5 »Hayet lanhan yekꞌ tzet wilan tuꞌ yinh innabꞌalan, wilnihan istit huneꞌ noꞌ icham chiw bꞌey yetkꞌulal bꞌay chito tzꞌayik, hayet istit noꞌ yekꞌ noꞌ sunil sat txꞌo txꞌotxꞌ tiꞌ, kaw xin yinh anhe tita kochnhe matxatikꞌa chayo yoj sat txꞌotxꞌ. Huneꞌ noꞌ icham chiw tuꞌ, ayilti huneꞌ yukꞌaꞌ noꞌ kaw nimajal xolbꞌal isbꞌaqꞌ sat. 6 Yapni noꞌ icham chiw tuꞌ iskawilal noꞌ meꞌ kabꞌebꞌ yukꞌaꞌ, noꞌ wilan istiꞌ haꞌ, isto lemna noꞌ icham chiw tuꞌ yinh noꞌ meꞌ yinh sunil yip yebꞌ ishowal, 7 yok islahwilal noꞌ yu noꞌ chiw tuꞌ; ismaqꞌni qꞌaho noꞌ yukꞌaꞌ noꞌ iskabꞌil. Matxatikꞌa xin yip noꞌ meꞌ tuꞌ islinhbꞌan isbꞌa yinh sat noꞌ chiw; maqꞌlaxayo noꞌ sat txꞌotxꞌ yu noꞌ chiw tuꞌ, isxanhobꞌtanhen noꞌ noꞌ, machi mak yu iskolnilo noꞌ yul isqꞌabꞌ noꞌ chiw tuꞌ, yuto kaw aykano yip noꞌ.^a

8 »Haꞌ noꞌ icham chiw tuꞌ, kaw yiqꞌkanokanh yip noꞌ sikꞌlebꞌil, yajaꞌ hayet kaw yiqꞌnikanokanh yip noꞌ, isqꞌahto huneꞌ yukꞌaꞌ noꞌ kaw nimajalkanoj, yelilo kanhebꞌxa yukꞌaꞌ noꞌ selelo huneꞌ qꞌahto tuꞌ. Haꞌ kanhebꞌ yukꞌaꞌ tuꞌ tohol yeto yinh yetkꞌulal kanhebꞌ istxikin sat yibꞌanhqꞌinal tiꞌ. 9 Ay xin huneꞌ yukꞌaꞌ bꞌay elilo huneꞌxa nichꞌan yukꞌaꞌ, haꞌ nichꞌan yukꞌaꞌ tuꞌ, kaw chꞌibꞌkanto bꞌey yinh yetkꞌulal sur, yebꞌ yinh yetkꞌulal bꞌay chiꞌahilo tzꞌayik, yebꞌ bꞌey yetkꞌulal txꞌo txꞌotxꞌ kaw ochebꞌil.^b 10 Haꞌ huneꞌ nichꞌan yukꞌaꞌ tuꞌ, kaw chꞌibꞌkanokanh masanta ahapno bꞌay ay ejército yul satkanh, isqꞌojnayti haywanh ejército ay satkanh, yebꞌ hayebꞌ txꞌumel sat txꞌotxꞌ, yok isxanhobꞌtanheni. 11 Yanipaxiko howal yinh Komam Dios, yahawil ejército ay satkanh, yinilo xahanbꞌal chꞌaqꞌlax hunun tzꞌayik tet Komam sat txꞌotxꞌ tiꞌ, yetanto Yatut Komam, yaykano wuyna Yatut Komam sat txꞌotxꞌ yu. 12 Haꞌ yu istxꞌojal anma, yuxin alaxiko ebꞌnaj soldado yul isqꞌabꞌ, yinipaxilo xahanbꞌal chꞌaqꞌlax tet Komam Dios hunun tzꞌayik, iskꞌaytzenilo isyelal, iswatxꞌen sunil tzet yal iskꞌul, yiqꞌnikanokanh yip.^c

13 »Lahwi tuꞌ, wabꞌenan istzotel huneꞌ naj ángel, isqꞌambꞌen huneꞌxa naj ángel tet naj chitzotel tuꞌ, hakaꞌ tiꞌ: “¿Bꞌaqꞌinh chilahwi hunteqꞌan chisyah Komam Dios, hunteqꞌan ayko selelo isnhuslax xahanbꞌal tet Komam hunun tzꞌayik? ¿Hayebꞌtom tzꞌayik chꞌalaxiko Yatut Komam Dios yebꞌ issoldado yul isqꞌabꞌ ebꞌnaj txꞌoj yu isxanhobꞌtanhe ebꞌnaj?” xhi. 14 Istaqꞌwi naj ángel tuꞌ, yalni naj: “Hato yet chilahwi yekꞌto 2,300 qꞌejbꞌiyalil yebꞌ sakꞌayalil, lahwi tuꞌ kat issajnhelaxkano Yatut Komam Dios,” xhi naj.

15 »Hanin Daniel intiꞌan, hayet lanhan yekꞌ hunteqꞌan tzet wilan tuꞌ yinh innabꞌalan yunhe intxumnilojan tzet chal yelapnoj, yok linhno huneꞌ mak hakaꞌ jilni anma yinh insatan. 16 Wabꞌenan huneꞌ yul isnuqꞌ winaj awi yinh kaw ip bꞌey istiꞌla haꞌ Ulai, yalni hakaꞌ tiꞌ: “Gabriel, hal tet huneꞌ naj winaj tiꞌ yinh tzet chalilo huneꞌ yil naj,” xhi.

17 »Lahwi tuꞌ, ishitziko naj ángel Gabriel inkꞌatanhan; hayet ishitziko naj, inxiwkanhan, way jahnojan, way xulnojan sat txꞌotxꞌ, yajaꞌ yal naj wetan: “Hach iskꞌahol naj winaj txumchahojabꞌ hawu ta haꞌ tzet hawil tiꞌ chiyij isbꞌa yinh islahobꞌal tzꞌayik,” xhi naj.

18 »Hayet lanhan istzotel naj wetan waykꞌayan sat txꞌotxꞌ, nhohan wuyujan, inwaykanhan; kinispitnihan naj yunhe wah linhnojan. 19 Yalni naj wetan: “Chinyehan tawet tzet chihul yet toxa chilahwi yekꞌayo ishowal Komam Dios, yuto haꞌ hunteqꞌan tuꞌ, chiyu yinh islahobꞌal tzꞌayik. 20 Haꞌ noꞌ meꞌ kabꞌebꞌ yukꞌaꞌ hawila, yechel isreyal Media yebꞌ Persia. 21 Haxa noꞌ icham chiw hawil tuꞌ, yechel naj isreyal Grecia, haxa yukꞌaꞌ noꞌ kaw nimajal ayilti xolbꞌal isbꞌaqꞌ sat, yechel naj bꞌabꞌel rey yinh txꞌotxꞌ Grecia tuꞌ.^d 22 Haxa yukꞌaꞌ qꞌahtoj yelilo kanhebꞌxa selel, yechel kanhebꞌ nimeta konhobꞌ chiꞌahi; yajaꞌ xin mach lahano yip hakaꞌ huneꞌ bꞌabꞌel.

27 »Hanin Daniel intiꞌan, kaw paxkanilo wipan wabꞌehan, inyabꞌiꞌayan hayebꞌ tzꞌayik. Haxa yet kꞌulxa ye inkꞌulan, wahwanojan, wokpaxojan munil yinh ismunil naj rey; yajaꞌ xin kaw okkano niman xiwkilal winhan yu tzet wilan, yuto mach nachalo wuhan tzet chal yelapnoj,» xhi yaꞌ Daniel.