Ebꞌnaj oxwanh tzeh kol-lax xol qꞌa qꞌaꞌ yul horno
3
Naj rey Nabucodonosor, ischej naj watxꞌelaxo huneꞌ tioxh nabꞌa oro, bꞌey txꞌotxꞌ Dura, yul ismajul Babilonia. Haꞌ huneꞌ tioxh tuꞌ, 30 (lahonhebꞌ iskawinaj) metro istel yok oxebꞌ metro ispimal. 2 Ischejni naj ta chiskutxbꞌako isbꞌa ebꞌnaj yahawil yeko yinh ej konhobꞌ ay yul ismajul txꞌotxꞌ Babilonia; haꞌ ton ebꞌnaj yahawil soldado, ebꞌnaj tesorero, ebꞌnaj gobernador, ebꞌnaj juez, ebꞌnaj chitzꞌajbꞌan isnabꞌal naj rey yebꞌ sunil hunteqꞌanxa ebꞌnaj yahawil yeko yul ismajul txꞌotxꞌ Babilonia, yunhe isqꞌinhtzelax huneꞌ tioxh yaqꞌ watxꞌe naj rey Nabucodonosor tuꞌ. 3 Kutxiko sunil ebꞌnaj yahawil, yebꞌ ebꞌnaj tesorero, ebꞌnaj gobernador, ebꞌnaj juez, ebꞌnaj chitzꞌajbꞌan isnabꞌal naj rey yebꞌ sunil hunteqꞌan ebꞌnaj yahawil yeko yul ismajul txꞌotxꞌ Babilonia tuꞌ, yok linhno ebꞌnaj sata huneꞌ tioxh yaqꞌ watxꞌe naj rey Nabucodonosor. 4 Istzotel huneꞌ naj aqꞌbꞌil ismunil istzoteli, yalni naj yinh kaw ip hakaꞌ tiꞌ: «Abꞌewe sunil hex kextit bꞌey yulajla konhobꞌ, yebꞌ hex kextit bꞌey nimeta konhobꞌ, yebꞌ hex cheyal nananta abꞌxubꞌal. 5 Hayet cheyabꞌen yok ej bocina, teꞌ suꞌ, teꞌ tinabꞌ, teꞌ arpa, teꞌ salterio yebꞌ zampoña yebꞌ sunil majan son, kat heyay jahnoj, cheyinayo hebꞌa sata huneꞌ tioxh maswatxꞌe naj rey Nabucodonosor tiꞌ. 6 Maknhetikꞌa mach chiꞌay jahnoj, yebꞌ xin mach chiyiyo isbꞌa, yinh anhe chiꞌalaxikto xol qꞌaꞌ yul horno,» xhi naj. 7 Yuxin hayet yabꞌen sunil ej konhobꞌ kutxaniko tuꞌ yok bocina, teꞌ suꞌ, teꞌ tinabꞌ, teꞌ arpa, teꞌ salterio, zampoña yebꞌ sunil hunteqꞌan majan son tuꞌ, yay jahnoj, yok yinoyo isbꞌa sata huneꞌ tioxh nabꞌa oro, iswatxꞌe naj rey Nabucodonosor.
8 Haꞌ yinh hunteqꞌan tzꞌayik tuꞌ ay hunteqꞌan ebꞌnaj caldeo ok aqꞌokꞌule yinh ebꞌnaj judío ay bꞌey Babilonia. 9 Yalni ebꞌnaj tet naj rey Nabucodonosor:
—¡Mam rey, yahawnhehojabꞌ hach yinh sunilbꞌal ej tiempo! 10 Hach tiꞌ mam rey, hachej ta sunil mak chꞌay jahnoj, kat yinayo isbꞌa sata huneꞌ tioxh oro hachej watxꞌelaxoj tiꞌ, yet chiyabꞌen yok bocina, teꞌ suꞌ, teꞌ tinabꞌ, teꞌ arpa, teꞌ salterio, zampoña yebꞌ sunil majanil son. 11 Haꞌ xin mak mach chꞌay jahnoj yebꞌ xin mach chiyiyo isbꞌa, chiꞌalaxto yul horno kaj txaltxonhe qꞌaꞌ yinh, kachi. 12 Wal xin ay hunteqꞌan ebꞌnaj judío, haꞌ ton naj Sadrac, naj Mesac, yebꞌ naj Abed-nego, ebꞌnaj aqꞌbꞌil ismunil yinh yahawilal yul ismajul Babilonia tiꞌ, haꞌ ebꞌnaj tuꞌ kaw mach chixiw ebꞌnaj tawet, mach chiyiyo isbꞌa ebꞌnaj sata hunteqꞌan hadiosal yebꞌ xin mach chiꞌay jahno ebꞌnaj sata huneꞌ tioxh oro hawaqꞌ watxꞌeꞌ tiꞌ, xhi ebꞌnaj.
