Istxꞌojal yebꞌ ismanhkꞌomal konhobꞌ Israel
7
Yalnipaxo Komam Jahawil:«Hayet lanhan wanhtenan Israel, yixtanhwiti ismul anma Efraín,
yebꞌ istxꞌojal tzet chiswatxꞌe anma Samaria.
Hanhetikꞌa yaqꞌni subꞌchaho ebꞌnaj yet anmahil, haꞌnhe chu.
Chiꞌokto ebꞌnaj eleqꞌ yul nha, chismaqꞌnipaxo ebꞌnaj anma yul bꞌeh, chinilo ebꞌnaj tzet aya.
2 Mach chistxum isbꞌa yanma ebꞌnaj ta kꞌuwan ismul ebꞌnaj wuhan.
Hoybꞌil ebꞌnaj yu tzet chiswatxꞌe,
haꞌ tzet chiswatxꞌe tuꞌ ayko insatajan.
3 Yu istxꞌojal chiswatxꞌe ebꞌnaj, chaqꞌ tzalaho ebꞌnaj yanma naj rey;
haxa yu leqꞌtiꞌal chal ebꞌnaj,
chaqꞌ tzalaho ebꞌnaj yanma ebꞌnaj iswiꞌehal konhobꞌ.
4 Sunil anma tuꞌ, ixlom yebꞌ winajlom.
Lahan hakaꞌ horno kaj nhatxnhonhe qꞌaꞌ yul,
matxa xin yilalo chiꞌalaxiko ip qꞌaꞌ yu naj chiwatxꞌen pan;
wal xin toxanhe chechma naj yaqꞌni watxꞌe isbꞌa ixim harina.
5 Haꞌ yinh istzꞌayikal isqꞌinh naj rey,
ebꞌnaj yahawil chiyukꞌtzekanh ebꞌnaj naj rey tuꞌ yu vino, yet ukꞌumxa naj,
toxanhe chato isbꞌa naj xol ebꞌnaj bꞌuchwawom.
6 Yinh sunil yanma ebꞌnaj chistxum yaqꞌni aykꞌayo hunu maka,
lahan ishowal ebꞌnaj hakaꞌ isqꞌaqꞌal hunu horno,
sunilbꞌal aqꞌbꞌal kaj nhatxnhonhe qꞌaꞌ yul horno tuꞌ,
haxa yet chisajbꞌilo xin yexnheto iskaj nhatxi qꞌaꞌ.
7 Sunil ebꞌnaj tuꞌ, lahan ishowal ebꞌnaj hakaꞌ isqꞌaqꞌal horno.
Chistanhtzenilo ebꞌnaj sunil ebꞌnaj ayko isreyalo ebꞌnaj.
Machi hunu mak xol ebꞌnaj tuꞌ, yiyo isbꞌa wetan.
8 Haꞌ ebꞌnaj Efraín, xaꞌissomto isbꞌa xol hunteqꞌan anma nan konhobꞌal,
lahan ebꞌnaj hakaꞌ ixim wah mach meltzobꞌiloj.
9 Anma nan konhobꞌal aqꞌni elo yip ebꞌnaj Efraín, machi xin yohtajoj.
Xasajbꞌilo xil iswiꞌ, mach xin yohtajo ebꞌnaj Efraín tuꞌ ta xapax yip ebꞌnaj.
10 Haꞌ isloloꞌal anma Israel, haꞌ chiꞌok aqꞌokꞌule yinh,
yajaꞌ xin maxhtikꞌa chimeltzo ebꞌnaj,
kat quinissaynihan ebꞌnaj hanin Yahawilintiꞌan isDiosal.
11 Anma Efraín, lahan hakaꞌ noꞌ kuwis sukbꞌilo iskꞌul, machi isnabꞌal;
chiꞌelto yaw yinh konhobꞌ Egipto yunhe iskolwa yinh,
kat isqꞌannipaxoj ta chikolwa konhobꞌ Asiria yinh.a
12 Hayet chito ebꞌnaj bꞌey tuꞌ, chinlehnitojan txꞌanh hakꞌ yibꞌanh ebꞌnaj,
kat waqꞌni aykꞌayojan ebꞌnaj, hakaꞌ noꞌ chꞌik.
Chiwanayojan isyaꞌtajil yibꞌanh ebꞌnaj, hakaꞌ yu yal-laxkano xol ebꞌnaj.
13 ¡Kꞌanchꞌan ebꞌnaj! Yuto ishekꞌilo isbꞌa ebꞌnaj winhan.
Chul kꞌayilal yibꞌanh ebꞌnaj, yuto ok ebꞌnaj manhkꞌomal wetan.
Chiwochehan chinkolan ebꞌnaj, yajaꞌ leqꞌtiꞌal chal ebꞌnaj winhan.
14 Mach yinh sunilo yanma ebꞌnaj awi wetan yet hilanto ebꞌnaj sat istxꞌat.
Chiskutxbꞌa isbꞌa ebꞌnaj,
chisqꞌanni ebꞌnaj ta chiwaqꞌan istrigo ebꞌnaj yebꞌ yuva ebꞌnaj,
yajaꞌ huneꞌnhetikꞌa haꞌ ismanhkꞌomal wetan.
15 Waxanhka waqꞌan kuybꞌanile tet ebꞌnaj,
waqꞌnihan yip isqꞌabꞌ ebꞌnaj, yajaꞌ ok ebꞌnaj yalaꞌ yinh tzet chu ispakꞌiko ebꞌnaj winhan.
16 Mach meltzo ebꞌnaj yul inqꞌabꞌan hanin Niman Welapnotiꞌan,
wal xin yinta hunteqꞌan komon dios to ebꞌnaj.
Lahan ebꞌnaj hakaꞌ teꞌ litꞌ mach kꞌulo islitꞌwahi.
Ebꞌnaj yahawil ebꞌnaj aqꞌlaxkamo yu espada, yu isloloꞌal istzoteli;
yuxin anma ah Egipto chiꞌok tzebꞌo yinh ebꞌnaj,» xhi Komam.