—Ay huneꞌ inwayikan, kaw xin ayko inwayik tuꞌan yinh inkꞌulan; yuxin chiwochehan wohtanhelojan tzet chal yelapnoj, xhi naj.

4 Istzotel ebꞌnaj ahbꞌe tet naj rey tuꞌ yinh abꞌxubꞌal arameo, yalni ebꞌnaj:

—¡Mam rey ayojabꞌ hachnhetikꞌako yinh reyalil tiꞌ yinh sunilbꞌal ej tiempo! Hal hawayik tuꞌ jabꞌehanh, hanhonh konhhachejabꞌ honhtiꞌanh, chijalnilojanh tzet chalilo hawayik tuꞌ, xhi ebꞌnaj.

5 Istaqꞌwi naj rey Nabucodonosor tet ebꞌnaj ahbꞌe tuꞌ:

—Haꞌ inwayik tuꞌan mato nahul wuhan, yuxin ta mach cheyalilo inwayik tuꞌan, yebꞌ tzet chal yelapnoj, kaw kokꞌ chu hetzokꞌlaxkamoj, kat yuchkꞌalaxayo heyatut, qꞌalemxanhe chikani. 6 Yajaꞌ ta cheyalilo inwayik tuꞌan yebꞌ tzet chal yelapnoj, chechabꞌ sabꞌehal wetan, yebꞌ xin kaw kꞌul chexwilan, kat yalaxiko hemay wuhan, yuxin halwe inwayik tuꞌan yebꞌ tzet chal yelapnoj, xhi naj.

7 Istaqꞌwi ebꞌnaj yet iskayel, yalni ebꞌnaj tet naj rey Nabucodonosor:

—Mam rey, hal hawayik tuꞌ jabꞌehanh, hak tuꞌ xin chijalilojanh yinh tzet chal yelapnoj, xhi ebꞌnaj.

8 Istaqꞌwi naj rey tuꞌ:

—Yinh kaw yeli hanintiꞌan wohtajan tato cheyoche chiꞌekꞌto tzꞌayik yibꞌanh huneꞌ tiꞌ yunhe hekolni hebꞌa, yuto cheyila ta mato nahul inwayik tuꞌan wuhan. 9 Yuxin ta mach cheyalilo inwayke tuꞌan, mach chexkolchahi. Yajaꞌ yunhe hekolni hebꞌa, chimhenabꞌaꞌkanh leqꞌtiꞌal yebꞌ istxꞌojal, cheyaqꞌni ispaj wetan yunhe yekꞌayoj. Yuxin halwelo wetan tzet inwayke tuꞌan, yunhe wohtanhenilojan ta chu heyu heyalnilo tzet chal yelapnoj, xhi naj.

10 Istaqꞌwi ebꞌnaj ahbꞌe tuꞌ sata naj rey, yalni ebꞌnaj:

—Mam rey, machi hunu naj winaj ay sat yibꞌanhqꞌinal tiꞌ chu yalnilo tzet chaqꞌambꞌe tiꞌ, yebꞌ xin maxhto hunu naj rey, maka hunu naj iswiꞌehal konhobꞌ chꞌaqꞌni hunu qꞌambꞌebꞌal hakaꞌ tiꞌ tet ebꞌnaj ahbꞌe, yebꞌ tet ebꞌnaj chikuyni tzet yelapno txꞌumel, maka tet ebꞌnaj txumlum. 11 Yuto haꞌ tzet chaqꞌambꞌe tiꞌ kaw yaꞌtaj, yuxin machi hunu mak chu yalniloj, kachannhem hunteqꞌan dios chinachalo yu, yajaꞌ hunteqꞌan tuꞌ mach ayoko koxol hanhonh anmahonh tiꞌ, xhi ebꞌnaj.

12 Hayet yabꞌen naj rey yalni ebꞌnaj hakaꞌ tuꞌ kaw tit ishowal naj, ischejni naj ta chipotxꞌlaxkamo sunil ebꞌnaj winaj kaw ay ishelanil ay sat txꞌotxꞌ Babilonia. 13 Hak tuꞌ yu ispujbꞌalaxikꞌo ischejbꞌanil naj rey, ta chipotxꞌlaxkamo sunil ebꞌnaj winaj kaw ay ishelanil, yuxin saylaxpaxo yaꞌ Daniel yebꞌ ebꞌyaꞌ yetbꞌi yu ispotxꞌlaxpaxokamoj.

