Chiyiqꞌpaxo yaꞌ Oseas yixal hunelxa ix txꞌoj ye iswiꞌ
3
Yalni Komam Jahawil wetan: «Iqꞌpaxokanh hawixal hunelxa kat haxahannheni, waxanhka xayako ismul ix yebꞌ mak yocheko ix. Hak tuꞌ chu inxahannhenan konhobꞌ Israel, waxanhka yako isnabꞌal yinh komon tioxh, yebꞌ xin yet yinito nimeta wah watxꞌebꞌil yinh teꞌ tajin uva xahanbꞌalil tet hunteqꞌan komon tioxh tuꞌ,» xhi Komam wetan.a2 Inloqꞌnihan ix yinh 15 (holahonhebꞌ) siclo plata yebꞌ huneꞌ homer ixim cebada yok yiktaxa, yunhe yok ix wixalojan hunelxa.b 3 Walnihan tet ix: «Hach tiꞌ chaxhok wixalojan yulbꞌal txꞌiꞌal tiempo, matxa chaxhwinajli, matxa chaxhto yinta hunuxa winaj, hakinpax tuꞌan, kꞌul chiwute hinbꞌahan tawinh,» kinchihan.
4 Yuto kaw txꞌiꞌal tiempo chikankano konhobꞌ Israel yinh matxa yahawil, matxa mak chitanheni, matxapaxo xahanbꞌal chaqꞌa, yebꞌ xin matxa istioxh, matxa xilqꞌape yet sacerdote chako yinh, matxapaxo istioxh yulaj yatut. 5 Lahwi tuꞌ kat ismeltzo konhobꞌ Israel, kat issaynilo Komam, isDiosal. Chissayiko anma Israel tuꞌ hunu mak yuninalto yaꞌ rey David yahawiloj. Haꞌ yinh huneꞌ tiempohal tuꞌ, chiyiyo isbꞌa anma Israel tet Komam, chischahni iskꞌulal Komam.