Etaxto yul iswiꞌ naj rey Nabucodonosor
4
Yalto naj rey Nabucodonosor bꞌey sunil yul ismajul txꞌotxꞌ Babilonia hakaꞌ tiꞌ: «Hanin rey Nabucodonosor intiꞌan, chiwaltojan: Ayojabꞌ aqꞌankꞌulal texol hex ay hex yulajla konhobꞌ yebꞌ nimeta konhobꞌ yebꞌ hex tzijxanhe abꞌxubꞌal cheyal sunil yul sat yibꞌanhqꞌinal tiꞌ.2 »Chiwochehan ta cheyohtanhelo kꞌaybꞌalkꞌule, yebꞌ yechel yip Dios xaꞌisyelo winhan, haꞌ ton huneꞌ Dios kaw niman yelapnoj. 3 ¡Kaw nimankano yelapno yechel yip Komam Dios yebꞌ xin kaw aykano yip kꞌaybꞌalkꞌule chiswatxꞌe! Yahawil yeko Komam yebꞌ xin aynhetikꞌa yip Komam yinh sunilbꞌal ej tiempo.
4 »Hanin Nabucodonosor intiꞌan kaw aqꞌankꞌulal wehan yul watutan yebꞌ xin kaw kinqꞌalombꞌikanokanhan yul inpalaciohan. 5 Yajaꞌ hayet huneꞌ aqꞌbꞌal yet lanhan inwayan, inwaykelan, kaw xin kinxiwan yu huneꞌ inwayik tuꞌan, issomchakanh innabꞌalan yu tzet wilan yinh inwayik tuꞌan. 6 Yuxin inchejan ilaxoti ebꞌnaj winaj kaw ay isnabꞌal yul ismajul Babilonia yunhe yalnilo ebꞌnaj tzet chalilo inwayik tuꞌan. 7 Yul ebꞌnaj mago, ebꞌnaj chiꞌilni tzet yelapno ye txꞌumel, ebꞌnaj ahbꞌelom yebꞌ ebꞌnaj caldeo, yajaꞌ mach yu yalnilo ebꞌnaj wetan tzet chal yelapno inwayik tuꞌan. 8 Tzujan tuꞌ yul yaꞌ Daniel, yaꞌ chiyijpaxo Beltsasar hakaꞌ isbꞌi indiosan, yaꞌ ayko Yespíritu Dios yinh, huneꞌ Dios kaw nimankano yelapnoj. Walnihan inwayik tuꞌan tet yaꞌ hakaꞌ tiꞌ:
9 »“Hach tiꞌ Beltsasar, iswiꞌehal xol ebꞌnaj kaw ay ishelanil, hanintiꞌan xawilan ta ayko yespíritu Dios tawinh, huneꞌ Dios kaw nimankano yelapnoj, yuxin machi hunu tzet ewan mach chitxumchalo hawu. Wal tinanh xin, halilo wetan tzet chalilo huneꞌ inwayik tuꞌan. 10 Haꞌ hunteqꞌan tiꞌ wilan yinh huneꞌ inwayik tuꞌan yet lanhan inwayan sat intxꞌatan:
Haꞌ yiktabꞌal txꞌo txꞌotxꞌ tiꞌ, wilan huneꞌ teꞌ niman qꞌebꞌtaj kaw nimajal istel.a
11 Wilan ischꞌibꞌkanh huneꞌ teꞌ qꞌebꞌtaj tiꞌ, kaw xin ay yip eliko teꞌ,
haxa ischon iswiꞌ teꞌ chitaahapno satkanh,
yuxin chisje yil-lax teꞌ yu anma sunil bꞌayejtuꞌwal yul sat yibꞌanhqꞌinal tiꞌ.
12 Kaw saqꞌalkano jilni xaj teꞌ, yebꞌ xin kaw tzetkꞌa sat teꞌ aykoj,
haꞌ xin teꞌ chiꞌanilo tzet chislo sunil anma.