14 Yuxin tzotel yaꞌ Daniel yinh sunil ishelanil yebꞌ isnabꞌal tet naj Arioc, yahawil yinh ebꞌnaj issoldado naj rey Nabucodonosor, yuto elto naj Arioc tuꞌ potxꞌwal yinh sunil ebꞌnaj winaj kaw ay ishelanil ay sat txꞌotxꞌ Babilonia. 15 Yalni yaꞌ Daniel tet naj Arioc tuꞌ:

—¿Tzet yinh xin yalilti naj rey huneꞌ chejbꞌanile tiꞌ yinh anhe yebꞌ kaw how yaqꞌni? xhi yaꞌ.

Hak tuꞌ yu yalnilo naj Arioc tet yaꞌ Daniel yinh tzet yinh xin yalilto naj rey huneꞌ chejbꞌanile tuꞌ. 16 Hak tuꞌ yu isto yaꞌ Daniel tzotelo tet naj rey, isqꞌanni yaꞌ ta chiyechma naj rey hunuxa tzꞌayikal, kat yalnilo yaꞌ tet naj tzet chal yelapno iswayik tuꞌ. 17 Lahwi tuꞌ, isto yaꞌ Daniel yatut, yalni yaꞌ huneꞌ tuꞌ tet yaꞌ Ananías, yaꞌ Misael yebꞌ tet yaꞌ Azarías. 18 Yunhe yok ebꞌyaꞌ isqꞌanaꞌ tet Komam Dios ay yul satkanh ta chitzꞌay iskꞌul Komam yinh ebꞌyaꞌ, chꞌaqꞌni iswayik naj rey tuꞌ yohtanhelo ebꞌyaꞌ, huneꞌ wayike ewanyehi,^a yunhe mach chipotxꞌlaxkamo yaꞌ Daniel yebꞌ ebꞌyaꞌ yetbꞌi, yinta ebꞌnaj winaj kaw ay ishelanil ay sat txꞌotxꞌ Babilonia.

19 Hak tuꞌ yu yaqꞌni Komam Dios huneꞌ tzet ewan ye tuꞌ yilaꞌ yaꞌ Daniel yet aqꞌbꞌalil, yuxin ok yaꞌ Daniel yalaꞌ kꞌul-la tzotiꞌ yinh Komam Dios ay yul satkanh. 20 Istzotel yaꞌ Daniel, yalni yaꞌ hakaꞌ tiꞌ:

24 Lahwi tuꞌ xin, isto yaꞌ Daniel tzotelo tet naj Arioc, naj chejbꞌil yu naj rey ispotxꞌnikamo sunil ebꞌnaj winaj kaw ay ishelanil ay sat txꞌotxꞌ Babilonia. Yalni yaꞌ Daniel tet naj Arioc:

—Mach chapotxꞌkamo ebꞌnaj winaj kaw ay ishelanil ay sat txꞌotxꞌ Babilonia tiꞌ, wal xin, iqꞌintojan sata naj rey, chiwalnilojan tzet chal yelapno iswayik naj tuꞌ, xhi yaꞌ Daniel.

25 Yuxin ilaxto yaꞌ Daniel yinh anhe sata naj rey yu naj Arioc. Yalni naj Arioc tet naj rey tuꞌ:

—Mam rey, maꞌilcha huneꞌ naj winaj wuhan xol ebꞌnaj iqꞌbꞌilti bꞌey Judá, haꞌ naj chiyu yalnilo tzet chal yelapno hawayik, xhi naj.

26 Isqꞌambꞌen naj rey tet yaꞌ Daniel, yaꞌ chiyijpaxo Beltsasar:

—¿Tom chisje hawu hawalnilo tzet wilan yul inwayikan, yebꞌ xin yinh tzet chal yelapno inwayik tuꞌan? xhi naj.

27 Istaqꞌwi yaꞌ Daniel:

—Mam rey, haꞌ tzet ewan chawoche hawohtanhelo tiꞌ, mach chu yalnilo ebꞌnaj winaj kaw helan, ebꞌnaj chiꞌilni tzet yelapno ye txꞌumel, ebꞌnaj mago, yebꞌ ebꞌnaj ahbꞌelom mach chu yalnilo ebꞌnaj. 28 Yajaꞌ xin ay huneꞌ Dios yul satkanh chꞌaqꞌni ohtanhelo tzet ewanyehi. Haꞌ huneꞌ Dios tuꞌ mayeni tawet mam rey Nabucodonosor yinh tzet chiyu bꞌaqꞌinh, yinh hawayik yebꞌ tzet hawil yet hilan hach sat hatxꞌat.