13 Hayet yabꞌen naj rey Nabucodonosor huneꞌ tuꞌ, kaw tit ishowal naj, ischejni naj ilaxoti yaꞌ Sadrac, yaꞌ Mesac, yebꞌ yaꞌ Abed-nego, kaw xin yinh anhe bꞌey ilaxoti ebꞌyaꞌ, yok ebꞌyaꞌ sata naj rey Nabucodonosor. 14 Isqꞌambꞌen naj:
—¿Tom yeli mach cheyiyo hebꞌa sata indiosalan, yebꞌ xin mach chexay jahno sata huneꞌ tioxh oro waqꞌ watxꞌehan? 15 Wal tinanh xin, ¿hinan hexmi heyay jahnoj, cheyinayo hebꞌa sata huneꞌ tioxh waqꞌ watxꞌe tuꞌan yet cheyabꞌen yok bocina, teꞌ suꞌ, teꞌ tinabꞌ, teꞌ arpa, teꞌ salterio, zampoña yebꞌ sunil isnuqꞌal son? Yuto ta mach chexay jahnoj, haꞌtikꞌa yinh huneꞌ hora tuꞌ chexalaxto xol qꞌaꞌ yul horno. ¿Mak diosal xin chexkolni yul inqꞌabꞌan? xhi naj.a
16 Istaqꞌwi yaꞌ Sadrac, yaꞌ Mesac yebꞌ yaꞌ Abed-nego tet naj rey Nabucodonosor:
—Mam rey, mach yilalo chikopajtzehanh tawet yinh huneꞌ tiꞌ. 17 Yuto haꞌ koDiosalanh bꞌay yijem chijute kobꞌahanh chu konhiskolnilojanh xol qꞌa qꞌaꞌ yul horno tuꞌ, chonhiskolnopaxilojanh yul haqꞌabꞌ. 18 Yajaꞌ ta mach chonhiskolanh xin, yilal hawohtanheniloj ta mach chijiyo kobꞌahanh tet hunteqꞌan hadiosal yebꞌ xin mach chonhay jahnojanh sata huneꞌ tioxh hawaqꞌ watxꞌeꞌ tiꞌ, xhi ebꞌyaꞌ.
19 Hayet yabꞌen naj rey Nabucodonosor tzet yal yaꞌ Sadrac, yaꞌ Mesac yebꞌ yaꞌ Abed-nego kaw tit ishowal naj, issajpaqꞌilo sat naj yu ishowal. Ischejni naj ta hujel el chiꞌalaxiko yip qꞌa qꞌaꞌ yul horno sata huntaꞌel. 20 Ischejni naj ebꞌnaj issoldado kaw ay yip iskꞌalnoyo yaꞌ Sadrac, yaꞌ Mesac yebꞌ yaꞌ Abed-nego, yunhe isqꞌojlaxto ebꞌyaꞌ xol qꞌaꞌ kaw kaj txaltxonhe yul horno. 21 Haꞌ ebꞌyaꞌ oxwanh tuꞌ, ayko xil isqꞌap ebꞌyaꞌ, yebꞌ isxanhabꞌ yebꞌ isqꞌuxil iswiꞌ, yebꞌ qꞌap qꞌap chishukbꞌako yibꞌanh xil isqꞌap yet iskꞌal-laxayoj, isqꞌojlaxikto ebꞌyaꞌ xol qꞌaꞌ yul horno. 22 Haꞌ ischejbꞌanil naj rey tuꞌ, kaw yinh anhe yijelaxi, yebꞌ xin kaw alaxiko yip qꞌaꞌ yul horno, yuxin haꞌ ebꞌnaj soldado qꞌojnikto ebꞌyaꞌ oxwanh tuꞌ yul horno, tzꞌato ebꞌnaj yu xaj qꞌaꞌ, iskam ebꞌnaj. 23 Haꞌ ebꞌyaꞌ oxwanh tzehtaj tiꞌ, kꞌalan ebꞌyaꞌ yet yaykꞌay xol qꞌaꞌ yul horno; haꞌ qꞌa qꞌaꞌ tuꞌ, kaw chiꞌah xaj qꞌaꞌ.