Sunil no noqꞌ chiyenhelnhe isbꞌa yalanh teꞌ niman qꞌebꞌtaj tuꞌ,
haxa xolaj isqꞌabꞌ teꞌ xin chiswatxꞌe noꞌ chꞌik yatut,
haꞌ yu teꞌ yuxin ay iskawil sunil tzet itzitz, yuto haꞌ teꞌ chiꞌanilo tzet chislo.
13 »”Lahwi tuꞌ, wilnihan yinh inwayik tuꞌan istit huneꞌ naj ángel yul satkanh. 14 Yalni naj yinh kaw ip hakaꞌ tiꞌ:
‘Qꞌajweyo huneꞌ teꞌ niman qꞌebꞌtaj tiꞌ, kat hetzokꞌnikanh isqꞌabꞌ teꞌ,
cheyinilo xaj teꞌ, kat hetixhnikanto sunil sat teꞌ,
kat issajlemikanto sunil no noqꞌ ay yalanh teꞌ,
yebꞌ sunil noꞌ chꞌik ay yatut xolaj isqꞌabꞌ teꞌ.
15 Haxanhe isxeꞌ teꞌ chikankano bꞌey txꞌo txꞌotxꞌ tuꞌ,
chekꞌalnayo yu chꞌen cadena hierro yebꞌ chꞌen bronce, cheyanikano xolaj telaj.
Chichakꞌanbꞌi huneꞌ naj tuꞌ yu yal chew chitit satkanh, chisloni telaj yinta no noqꞌ.
16 Chihel-lax isnabꞌal huneꞌ winaj tuꞌ, kat yaqꞌlax isnabꞌal no noqꞌ tet,
hujebꞌ habꞌil chꞌay isyaꞌtajil tuꞌ yibꞌanh.
17 Haꞌ ebꞌnaj ángel chitanhen sat yibꞌanhqꞌinal tiꞌ halni ta chihul huneꞌ isyaꞌtajil tiꞌ yibꞌanh,
yunhe yohtanhenilo ebꞌnaj winaj tato haꞌ Komam Dios,
Komam kaw niman yelapnoj haꞌ Yahawil yinh ebꞌnaj yahaw konhobꞌ.
Haꞌ mak chal iskꞌul Komam, haꞌ chako Komam yahawilo ej konhobꞌ, yebꞌ xin,
haꞌ ebꞌnaj winaj chewchotanhe haꞌ chako Komam yahawilo konhobꞌ,’ xhi naj ángel.
18 »”Hak tuꞌ yu wilnihan yinh inwayikan, hanin Nabucodonosor intiꞌan. Wal tinanh, hach Beltsasar, halilo wetan tzet chal yelapno inwayik tuꞌan, yuto sunil ebꞌnaj winaj kaw ay ishelanil ay yul ismajul Babilonia tiꞌ, mach chu yu ebꞌnaj yalnilo tzet chaliloj; wal hach tiꞌ chu hawu, yuto ayko Yespíritu Komam Dios tawinh, huneꞌ Dios kaw nimankano yelapnoj,”» xhi naj Nabucodonosor tet yaꞌ Daniel.
19 Hayet yabꞌen yaꞌ Daniel, yaꞌ chiyijpaxo Beltsasar huneꞌ iswayik naj rey Nabucodonosor tuꞌ, iskꞌayilo iskꞌul yaꞌ, aymi xin hunu hora okkano yaꞌ yinh kꞌaykꞌulal, issomchapaxokanh isnabꞌal yaꞌ. Yalni naj rey Nabucodonosor tet yaꞌ:
—Hach Beltsasar, machojabꞌ chisomchakanh hanabꞌal yu inwayiktiꞌan, yebꞌ yu tzet chal yelapnoj, xhi naj.
