Txahli yaꞌ Daniel yinh iskonhobꞌ
9
«Haꞌ naj Darío iskꞌahol naj Asuero, xol ebꞌnaj ah Media titna yikꞌal naj, haꞌ xin naj Darío tuꞌ ok reyal yinh ebꞌnaj caldeo. 2 Hayet bꞌabꞌel habꞌil yok naj Darío reyalil, hanin Daniel intiꞌan, lanhan wilnihan teꞌ hum tzꞌibꞌnhebꞌil yu yaꞌ Jeremías, ischejabꞌ Komam Dios, yunhe kam chitxumchalo wuhan isbꞌisil habꞌil bꞌay chꞌay isyaꞌtajil yibꞌanh konhobꞌ Jerusalén hakaꞌtikꞌa yu yalnikano Komam Dios tet ischejabꞌ tato 70 (lahonhebꞌ iskanhwinaj) habꞌil. 3 Yu tuꞌ, yuxin kinokan insayaꞌlojan Komam Dios Jahawil yinh txah, inqꞌannihan tet Komam, wokan yinh txah yet mach chonhwaꞌi; wanikojan xilqꞌape yet bꞌiskꞌulal winhan, way tzꞌonhnojan xol tanh. 4 Intxahlihan tet Komam Jahawil, inDiosalan, walnatijan ismul inkonhobꞌan, walnihan hakaꞌ tiꞌ: “Mamin, hach Wahawilan, hach tiꞌ Dios kaw nimankano yelapnoj yebꞌ xin kaw ay hamay. Haꞌ tzet haltebꞌilkano hawu chiyij isbꞌa, chayenilo iskꞌulchꞌanil hakꞌul yinh mak chachocheni, chiskꞌubꞌan chejbꞌanile aykano hawu. 5 Hanhonh konhhakonhobꞌ honhtiꞌanh jako komulanh tawet, kowatxꞌenanh istxꞌojal yinh hasat, kowatxꞌenanh ismachiswalilal, jokanh manhkꞌomal tawet, kopohnilo kobꞌahanh yinh kuybꞌanile yebꞌ chejbꞌanile aqꞌbꞌilkano hawu. 6 Mach koyijehanh tzet chal ebꞌnaj hachejabꞌ tzotel yinh habꞌi jetanh, yebꞌ tet ebꞌnaj jahawilanh, yebꞌ tet ebꞌnaj iswiꞌehal konhobꞌ, yebꞌ tet jichmamanh, yebꞌ tet sunil konhobꞌ Israel. 7 Hach tiꞌ Mamin, Wahawilan, kaw tohol hachkanoj, walonh ah Judá honhtiꞌanh kaw ayonhkanikojanh yinh txꞌixwilal tinanh, yebꞌ sunil anma ah Jerusalén, yebꞌ sunil ebꞌnaj Israel; ebꞌnaj kawil aya yebꞌ ebꞌnaj kaw nahat pujnakanto yulajla konhobꞌ yu ismanhkꞌomal tawet. 8 Mam Wahawil, hanhonhtiꞌanh, kaw ayonhkanikojanh yinh txꞌixwilal, hakpax tuꞌ naj jahawilanh, yebꞌ ebꞌnaj iswiꞌehal yinh kokonhobꞌanh, yebꞌ ebꞌyaꞌ komam ichamanh, yuto jako komulanh tawet. 9 Mam Jahawilanh, hach tiꞌ hach koDiosalanh tzꞌayojabꞌ hakꞌul jinhanh, chawaqꞌnipaxo nimankꞌulal jinhanh, waxanhka xin konhokanh manhkꞌomal tawet. 10 Mam Jahawilanh, hach koDiosalanh, hanhonhtiꞌanh mach koyijehanh tzet hawala, mach kobꞌeybꞌalnhehanh chejbꞌanile hawaqꞌkano tet ebꞌnaj hachejabꞌ yu kobꞌeybꞌalnhenanh. 11 Sunil anma Israel manhkꞌon chejbꞌanile aykano hawu, ispohnilo isbꞌa yu mach chisyije tzet chawala. Yuxin ayayo hatzꞌaktiꞌ jibꞌanhanh yebꞌ isyaꞌtajil hawalkanoj yet hawaqꞌni bꞌinaho habꞌi, hunteqꞌan tzꞌibꞌnhebꞌilkano yinh chejbꞌanile hawaqꞌ tet yaꞌ Moisés, hachejabꞌ, yuto jako komulanh tawet, Mamin. 