2. ISKABꞌ MAJAN KUYBꞌANILE: WAYIKE YINH TZET CHITOHULI
(7:1–12:13)
Yil yaꞌ Daniel kanhkꞌonh no noqꞌ yinh iswayik
7
Hayet bꞌabꞌel habꞌil yok naj Belsasar isreyalo Babilonia, ay tzet yil yaꞌ Daniel yinh iswayik yet lanhan isway yaꞌ yinh huneꞌ aqꞌbꞌal. Lahwi tuꞌ istzꞌibꞌnhen yaꞌ bꞌaytet niman yelapno yil yaꞌ yinh iswayik tuꞌ.2 Yalni yaꞌ Daniel tuꞌ: «Hanintiꞌan wilan yinh inwayikan yet aqꞌbꞌalil istit jaqꞌeqꞌ yinh iskanhebꞌal istxikin satkanh, yaqꞌni howal jaqꞌeqꞌ tuꞌ yibꞌanh haꞌ niman mar. 3 Wilnihan yahilo kanhkꞌonh noꞌ nime noqꞌ xol haꞌ mar tuꞌ; nanantanhe xin jilni hunun noꞌ.a
4 »Haꞌ noꞌ bꞌabꞌel, lahan jilni noꞌ hakaꞌ noꞌ bꞌalam, ay xin isxikꞌ noꞌ hakaꞌ noꞌ tꞌiw. Hayet tꞌanhan inikojan yinh noꞌ, wilnihan ishokꞌlaxkanh isxikꞌ noꞌ, yilaxkanh noꞌ sat txꞌotxꞌ, yah linhno noꞌ hakaꞌ anma, yalaxikto yanma noꞌ hakaꞌ yanma anma.
5 »Haxa noꞌ iskabꞌ, lahan jilni noꞌ hakaꞌ noꞌ oso; yajaꞌ haꞌ qꞌaxep isnimanil, ekꞌna nimajal aykanh sata qꞌaxepxa. Nhakꞌbꞌil oxebꞌ motxe yu noꞌ. Yal-lax tet noꞌ hakaꞌ tiꞌ: “Asiꞌ, kꞌux hachibꞌe, hatatikꞌa hanta chawoche chakꞌuxuꞌ,” xhi tet noꞌ.
6 »Lahwi tuꞌ, wilnihan huneꞌxa noꞌ, lahan jilni hakaꞌ noꞌ tzꞌibꞌinh bꞌalam; ay kanhebꞌ xikꞌ yinh yichinh, hakaꞌ isxikꞌ noꞌ chꞌik, yebꞌpaxo xin ay kanhebꞌ iswiꞌ noꞌ. Yaqꞌlaxkano yip noꞌ yul isqꞌabꞌ.
7 »Lahwi tuꞌ, wilnihan yinh inwayik tuꞌan yet aqꞌbꞌalil, huneꞌxa noꞌ iskanh. Haꞌ huneꞌ no noqꞌ tuꞌ, kaw chonhxiw jilni noꞌ yebꞌ xin kaw ay ismay jilni noꞌ. Kaw xin aykano yip noꞌ sikꞌlebꞌil, haꞌ yeh noꞌ kaw nimej, yebꞌ hierro yeh noꞌ. Sunil tzet chiskꞌuxayto noꞌ, chisxitnito noꞌ, chisxanhobꞌtanhen noꞌ tzet matxa chilahwi yu. Haꞌ huneꞌ noꞌ iskanh tuꞌ kaw nantikꞌa jilni noꞌ sata sunil noꞌ wilan yet bꞌabꞌelal. Haꞌ noꞌ tuꞌ 10 (lahonhebꞌ) yukꞌaꞌ noꞌ.
8 »Hayet tꞌanhan inikojan yinh hunteqꞌan yukꞌaꞌ noꞌ tuꞌ, wilnihan yelilo huneꞌxa yukꞌaꞌ noꞌ nichꞌanchꞌan xol 10 (lahonhebꞌ) yukꞌaꞌ tuꞌ, wilnihan yilaxilo oxebꞌ yukꞌaꞌ noꞌ, iskankano huneꞌ nichꞌan tuꞌ, seleloj. Haꞌ huneꞌ yukꞌaꞌ nichꞌanchꞌan ahilo tuꞌ, ay isbꞌaqꞌ sat hakaꞌ anma, yebꞌ xin ay istiꞌ, chalni nimeta tzotiꞌ nanxa islowi.
