Alaxayto yaꞌ Daniel yul huneꞌ holan xol noꞌ bꞌalam
6
Naj rey Darío, yako naj ciento veinte ebꞌnaj gobernador yahawilo ej konhobꞌ ay yul sunil ismajul txꞌotxꞌ Babilonia. 2 Yanipaxiko naj oxwanh ebꞌnaj winaj, iswiꞌehalo yinh ebꞌnaj ciento veinte gobernador tuꞌ, haꞌ xin yaꞌ Daniel xol ebꞌnaj oxwanh tuꞌ, yunhe yilni ebꞌnaj ta tzꞌajan chiyaqꞌ anma istohlabꞌal, yunhe mach chikꞌaywa naj rey Darío. 3 Yajaꞌ wal yaꞌ Daniel, kaw ekꞌbꞌal yelapno yaꞌ yibꞌanh ebꞌnaj iswiꞌehal yebꞌ yibꞌanh ebꞌnaj gobernador tuꞌ yuto kaw ekꞌbꞌal ishelanil yaꞌ, yuxin ok yinh isnabꞌal naj rey Darío tuꞌ yaniko yaꞌ Daniel sat yahawil yinh ebꞌnaj gobernador yul ismajul txꞌotxꞌ Babilonia. 4 Yuxin haꞌ ebꞌnaj gobernador yebꞌ ebꞌnaj iswiꞌehal tuꞌ ok ebꞌnaj issayaꞌ yinh tzet chu yok ebꞌnaj aqꞌokꞌule yinh yaꞌ Daniel, yinh hunu bꞌaytet txꞌoj chiswatxꞌe yinh ismunil. Yajaꞌ machi hunu bꞌaytet yinh chu yok ebꞌnaj aqꞌokꞌule yinh yaꞌ Daniel, yuto machi hunu ismul yaꞌ chiꞌilchalo yu ebꞌnaj; yuto kaw yijem yaꞌ yebꞌ xin machi hunu istxꞌojal chisqꞌaytze yaꞌ yinh, yebꞌ xin machi hunu mule chiꞌilchalo yinh yaꞌ. 5 Yuxin yal ebꞌnaj: «Machi hunu tzet chu jaqꞌni ismulo naj Daniel tiꞌ, yunhe jok aqꞌokꞌule yinh naj, kachannhe yinh isyijemal naj yinh isley isDiosal chu jok aqꞌokꞌule,» xhi ebꞌnaj.6 Yuxin iskutxbꞌako isbꞌa ebꞌnaj gobernador yebꞌ ebꞌnaj iswiꞌehal tuꞌ sata naj rey Darío, yalni ebꞌnaj tet naj:
—¡Mam rey Darío, ayojabꞌ hachnhetikꞌako yinh yahawil tiꞌ yinh sunilbꞌal ej tiempo! 7 Sunil hanhonh gobernador honhtiꞌanh yebꞌ ebꞌnaj yahawil ej konhobꞌ yebꞌ ebꞌnaj iswiꞌehal yehi, yebꞌ ebꞌnaj yahawil soldado, xakolahtiꞌnhe kobꞌahanh ta chawatxꞌe hunu ley, kat yal-laxilto xol sunil anma ay yul ismajul Babilonia tiꞌ. Machojabꞌ hunu mak chitxahli tet isdios, maka isqꞌanni hunu tzet choche tet hunu yet anmahil yinh huneꞌ ixahaw; wal xin, tawetnhe chu isqꞌanni, mam rey. Haꞌ mak mach chiyijen huneꞌ chejbꞌanile tiꞌ xin, chiꞌalaxayto yul holan xol noꞌ bꞌalam. 8 Yuxin wal tinanh mam rey, aqꞌ firma yinh huneꞌ ley tiꞌ, yunhe machi mak chihelni yebꞌ yunhe mach chiꞌekꞌto yet yijni isbꞌa hakaꞌ yalni koley hanhonh Media yebꞌ Persia honh tiꞌ, xhi ebꞌnaj.