29 »Hach tiꞌ mam rey, hayet hilan hach sat hatxꞌat, yekꞌ yinh hanabꞌal yinh tzet chiyu bꞌaqꞌinh, haꞌ xin Komam Dios, Komam chiyenilo tzet ewanyehi, haꞌ yeni tawet yinh tet chiyu bꞌaqꞌinh. 30 Haꞌ xin wetan isyelo Komam Dios huneꞌ tzet ewan ye tuꞌ, yajaꞌ maxhtaj yu kaw ekꞌbꞌal inhelanilan yibꞌanh ebꞌnaj winaj itzitz sat yibꞌanhqꞌinal tiꞌ, machoj, wal xin to yu walnilojan tawet tzet chal yelapno hawayik tuꞌ, yunhe hawohtanheniloj tzet chꞌekꞌ yinh hanabꞌal.

31 »Haꞌ yinh hawayik tuꞌ, mam rey, hawil huneꞌ yechel anma kaw nimajal, linhankanh yinh hasat. Haꞌ huneꞌ yechel tuꞌ, kaw chitzejtzoni, kaw ay ismay jilni. 32 Haꞌ iswiꞌ huneꞌ yechel anma tuꞌ oro, chꞌen kaw kꞌul; haxa istxam iskꞌul yebꞌ isqꞌabꞌ plata chꞌen aykoj; haxa iskꞌul yebꞌ isbꞌul, bronce chꞌen. 33 Haxa yoj hierro chꞌen; haxa ispaqꞌanil yoj, ayko chꞌen hierro, aypaxo txꞌotxꞌ qꞌantxꞌotxꞌ nhusbꞌil. 34 Hayet tꞌanhan hachiko yinh huneꞌ yechel anma tuꞌ, istit huneꞌ chꞌen chꞌen, yok chakꞌla chꞌen yinh yoj hierro yebꞌ txꞌotxꞌ qꞌantxꞌotxꞌ tzꞌajbꞌil, ispohto huneꞌ yechel anma tuꞌ yu chꞌen; haꞌ huneꞌ chꞌen tuꞌ, machi mak pitniti chꞌen. 35 Yu huneꞌ chꞌen chꞌen tuꞌ xin kaw kokꞌ eliko huneꞌ yechel anma tuꞌ. Wal chꞌen hierro, yebꞌ txꞌotxꞌ qꞌantxꞌotxꞌ nhusbꞌil yebꞌ chꞌen bronce, chꞌen plata yebꞌ chꞌen oro kaw kokꞌ elkanikoj, lahan elkaniko hakaꞌ ismatzꞌikal ixim trigo yet chixulaxilo isqꞌal ixim yet waresmahil kat yijlaxto yu jaqꞌeqꞌ. Matxa nino yekꞌlenal chikankanoj. Wal chꞌen chꞌen maqꞌnipoho huneꞌ yechel anma tuꞌ, chꞌibꞌilo chꞌen ismeltzoko chꞌen nime witzal, ismajnilo sunil sat txꞌo txꞌotxꞌ.

36 »Mam rey haꞌ ton tuꞌ hawayke. Wal tinanh xin, chiwalan tawet tzet chal yelapnoj huneꞌ hawayik tuꞌ. 37 Hach tiꞌ mam rey, yahawil haweh xol ebꞌnaj rey, yuto haꞌ Komam Dios, ay yul satkanh aqꞌni hamunil tiꞌ, yaniko konhobꞌ yul haqꞌabꞌ, yaqꞌni hawip yebꞌ hamay. 38 Bꞌayxanhetuꞌwal ay anma, no noqꞌ yebꞌ noꞌ chꞌik yahaw haweko yinh, ay hawip yibꞌanh, yuto haꞌ Komam Dios aniko yul haqꞌabꞌ, yuxin hachton huneꞌ wiꞌe nabꞌa oro tuꞌ. 39 Hayet chachel yinh reyalil tiꞌ, kat yahwano huneꞌxa niman konhobꞌ, yajaꞌ xin paxna yip sata hakonhobꞌ tiꞌ. Lahwi tuꞌ, kat yahwano huneꞌ isyox nime konhobꞌ, haꞌ ton chisyelo chꞌen bronce tuꞌ. Haꞌ huneꞌ niman konhobꞌ tuꞌ, chꞌok yahawilo yinh sunil sat yibꞌanhqꞌinal tiꞌ. 40 Haxa huneꞌxa niman iskanh konhobꞌ, kaw aykano yip hakaꞌ chꞌen hierro, yuto chꞌen hierro tuꞌ, sunil chismaqꞌpoho chꞌen, kat istanhkanilo sunil tzet ye tuꞌ yu chꞌen, hak tuꞌ chu ismaqꞌnipoho huneꞌ konhobꞌ tuꞌ sunil, kat istanhtzenkaniloj.^b

