5 Yinhtikꞌa huneꞌ hora tuꞌ, isyeni isbꞌa huneꞌ qꞌabꞌe chitzꞌibꞌliko yinh iskꞌul bꞌitzꞌabꞌ hunteqꞌan tzꞌibꞌ sata cantil, yilni naj rey Belsasar hunteqꞌan tzꞌibꞌ tuꞌ. 6 Hayet yilni naj huneꞌ tuꞌ, issajpaqꞌilo sat naj yu xiwkilal, issomchakanh isnabꞌal naj, ispaxilo yip naj, xanhe chischale isbꞌa iswitxꞌiꞌ naj isluylun yu xiwkilal. 7 Yah yaw naj rey Belsasar yinh kaw ip, ischejni naj yawtelaxo ebꞌnaj mago, ebꞌnaj caldeo yebꞌ ebꞌnaj ahbꞌelom, yalni naj tet ebꞌnaj winaj kaw ay ishelanil ay sat txꞌotxꞌ Babilonia: «Makxanhetikꞌa chitxumnilo hunteqꞌan tzꞌibꞌ tiꞌ, chihalnilo wetan tzet chaliloj, chꞌalaxiko xilqꞌape kajmutzꞌmunhe yinh, kat yalaxiko huneꞌ uwe oro yinh isnuqꞌ, kat yok yinh isyox yahawilal yul ismajul Babilonia tiꞌ,» xhi naj rey.

8 Hak tuꞌ yu yilaxti sunil ebꞌnaj winaj kaw ay ishelanil sata naj rey Belsasar, yajaꞌ machi yu istxumnilo ebꞌnaj tzet chalilo hunteqꞌan tzꞌibꞌ tuꞌ, yebꞌ xin mach yu yalnilo ebꞌnaj tet naj rey tuꞌ tzet chaliloj. 9 Yuxin kaw okkano niman kꞌaykꞌulal yinh naj rey Belsasar, issajpaqꞌilo sat naj yu xiwkilal, hakpax tuꞌ ebꞌnaj nime winaj yahaw ayko iskꞌatanh naj, okkano ebꞌnaj yinh sukal.

10 Hayet yabꞌen ix reina, ismiꞌ naj rey Belsasar yel yaw naj rey tuꞌ yebꞌ yel yaw ebꞌnaj nime winaj, yokto ix yul cuarto bꞌay kutxaniko ebꞌnaj yinh qꞌinh tuꞌ, yalni ix:

—¡Mam rey, yahawojabꞌ hachnhetikꞌa yinh sunilbꞌal ej tiempo! Machojabꞌ chisomchakanh hanabꞌal yebꞌ xin machojabꞌ chisajpaqꞌilo hasat yu xiwkilal. 11 Haꞌ yul ismajul txꞌotxꞌ Babilonia bꞌay ayachiko reyalil tiꞌ, ay huneꞌ naj winaj ayko ishelanil Dios yinh, huneꞌ Dios kaw nimankano yelapnoj. Haꞌ yinh istiempohal yet ayko yaꞌ rey Nabucodonosor, hamam reyalil, ay huneꞌ naj winaj tiꞌ kaw itzꞌat iswiꞌ yebꞌ kaw ay ishelanil yebꞌ isnabꞌal hakaꞌ ishelanil hunteqꞌan dios; yuxin haꞌ naj yako yaꞌ rey Nabucodonosor tuꞌ iswiꞌehalo yinh sunil ebꞌnaj mago, ebꞌnaj chiꞌilni tzet yelapno ye txꞌumel, ebꞌnaj caldeo yebꞌ ebꞌnaj ahbꞌelom. 12 Haꞌ huneꞌ naj winaj tuꞌ, Daniel isbꞌi naj, yajaꞌ Beltsasar yako yaꞌ rey Nabucodonosor isbꞌiho naj. Haꞌ naj Daniel tuꞌ kaw ilchakanilo helanile yitzꞌatil wiꞌe yebꞌ nabꞌale yinh naj, yuxin chisje istxumchalo wayike yu naj, chisnanilo naj tzettaj ye tuꞌ kaw yaꞌtaj yelapnoj. Chalnipaxilo naj yinh kaw istꞌinhanil yinh tzet bꞌay chikabꞌkon kokꞌul, yuxin wal tinanh awte naj Daniel tuꞌ, chiyalnolo naj tawet tzet chal yelapno huneꞌ tiꞌ, xhi ix.

13 Hak tuꞌ yu isbꞌey yilaxoti yaꞌ Daniel sata naj rey Belsasar. Isqꞌambꞌen naj tet yaꞌ Daniel:

—¿Hachmi tiꞌ chawij Daniel, ah Judá ilaxti preso yu yaꞌ Nabucodonosor, inmaman? 14 Hanintiꞌan mawabꞌehan ta ayko ishelanil Dios tawinh, huneꞌ Dios kaw niman yelapnoj, yuxin kaw ay yitzꞌatil hawiꞌ, kaw aykano hanabꞌal yebꞌ xin kaw ekꞌnaxakano hahelanil. 15 Manchejan ilaxoti ebꞌnaj winaj kaw ay ishelanil yinh insatan, yebꞌ ebꞌnaj chikuyni yinh tzet yelapno ye txꞌumel yunhe istxumnilo ebꞌnaj hunteqꞌan tzꞌibꞌ tiꞌ, yu yalnilo ebꞌnaj tzet chaliloj, yajaꞌ machi yu, yu ebꞌnaj. 16 Hanintiꞌan xawabꞌehan ta chisje hawu hatxumnilo wayike yebꞌ tzettaj kaw yaꞌta yelapnoj. Wal tinanh ta chitxumchalo hunteqꞌan tzꞌibꞌ tiꞌ hawu, chawalnilo tzet chalilo wetan, chinchejan alaxoko xilqꞌape qꞌap kajmutzꞌmunhe tawinh, kat yalaxiko uwe oro yinh hanuqꞌ, kat hawok isyox yahawil yul ismajul Babilonia tiꞌ, xhi naj rey.