9 Hak tuꞌ yu yaqꞌni firma naj rey Darío yinh huneꞌ ley tuꞌ.
10 Hayet yabꞌen yaꞌ Daniel ta yaqꞌ firma naj rey Darío yinh huneꞌ ley tuꞌ, yokto yaꞌ yul yatut yul huneꞌ iscuarto hajan isventanahil, hakanto yinh yetkꞌulal Jerusalén, yay jahno yaꞌ, istxahli yaꞌ tet Komam Dios, yebꞌ yaqꞌni yaꞌ yuchꞌandiosal tet isDiosal. Oxel xin txahli yaꞌ yinh huneꞌ tzꞌayik tuꞌ, hakaꞌtikꞌa chiyute yaꞌ yet yalanhtokanoj.a 11 Iskutxbꞌaniko isbꞌa hunteqꞌan ebꞌnaj winaj tuꞌ, isto ebꞌnaj yatut yaꞌ Daniel, yilcha yaꞌ yu ebꞌnaj yet lanhan istxahli tet Komam Dios. 12 Lahwi tuꞌ, isto ebꞌnaj sata naj rey, istzotel ebꞌnaj yinh huneꞌ ley yalilto naj rey tuꞌ, yalni ebꞌnaj hakaꞌ tiꞌ:
—Mam rey, ¿chimhanatij ta hawaqꞌ firma yinh huneꞌ ley chalni ta yulbꞌal huneꞌ ixahaw machi hunu mak tiꞌ chisqꞌan hunu tzet ye tuꞌ tet isdios, maka tet hunu winaj ta maxhtaj tawet chisqꞌana. Hawalnipaxoj ta haꞌ mak mach chiyijen huneꞌ ley tuꞌ chiꞌalaxayto yul holan xol noꞌ bꞌalam? xhi ebꞌnaj.
Istaqꞌwi naj rey:
—Yel cheyala, haꞌ huneꞌ ley tuꞌ yilal isyijelaxi hakaꞌ koley hanhonh Media yebꞌ Persia honh tiꞌ, machi ekꞌto yet yijni isbꞌa, xhi naj.
13 Yalni ebꞌnaj tet naj rey:
—Haꞌ naj Daniel, iskꞌahol huneꞌ naj ah Judá, ebꞌnaj ilaxti preso Babilonia tiꞌ, mach chixiw naj tawet mam rey, mach chisyije naj huneꞌ ley hawaliltoj, yuto oxel chitxahli naj tet isDiosal hunun tzꞌayik, xhi ebꞌnaj.
14 Hayet yabꞌen naj rey huneꞌ tuꞌ, kaw bꞌiskꞌulal eliko iskꞌul naj, issayni naj yinh tzet chu iskolni naj yaꞌ Daniel, kaw sunilbꞌal tzꞌayik masanta qꞌejbꞌayo munla naj yunhe iskolni naj yaꞌ Daniel. 15 Yajaꞌ wal hunteqꞌan ebꞌnaj winaj tuꞌ, ok hoyno ebꞌnaj yinh naj rey Darío, yalni ebꞌnaj tet naj:
—Mam rey, hach tiꞌ kaw hawohta koley hanhonh Media yebꞌ Persia honh tiꞌ, machi hunu ley maka hunu chejbꞌanile tiꞌ bꞌay chaqꞌ firma naj rey machi yij isbꞌa, xhi ebꞌnaj.
16 Hak tuꞌ yu ischejni naj rey ilaxoti yaꞌ Daniel, yunhe yalaxayto yaꞌ yul holan xol noꞌ bꞌalam. Yalni naj rey Darío tet yaꞌ Daniel tuꞌ:
—Haꞌojabꞌ haDiosal bꞌay chilan hawaqꞌni chejaꞌ habꞌa, haꞌojabꞌ chachkolni, xhi naj.
17 Hayet xaꞌalaxayto yaꞌ Daniel xol noꞌ bꞌalam tuꞌ, yilaxti huneꞌ chꞌen niman chꞌen, yalaxkaniko chꞌen ismajiloj. Yaniko naj rey Darío yebꞌ ebꞌnaj nimeta yahawil issellohal isjolqꞌabꞌ yibꞌanh chꞌen yunhe yijnikano isbꞌa huneꞌ ley tuꞌ yinh yaꞌ Daniel. 18 Lahwi tuꞌ isto naj rey Darío bꞌey ispalacio, matxa xin waꞌ naj yet yok naj wayoj, yebꞌ xin matxa ischej naj ilaxoti ebꞌnaj chisonli yunhe istzala iskꞌul naj; mach titpaxo iswayanh naj huneꞌ aqꞌbꞌal tuꞌ.