12 Haꞌ tzet hawalkano jinhanh, masan yij isbꞌa, yijnipaxo isbꞌa tzet hawalkano yinh ebꞌnaj jahawilanh. Hawanayo huneꞌ niman isyaꞌtajil jibꞌanhanh. Wal xin maxhto hunu isyaꞌtajil xahawayo sat yibꞌanhqꞌinal tiꞌ hakaꞌ isyaꞌtajil hawayo yibꞌanh konhobꞌ Jerusalén. 13 Hul hunteqꞌan isyaꞌtajil jibꞌanhanh hakaꞌtikꞌa yalni chejbꞌanile hawaqꞌ tet yaꞌ Moisés, yajaꞌ wal hanhonhtiꞌanh Mam Jahawilanh, hach koDiosalanh, maxhtikꞌa chachkosayilojanh yunhe istzꞌaykanh hakꞌul jinhanh. Machi xin chikobꞌejanh kowatxꞌenanh istxꞌojal yu komeltzohanh yul haqꞌabꞌ, kat jokanh johtanhenilojanh isyelal chawala. 14 Yu tuꞌ, yuxin Mam Jahawilanh ok yinh hanabꞌal hawaniti niman isyaꞌtajil tiꞌ jibꞌanhanh, yuto hach tiꞌ mam Jahawilanh, koDiosalanh kaw tohol hachkano yinh sunil tzet hawatxꞌe, yuto hanhonhtiꞌanh mach koyijehanh tzet chawala.15 »”Mamin hach Jahawilanh yebꞌ koDiosalanh, hach tiꞌ hawilo ebꞌnaj jichmamanh sat txꞌotxꞌ Egipto yu yip haqꞌabꞌ, hayet tuꞌ kaw bꞌinakano habꞌi, yexnhetotikꞌa xin isbꞌina tinanh; yajaꞌ wal hanhonhtiꞌanh xin jako komulanh, kowatxꞌenanh istxꞌojal. 16 Mamin, hach jahawilanh, hach tiꞌ kaw tohol hachkanoj, yuxin chinqꞌanan tawet ta chawilo hahowal yibꞌanh hakonhobꞌ Jerusalén, yebꞌ witz Sión; yuto hawet yehi, yuto yu komulanh yebꞌ yu istxꞌojal ebꞌyaꞌ komam ichamanh yuxin sunil ej konhobꞌ hoyaniko yinh konhobꞌ Jerusalén kaw chibꞌuchwa yinh Jerusalén yebꞌ yinh hakonhobꞌ. 17 Wal tinanh Mamin, hach koDiosalanh, abꞌe intxahan hanin hachejabꞌ intiꞌan, abꞌe tzet chinqꞌanan tawet tiꞌ yu hanta isxahanil ay habꞌi hawu, tzꞌayojabꞌ hakꞌul yinh hawatut bꞌiskꞌulalkano yekanoj. 18 Mamin hach inDiosalan, txalbꞌa hatxikin, kat hawabꞌen tzet chinqꞌanan. Tꞌanhxanhayti yinh isyaꞌtajil chijaqꞌlehanh, kat hawilnayti konhobꞌ bꞌay chꞌaqꞌlax bꞌinaho habꞌi, huneꞌ konhobꞌ hawet yehi. Wal xin xaꞌuchkꞌalaxtoj. Hayet chonhtxahlihanh tawet tiꞌ, mach lanhan iskawxi kokꞌulanh yinh istoholal chilakowatxꞌehanh, wal xin chikawxi kokꞌulanh yinh iskꞌulchꞌanil hakꞌul, yuto kaw hantakano iskꞌulal hakꞌul. 19 ¡Mamin, hach Jahawilanh, aqꞌ nimankꞌulal jinhanh! ¡Hajbꞌa hatxikin chawatxꞌen tzet chikoqꞌananh tawet! ¡Mamin, hach inDiosalan, yu kaw xahan ay habꞌi hawu! ¡Machojabꞌ chinahatli hakolwa jinhanh! Yuto haꞌ yibꞌanh Jerusalén yebꞌ yibꞌanh hakonhobꞌ chꞌaqꞌlax bꞌinaho habꞌi,” kinchihan yinh intxahan.