41 »Hawilnipaxo yoj yebꞌ yiximal yoj huneꞌ yechel anma tuꞌ, haꞌ ton huneꞌ majan hierro yok huneꞌ majan qꞌantxꞌotxꞌ nhusbꞌil. Haꞌ tuꞌ chiyal yelapnoj ta haꞌ huneꞌ niman konhobꞌ tuꞌ chipohlaxtoj, machi yip yuto soman ye chꞌen hierro yebꞌ txꞌotxꞌ qꞌantxꞌotxꞌ hakaꞌ yu hawilni tuꞌ. 42 Haꞌ yiximal yoj tuꞌ hierro soman yebꞌ txꞌotxꞌ qꞌantxꞌotxꞌ tzꞌajbꞌil, haꞌ tuꞌ chal yelapnoj ta haꞌ huneꞌ niman konhobꞌ tuꞌ, yikta ay yip, yiktaxapaxo xin machi yip. 43 Hakaꞌ yu hawilni ta soman ye chꞌen hierro yebꞌ txꞌotxꞌ qꞌantxꞌotxꞌ, hak tuꞌ chu yaqꞌlen ishunbꞌan isbꞌa huneꞌ niman konhobꞌ tuꞌ yebꞌ hunteqꞌanxa konhobꞌ. Chiyiqꞌni ebꞌnaj winaj ebꞌix ix ay yul hunteqꞌan konhobꞌ tuꞌ yixaloj, yajaꞌ xin mach chu ishunbꞌan isbꞌa, hakaꞌ chꞌen hierro, mach chu ishunbꞌan isbꞌa yebꞌ txꞌotxꞌ qꞌantxꞌotxꞌ. 44 Haꞌ yulbꞌal hunteqꞌan tiempo bꞌay ayiko ebꞌnaj rey tuꞌ, chiyinikanh Komam Dios ay yul satkanh huneꞌ naj yahaw machi bꞌaqꞌinhal chitanhilo ismunil yinh yahawil; yebꞌ xin mach chꞌekꞌto ismunil tuꞌ tet hunuxa. Haꞌ huneꞌ naj yahaw tuꞌ, chistanhtzelo naj hunteqꞌan nimeta konhobꞌ tiꞌ. Wal naj xin aynhetikꞌa naj yinh sunilbꞌal ej tiempo. 45 Haꞌ ton chal yelapno chꞌen chꞌen hawil istit sat witz, chꞌen maxhtaj hunu anma pitnitij, chꞌen maqꞌnipoho chꞌen hierro, chꞌen bronce, txꞌotxꞌ qꞌantxꞌotxꞌ, chꞌen plata yebꞌ chꞌen oro. Mam rey, haꞌ Komam Dios, Komam kaw nimankano yelapnoj, yeni hawilaꞌ yinh tzet chiyu bꞌaqꞌinh, yuxin hawayik tuꞌ, kaw yeli, chiyijnipaxo isbꞌa tzet chal yelapnoj, xhi yaꞌ Daniel.

46 Hayet yabꞌen naj rey Nabucodonosor huneꞌ tuꞌ, yok naj yinoyo isbꞌa sata yaꞌ Daniel, yay jahno naj yay xulno naj sat txꞌotxꞌ. Ischejni naj yaltelax xahanbꞌal yebꞌ pom tet yaꞌ Daniel tuꞌ. 47 Yalni naj rey tet yaꞌ Daniel:

—Yinh kaw yeli, haꞌ heDiosal tiꞌ, hanhechꞌan Dios xol hunteqꞌan chihal-lax diosal, yebꞌ xin yahawil ye yinh ebꞌnaj rey. Haꞌ chiyenilo tzet ewanyehi, yuxin mayu hawu hawalnilo wetan huneꞌ tzet ewan ye tiꞌ, xhi naj.

48 Yuxin kaw niman yelapno elkaniko yaꞌ Daniel yu naj rey Nabucodonosor, yalaxiko ismay yaꞌ yu naj, yaqꞌlax nimeta sabꞌehal tet yaꞌ, yalaxiko yaꞌ gobernadoral yul ismajul txꞌotxꞌ Babilonia. Yalaxpaxiko yaꞌ yahawil yinh sunil ebꞌnaj winaj kaw ay ishelanil ay sat txꞌotxꞌ Babilonia. 49 Isqꞌanni yaꞌ Daniel tet naj rey, ta chiyako naj yaꞌ Sadrac, yaꞌ Mesac yebꞌ yaꞌ Abed-nego yahawilo yinh ismunil naj yul ismajul txꞌotxꞌ Babilonia. Wal yaꞌ Daniel xin aqꞌlax ismunil yaꞌ kaw niman yelapno yul ispalacio naj rey Nabucodonosor.