yaniko ebꞌnaj howal jinhanh.
20 Koreyanh bꞌay kaw chitikꞌa kawxi kokꞌulanh, yaꞌ sikꞌbꞌililo yu Komam Jahawil, tzabꞌlaxayoj,
yilaxto preso. Hanhonh tiꞌ konah ta haꞌ yaꞌ chonhkolni tet hunteqꞌan nimeta konhobꞌ.b
21 ¡Hex ah Edom, hex ay hex sat txꞌotxꞌ Uz, tzebꞌanhwej, tzalahanhwe tinanh!
Haꞌ isyaꞌtajil chiꞌapnopaxo teyinh, hakaꞌta chexukꞌtzelaxokanh kat hexabꞌoj.
22 Hex ah Sión, wal tinanh mayijkano isbꞌa yay isyaꞌtajil teyibꞌanh.
Matxa bꞌaqꞌinhal tiꞌ chexilaxoto preso nan konhobꞌal hunelxa.
Haxa hex ah Edom chaqꞌayo Komam Jahawil isyaꞌtajil teyibꞌanh yu hetxꞌojal,
chiꞌelo yenhel hemul yu Komam.