Isyaꞌtajil chꞌay yibꞌanh konhobꞌ Israel yu ispohilo isbꞌa yinh Komam Dios
5
Yalnipaxo Komam:«Abꞌewe hunteqꞌan tiꞌ,
hex sacerdote yebꞌ hex Israel, cheyabꞌenpaxo hex yuninal naj rey;
yuto haꞌ teyibꞌanh chiꞌalaxayo hunteqꞌan isyaꞌtajil tiꞌ,
yuto hex tiꞌ lahan hex hakaꞌ latzꞌabꞌ ayayo bꞌey Mizpa,
lahan hexpaxo hakaꞌ txꞌanh hakꞌ lehanayo bꞌey iswiꞌ witz Tabor.
2 Kaw kexaykꞌaykano yinh mule bꞌey Baal-peor sat niman akꞌal Sitim,
yu makta hepotxꞌkamoj,
yuxin chiwayojan isyaꞌtajil teyibꞌanh hesunil.
3 Hanintiꞌan wohtajan tzettaj chiswatxꞌe Efraín,
haxa Israel, mach chu yalni ta mach wohtajojan ismul chiswatxꞌe;
yuto wal tinanh kaw xaꞌok hemul hex Efraín hex tiꞌ yu heyixli,
heyetanpaxto hebꞌa hex Israel hex tiꞌ,» xhi Komam.
4 Hex tiꞌ, mach chiꞌekꞌ yinh henabꞌal hemeltzoko yul inqꞌabꞌan hanin heDiosal intiꞌan,
yu huneꞌ tuꞌ xin mach cheyiyo hebꞌa wetan,
yebꞌ xin mach ohtabꞌilo hinan heyu, hanin heYahawilintiꞌan.
5 Haꞌ isloloꞌal ebꞌnaj Israel, haꞌ chiyenilo istxꞌojal ebꞌnaj.
Haꞌ konhobꞌ Efraín haꞌ ismul chiꞌaqꞌni aykꞌayoj,
haktikꞌapax tuꞌ xin konhobꞌ Judá chiꞌaykꞌaypaxo yinta ebꞌnaj tuꞌ.
6 Chꞌekꞌ ebꞌnaj quinissayaꞌan hanin Jahawil intiꞌan yebꞌ ismeꞌ yebꞌ iswakax yu yaqꞌni isxahanbꞌal wetan,
yajaꞌ mach chinilchahan yu ebꞌnaj, yuto xaꞌinpohilo inbꞌahan yinh ebꞌnaj.
7 Yako ebꞌnaj ismul wetan hanin Yahawilintiꞌan yuto lahan ebꞌnaj hakaꞌ hunu ix miꞌe ay yunin,
yajaꞌ mach yeto naj ichamile yehi, wal xin nan mak ismam.
Hak tuꞌ xin ebꞌnaj Israel yinhnhe huneꞌ ixahaw chitanhilo ebꞌnaj yebꞌ istxꞌotxꞌ wuhan.
8 ¡Chꞌoqꞌtzelax yukꞌaꞌ wakax yet howal bꞌey Gabaa,
kat yoqꞌtzelaxpaxo trompeta bꞌey Ramá!
¡Awanhwe bꞌey Bet-avén!
¡Xiwojabꞌkanh ebꞌnaj konhobꞌ Benjamín!a
9 Haꞌ konhobꞌ Efraín kaw chitanhkaniloj yinh istzꞌayikal yet chꞌay isyaꞌtajil yibꞌanh.
Haꞌ xol hunun majan ebꞌnaj Israel waqꞌan ohtanhelaxo isyelal.
10 Yalnipaxo Komam: «Haꞌ ebꞌnaj yahawil konhobꞌ Judá,
lahan ebꞌnaj hakaꞌ mak chihekꞌni mohon,
yajaꞌ chinjobꞌayojan inhowalan yibꞌanh ebꞌnaj hakaꞌ isjobꞌlaxayo ha haꞌ yibꞌanh anma.
11 Haꞌ konhobꞌ Efraín tiꞌ, kaw lanhan yekꞌyaꞌ yanma, kat yetalaxi,
yuto ok tzujno ebꞌnaj yinta isdios anma, matzet chiswatxꞌe.
12 Haninan chinokan wetatojan konhobꞌ Efraín hakaꞌ noꞌ ih,
chiwetanpaxtojan konhobꞌ Judá hakaꞌ noꞌ ih chikꞌuxnito te teꞌ.
13 Hayet chiyilni konhobꞌ Efraín ta yaꞌay,
kat yilnipaxo Judá islahwilal kat isto konhobꞌ Efraín bꞌey Asiria,
chisqꞌanni tet naj rey Jareb ta chikolwa naj yinh,
yajaꞌ xin mach chiꞌanhcha yu naj,
nitam chiꞌanhcha islahwilal Judá yu naj.b
14 Hakaꞌ chu ismajwa hunu noꞌ bꞌalam,
hak tuꞌ chu inmajwahan yinh Efraín,
yebꞌ xin hakaꞌ ismajwa noꞌ yunin bꞌalam,
hak tuꞌ chu inmajwahan yinh konhobꞌ Judá.
Hanintiꞌan kokꞌ chiwuteyojan ebꞌnaj,
kat welkanhan hakaꞌ noꞌ bꞌalam, chinxittojan ebꞌnaj,
machi mak xin chikolnilo ebꞌnaj wetan.
Anma Israel chal-le isbꞌejni istxꞌojal yajaꞌ mach yelo chala
15 »Lahwi tuꞌ, kat inmeltzohan bꞌay ay hinan masanto yet chisnani isbꞌa ebꞌnaj yinh ismul,
kat kinissaynilojan ebꞌnaj.
¡Xol sunil isyaꞌtajil chinissayan ebꞌnaj!» xhi Komam.