2. ISKABꞌ MAJAN KUYBꞌANILE
(4:1–14:9)
Ishowal Komam Dios yinh anma Israel
4
Yalnipaxo yaꞌ Oseas:«Hex Israel abꞌewe istzotiꞌ Komam Jahawil,
yuto chitit ishowal Komam yinh anma ay sat txꞌotxꞌ tiꞌ,
yuto mach isyije anma tzet chal Komam,
mach chitzꞌay iskꞌul yinh yet anmahil,
machipaxo Komam Dios yinh isnabꞌal anma.
2 Wal xin hanhkꞌanhe ismanhkꞌomal yinh tzet xaꞌistaqꞌwe yinh,
yebꞌ xin hanhkꞌaxanhetikꞌa leqꞌtiꞌal chala, potxꞌwal,
eleqꞌ yebꞌ xin ixloj yebꞌ winajlo chu anma, chilanxanhetikꞌa ispotxꞌlen isbꞌa.
3 Yuxin haꞌ huneꞌ txꞌotxꞌ konhobꞌ tiꞌ, chiꞌokkano txꞌotxꞌ yinh bꞌiskꞌulal,
kat ispaxilo yip sunil anma ay yul konhobꞌ tiꞌ,
kat iskampaxilo sunil noꞌ xoltelajil noqꞌ, yebꞌ noꞌ chꞌik chꞌekꞌ satkanh,
yebꞌ noꞌ kay chꞌekꞌ xol haꞌ mar,» xhi yaꞌ Oseas.
4 Yalni Komam: «Machojabꞌ mak chꞌok aqꞌokꞌule yinh yet anmahil,
machojabꞌ mak chikachwahi, yuto haꞌ anma hawet konhobꞌ tiꞌ,
lahan hakaꞌ mak chꞌok aqꞌokꞌule yinh ebꞌnaj sacerdote.
5 Chextxaqꞌmohi yet tzꞌayikal,
kat istxꞌaqꞌmopaxo ebꞌnaj inchejabꞌan yet aqꞌbꞌalil teyintaj.
Chintanhtzelojan konhobꞌ Israel tiꞌ, konhobꞌ hakaꞌta hemiꞌ yehi.
6 Haꞌ inkonhobꞌtiꞌan uchkꞌalaxtoj yuto machi isnabꞌal.
Haxa hex sacerdote hex tiꞌ, kaw heyintanhekanilto nabꞌale,
yuxin chexwilojan yinh hemunil tiꞌ,
yebꞌ xin yu henahulnheto chejbꞌanile aqꞌlax teyet yu heDiosal,
yuxin hakinpax tuꞌan chinnahulnhetojan heyuninal.
7 Hakaꞌtikꞌa yu yahkanh ischꞌibꞌ isbꞌisil ebꞌnaj sacerdote,
hakpax tuꞌ chu yahkanh ebꞌnaj yaniko ismul yinh insatan,
yajaꞌ xin chinmeltzokojan ismay ebꞌnaj yinh txꞌixwilal.
8 Haꞌ yu xahanbꞌal chiꞌaqꞌlax yinh ismul inkonhobꞌan, yuxin saqꞌal islow hetiꞌ,
yuxin kaw chextzalahi chiyaniko ismul inkonhobꞌtiꞌan.
9 Hakaꞌ isyaꞌtajil chiꞌay yibꞌanh inkonhobꞌan,
haktikꞌapax tuꞌ isyaꞌtajil chiꞌay teyibꞌanh hex sacerdote hex tiꞌ,
hakaꞌtikꞌa tzet chewatxꞌe yebꞌ tzet chebꞌeybꞌalnhe,
hak tuꞌ isyaꞌtajil chiꞌay teyibꞌanh.
10 Haꞌ inkonhobꞌtiꞌan chiwaꞌi yajaꞌ mach chinoh iskꞌul,
chiꞌixli ebꞌnaj winaj kat iswinajlipaxo ebꞌix ix, yajaꞌ matxa chiꞌuninwi,
yuto xaꞌisbꞌej iswatxꞌen tzet chiwalan, hanin Yahawilintiꞌan.
11 Haꞌ yu ixloj yebꞌ winajloj yebꞌ yu ukꞌu teꞌ,
yuxin suk elkaniko isnabꞌal.
12 Haꞌ inkonhobꞌtiꞌan haꞌ tet teꞌ tioxh chitxahli,
chiyechman ispaj istxah tuꞌ tet teꞌ;
yako ismul ispohnilo isbꞌa winhan hakaꞌ hunu ix ix chissay iswinaj,
kat isbꞌejnikano yichamil.
13 Yaqꞌ isxahanbꞌal yibꞌanh iswiꞌla witz,
yaltenpaxo teꞌ pom iswiꞌla ej wonhan yebꞌ xin yalanh ej yenhel teꞌ hih yebꞌ teꞌ álamo,
yebꞌ teꞌ olmo, yu huneꞌ tuꞌ xin ok iskutzꞌin ebꞌnaj winajloj,
issaynipaxo ebꞌix alibꞌe iswinaj.
14 Mach chiwayojan isyaꞌtajil yibꞌanh ebꞌix hekutzꞌin
yebꞌ yibꞌanh ebꞌix heyalibꞌ yu istxꞌojal iswiꞌ,
wal xin yuto haꞌ hunpaxo ebꞌnaj mame chiꞌoktzujno yinta ebꞌix ix txꞌoj ye iswiꞌ,
chiyaqꞌni ebꞌnaj isxahanbꞌal yebꞌ ebꞌix ix chibꞌeybꞌalnhen mule yebꞌ winaj,
yuxin haꞌ huneꞌ konhobꞌ machi isnabꞌal tiꞌ, chiꞌaykꞌaykanoj.
15 Haꞌ konhobꞌ Israel tiꞌ kaw lanhan yaniko ismul chiyetanto isbꞌa hakaꞌ ebꞌix ix txꞌoj ye iswiꞌ,
yajaꞌ wal hex konhobꞌ Judá machojabꞌ cheyako hemul.
Machojabꞌ chexto heyiqꞌayo hebꞌa bꞌey Gilgal,
machojabꞌ chexahto bꞌey Bet-avén,
machojabꞌ cheyaqꞌ bꞌinaho isbꞌi Komam Dios cheyalni hakaꞌ tiꞌ:
“Itzitz Komam Jahawil,” tajka kexchi.a
16 Yuto haꞌ konhobꞌ Israel, lahan hakaꞌ hunu noꞌ wakax kaw how,
mach chiyaqꞌ kuyuꞌ isbꞌa, yuxin ispohilo isbꞌa.
Ta hak tuꞌ, ¿tom chisje Komam Jahawil istanheꞌ ebꞌnaj tuꞌ hakaꞌ chu istanhelax noꞌ meꞌ bꞌay kaw haman?
17 Haxapaxo konhobꞌ Efraín, haꞌ yinh ej tioxh bꞌay chikawxi iskꞌul,
yajaꞌ yilaꞌxami, bꞌejwekanoj.
18 Sunil ebꞌnaj ay yul konhobꞌ Efraín aykꞌayna ebꞌnaj hakaꞌ chu yaykꞌay ebꞌnaj ukꞌum teꞌ.
Maxhtikꞌa chisbꞌej ebꞌnaj yixli.
Haꞌ ebꞌnaj yahawil kaw chiyoche ebꞌnaj iswatxꞌeꞌ tzettaj kaw txꞌixobꞌal.
19 ¡Chiꞌijlaxto ebꞌnaj yu jaqꞌeqꞌ,
kat istxꞌixwikanh ebꞌnaj yu isxahanbꞌal!» xhi Komam.