24 Wal naj rey Nabucodonosor, kaw xiwkanh naj, yah lemna naj yinh anhe, yalni naj tet ebꞌnaj yahawil ayko iskꞌatanh tuꞌ:
—¿Tom mach oxwanho ebꞌnaj tzehtaj maxekꞌalayoj maxeyanikto xol qꞌaꞌ tiꞌ? xhi naj.
Istaqꞌwi ebꞌnaj:
—Hakton tuꞌ mam rey, xhi ebꞌnaj.
25 Yalni naj rey tuꞌ:
—Yajaꞌ hanintiꞌan kanhwanh ebꞌnaj chiwilan, yebꞌ xin bꞌejtzobꞌil ebꞌnaj chꞌekꞌ ebꞌnaj xol qꞌaꞌ, matzet xin chu ebꞌnaj yu qꞌaꞌ. Haꞌ naj iskanh, lahan jilni naj hakaꞌ hunu dios, xhi naj.
26 Ishitziko naj rey Nabucodonosor istiꞌ horno bꞌay kaw chiꞌah xaj qꞌaꞌ tuꞌ, yalni naj:
—¡Hach Sadrac, Mesac yebꞌ hach Abed-nego hex ischejabꞌ Dios kaw niman yelapnoj, elanhwetij, kat hetit bꞌey tiꞌ! xhi naj.
Hak tuꞌ yu yelti ebꞌyaꞌ oxwanh tuꞌ xol qꞌaꞌ. 27 Lahwi tuꞌ yok bꞌulna ebꞌnaj yahawil, ebꞌnaj gobernador, ebꞌnaj yahawil soldado, ebꞌnaj chitzꞌajbꞌan isnabꞌal naj rey yilaꞌ ebꞌyaꞌ oxwanh tuꞌ, yuto mach tzꞌahto isnimanil ebꞌyaꞌ yu qꞌaꞌ, nitam xil iswiꞌ ebꞌyaꞌ, mach tzꞌapaxto xil isqꞌap ebꞌyaꞌ, nitam sam qꞌaꞌ ayko yinh xil isqꞌap ebꞌyaꞌ tzꞌanato yu qꞌaꞌ. 28 Yuxin yal naj rey Nabucodonosor hakaꞌ tiꞌ: «Hal-laxojabꞌ kꞌul-la tzotiꞌ yinh isDiosal naj Sadrac, naj Mesac yebꞌ naj Abed-nego, yuto ischej yángel iskoloꞌ ebꞌnaj ischejabꞌ tiꞌ, yuto yinh isDiosal ebꞌnaj tuꞌ kawxi iskꞌul. Mach isyije ebꞌnaj tzet walan, wal xin ishin isbꞌa ebꞌnaj iskami sata yinayo isbꞌa tet hunuxa dios mach isDiosaloj. 29 Yuxin chiwalan huneꞌ chejbꞌanile tiꞌ; makxanhetikꞌa anmahil chihalni hunu txꞌoj tzotiꞌ yinh isDiosal naj Sadrac, naj Mesac yebꞌ naj Abed-nego tiꞌ chipotxꞌlaxkamoj, kaw kokꞌ chiꞌayikoj, kat yuchkꞌalaxayo yatut, qꞌalemxanhe chikani, tzijxanhe konhobꞌal, tzijxanhe abꞌxubꞌal chala, yuto machi hunuxa dios chu konhiskolni hakaꞌ isDiosal ebꞌnaj tiꞌ,» xhi naj.
30 Hak tuꞌ xin kaw niman yelapno elkaniko yaꞌ Sadrac, yaꞌ Mesac, yebꞌ yaꞌ Abed-nego sunil yul ismajul txꞌotxꞌ Babilonia yu naj rey Nabucodonosor.