9 Tꞌanhan intojan wilnihan masanta alaxayo hunteqꞌan tzꞌonhobꞌal,
yay tzꞌonhno Icham Winaj aynhetikꞌa yinh sunilal ej tiempo yul istzꞌonhobꞌal.
Haxa xil isqꞌap xin, saj hakaꞌ jilni chꞌen sajbꞌat,
haꞌ xil iswiꞌ kaw saj hakaꞌ noꞌ lana saj.
Haxa yehobꞌal bꞌay tzꞌonhan, chiꞌah xaj qꞌaꞌ yinh,
xaj qꞌaꞌ xin aypaxiko isyantahilo istzꞌonhobꞌal tuꞌ.
10 Ay xin huneꞌ qꞌa qꞌaꞌ chꞌelti sataj hakaꞌ ha haꞌ chꞌekꞌ yojomal.
Mach isbꞌi hayebꞌ mil isbꞌisil anma chiyaqꞌ chejaꞌ isbꞌa tet.
Mach isbꞌi hayebꞌ millones anma kutxaniko sataj.
Yok Komam yilni yinh tzet chꞌeliko anma; ishajlax hunteqꞌan teꞌ libro.
11 »Kinokkano tꞌanhnojan yinh noꞌ iskanh noqꞌ yu nimeta tzotiꞌ chiyal yukꞌaꞌ noꞌ. Hayet tꞌanhan inikojan yinh noꞌ, wilnihan ispotxꞌlaxkamo noꞌ, kaw xin kokꞌ ayiko isnimanil noꞌ, isqꞌojlaxto xol qꞌaꞌ yu istzꞌakantoj. 12 Hakpax tuꞌ xin hunteqꞌanxa no noqꞌ tuꞌ, ilaxilo yip noꞌ, yajaꞌ xin itzitzto noꞌ hanikꞌoxa.
13 Lahwi tuꞌ, wilnihan yet aqꞌbꞌalil yinh inwayik tuꞌan, istit huneꞌ mak xol moyan,
lahan jilni hakaꞌ iskꞌahol naj winaj,
yapni iskꞌatanh huneꞌ Icham Winaj aynhetikꞌa yinh sunilal ej tiempo, ishitziko sata Icham.
14 Yaqꞌlax yip, yalaxiko ismay, yalaxiko yinh yahawil yunhe sunil ej konhobꞌ yebꞌ txꞌotxꞌ nimeta konhobꞌ,
yebꞌ sunil anma nananta abꞌxubꞌal chala, chꞌok yaqꞌaꞌ chejaꞌ isbꞌa tet.
Haꞌ yip tuꞌ, aynhetikꞌa yinh sunilbꞌal ej tiempo,
haꞌ ismajul huneꞌnhe yehi yebꞌ xin machi bꞌaqꞌinhal chitanhiloj.
15 »Hanin Daniel intiꞌan, kaw kinxiwan yet wilnihan hunteqꞌan tuꞌ, iskꞌayilo inkꞌulan wilnihan. 16 Inhitzikojan iskꞌatanh huneꞌ naj ayko xol ebꞌnaj kutxaniko bꞌey tuꞌ, inqꞌambꞌenan yinh isyelal tzet chal yelapno sunil hunteqꞌan tuꞌ. Istzotel naj wetan, yaqꞌni naj wohtanhelojan tzet chal yelapno hunteqꞌan tuꞌ, yalni naj:
17 »“Haꞌ kanhebꞌ noꞌ nimeta noqꞌ hawil tuꞌ, yechel kanhwanh ebꞌnaj winaj chꞌok yahawil sat yibꞌanhqꞌinal tiꞌ. 18 Lahwi tuꞌ, chischahni makta yetxa Komam Dios ismajul, Komam kaw niman yelapnoj, haꞌ ismajul tuꞌ chꞌokkano yu yinh sunilbꞌal ej tiempo, machi bꞌaqꞌinhal chitanhiloj,” xhi naj.