Tzotel-laxkano tet yaꞌ Daniel yibꞌanhilo 70 semana
20 »Hayet lanhan intzotelan tet Komam Dios yinh intxahan, chiwalnihan inmulan yebꞌ ismul wet konhobꞌ Israelan tet Komam, yet lanhan inqꞌannihan tet Komam Wahawil, inDiosalan yinh witz Sión, witz yet Komam yehi; 21 yapni lemna naj Gabriel inkꞌatanhan, naj wilan yet bꞌabꞌelal, apni lemna naj hakaꞌ yorahil bꞌay chꞌaqꞌlax xahanbꞌal tet Komam Jahawil yinh qꞌejbꞌiyal. 22 Yaqꞌni naj intxumuꞌan, istzotel naj wetan, yalni naj hakaꞌ tiꞌ: “Daniel, wal tinanh makinhulan takꞌatanh yunhe waqꞌnihan hahelanil yebꞌ yitzꞌatil hawiꞌ. 23 Hataxtikꞌa yet hawichiko hatxahli yaqꞌlax chejbꞌanile, yuxin makinhulan waqꞌaꞌan huneꞌ chejbꞌanile tiꞌ yu hawohtanheniloj, yuto kaw xahan ayach yu Komam Dios. Wal tinanh xin txumchahojabꞌilo huneꞌ chejbꞌanile tuꞌ hawu, kat hatxumnilo tzet chaqꞌ Komam hawilaꞌ tiꞌ:
24 70 (lahonhebꞌ iskanhwinaj) semana chꞌekꞌto yibꞌanh hawet Israelal yebꞌ yibꞌanh hakonhobꞌ,
konhobꞌ yet Komam Jahawil, kat istanhtzelaxkanilo istxꞌojal yebꞌ mule,
kat yaqꞌlax nimankꞌulal yinh mule,
kat yalaxkaniko istoholal yinh sunilbꞌal ej tiempo,
yunhe yijnikano isbꞌa tzet aqꞌlax yilaꞌ ebꞌyaꞌ ischejabꞌ Komam Dios yebꞌ tzet halbꞌilkano yu ebꞌyaꞌ,
kat yalaxiko mak sikꞌbꞌililo yu Komam Dios yinh ismunil.a
25 Yilal hawohtanheniloj kat hatxumniloj
ta hayet chilahwi yal-laxilto chejbꞌanile
ta chiwatxꞌelaxkanh konhobꞌ Jerusalén hunelxa,
chꞌekꞌto hujebꞌ semana yebꞌ 62 (iskabꞌ iskanhwinaj) semana,
kat yul huneꞌ naj Yahaw sikꞌbꞌililoj.
Haꞌ yul hunteqꞌan tiempo tuꞌ, chiwatxꞌelaxkanh txonhbꞌal bꞌey yul konhobꞌ Jerusalén hunelxa,
kat iswatxꞌelaxkanh iskꞌubꞌal konhobꞌ Jerusalén xol nimeta isyaꞌtajil.
26 Hayet chilahwi yekꞌto 62 (iskabꞌ iskanhwinaj) semana tuꞌ,
kat yilaxilo iskawil naj Yahaw sikꞌbꞌililo tuꞌ,
kat yintanhelaxkanilto yu ebꞌnaj winaj yebꞌ yu Komam Dios, lahwi tuꞌ,
kat yaykꞌay konhobꞌ Jerusalén yebꞌ Yatut Komam Dios yu iskonhobꞌ huneꞌ naj yahaw chitit howal yinh Jerusalén tuꞌ.
Yinh hunepnhechꞌan chiꞌuchkꞌalaxayo konhobꞌ Jerusalén,
kat istanhkaniloj hakaꞌ chu yul hunu niman elomaꞌ, chislahniko yuni howal,
kat yuchkꞌalaxto ej konhobꞌ hakaꞌtikꞌa nabꞌil yu Komam Dios, masanto yinh islahobꞌal tzꞌayik.
27 Chistꞌinhbꞌakano huneꞌ naj Yahaw tuꞌ istzotiꞌ yebꞌ txꞌiꞌal anma yinhxanhe huneꞌ semana,
yajaꞌ haꞌ yul yiktabꞌal huneꞌ semana tuꞌ chiyilo naj xahanbꞌal yebꞌ yebꞌalqꞌabꞌe.
Lahwi tuꞌ kat yul naj txꞌoj, chiyanikto naj isyahbꞌetajil yul Yatut Komam Dios,
chiyinilo naj ispixan masanta chihul isyaꞌtajil yibꞌanh huneꞌ naj txꞌoj tuꞌ,
kat istanhkanilo naj hakaꞌ halbꞌil yu Komam Dios,” xhi naj Gabriel tuꞌ wetan,» xhi yaꞌ Daniel.b