Istaqꞌwi yaꞌ Beltsasar tet naj rey Nabucodonosor:
—Mam rey haꞌ huneꞌ hawayik tiꞌ, hantam saqꞌal tato yinh ebꞌnaj ayko ishowal tawinh bꞌay chitzoteli, haxa tzet chal yelapnoj yijabꞌ isbꞌa yinh ebꞌnaj chichiwako iskꞌul tawinh. 20 Haꞌ huneꞌ teꞌ qꞌebꞌtaj hawil ischꞌibꞌkanh yebꞌ kaw ay yip elkanikoj, chitaahapno ischon satkanh, yuxin chiꞌil-lax yu anma ay sunil bꞌayejtuꞌwal yul sat yibꞌanhqꞌinal tiꞌ, 21 yebꞌ xin kaw saqꞌalkano jilni xaj yebꞌ kaw nimankano sat aykoj. Chiyaqꞌni tzet chislo sunil tzet itzitz; bꞌay chiskotbꞌa isbꞌa no noqꞌ yalanh yenhel yebꞌ bꞌay chiswatxꞌe noꞌ chꞌik yatut, mam rey. 22 Hach bꞌay chitzotel huneꞌ tiꞌ, mam rey. Hach tiꞌ kach chꞌibꞌkanh, hawiqꞌnikanokanh hawip, habꞌinakano yu haqꞌalomal masanta ahapno habꞌina satkanh, hawokkano yahawil yibꞌanh sunil sat yibꞌanhqꞌinal tiꞌ.
23 Haxa naj ángel hawil istit yul satkanh, halni: “Qꞌajweyo teꞌ qꞌebꞌtaj tiꞌ, chetzokꞌnikanh isqꞌabꞌ, wal isxeꞌ cheyakano sat txꞌo txꞌotxꞌ, chekꞌalnayo yu cadena hierro yebꞌ bronce. Haꞌ huneꞌ winaj tuꞌ chikankano xolaj telaj, kat yay yal chew chitit yul satkanh yibꞌanh, kat yalaxiko xol no noqꞌ, yulbꞌal hujebꞌ habꞌil,” xhi naj ángel. 24 Hak tiꞌ chal yelapno tzet yal Komam Dios, Komam kaw nimankano yelapno tuꞌ, tawinh mam rey. 25 Hach tiꞌ, chachilaxilo xol anma, kat hawalaxto xol no noqꞌ, chaloni telaj yinta noꞌ wakax, kat hachakꞌanbꞌi yu yal chew chitit yul satkanh. Hujebꞌ habꞌil chiꞌay huneꞌ isyaꞌtajil tiꞌ tawibꞌanh masanta chitxumcha hawu ta hanhe Komam Dios, Komam kaw nimankano yelapno ay yip yibꞌanh sunil ebꞌnaj yahaw ej konhobꞌ, haꞌ xin Komam chꞌaqꞌni huneꞌ munil yinh yahawil tuꞌ tet mak bꞌay chiyoche iskꞌul yaqꞌaꞌ. 26 Haxa tzet hal-lax yinh teꞌ isxeꞌ alaxkano sat txꞌo txꞌotxꞌ tuꞌ, chaliloj ta mach chiꞌilaxilo hamunil tiꞌ tawet, wal xin chachmeltzo yinh hamunil tiꞌ hunelxa yet xatxumchalo hawu ta hanhe Komam Dios ay yul satkanh yahawil yinh sunil sat yibꞌanhqꞌinal tiꞌ. 27 Yuxin wal tinanh mam rey abꞌe huneꞌ kachbꞌanil chiwalan tawet tiꞌ: Bꞌej hawaniko hamul, chawatxꞌen istoholal, matxa chawatxꞌe istxꞌojal, tzꞌayojabꞌ hakꞌul yinh anma mebꞌaꞌ kat hakolwa yinh, kꞌuxantaxka chito hitzto yoj istzꞌayikal bꞌay chawil aqꞌankꞌulal, xhi yaꞌ Daniel.
28 Sunil hunteqꞌan tzotiꞌ hal-lax tet naj rey Nabucodonosor tuꞌ, yij isbꞌa. 29 Haxa yet istzꞌajna huneꞌ habꞌil, yet lanhan yekꞌ naj rey Nabucodonosor yul ispalacio bꞌey konhobꞌ Babilonia, 30 yalni naj rey hakaꞌ tiꞌ: «Ilkꞌanabꞌ niman konhobꞌ Babilonia tiꞌ, haninan yebꞌ wipan inwatxꞌekanhan yunhe isyenilo isbꞌa tato ay welapnojan, kat yokkano niman konhobꞌal yinh ej txꞌotxꞌ ayko yalanh wipan,» xhi naj rey.