17 Istaqꞌwi yaꞌ Daniel tet naj:

—Kanojabꞌ hunteqꞌan sabꞌehal tuꞌ tawet, mam rey, yebꞌ xin chisje hawaqꞌni huneꞌ munil tuꞌ tet hunuxa maka. Kꞌultikꞌa, mam rey, chiwilan hunteqꞌan tzꞌibꞌ tiꞌ, chiwalnilojan tawet tzet chaliloj.

18 »Mam rey, haꞌ Komam Dios, Komam kaw nimankano yelapnoj, haꞌ aqꞌni ismunil yaꞌ Nabucodonosor, hamam yinh reyalil, yebꞌ xin nimeta qꞌalomal, yebꞌ ismay, yebꞌ yip, yuxin kaw niman yelapno elkanikoj. 19 Yuxin haꞌ yu yip kaw nanxa islow yaqꞌ Komam Dios, yuxin sunil konhobꞌlaj, yebꞌ txꞌotxꞌ nimeta konhobꞌ yebꞌ anma nananta yabꞌxubꞌal, chiluylun yu xiwkilal yinh sat yaꞌ Nabucodonosor tuꞌ. Haꞌ mak chal iskꞌul, chispotxꞌkamoj, haꞌ mak chal iskꞌul chiskoliloj, haꞌ mak chal iskꞌul chiyaniko iswinajil, haꞌ mak chal iskꞌul ta chꞌel ispixan, chꞌel ispixan yu. 20 Yajaꞌ hayet yinikanh isbꞌa, iskawbꞌilo yanma yu isloloꞌal, yilaxilo yinh reyal yu Komam Dios, istanhilo isqꞌaqꞌal ismay. 21 Ilaxilo xol anma, lahanxa eliko isnabꞌal hakaꞌ isnabꞌal no noqꞌ, yekꞌ xol noꞌ xoltelajil burro, yaqꞌlax telaj islobꞌ hakaꞌ noꞌ wakax, ischakꞌanbꞌipaxo isnimanil yu yal chew chitit satkanh, masanta txumchalo yu ta hanhe Komam Dios, Komam kaw nimankano yelapnoj, haꞌ aykanh yip yibꞌanh ebꞌnaj yahawil ej konhobꞌ, yebꞌ xin haꞌ mak chal iskꞌul Komam, haꞌ chꞌok yahawo konhobꞌ. 22 Haxapaxo hach tiꞌ mam rey Belsasar yuninal yaꞌ rey Nabucodonosor tuꞌ hawehi, kaw hawohta sunil hunteqꞌan tiꞌ, yajaꞌ mach chawiyo habꞌa tet Komam. 23 Wal xin kaw hawikanh habꞌa sata Komam Dios, Komam yahaw satkanh, hachejni ilaxoti hunteqꞌan vaso yet Yatut Komam Dios yehi, hawukꞌni vino yul hunteqꞌan vaso tuꞌ yebꞌ ebꞌnaj nime winaj, yebꞌ ebꞌix hawixal, yebꞌ ebꞌix iskabꞌ ixale. Yebꞌpaxo hunxa, kach ok hawiqꞌayo habꞌa sata hunteqꞌan tioxh watxꞌebꞌilayo yinh chꞌen plata, chꞌen oro, chꞌen bronce, chꞌen hierro, chꞌen chꞌen, yebꞌ te teꞌ, hatioxh yekoj. Hunteqꞌan tioxh tuꞌ mach chu ismujli, mach chabꞌe, matzet yohtaj; yajaꞌ wal tet Komam Dios, Komam yul isqꞌabꞌ ay hakawil, Komam yohta tzet chabꞌeybꞌalnhe, maxhtikꞌa chawiyo habꞌa, mach hawapaxiko ismay.

24 »Yuxin haꞌ Komam Dios chejni huneꞌ qꞌabꞌe tiꞌ, istzꞌibꞌnhen hunteqꞌan tzꞌibꞌ tiꞌ. 25 Chalni: Mene, Mene, Tekel, Uparsin. 26 Haꞌ hunteqꞌan tzꞌibꞌ tiꞌ, hak tiꞌ chal yelapnoj: Mene: Masbꞌis Komam Dios hayebꞌxa tzꞌayik hawok reyal, mayalnikano ta chilinhikano hamunil tiꞌ. 27 Tekel: Makaxhismale Komam Dios yul malbꞌal, mach xin tzꞌajano makaxhelikoj. 28 Peres: Haꞌ hamajul tiꞌ chipohlaxayoj, kat yalaxiko yul isqꞌabꞌ ebꞌnaj medo yebꞌ ebꞌnaj persa, xhi yaꞌ Daniel.

29 Lahwi tuꞌ xin, ischejni naj rey Belsasar yalaxiko xilqꞌape qꞌap kajmutzꞌmunhe yinh yaꞌ Daniel. Yalaxiko huneꞌ uwe oro yinh isnuqꞌ yaꞌ, yalaxiko yaꞌ Daniel tuꞌ yinh isyox yahawil yul ismajul txꞌotxꞌ Babilonia.

30 Wal naj Belsasar isreyal ebꞌnaj caldeo yinhtikꞌa huneꞌ aqꞌbꞌal tuꞌ kam naj.^b 31 Haxa naj Darío isreyal txꞌotxꞌ Persia okkano yahawilo selelo naj Belsasar tuꞌ. Hayet tuꞌ 62 (kabꞌebꞌ iskanhwinaj) ishabꞌilal naj.