19 »Kaw xin wochehan wohtanhelojan isyelal yinh noꞌ iskanh noqꞌ, noꞌ kaw nantikꞌa jilni yebꞌ kaw chonhxiw jilni; hierro yeh noꞌ, haxa yisqꞌaj noꞌ bronce chꞌen, chisxitnikamo noꞌ sunil, chisbꞌiqꞌnaytoj, chisxanhobꞌtanhen tzet matxa chilahwi yu. 20 Inqꞌambꞌenpaxojan tzet chalilo 10 (lahonhebꞌ) yukꞌaꞌ noꞌ ayilti yinh iswiꞌ, yebꞌ tzet chalilo huneꞌxa yukꞌaꞌ noꞌ elilo yet tzujanilxa, yaykꞌay oxebꞌ yukꞌaꞌ noꞌ iskankano huneꞌ elilo yet tzujanilxa tuꞌ seleloj, huneꞌ yukꞌaꞌ ay isbꞌaqꞌ sat yebꞌ istiꞌ, chalni nimeta tzotiꞌ nanxa islow yoki yu chikanh isbꞌa. 21 Wilnihan yaqꞌni howal yukꞌaꞌ noꞌ tuꞌ yinh makta yetxa Komam Dios, isqꞌoji noꞌ yinh, 22 masanta apni Icham Winaj aynhetikꞌa yinh sunilal ej tiempo, haꞌ ton Komam Dios kaw nimankano yelapnoj, iswatxꞌen istoholal yinh makta yetxa yehi, yapni istiempohal yiqꞌni ismajul.
23 »Yalni naj wetan hakaꞌ tiꞌ:
“Haꞌ noꞌ iskanh noqꞌ tuꞌ, haꞌ ton huneꞌ iskanh niman konhobꞌ ay sat txꞌo txꞌotxꞌ tiꞌ,
haꞌ huneꞌ niman konhobꞌ tuꞌ kaw nantikꞌa jilni sata sunil hunteqꞌanxa.
Sunil tzet ay sat txꞌo txꞌotxꞌ tiꞌ, chisbꞌiqꞌaytoj, chisxanhobꞌtanheni, chisxitnitoj.
24 Haxa 10 (lahonhebꞌ) yukꞌaꞌ, haꞌ ton 10 (lahonhwanh) ebꞌnaj yahaw chiꞌah yul huneꞌ niman konhobꞌ tuꞌ,
haꞌ yinta hunteqꞌan ebꞌnaj tuꞌ, chiꞌah huneꞌxa naj yahaw kaw nantikꞌa jilni sata ebꞌnaj bꞌabꞌel,
ay xin oxwanh ebꞌnaj yahaw tuꞌ chitanhilo yu naj.
25 Chalni naj tzotiꞌ txꞌoj yinh Komam Dios, Komam kaw niman yelapnoj,
kat yok naj yetano makta yetxa Komam yehi,
chꞌok yinh isnabꞌal naj ishelni chejbꞌanile yet Komam yebꞌpaxo tzꞌayik kaw txahul yet Komam,
kat yalaxiko iskonhobꞌ Komam Dios yul isqꞌabꞌ naj yulbꞌal yikta iskanh tiempo.b
26 Yajaꞌ hayet chꞌay tzꞌonhno Komam Dios yilni yinh tzet chꞌeliko anma,
kat yok yilno tzet chꞌeliko naj, kat yilaxilo yip naj, kat istanhkanilo naj yinh hunelnhe.
27 Yaqꞌlax ismajul yebꞌ yip yebꞌ ismay sunil nime konhobꞌ ay sat txꞌo txꞌotxꞌ tiꞌ yul isqꞌabꞌ makta yetxa Komam Dios yehi;
Komam kaw niman yelapnoj. Haꞌ yip Komam aynhetikꞌa yinh sunilbꞌal ej tiempo,
sunil ebꞌnaj yahawil sat yibꞌanhqꞌinal tiꞌ chiyaqꞌ chejaꞌ isbꞌa tet Komam, chisyijen tzet chala,” xhi.
28 »Haꞌ tiꞌ chikachnakano tzet yal naj wetan. Wal hanin Daniel intiꞌan kaw somchakanh innabꞌalan, issajpaqꞌilo insatan, machi mak tet xin walan hunteqꞌan tiꞌ, yulnhe wanmahan inkꞌubꞌakanojan,» xhi yaꞌ Daniel.