19 Haxa yet issajbꞌiloj kaw sahabꞌ ah naj rey tuꞌ, isto naj yinh anhe bꞌay alaxayto yaꞌ Daniel xol noꞌ bꞌalam. 20 Ishitziko naj istiꞌ holan bꞌay ayayto yaꞌ Daniel tuꞌ, yawten naj yaꞌ Daniel. Kaw xin bꞌiskꞌulal yu yahwi naj, yalni naj hakaꞌ tiꞌ:
—Daniel, hach ischejabꞌ Dios itzitz, ¿mam yu kach iskolni haDiosal tet noꞌ bꞌalam, haDiosal bꞌay kaw chilan hawaqꞌni chejaꞌ habꞌa? xhi naj.
21 Istaqꞌwi yaꞌ Daniel tet naj:
—¡Mam rey, yahawil hachojabꞌnhetikꞌa yinh sunilbꞌal ej tiempo! 22 Haꞌ inDiosalan chejniti yángel, haꞌ mamajchen istiꞌ noꞌ bꞌalam tiꞌ, yuxin matzet makinyutehan noꞌ, yuto machi inmulan sata Komam Dios, machipaxo hunu istxꞌojal tiꞌ inwatxꞌehan yinh hasat mam rey, xhi yaꞌ Daniel.
23 Hayet yabꞌen naj rey ta itzitz yaꞌ Daniel kaw tzalakanokanh naj sikꞌlebꞌil, ischejni naj yilaxahti yaꞌ Daniel yul holan xol noꞌ bꞌalam. Hak tuꞌ yu yilaxahti yaꞌ xol noꞌ bꞌalam. Machi xin nichꞌano lahwilal ilchalo yinh yaꞌ, yuto kawxi iskꞌul yaꞌ yinh isDiosal. 24 Ischejni naj rey Darío ilaxoti ebꞌnaj ok aqꞌokꞌule yinh yaꞌ Daniel, isqꞌojlaxayto ebꞌnaj yebꞌ yuninal yebꞌ yixal yul holan xol noꞌ bꞌalam; maxhtotikꞌa chiꞌayapno ebꞌnaj yich holan bꞌay ay noꞌ bꞌalam tuꞌ, yah lemna noꞌ iskꞌuxnokamo ebꞌnaj, iskachꞌni poho noꞌ sunil isbꞌajil isnimanil ebꞌnaj.
25 Lahwi tuꞌ, ischejni naj rey Darío ta chitzibꞌnhelaxto tet sunil ej konhobꞌ yebꞌ tet ej txꞌotxꞌ nimeta konhobꞌ, yebꞌ tet sunil anma nananta abꞌxubꞌal chal sat sunil yibꞌanhqꞌinal tiꞌ, yalnito naj:
«Ayojabꞌ aqꞌankꞌulal texol. 26 Chiwaltojan teyet hesunil ay hex yul inmajultiꞌan, kaw nimanojabꞌ yelapno isDiosal yaꞌ Daniel yul hesat, kat heluylun xiwkilal sata isDiosal yaꞌ.
Yuto haꞌ isDiosal yaꞌ Daniel tiꞌ, Dios itzitz,
yebꞌ xin Dios yinh sunilbꞌal ej tiempo, haꞌ ismunil yinh yahawilal,
machi bꞌaqꞌinhal chitanhiloj, haꞌ yip aynhetikꞌa yinh sunilbꞌal ej tiempo.
27 Haꞌ Komam Dios chꞌaqꞌni kolbꞌanile yebꞌ xin chikolwahi.
Chiswatxꞌe kꞌaybꞌalkꞌule, chisyeni yechel yip yul satkanh yebꞌ sat txꞌo txꞌotxꞌ tiꞌ.
Haꞌ Komam Dios kolni yaꞌ Daniel yul istiꞌ noꞌ bꞌalam,» xhito naj rey.
28 Wal yaꞌ Daniel, kaw niman yelapno elkaniko yaꞌ yulbꞌal istiempohal naj rey Darío yebꞌ yulbꞌal istiempohal naj rey Ciro, ah Persia.