6
Yalni ebꞌnaj Israel:«Titanhwej, meltzojonhweko yul isqꞌabꞌ Komam Jahawil.
Haꞌ Komam konhaqꞌni ekꞌoyaꞌ, yajaꞌ haꞌ chonhanhteni;
haꞌ aniko kolahwilal, haꞌ xin chitzꞌisnipaxoj.
2 Lahwi yekꞌto kabꞌ tzꞌayik chonhyaqꞌni itzitzbꞌokanh Komam,
haxa yinh isyox tzꞌayik chonhyinikanh Komam,
hak tuꞌ xin chonhok sata Komam.
3 Jaqꞌaꞌ jip johtanhenilo Komam Jahawil,
hakaꞌ chu issajbꞌilo hunun tzꞌayik,
hak tuꞌ xin chul Komam konhissayaꞌ,
yebꞌ hakaꞌ yet chul haꞌ nhabꞌ yinh bꞌabꞌel yebꞌ yinh tzujanilxa yibꞌanh txꞌo txꞌotxꞌ,» xhi ebꞌnaj.
4 Yalni Komam Jahawil: «Hach Efraín, ¿tzet tzꞌaj kach wutehan?
Hakpax tuꞌ hach Judá, ¿tzet wal kach wutenan?
Haꞌ hexahannhe hinan lahan hakaꞌ moyan yet sahabꞌ sakꞌayalil,
yebꞌ hakaꞌ yal chew hunepnhechꞌan chikꞌaykanh.
5 Yu huneꞌ tuꞌ yuxin kexwaqꞌ ekꞌo yaꞌan,
hakaꞌ yu waqꞌnihan yalaꞌ ebꞌnaj inchejabꞌan.
Haꞌ tzotiꞌ chiꞌelti yul intiꞌan kexaqꞌni kamoj.
Haxa istoholal tzet chinwatxꞌehan, lahan hakaꞌ yet chiꞌahilo tzꞌayik.
6 Haꞌ istzꞌay hekꞌul yinh heyet anmahil,
haꞌ chiwochehan, maxhtaj heyaqꞌni xahanbꞌal wetan.
Yebꞌ kinheyohtanhenan haꞌ chiwochehan,
maxhtaj henhusni no noqꞌ yinh xahanbꞌalil wetan.
7 Wal ebꞌnaj xin, lahan yute ebꞌnaj hakaꞌ naj Adán,
ismanhkꞌo ebꞌnaj trato tꞌinhbꞌabꞌilkano wuhan tet ebꞌnaj,
hak tuꞌ yu yaniko ebꞌnaj ismul insatajan.
8 Haꞌ konhobꞌ Galaad,
istxꞌojalxanhetikꞌa chiswatxꞌe, yebꞌ potxꞌomkamo anma.
9 Hakaꞌ chute yebꞌan isbꞌa ebꞌnaj elqꞌom yechman yekꞌ hunu maka,
hak tuꞌ chute hunbꞌulan ebꞌnaj sacerdote yul isbꞌelal Siquem,
chꞌok ebꞌnaj eleqꞌ yinh mak chꞌekꞌto bꞌey tuꞌ,
kat ispotxꞌnikamo ebꞌnaj, chiswatxꞌen ebꞌnaj isyahbꞌetajil.a
10 Haxa xol ebꞌnaj Israel xawilan tzet ye tuꞌ kaw yahbꞌetajil chilaiswatxꞌe,
haꞌ bꞌey tuꞌ ixli yebꞌ winajli anma Efraín, hakpax tuꞌ Israel yetato isbꞌa.
11 Hakpax tuꞌ anma ah Judá, xawalan tzet tzꞌayikal chiꞌay isyaꞌtajil yibꞌanh;
chilahwi tuꞌ chiwaqꞌni meltzohojan inkonhobꞌan chiꞌilaxto preso,» xhi Komam Jahawil.