31 Lanhantotikꞌa yalni naj hakaꞌ tuꞌ, yabꞌen naj huneꞌ yul nuqꞌe tit yul satkanh, yalni hakaꞌ tiꞌ: «Hach rey Nabucodonosor, chikam hawabꞌe hunteqꞌan tzotiꞌ tiꞌ: Haꞌ huneꞌ hamunil yinh reyal tiꞌ, chiꞌilaxilo tawet. 32 Chachilaxilo xol anma, kat hawalaxto xol no noqꞌ, chaloni telaj yinta noꞌ wakax. Hujebꞌ habꞌil chiꞌay huneꞌ isyaꞌtajil tiꞌ tawibꞌanh, masanto chawohtanheloj ta haꞌ Komam Dios kaw nimankano yelapnoj, haꞌ ay yip yibꞌanh ebꞌnaj yahaw konhobꞌ, yebꞌ xin haꞌ Komam chꞌaqꞌni huneꞌ munil tuꞌ tet mak bꞌay choche iskꞌul yaqꞌaꞌ,» xhihayti yul satkanh tuꞌ.
33 Yinhtikꞌa huneꞌ hora tuꞌ, yij isbꞌa tzet hal-lax yinh naj rey Nabucodonosor, yilaxilo naj xol ebꞌnaj winaj, chisloni naj telaj xol noꞌ wakax; chichakꞌanbꞌi isnimanil naj yu yal chew chitit yul satkanh, ischꞌibꞌ xil iswiꞌ naj hakaꞌ xil noꞌ tꞌiw, ischꞌibꞌ yisqꞌaj naj hakaꞌ yisqꞌaj noꞌ chꞌik.
34 «Yalni naj rey Nabucodonosor: “Lahwi istzꞌajna istiempohal yay isyaꞌtajil wibꞌanhan, hanin Nabucodonosor intiꞌan, intꞌanhxikanhan satkanh, iswatxꞌilo innabꞌalan. Walnihan kꞌul-la tzotiꞌ yinh Komam kaw nimankano yelapnoj, wanikojan ismay Komam Dios, Komam itzitz yinh sunilbꞌal ej tiempo.
Haꞌ Komam Dios haꞌ yahawil yinh tohbꞌalqꞌinal,
kaw ay yip Komam yinh sunilbꞌal ej tiempo.
35 Sunil anma ay sat yibꞌanhqꞌinal tiꞌ mach chu islahbꞌanhen isbꞌa hakaꞌ Komam.
Haꞌ tzet choche iskꞌul Komam, haꞌ chiswatxꞌe yul satkanh yebꞌ xol anma ay sat yibꞌanhqꞌinal tiꞌ.
Machi hunu mak chu iskachwa yinh Komam chalni:
‘¿Tzet yinh xin hak tuꞌ chawute?’ mach xhihoj.”
36 »Hayet tuꞌ xin iswatxꞌilo innabꞌalan, wokpaxojan reyalil hunelxa, yok inmayan, wiqꞌnipaxkanokanh wipan hunelxa. Yul ebꞌnaj gobernador yebꞌ ebꞌnaj nime winaj chimunla yul palacio kinissaynojan, wokpaxojan yinh reyalil hunelxa, kaw ekꞌbꞌalto xin qꞌalomal aqꞌlax wetan sata yet yalanhtokanoj.
37 »Wal tinanh xin, hanin Nabucodonosor intiꞌan chiwalan kꞌul-la tzotiꞌ yinh Komam Dios, chiwanikojan ismay Komam yahaw satkanh, yuto sunil tzet chiswatxꞌe kaw yelkanoj, yebꞌ xin kaw tohol isbꞌeybꞌal. Haꞌ Komam chiꞌinayo mak kaw chiyikanh isbꞌa,» xhi naj rey Nabucodonosor.