2 «Haꞌ yulbꞌal hunteqꞌan tzꞌayik tuꞌ, hanin Daniel intiꞌan kaw oxebꞌ semana bꞌiskꞌulal wehan. 3 Mach inlohan itah kaw kꞌul, mach inkꞌuxan chibꞌe, mach wukꞌan vino, machi anh xuqꞌ sam wakojan winhan masanto yij isbꞌa oxebꞌ semana. 4 Haꞌ yinh tzꞌayik 24 (kanhebꞌ iskawinaj) yinh bꞌabꞌel ixahaw ayinan istiꞌ haꞌ niman Hidekel. 5 Intꞌanhxitojan, wilnihan huneꞌ naj winaj, ayko qꞌap lino xilo isqꞌap naj, kꞌalbꞌil yikta yu huneꞌ txꞌambꞌal oro, chꞌen kaw kꞌul. 6 Haꞌ isnimanil, xanhe chitzejtzoni hakaꞌ chꞌen berilo, haxa sat xanhe chijeplahi hakaꞌ yet chijepla kꞌuh, haxa isbꞌaqꞌ sat, lahan jilni hakaꞌ isqꞌaqꞌal tzejtah. Haꞌ isqꞌabꞌ yebꞌ yoj lahan jilni hakaꞌ chꞌen bronce xanhe chitzejtzoni, haxa yul isnuqꞌ lahan hakaꞌ yul isnuqꞌ hunu niman wejan anma.

7 »Haninnhechꞌan Daniel intiꞌan wilan huneꞌ tiꞌ, wal ebꞌnaj ayko inkꞌatanhan, mach yil ebꞌnaj, wal xin ok huneꞌ niman xiwkilal yinh ebꞌnaj, yelkanh ebꞌnaj, yebꞌanto isbꞌa ebꞌnaj. 8 Haninxanhehan kinkankanojan inchukilan, wilnihan huneꞌ tiꞌ, ispaxkanilo wipan yu xiwkilal. 9 Yajaꞌ wabꞌehan yul isnuqꞌ huneꞌ naj winaj tuꞌ, hayet wabꞌenan yul isnuqꞌ naj waykꞌayan, nhohan wukanayojan sat txꞌotxꞌ, yok huneꞌ niman wayanh winhan. 10 Yinhnhena tuꞌ, kinispitnihan huneꞌ qꞌabꞌe, waynhohnojan, wanayojan inwitxꞌiꞌan yebꞌ inqꞌabꞌan sat txꞌotxꞌ. 11 Yalni wetan hakaꞌ tiꞌ: “Daniel, hach tiꞌ kaw xahan ayach yu Komam Dios. Ahanhwanoj, chikam hawabꞌen tzet chiwalan tawet, yuto kinchejlaxtijan tzotelo tawet,” xhi wetan.

»Hayet lanhan yalni hunteqꞌan tzotiꞌ tuꞌ wetan, wah linhnojan, yajaꞌ xin toxanhe chinluylunan yu xiwkilal. 12 Yalnipaxo wetan: “Daniel, mach chaxhxiwi, yuto hatax yet bꞌabꞌel tzꞌayik yet hawaniko yinh hakꞌul hatxumni hunteqꞌan tzet kaw yaꞌta yelapnoj, yebꞌ yet hawok hawinayo habꞌa sata Komam Dios haDiosal, yabꞌen Komam hatxah, yuxin haꞌ yu tzet hawal yinh hatxah, yuxin makinhulan. 13 Haꞌ huneꞌ espíritu, yahaw yeko yinh ismajul txꞌotxꞌ Persia, yaqꞌ howal winhan yulbꞌal 21 (huneꞌ iskawinaj) tzꞌayik. Yajaꞌ haꞌ naj Miguel, huneꞌ naj ángel yahaw niman yelapnoj hul kolwal winhan, yuto kinkankanojan inchukilan iskꞌatanh ebꞌnaj yahawil Persia.^a 14 Makinhulan waqꞌaꞌan hawohtanhelo tzet chihul yibꞌanh hakonhobꞌ yinh islahobꞌal tzꞌayik, yuto haꞌ tzet maxawil tiꞌ, chiyij isbꞌa yinh hunteqꞌan tzꞌayik chitohuli,” xhi.

15 »Hayet lanhan yalni naj hunteqꞌan tzotiꞌ tuꞌ wetan, tꞌanhan hinayojan sat txꞌotxꞌ, insukbꞌilojan. 16 Yajaꞌ xin ay huneꞌ naj lahan jilni hakaꞌ iskꞌahol naj winaj tzabꞌni intiꞌan. Hak tuꞌ yu intzotelkanhan, walnihan tet naj linhankanh insatajan tuꞌ hakaꞌ tiꞌ: “Mamin, haꞌ yu tzet mawilan tiꞌ kaw bꞌiskꞌulal maꞌelkaniko inkꞌulan yebꞌ xin kaw mapaxkanilo wipan. 17 ¿Tzet xin chu istzotel hachejabꞌ tiꞌ tawet hach wahawilan yet matxatikꞌa nino wipan, yebꞌ matxa chu inhiqꞌni inhaqꞌohan?” kinchihan.

18 »Haꞌ naj lahan jilni hakaꞌ iskꞌahol naj winaj tuꞌ, istzabꞌpaxo naj intiꞌan hunelxa, yaqꞌni naj wipan. 19 Yalni naj wetan: “Hach tiꞌ kaw xahan ayach yu Komam Dios, mach chaxhxiwi, ayojabꞌ aqꞌankꞌulal yul hawanma, kaw chawute habꞌa, ako yip hawanma,” xhi naj wetan. Hayet lanhan istzotel naj wetan, wabꞌenan yok wipan, walnihan: “Mamin, tzotelanh wetan, yuto maxawaqꞌ wipan,” kinchihan. 20 Yalni naj wetan: “¿Hawohtami, tzet yinh yuxin makinhulan takꞌatanh? Yajaꞌ wal tinanh xin yilal inmeltzohan howal yinh huneꞌ espíritu yahawil yinh txꞌotxꞌ Persia, hayet chilahwi waqꞌni howalan yebꞌi kat yul huneꞌ espíritu yahawil yinh txꞌotxꞌ Grecia. 21 Wal xin chiwaqꞌan hawohtanhelo tzet tzꞌibꞌnhebꞌilayo yul hum yet isyelal, machi xin hunu mak chikolwa yaqꞌni howal wintajan yinh hunteqꞌan espíritu yahawil yinh konhobꞌ tuꞌ, kachannhe naj ángel Miguel, naj ángel chextanheni.”